Stap Rere from Wan Niu Wokbaot
Man we i raet ia, i stap long Parana, Brasil.
Semmak olsem Nifae we i sel i go long ples we hem i no save long hem, mi nidim blong praktisim fet long Lod long saed blong statem wan famli.
Foto © Getty Images
Long ol wik we i go kasem mared mo tempol siling blong mi, tingting blong mi i stat blong trabol abaot ol samting we mi nidim blong mekem bifo mi statem niu famli blong mi. Nomata evri glad we mi filim long tetaem ia, tingting i fasfas long saed blong oganaesem niufala famli fasin, stretem faenens blong mitufala, faenem ples blong putum ol ting blong mitufala, mo evri niufala responsabiliti blong mi olsem wan waef. Mi bin wantem blong meksua se mitufala i statem mared blong mitufala long raet wei taem mitufala i putum taem long ol aktiviti blong mitufala from ol impoten samting olsem obei ol komanmen, mo spendem taem tugeta olsem hasban mo waef nomata laef blong mitufala i bisi tumas.
Taem mared i stap kam kolosap, mi bin stap drim nogud long plante trabol we i save spolem wan famli. From se mi kamaot long wan famli we i gat lav be i bin fesem fulap samting, we oltaem i fesem bigfala raorao mo hat i brok, ol nogud drim ia oli spolem mi tumas. Mekem se wan naet, afta plante naet we i semmak, mi wekap, mi swet mo disaed blong folem advaes blong Sista Neill F. Mariott, Seken Kaonsela long Yang Woman Jeneral Presidensi, we hem i talem long toktok blong hem “Givim Hat blong Yumi long God” (Liahona, Nov. 2015, 30–32). Mi bin sarem ae blong mi mo prea, “Dia Papa long Heven, ?wanem nao mi save mekem blong kipim ol nogud samting ia oli stap longwe long famli blong mi?”
Ansa i kambak long mi kwiktaem mo strong semmak olsem wan i openem doa long hed blong mi mo putum tingting ia i stap long ples ia. Smol, kwaet voes i toktok long mi: “Jes mekem nomo wanem yu sapos blong mekem. Stap fetful long wanwan step.” Spirit i talem sam stret advaes, mo mi filim se sapos mi mekem olgeta samting ia, evri samting bae i oraet.
Mi smael, mo filim jes blong mi i fulap long gud filing. Wantaem nomo, mi fogetem evri wari, from mi bin save se hemia i tru. Mi bin filim Tabu Spirit bifo, be i neva strong olsem we i bin kasem mi long naet ia. Mi bin filim lav blong Papa blong yumi long Heven mo Sevya i raonem mi, mo mi bin save se kamfot mo laef we i no save finis blong famli blong mi i wan impoten samting long Tufala, semmak olsem we hem i impoten long mi.
Blong stretem tingting blong mi, wan stori we i kamaot long ol skripja i kam long maen blong mi—taem ia we Lod i givim oda long Nifae blong hem i bildim wan sip: “Yu mas bildim wan sip, folem fasin we bae mi soem yu, blong mi save karem ol pipol blong yu i go krosem ol solwota ia.” (1 Nifae 17:8; oli ademap italik).
Nifae mo famli blong hem i bin stap long waelples blong plante yia, oli gotru long plante kaen hadtaem. Hem i save fraet blong statem wan niu wokbaot krosem solwota mo letem fraet i kam moa strong bitim fet blong hem. Be hem i no fraet. Hem i akseptem mo obei ol instraksen blong God. Hem i gat fet se ol promes blong God bae oli kamtru. Lod i neva talem long Nifae se bae i no gat strong win, o bae i no gat ol wef we bae oli kam agensem sip. Be Hem i talem long Nifae se sapos hem i folem toktok blong Hem, bae hem i save lidim famli blong hem i stap sef krosem bigfala solwota i go kasem graon blong promes.
Mi bin luksave se, mi tu, mi bin travel tru long wan waelples blong plante yia, be naoia, mi stap long fored blong solwota, mi stap rere from wan niu wokbaot: mared. God i singaotem mi— mo mi ting se i semmak long evri Lata-dei Sent famli—blong mi bildim wan sip folem ol instraksen blong God.
Taem hasban blong mi mo mi i bin mared, ol trabol oli kam. Mi sik, mo mitufala i gat hadtaem blong mekem faenens blong mitufala i stap gud, mo blong putum long praktis evri gud famli fasin we mitufala i bin disaed blong folem.
Be kaonsel we mi bin kasem long naet ia i bin stap long hat blong mi. Evri dei, mitufala i traem blong lanem mo holemtaet toktok blong God insaed long hat blong mifala, blong folem ol gud eksampol blong ol gudfala lida blong mifala—wetem hemia blong Kraes—mo blong kam antap long fasin blong mitufala. Mi kasem wan testemoni we i strong moa abaot prea, mo mi testem tru lav blong Papa we Hem i bin gat long mitufala. Mi stat blong gat moa tras mo no fraet tumas. Mitufala i luksave se ol hadtaem we mitufala i stap fesem oli kam ol step blong kam antap. Tedei, hom blong mifala i olsem wan smol pis blong heven.
Mitufala i stap yet long stat blong wokbaot blong mitufala, be blong mared mo statem wan famli i bes joes we mi bin mekem. Hat blong mi i fulap long glad mo taem mi tingbaot tempol odinens we yumi bin kasem mo taem mi save se atoriti blong God i bin silim odinens ia. Moa mi andastan hamas famli i impoten long plan blong Papa long Heven, mo hamas kavenan we mitufala i mekem i tabu, moa mi wantem helpem ol nara famli blong kasem semfala odinens ia.
Mi bin lanem se yumi no nid blong wari abaot wanem i stap gohed, from se “Spirit ia we God i givim long yumi, hem i no blong mekem yumi fraet, nogat. Spirit ia i blong mekem yumi gat paoa, i blong mekem yumi lavem ol man, mo i blong mekem yumi naf blong blokem ol samting we yumi nomo i wantem” (Seken Timoti 1:7). I simpol nomo. Yumi nid blong obei, blong folem ol instraksen we God i givim tru long ol skripja mo ol toktok blong ol profet blong tedei, mo askem long prea blong kasem moa instraksen we i blong yuwan. Sapos yumi mekem olgeta samting ia, yumi save krosem solwota blong ol las dei ia, wetem ful tras se nomata wanem kaen trabol bae i kasem yumi, olgeta we yumi lavem bambae oli stap sef.