Ol Voes blong Ol Lata-dei Sent
!Mekem Finis!
Pikja i kam long Allen Garns
Long taem blong ol intaviu blong mi olsem wan bisop long wan Sandei aftenun, mi bin glad blong sidaon wetem wan gudfala fren blong tokbaot sam jalenj we hem i bin stap fesem. Afta we mi lisin long ol wari blong hem blong smol taem, mi bin filim se wanem hem i nidim, hem i blong ridim ol skripja oltaem, oltaem. Tingting i kam long mi tu, se, olsem bisop blong hem, mi tu mi mas mekem skripja stadi blong mi oltaem, oltaem, mo hemia i wan samting we mi bin stap traehad wetem. Mekem se mi askem hem blong mitufala i kam ol “akaontebol patna” blong traehad blong stadi moa oltaem, oltaem.
Evri dei afta we hem o mi i finis ridim ol skripja, bae hem o mi i tekstem narawan ol toktok ia: !Mekem finis! From mi bin save se wan i bin stap wet blong harem se yes o no narawan i finisim riding blong hem long dei, i bin pusum mitufala bigwan. Sapos wan long mitufala i foget, wan bae i kasem teks blong mekem narawan i tingbaot. Sapos wan i no teks, be wan i no jikim narawan from. Mitufala i tekem jalenj ia mo no mekem narawan i filim sem from.
Mitufala i statem jalenj ia sikis manis i pas, mo mi no tingbaot se i gat wan dei we mitufala i mestem blong ridim skripja blong mitufala. Brata ia i stanap long fas mo testemoni miting tu manis i pas, mo serem testemoni blong hem long olsem wanem nao fasin blong stadi skripja i mekem gud samting long hem mo famli blong hem.
Mi talem tangkyu long brata ia mo from frensip blong hem, mo tu, from ol teks blong hem evri dei. Mi bin luk olsem wanem teknoloji, taem oli yusum gud, i save leftemap laef blong yumi. Mi talem tangkyu tu from ol skripja mo olsem wanem oli stap testifae abaot Kraes. Mi save se sakrifaes blong Sevya we i pem praes from ol sin blong yumi, i mekem i posibol blong wanwan long yumi i gobak laef wetem Hem wan dei.