?Olsem wanem bae mi save se God i stap lisin long ol prea blong mi?

Traem lisin long Tabu Spirit. Ol pipol oli harem Tabu Spirit long ol defren wei, so maet yu stap lisin mo wet from wan kwaet, smol voes, be Spirit i toktok long yu tru long wan filing. Mi save se Tabu Spirit bae i talem long yu evri samting we yu nidim blong save—bambae yu mas lisin.

Long wan taem, mi gat bigfala tu tingting se bae mi go long wan deit wetem wan we i no memba o nogat. Wan Sandei, long sakramen miting, wan sista i givim wan toktok se mi filim se i blong mi stret. Long tetaem ia, mi bin kasem wan gud filing se Lod i ansarem prea blong mi. Bifo long hemia, mi no save stret se bae mi mekem wanem, be afta, Tabu Spirit i givim kamfot long mi, mo Hem i fulumap hat blong mi wetem glad mo strong paoa long tingting. God i stap ansarem yumi tru long ol filing, ol tingting, ol skripja, !mo iven ol man we oli givim toktok long Jos!

Tru long ol skripja, oli tijim yumi se God bae i oltaem harem ol prea blong yumi mo bae i ansarem olgeta sapos yumi toktok long Hem wetem fet mo tru tingting. Insaed long hat blong yumi, bambae yumi filim konfemesen se Hem i stap harem yumi, yumi filim wan filing blong pis mo kwaet. Yumi save filim tu se evri samting bambae oli oraet sapos yumi folem tingting blong Papa. Sapos yumi gat tu tingting se Hem i stap harem yumi o no, nao i gud yumi lukaotem rod insaed long ol skripja, mo afta, askem sapos olgeta samting ia we yumi bin ridim oli tru.

Mi save se God i stap harem yumi from prea i stap givim wan filing blong pis, givhan, mo lav insaed long hat blong mi. Mi luk se Hem i stap mekem mi mi fri long plante denja, dei afta dei, mo Hem i protektem famli blong mi, mo mi filim se Hem i lavem mi. Bifo mi go long skul, oltaem mi stap talem stamba toktok blong Ol Yang Woman; hemia i stap helpem mi blong tingbaot se mi mi wan gel blong Papa long Heven, we i stap lavem mi.

Wan taem mi bin stap askem miwan se God i save harem ol prea blong mi o no, mo afta, mi filim ansa ia insaed long hat blong mi. Mi bin harem wan i serem testemoni abaot prea, mo mi save filim Tabu Spirit. Narafala advaes blong mi i blong yu askem papa mo mama blong yu, bisop o ol nara memba blong wod blong yu. !Yu save prea from help long saed blong topik ia tu!

Mi save se Papa long Heven i stap harem ol prea blong mi from ol toktok ia we oli stap long singsing blong Praemeri, “Prea blong Pikinini” (Children’s Songbook, 12): “Papa we i stap long Heven, ?Yu yu rili stap ia? ?Mo i tru we yu yu stap harem mo ansarem evri prea blong pikinini? Sam oli talem se heven i longwe, be mi mi filim i kolosap raon long mi taem mi prea.” Taem mi stap tingbaot singsing ia, mi save se Hem i stap lisin from se mi filim Spirit mo bigfala lav we Hem i gat long mi. Taem mi stap tingbaot se Hem i stap lavem mi, mi filim wan kamfot mo mi save se Hem i stap harem ol prea blong mi.

Papa long Heven i stap lisin long ol prea blong yumi oltaem, be samtaem, i olsem se Hem i no stap ansarem ol prea blong yumi from maet Hem i no ansa long yumi long wei mo long taem we yumi wantem Hem blong ansa. Yumi nid blong save putum tingting blong yumi i folem tingting blong Hem, mo gat fet ia se Hem nao i save stret wanem i gud moa blong yumi. Papa long Heven i lavem yumi mo bae i traem oltaem blong helpem yumi blong lanem samting mo gro taem Hem i stap ansarem ol prea blong yumi.

Afta long prea, yu save lisin long ol filing mo ol tingting we oli kam long hat blong yu. Wan long olgeta i maet ansa blong prea blong yu. Taem yumi stap prea wetem tru tingting mo wan hat we i tru, Papa blong yumi long Heven i ansa folem fet we yumi gat long Hem. Hem i no ansa nomo blong stretem tingting blong yumi blong wantem traem Hem.