Ol Voes blong Ol Lata-dei Sent
Plis No Plei Singsing Ia
Ol pikja oli kam long Bradley H. Clark
Sam taem i pas, famli blong mi mo mi i bin stap laef long Verakrus, Meksiko, mo ol pikinini blong mi oli bin stap go long praemeri skul long ples ia. Evri moning, taem mi stap helpem ol trifala pikinini blong mi blong oli rere blong go long skul, mifala i stap lisin long redio—redio stesen ia we i moa popula long taon—wetem evri naes program we wan yang man anaonsa i stap presentem.
Mifala i stat blong harem wan singsing we i saon gud tumas. Taem mi stap lisin gud long ol toktok blong singsing ia, mi luksave se ol samting we i stap talem, nomata oli no swea, oli no klin mo i doti.
Wantaem nomo mi talem long ol pikinini blong mi: “Yumi no save lisin long kaen lanwis olsem.” Ating oli no stap lisin long ol toktok blong singsing, be oli lisin inaf blong save singsing folem tiun blong singsing ia.
Oli luk mi ofem redio mo oli askem mi se mi stap mekem wanem. “Bae mi go talem redio anaonsa ia se bae i tekemaot singsing ia long program.” Oli sapraes tumas, mekem se i leftemap tingting blong mi blong mi tekem aksen.
Oli no save bilivim, mo mi tu, mi no save bilivim miwan, be mi pikimap telefon mo ringim redio stesen. Mi no ting se bae wan i ansa, be mi sapraes taem sem redio anaonsa ia we mifala i jes harem hem long program, i ansarem telefon kwiktaem.
Mi talem long hem se mi no agri blong stap lisin long singsing ia, from se plante famli oli onem redio long taem olsem long moning. Hem i askem mi se bae mi riplesem singsing ia wetem wanem nara singsing, be fasin blong hem i gud tumas mekem se mi askem hem nomo blong i no plei singsing ia long taem we ol pikinini oli stap long haos yet.
Mi neva faenemaot se mi bin go long ea long tetaem ia, be mi glad nomo se redio anaonsa ia i bin lisin. Mo long ol nekis dei afta, mi save talem se hem i mekem olsem we mi bin askem.
Eksperiens ia i konfemem long mi se yumi mas gat strong paoa long tingting, taem yumi gat janis blong mekem ol desisen mo mekem wanem we i nid blong protektem ol pikinini blong yumi long ol nogud samting. Taem yumi mekem olsem, Tabu Spirit i save gohed blong stap kompanion blong yumi oltaem.