Star I Stap Saen
Hem we i raet i stap long Kolorado, YSA.
“It’s nice to be here with you in Primary” (Children’s Songbook, 254).
Star i takin long klos blong hem. Hem i harem se i defren blong werem wan dres i go long jos. Long olfala jos blong hem, ol gel oli werem longfala o sot traoses nomo long Sandei. Be i no long niufala jos blong hem. Hem mo mama blong hem i jes baptaes long Jos blong Jisas Kraes blong Ol Lata-dei Sent.
Star i pulum win taem hem i lukluk hem bakegen long mira. Hem i glad tumas blong go long Jos blong fas taem olsem wan ofisol memba, be hem i fraet smol tu wetem. Bifo, hem i stap wetem Mama long ful taem long jos. Be naoia, bae hem i go long Praemeri.
Star i lukluk gud hem long mira. ?Be olsem wanem sapos hem i no harem gud wetem ol memba? ?Olsem wanem sapos ol nara pikinini oli no laekem hem?
“?Star? ?Yu redi?” Mama i singaot.
Star i wokbaot i godaon long ol step. Hem i askem: “?Yu luk se mi luk gud?”
Mama i smael. “Yu luk naes tumas.”
Star i tanem fes smol. “Be yu mas talem hemia nomo. Yu yu mama blong mi.”
“Yes, i tru. Mi mas talem hemia. From se hem i tru.”
Star i smael smol. Oltaem, mama blong hem i faenem wan rod blong mekem hem i filim gud. Be i harem bel blong hem i tantanem smol yet. ?Olsem wanem sapos i no gat wan nara pikinini nating we i wantem toktok wetem hem? Hem i gat ol fren long skul, be oli no ol memba blong niufala jos blong hem. Hem i wantem nomo se sapos wan fren blong hem nomo i stap go long jos wetem hem.
“Mi jes tingbaot se mi mas mekem wan samting,” hem i talem long Mama blong hem.
Hem i ron i gobak antap long step mo i go nildaon long saed blong bed blong hem. “Dia Papa long Heven, ples helpem mi blong mi gat ol niufala fren. Mi biliv se wanem ol misinari oli bin tijim i tru, be mi mi fraet.”
Star i nildaon i stap, i lisin. Afta smol taem, hem i filim wan filing we i swit, we i gat pis, mo hem i nomo fraet.
Long jos, Star mo Mama i sidaon wetem wan famli we oli gat tri smol gel. Papa mo mama ia i talemaot nem blong olgeta finis, mo oli stat blong toktok wetem Mama bifo miting i stat. Star i helpem ol gel blong oli kalarem wan pikja blong Jisas.
Bisop Andrews i wokbaot i kam long tufala. “!Sista Cunningham! !Star! Hem i gud blong luk yutufala tedei.” Hem i givim tufala wan bigfala smael mo i sekhan long tufala. Star i fogetem se evriwan i naes long jos. Maet bae hem i faenem wan fren.
Afta long sakramen miting, Star i go long Praemeri. Hem i lukluk i go long ol nara pikinini we oli stap lukluk hem taem hem i stap go sidaon. Oli stap toktok long olgeta mo oli no luk hem. Hat blong Star i stat blong fraet. Bae hem i stap hemwan nomo.
Nao, wan gel we yia blong hem i semmak long Star i wokbaot i kam insaed long rum. Star i tingting: “Hem tu, i luk se hem i fraet. Bae mi save toktok long hem.”
Star i pulum gud win blong hem, mo i wokbaot i go long gel ia. “Halo. Nem blong mi Star. Mi mi niu. ?Bae yu laekem blong sidaon kolosap long mi?” Star i holem taet win blong hem. ?Bae gel ia i wantem kam fren blong hem?
Maot blong gel i smael haf nomo. “Mi mi Sarah. Mi tu, mi niu. Famli blong mi i jes muv i kam long ples ia. Mifala i kam long Ontario.”
“Mama blong mi mo mi i jes baptaes tu wik i pas,” Star i talem. “Mi no save stret se bae mi mekem wanem.”
Smael blong Sarah i kam bigwan moa. “Bae yumitu faenemaot tugeta.”
Star mo Sarah i sidaon wetem klas blong tufala. Samtaem, ae blong Star i kasem ae blong Sarah, mo smael. Sarah i smael tu. Star i filim se hem i harem gud mo i hapi. Hem i save se Papa long Heven i bin ansarem prea blong hem mo i bin helpem hem blong faenem wan fren.
Long klas, tija i askem Star mo Sarah blong talemaot nem blong tufala.
Star i stanap. “Nem blong mi i Star Cunningham. Mama mo mi i baptaes tu wik i pas.” Hem i stop, mo i smael bigwan taem hem i lukluk i go long niufala fren blong hem. “Mo hemia i fren blong mi, Sarah.”