Kasem Taem Yumi Mit Bakegen
Paoa blong God
I kamaot long wan toktok blong jeneral prishud sesen we oli singaotem “The Doctrine of the Priesthood,” Ensign, Mei 1982, 32–34; oli jenisim stael blong raet.
Fet i paoa, mo paoa hem i prishud.
City of Zion Translated, i kam long Del Parson
God hem i God, from se Hem nao i gat evri fet, mo evri paoa, mo evri prishud. Laef we Hem i stap laef folem, oli singaotem laef we i no save finis.
Mo hamas nao bae yumi kam olsem Hem, i hamas nao yumi kasem fet blong Hem, kasem paoa blong Hem, mo yusum prishud blong Hem. Mo taem yumi kam olsem Hem long ful mo tru mining blong toktok ia, nao yumi save kasem laef we i no save finis.
Fet mo prishud, tufala i wok wan. Fet i paoa, mo paoa hem i prishud. Afta we yumi kasem fet, yumi kasem prishud. Afta, tru long prishud, yumi gro long fet blong yumi, kasem we, taem yumi kasem evri paoa, yumi kam olsem Lod blong yumi.
Taem blong yumi, long wol ia, i stap olsem wan taem blong traem yumi, mo wan taem blong tes. Hem i spesel janis blong yumi, taem yumi stap long wol ia, blong mekem fet blong yumi i kam stret evriwan, mo blong yumi gro long prishud paoa. …
Tabu prishud i mekem moa blong mekem ol man oli kam stret evriwan long taem blong Inok bitim eni nara taem. Long bifo, oli save olsem oda blong Inok (luk long D&C 76:57); hem i paoa we tru long hem, hem mo ol pipol blong hem oli bin jenis i kam narafala. Mo oli bin jenis i kam narafala from se oli bin gat fet mo oli bin yusum paoa blong prishud.
Hem i wetem Inok nao, we Lod i bin mekem kavenan ia we i no save finis, se evriwan we i kasem prishud, bambae oli gat paoa, tru long fet, blong rul mo blong kontrolem evri samting long wol, blong oli stanap agensem ol ami blong ol nesen, mo blong stanap long glori mo olsem wan god long fes blong Lod.
Melkesedek i bin wan man we fet blong hem i olsem, mo ol pipol blong hem oli tekem stret mo gud fasin i kam, mo oli kasem heven, mo oli bin lukaotem taon blong Inok (Joseph Smith Translation, Jenesis 14:34). …
?Nao, wanem nao hem i doktrin blong prishud? ?Mo olsem wanem nao yumi mas laef olsem ol wokman blong Lod?
Doktrin ia i we, God, Papa blong yumi, i wan man we i gat glori, i stret evriwan, mo i wan god we i gat olgeta paoa long bodi, olgeta paoa, mo i rul ova long evri samting, i save evri samting mo i gud evriwan long ol fasin blong Hem, mo Hem i stap laef insaed long famli.
I olsem nao. Papa blong yumi long Heven i stap glad long hae ples blong hem long glori mo long fasin we i stret evriwan, mo long paoa blong Hem, from fet blong Hem i stret evriwan mo prishud blong Hem i no gat en blong hem.
I olsem nao. Prishud, i stret nem blong paoa blong God, mo sapos bae yumi mas kam olsem Hem, yumi mas kasem mo yusum prishud blong Hem, o paoa ia semmak olsem we Hem i stap yusum. …
I olsem nao. Yumi gat paoa, tru long fet, blong rul ova mo kontrolem evri samting, tugeta ol samting long wol ia mo long saed blong spirit; yumi gat paoa blong wokem ol merikel mo ol laef we oli stret evriwan; blong stanap long ples blong God mo stap olsem Hem from se yumi bin kasem fet blong Hem, ol samting blong Hem we oli stret evriwan, mo paoa blong Hem, o long nara toktok, prishud blong Hem we i fulwan.
Hemia nao, i doktrin blong prishud, mo prishud ia, i no gat, mo i no save gat eni samting moa we i bigwan moa long hem. Hemia i paoa ia we yumi save kasem tru long fet mo stret mo gud fasin …
I tru. I gat paoa long prishud—wan paoa we yumi stap lukaotem blong kasem blong yumi yusum, wan paoa we yumi stap prea from, se bae i stap wetem yumi mo wetem laen blong yumi afta, blong oltaem.