Laef Bakegen long Ded blong Jisas Kraes mo Ol Trutok abaot Bodi blong Hem
Tru long Laef Bakegen long Ded blong Hem, Jisas Kraes i bin tijim ol bigfala trutok abaot bodi blong Hem.
Wan smol pat blong peinting ia, The Doubtful Thomas, we i kam long Carl Heinrich Bloch
Bakgraon © janniwet/iStock/Getty Images
“Jisas i talem: ‘Olgeta samting i finis nao.’ Nao hem i bodaon, i letem hem i ded” (Jon 19:30). Long tetaem ia, spirit blong Jisas Kraes i aot long bodi blong Hem—wan bodi we i bin gotru long safaring blong Hem i save pem praes from ol sin blong evri pipol, mo helpem olgeta long ol samting we oli no strong long hem (luk long Alma 7:12–13). Bodi ia, we naoia i wan emti wan, oli bin karemaot long kros, oli kavremap long kaliko, mo afta oli putum long hol blong ston. Long nambatri dei, ol woman oli kam kolosap long hol blong ston blong finisim ol kastom blong ded long bodi ia.
Be bodi ia, i go finis.
Taem oli faenem se hol blong ston ia i emti, hem i olsem se hem i jes stat ia nao. Meri Magdala, Ol Aposol, mo plante moa afta, oli bin witnesem wan samting we i wan merikel: Jisas Kraes we i laef bakegen long ded, we i stret evriwan, we oli save tajem bodi blong Hem, mo i wan man.
Sevya i bin meksua se olgeta we oli witnesem Hem afta we Hem i laef bakegen long ded, oli kasem fulwan se Hem i gat wanem kaen bodi. Eksampol, Hem i bin invaetem ol Aposol, blong oli tajem bodi blong Hem, blong oli save save stret se Hem i gat wan bodi blong mit mo bun, be i no wan spirit (luk long Luk 24:36–40).1 Hem i bin kakae tu wetem olgeta (luk long Luk 24:42–43).
Taem ol Aposol oli bin fulfilim wok we oli bin kasem blong prijim gospel blong Jisas Kraes, oli bin fesem man we i agensem mo i givim hadtaem long olgeta; sam long ol samting ia oli bin hapen from se oli bin stap tijim se Jisas Kraes i bin laef bakegen long ded mo evri kaen man bae oli laef bakegen long ded from hemia (luk long Ol Wok 4:1–3).
Tedei, Laef Bakegen long Ded blong Jisas Kraes i stamba blong mesej we Jos blong Hem i stap talemaot long wol, semmak olsem bifo. Olsem we Profet Josef Smit i bin talem: “Ol stamba prinsipol blong relijin blong yumi oli ol testemoni blong ol Aposol mo ol Profet, long saed blong Jisas Kraes, se Hem i bin ded, oli bin berem Hem, mo Hem i bin girap long nambatri dei, mo i bin go long heven; mo evri narafala samting abaot relijin blong yumi, oli go wetem hemia.”2
Laef Bakegen long Ded i stap help blong ansarem ol stamba kwestin abaot fasin blong God, fasin blong yumi mo rilesensip blong yumi wetem God, stamba tingting blong laef ia, mo hop we yumi gat long Jisas Kraes. Hemia samfala trutok we Laef Bakegen long Ded blong Jisas Kraes i soemaot klia.
Papa long Heven i Gat wan Bodi blong Glori
The First Vision, i kam long Gary L. Kapp
Tingting ia, se God i olsem wan man, i stap gud insaed long Baebol,3 mo tu, insaed long tingting blong ol man, be fasin blong man long tingting mo relijin blong olgeta, oli sakemaot tingting ia blong lukluk se God “i no gat wan bodi, ol pat blong bodi, o strong filing;”4 hemia i from we, long lukluk ia, se bodi (mo samting) i rabis, o i no ril, be spirit, maen, o tingting, oli ol tru samting we i mekem man i man, o man i ril.
Nao, revelesen ia we i soem huia God tru long Pikinini blong Hem, Jisas Kraes, i wan samting we i gat glori, i simpol mo i wan niu tingting.
Long taem blong ministri blong Hem, Sevya i talem: “Man we i luk mi, hem i luk Papa blong mi” (Jon 14:9). Hemia i bin tru moa afta we Jisas i laef bakegen long ded wetem wan bodi we i stret evriwan mo i nomo save ded, we i soem se “Papa i gat wan bodi blong mit mo bun we oli save tajem, semmak olsem hemia blong man; Pikinini blong Hem tu” (luk long D&C 130:22).
Stret fasin mo huia i Papa long Heven i kamkamaot nao long yumi. Olsem we Josef Smit i bin eksplenem afta: “Samting we i no gat bodi blong mit mo bun, o pat blong bodi, i samting nating. I no gat wan narafala God long heven, be God ia nomo we i gat mit mo bun.”5
Elda Jeffrey R. Holland blong Kworom blong Olgeta Twelef Aposol i talem hemia long wei ia: “Sapos we, blong gat wan bodi, yumi no nidim, be tu, Hae God i no wantem, nao ?from wanem nao Ridima i pemaot man, o bodi blong Hem; i pemaot bodi blong man blong ded mo gref, i promesem se bae i neva seperet bakegen long spirit blong Hem long taem naoia o long taem we i no save finis? Eni man we i sakemaot tingting ia se God i gat wan bodi, i stap sakemaot Kraes we i bin laef long wol ia, mo tu, Kraes we i bin laef bakegen long ded.6
Papa long Heven i Gat Olgeta Paoa, Olgeta Save, mo Olgeta Lav
Ol bigfala toktok we i tokbaot fasin blong Papa long Heven oli kamkamaot tu tru long taem ia we Jisas Kraes i laef bakegen long ded. Olsem we Elda D. Todd Christofferson blong Kworom blong Olgeta Twelef Aposol i bin talem: “From se Laef Bakegen long Ded blong Kraes i tru, i no gat risen blong gat tu tingting se God Papa we i igat Olgeta Paoa, i Save Evri Samting, i gat open hat—mo i givim Wan Stret Pikinini ia Nomo blong Hem blong pemaot wol ia.”7
Paoa, save, mo gud fasin blong God, Laef bakegen long ded blong Jisas Kraes i bin pruvum waes mo lav we i stap long plan blong Papa long Heven mo i pruvum paoa blong Pikinini blong Hem blong mekem hemia i hapen.
Yumi Ol Pikinini blong God
Olsem we Baebol i stap tijim yumi, yumi kamkamaot fastaem “folem pikja blong God, we yumi man mo woman” (Jenesis 1:27). Laef Bakegen long Ded blong Jisas Kraes i mekem trutok ia i kam strong moa. Hem i tru we, long stret taem we Hem i bin laef bakegen long ded, Jisas Kraes i bin poenemaot rilesensip blong yumi wetem Papa long Heven taem Hem i talem: “Yu no holem mi, from we mi mi no go antap long Papa blong mi yet. Mi stap gobak long Papa blong mi we hem i Papa blong yufala tu, mo i God blong mi, mo i God blong yufala” (Jon 20:17).
Sevya i talemaot se God mo man, oli no defren long wanwan long olgeta long bodi blong olgeta. Olsem wanem nao bodi blong yumi i stap, i semmak long hemia blong spirit blong yumi,8 mo spirit blong yumi, God i krietem folem pikja blong Hem from se hemia i fasin blong rilesensip blong papa, mama mo pikinini.
Wan Bodi i Wan Presen we i Givim Paoa mo i Hae
Foto pikja i kam long David Stoker
Tru long Laef bakegen long ded blong Hem, Sevya i bin soem yumi se wan laef we i stap insaed long wan bodi blong mit mo bun i wan ful pat blong bodi we i no save finis blong God mo ol pikinini blong Hem. Olsem we Lod i talemaot long Josef Smit, “Ol samting we God i mekem wol ia wetem, oli blong taem we i no save finis, mo spirit mo samting we God i mekem wol ia wetem, oli joen tugeta oli no save seperet, oli kasem wan glad we i fulwan” (luk long D&C 93:33). Koneksen ia we oli no save seperetem, i joenem spirit wetem bodi blong man i kam tugeta, blong mekem oli wan bodi nomo we i no save ded, i no save roten, i gat glori mo i stret evriwan—wan kaen bodi ia nomo we i save kasem ful glad ia nomo we God i gat.
Be, long nara saed, afta we yumi kasem wan bodi blong mit mo bun, mo afta, taem yumi seperet long bodi ia bakegen blong go insaed long spirit wol, “olgeta dedman oli bin tekem se fasin we spirit blong olgeta oli stap longwe long bodi blong olgeta longtaem tumas i olsem blong stap long kalabus” (luk long D&C 138:50; luk tu long D&C 45:17).
Iven bodi blong yumi long wol ia oli wan impoten pat blong plan blong Papa long Heven, mo oli wan tabu presen. Taem ol spirit blong yumi we oli bin stap long laef bifo oli kam long wol ia, oli bin “givim moa” long olgeta, (luk long Abraham 3:26) oli givim olgeta wan bodi. Olsem we Profet Josef Smit i bin tijim: “Yumi kam long wol ia blong yumi save gat wan bodi mo presentem yumi klin gud long fes blong God long selestial kingdom. Bigfala prinsipol blong hapines i blong gat wan bodi blong mit mo bun. Devel i no gat bodi, mo hemia nao i panismen blong hem.”9
Olsem we Elda David A. Bednar blong Kworom blong Olgeta Twelef Aposol i bin tijim: “Ol bodi blong yumi we i gat mit mo bun, i mekem se i posibol blong yumi gat bigfala, dipfala, mo wan strongfala eksperiens we yumi no save gat long laef bifo laef long wol ia. From hemia, ol rilesensip blong yumi wetem ol nara pipol, paoa blong yumi blong luksave mo tekem aksen folem trutok, mo paoa blong yumi blong obei long ol prinsipol mo odinens blong gospel blong Jisas Kraes oli kam bigwan moa tru long ol bodi blong yumi blong mit mo bun. Long skul blong laef ia long wol, yumi filim gud fasin, lav, fasin we i kaen, hapines, harem nogud, tingting i trabol, sobodi, mo tu, ol jalenj blong no save mekem evri samting from samting i no stret long bodi blong yumi, mo evri samting ia oli mekem yumi rere from laef we i no save finis. Blong talem long simpol toktok, i gat ol lesen we yumi mas lanem, mo ol eksperiens we yumi mas gat, olsem we skripja i talem, ‘long saed blong mit mo bun’ (1 Nifae 19:6; Alma 7:12–13).”10
Antap long hemia, Profet Josef Smit i bin tijim: “Evri man long wol we oli gat wan bodi, oli gat paoa ova long olgeta we oli no gat bodi.”11 Setan i save temtem yumi, be hem i no save fosem yumi. “Devel i no gat paoa ova long yumi, be nomo, sapos yumi letem hem.”12
Long en, presen ia, we i wan bodi we i laef bakegen long ded, mo i stret evriwan i helpem yumi blong putum yumiwan i hae bitim paoa blong Setan blong oltaem. Sapos i no bin gat Laef Bakegen long Ded, “ol spirit blong yumi bae i mas kam andanit long paoa blong … devel, blong nomo girap. Mo ol spirit blong yumi bae oli save kam olsem hem, mo bae yumi kam ol devel, ol enjel blong wan devel, blong oli sakemaot yumi long fes blong God blong yumi, mo blong stap wetem papa blong ol giaman, long sore olsem hem bakegen” (2 Nifae 9:8–9).
Spirit mo Bodi, Tufala i No Enemi
Nomata we tufala i defren, spirit mo bodi oli blong tufala defren ril samting we i no joen. Olsem we Josef Smit i bin lanem: “I no gat wan samting we i olsem samting nating. Evri samting we i spirit i wan samting, be hem i moa gud o moa klin evriwan, mo ol ae we oli klin evriwan nomo oli save luksave ol samting ia. Yumi no save luk samting ia we i spirit; be taem bodi blong yumi i kam klin evriwan, bae yumi luk se evri samting we i spirit i wan samting” (luk long D&C 131:7–8).
Wan smol pat blong peinting ia, Christ Appearing in the Western Hemisphere, we i kam long Arnold Friberg
Jisas Kraes, olsem wan man we i kasem glori mo i laef bakegen long ded, i ripresentem yunion ia blong spirit mo bodi, we i soem long yumi se “spirit mo bodi oli sol blong man” (luk long D&C 88:15). Long laef ia, yumi traehad blong gat “tingting blong spirit” be i no “tingting we i folem fasin blong wol” (2 Nifae 9:39), yumi traehad blong lego “man we i folem fasin blong wol” (Mosaea 3:19), mo blong “kontrolem ol filing blong [yumi]” (Alma 38:12). Be hemia i no minim se spirit mo bodi oli enemi. Olsem we Jisas Kraes i bin soemaot long yumi, bodi i no blong yumi no laekem o pusum i go tumas, be i blong yumi kontrolem gud mo jenisim.
Laef insaed long wan Bodi blong Wol Ia i gat Wan Stamba Tingting we i gat Mining
Tingting ia, se laef ia i wan tes, i kam klia gud taem yumi tekem wanem we yumi save abaot laef blong yumi bifo, mo afta long tes ia. Yumi bin laef olsem ol spirit bifo yumi kam long wol ia, mo Papa long Heven i wantem yumi blong kam olsem Hem, mo laef blong oltaem wetem wan bodi blong mit mo bun we i nomo save ded. Olgeta trutok ia i minim se taem blong tes blong yumi wetem ol bodi ia blong mit mo bun, oli no wan janis we yumi gat, be i gat ril mining mo stamba tingting biaen long ol.
Olsem we Elda Christofferson i bin eksplenem: “Tru long ol joes blong yumi, bae yumi soemaot long God (mo long yumiwan) komitmen blong yumi, mo paoa blong yumi blong laef folem selestial loa blong Hem taem yumi no stap long ples we Hem i stap long hem, mo taem yumi gat wan bodi blong mit mo bun we i gat evri paoa, filing mo strong filing blong hem. ?Bae yumi save jenisim bodi blong mit ia blong i kam wan tul, be i no masta blong spirit? ?Bae God i save trastem yumi, long taem naoia mo long taem we i no save finis wetem ol paoa olsem hemia blong wan god, mo tu, wetem paoa ia blong krietem laef? ?Bae wanwan long yumi i winim ivel? Olgeta we oli mekem, bambae God i “givim moa antap long hed blong olgeta blong oltaem mo oltaem” [luk long Abraham 3:26]—we i wan impoten pat blong glori ia, we i wan bodi blong mit mo bun we i laef bakegen long ded, i nomo save ded mo i kasem glori.”13
Ol eksperiens blong yumi, wetem ol bodi blong yumi naoia, wetem tu ol rilesensip wetem wanwan long yumi, oli gat mining from se oli semmak olsem hemia we bambae i stap kam. Olsem we Josef Smit i bin lanem: “Mo semfala laef wetem ol narafala man we yumi stap gat long wol ia, bae i stap wetem yumi longwe, be nomo, bae i gat, antap long hem, glori ia we i no save finis, mo glori ia, yumi no gat naoia” (luk long D&C 130:12).
Yumi Gat Hop long Jisas Kraes
The Three Marys at the Tomb, we i kam long William-Adolphe Bouguereau, Superstock.com
Stat long tetaem ia we oli luk hol blong ston i emti i stap, Laef Bakegen long Ded blong Jisas Kraes i tekem hop i kam, from se yumi luksave long Laef bakegen long ded ia, fiuja laef blong yumi, we evri samting we i no stret, bambae Hem i stretem long bihaf blong yumi sapos yumi gohed blong stap fetful.”14
Ol fas Aposol blong Sevya oli bin save talem wan strong witnes abaot Laef bakegen long ded blong Hem from se oli bin luk mo filim bodi blong Hem. Be i gat moa samting long hemia. Semmak olsem we Jisas Kraes i bin hilim ol samting we yumi no stret long hem long bodi blong yumi blong soem se Hem i gat paoa blong fogivim ol sin (luk long Luk 5:23-25), Laef Bakegen long Ded blong Hem—pruf we yumi save tajem abaot paoa blong Hem blong winim ded blong bodi—i kam blong stretem tingting blong olgeta we oli stap folem Hem abaot paoa blong hem blong winim ded long saed blong spirit. Ol promes we Hem i bin givim long ol tijing blong Hem—fogivnes blong ol sin, pis long laef long wol ia, laef we i no save finis long kingdom blong Papa—oli kam ril mo fet blong olgeta i no seksek nating.
“Sapos hem i no laef bakegen, hemia i min se yufala i bilif blong nating, mo yufala i stap yet long ol sin blong yufala” (Fas Korin 15:17). Be from se Hem i bin girap long ded, yumi save “gat hop tru long atonmen blong Kraes mo paoa blong laef bakegen blong hem, blong girap long laef we i no save finis, mo hemia i from fet blong [yumi] long hem, folem promes” (Moronae 7:41).
Long taem blong laef blong Hem long wol ia, Jisas Kraes i bin invaetem ol pipol blong folem Hem. Afta we Hem i ded mo i laef bakegen long ded, ples blong go long hem i kam klia. Sapos yumi, tru long fasin blong stap obei long ol loa mo ol odinens blong gospel, yumi stap trenem wan “selestial spirit” insaed long yumi, nao yumi save “bae oli kasem sem bodi ia we oli bin gat long wol” mo “wan pat blong selestial glori i mekem [yumi] laef, [mo] bambae [yumi] kasem semfala glori ia, we i fulwan” (luk long D&C 88:28–29). Hem nao i bin soem rod. Hem nao, Hem i rod. Hem i tru long paoa blong Hem—tru long Atonmen mo Laef Bakegen long Ded blong Hem—we ful selestial laef ia i posibol, we i gat tu insaed, wan ful glad insaed long wan bodi we i laef bakegen long ded.