Ol Voes blong Ol Lata-dei Sent
Oli Sevem Mi long Aktiviti Rum
Pikja i kam long Allen Garns
Plante taem, hasban blong mi i mas wok long ol Sandei, mekem se miwan nomo bae mi lukaotem ol fofala boe blong mitufala long Jos. Wan Sandei, long taem blong sakramen miting, tufala smol boe, tufala i stap jalus long tufala. Sapos mi mekem wan i ridim buk, brata blong hem tu i wantem. Mi traem ol smol kaekae, ol pleiplei mo kala, be i no gat wan samting i wok. Nao, mi harem se i tumas wetem tufala boe we tufala i no save sidaon kwaet nating blong wan aoa.
Mi pulumaot wan smol pleiplei long basket mo givim i go long hemia we i gat wan yia. Wantaem nomo, hemia we i gat tri yia, Taeson, i singsingaot mo i stap sakem han long smol brata blong hem, i traem karembak pleiplei. Mi sem tumas, mi karem tufala ia we i stap singaot mo stap faet i go long aktiviti rum.
Fes blong mi i fulap long wota blong ae blong mi. ?From wanem i mas had olsem? Mi stap mekem wanem we Papa long Heven i wantem mi blong mekem taem mi tekem famli blong mi i stap go long Jos, ?yes o no? Be mi nomo save mekem bakegen. Mi harem mi taet mo mi sem, blong mekem tufala boe blong mi i stap kwaet long taem blong sakramen miting, miwan, evri wik. Mi nomo wantem kambak.
Mi sidaon wetem ol tingting ia ating blong 15 seken olsem, mo wan sista we mi no bin save hem, i kam kamaot long aktiviti rum, i kam from mi. Nem blong hem i Sista Beus. Plante taem, hem i stap sidaon hemwan, from hasban blong hem i stap long bisoprik mo ol pikinini blong hem oli bigwan finis. Hem i talem se: “!Oltaem yu stap long ples ia yuwan!” Mi luk se yu stap traehad. ?Bae Taeson i save kam wetem mi? !Mi no iven save ansarem hem! Mi jes talem yes wetem hed blong mi, mo hem i tekem han blong boe mo i pulum hem i go, we naoia i kwaet, mo i hapi, tufala i gobak long japel.
Mi waepem ol krae blong mi, mi pikimap smol bebi, mo wetem tingting i stap daon, mi wokbaot i gobak long japel blong save glad long nara haf blong miting, long plis.
Long nekis Sandei, taem mifala i go long sakramen miting, Taeson i lukaotem niufala fren blong hem. Long naet, bae hem i prea: “Tangkyu Papa long Heven from Sista Beus. !Mi laekem hem tumas!”
Hem i tri yia nao, mo Taeson i stap lukaotem Sista Beus insaed long japel. Las yia, oli singaotem hem i kam Praemeri tija blong Taeson. Smol boe ia i hapi tumas.
Mi glad tumas from Sista Beus mo tingting blong hem blong lanem mo givim seves long ol narawan. Mi save se yumi save blesem laef blong ol narawan taem yumi givim seves semmak olsem Sevya i bin mekem.