Andrei mo Nogud Toktok
Hem we i raet i stap long Yuta, YSA.
“I’ll try to repent, to do better, to pray” (Children’s Songbook, 98).
“!Yu ting se yu yu gud bitim ol narawan from yu no stap swea!” Nikolai i talem long spel taem long skul.
“!i no tru tu!” Andrei i talem.
“?Be from wanem u no wantem talem wan swea ia nomo? !Wan ia nomo! Bae yu no ded. Evri man i swea.”
Andrei i seksekem solda blong hem. “Mi jes no wantem nomo.”
Andrei i save se fasin blong swea i rong mo i mekem se Tabu Spirit i gowe. Andrei i wantem Tabu Spirit i stap insaed long hem. Mekem se hem i no swea.
Andrei i no niu long skul, mo kasem naoia, Nikolai i wan pikinini ia nomo long klas sikis blong olgeta we i wantem kam fren blong hem. Be Nikolai i stap hambak long hem evri dei blong hem i mas swea. Mo evri dei Andrei i stap taed blong talem no. Mo tu, Andrei i fraet se Nikolai bae i stop blong stap olsem fren blong hem, mo afta, bae hem i stap hemwan bakegen.
“Jes talem wan swea nomo,” Nikolai i talem afta skul. “Afta, bae mi nomo hambak long yu.”
Nao, Andrei i taed tumas blong fren blong hem i hambak long hem, nao i talem wan swea—wan we i no nogud tumas.
Nikolai i agri long hed blong hem. “!Gud! Naoia, yu pat blong mifala.”
Afta long hemia, ol nara fren oli stap toktok tu long Nikolai. Oli kakae wetem hem mo oli plei futbol wetem hem long spel taem long skul. Be blong stap long grup blong Nikolai i semmak olsem se yu wokbaot insaed long sanbij we i sopsop mo man i draon long hem. Moa Andrei i stap hangaraon wetem olgeta, moa hem i toktok mo mekem samting semmak long olgeta. Mo evriwan i swea. Oli swea plante. Oli laf mo oli swea swea long olgeta bakegen. Oli talem ol nogud toktok abaot ol tija blong olgeta. Oli stap go krangke mo oli mekem ol samting we oli no soem respek nating. Sloslo Andrei i stap kros kros plante taem, mo i faenem moa mo moa risen blong stap swea.
Wan naet, taem Papa mo Mama oli aot, Andrei mo bigfala sista blong hem, Katya, tufala i rao from program blong televisen. Bifo Andrei i tingting long hem, wan swea i kamaot long maot blong hem.
Katya i lukluk hem, i sek. “Bae mi talem long Mama.”
Andrei i ron i go long bedrum blong hem mo i sarem doa. ?Wanem i rong wetem evriwan? ?From wanem oli stap mekem hem i kros oltaem? Taem papa mo mama blong hem i kambak long haos, Andrei i openem doa blong hem smol, mo harem Katya i talem: “Mama, Andrei i swea long mi.”
“?Wanem?” Mama i sapraes wantaem. “Andrei bae i no save swea.”
Andrei i sarem doa mo i sakem hem long bed blong hem. Hem i stap tingting long hamas fasin blong hem i kam defren stat long taem ia we hem i stat blong swea. Longtaem finis nao hem i nomo filim Tabu Spirit.
Andrei i nildaon long saed blong bed blong hem, mo i prea. “Dia Papa long Heven, mi sore tumas we fasin blong mi i nogud, mo mi stap kros. Mi sore we mi stat blong swea. Bae mi kam gud moa.”
Taem Andrei i stap prea olsem, wan gud filing i fulumap hat blong hem. Blong fas taem, afta we hem i stat swea, hem i stap filim rili hapi. Hem i bin save se God i lavem Hem, mo Hem i save filim Tabu Spirit. Hem i filim we Lod i fogivim hem, mo hem i bin save se hem i save jenis o kam gud moa.
Afta we hem i prea, hem i talem trutok long Mama blong hem mo hem i talem sore long Katya. Andrei i filim gud moa afta long hemia. Hem i filim gud blong sakem sin.
Long nekis dei, long skul, Andrei i no go kakae wetem grup blong Nikolai. Be hem i sidaon wetem sam pikinini we hem i no save olgeta. Bae i tekem taem, be Andrei i save se bae hem i faenem sam fren we oli gud mo hapi mo oli no swea. Semmak olsem hem.