Olgeta Stret Man Bambae Oli Laef Wetem Fet

I gat wan olfala kastom stori blong Ol Man Jiu abaot wan man we i stap mekem sop, we i no bin biliv long God. Wan dei, taem hem i bin stap wokbaot wetem wan rabae, hem i talem: “I gat wan samting we mi no save andastanem. Yumi bin gat relijin blong plante taosen yia. Be evri ples we yu lukluk i go long hem, i gat ivel, korapsen, fasin blong no stap ones, no stap stret, harem nogud, hanggri mo faet. I luk olsem se relijin i no mekem wol i kam gud nating. So bae mi askem yu: “?Wanem nao i gud long hem?”

Rabae i no ansa blong smol taem, be i gohed blong wokbaot wetem man ia we i stap mekem sop. Long en, tufala i stap kam kolosap wan ples blong pleiplei, we ol pikinini we das i kavremap olgeta, oli stap pleiplei long graon.

“I gat wan samting we mi no andastanem,” Rabae i talem. “Luk ol pikinini ia. Yumi gat sop blong plante taosen yia nao, be yet, olgeta pikinini ia oli doti we. “?Wanem nao sop i gud long hem?”

Man we i mekem sop i talem: “Be Rabae, i no stret blong putum blem long sop from ol pikinini ia we oli doti. Oli mas yusum sop bifo sop i save mekem wok blong hem.”

Rabae i smael i talem: “Hemia nao.”

Aposol Pol, we i stap talem ol toktok blong wan profet long Ol Testeman, i talem sot wanem nao mining blong stap olsem wan man we i stap biliv, nao hem i raetem: “Man we i stret man long fes blong God” (Rom 1:17).

Maet long simpol toktok ia, yumi andastanem wanem i defren bitwin wan relijin we i no strong mo i no wok, mo wan we i gat paoa blong jenisim laef fulwan.

Be blong andastanem se i minim wanem blong laef wetem fet, yumi mas andastanem wanem nao hem i fet.

Fet i moa bitim bilif. Hem i blong trastem God fulwan, mo tekem aksen.

Hem i moa bitim blong talem nomo o wantem se samting i hapen.

Hem i moa bitim fasin blong sidaon i stap, agri wetem hed, mo talem se yumi agri. Taem mifala i talem se “olgeta stret man oli mas laef wetem fet,” mifala i minim se fet blong yumi nao bae i lidim mo daerektem yumi. Yumi mekem samting long wan wei we i stret folem fet blong yumi—i no blong stap obei krangke nomo, be wetem wan tru save, mo wan tru lav long God, mo from waes tingting ia we i no gat praes we Hem i bin soemaot long ol pikinini blong Hem.

Fet i mas kam wetem aksen; sapos no, hem i no laef (luk long Jemes 2:17). Nao, hemia i no fet nating. Hem i no gat paoa blong jenisim fasin blong wan man o woman, nao i no save jenisim wol.

Ol man mo ol woman we oli gat fet oli trastem Papa blong olgeta long Heven we i gat sore—iven long ol taem we samting i no stap stret, iven long ol taem we i gat tu tingting mo samting i kam agens, ol taem ia we maet oli no save luk gud samting, o oli no save andastanem klia samting.

Ol man mo ol woman we oli gat fet, oli wantem tumas blong wokbaot long rod blong wan disaepol, mo oli traehad blong folem eksampol blong Sevya blong olgeta we oli lavem, we i Jisas Kraes. Fet i pusum tingting blong man, mo, i tru, i givim insperesen blong tanem hat blong yumi i go long heven, mo blong yumi go long ol narafala man, yumi leftemap olgeta mo blesem olgeta.

Relijin we i no gat aksen wetem, i olsem sop we i stap long bokis blong hem nomo. Hem i save mekem fulap samting, be long ril laef, hem i gat smol paoa nomo blong mekem samting i defren kasem taem we hem i mekem wok we hem i gat stamba tingting from. Gospel we i kambak we i blong Jisas Kraes, i wan gospel blong aksen. Jos blong Jisas Kraes i stap tijim se tru relijin i wan mesej blong hop, blong fet, mo blong jareti, mo tu i helpem ol narafala fren blong yumi long saed blong spirit mo long saed blong wol.

Sam manis i pas, waef blong mi, Hariet, mo mi, mitufala i bin mekem wan famli trip wetem samfala pikinini blong mifala i go long Mediterenian eria. Mifala i bin visitim sam kamp blong ol rifuji, mo mitim samfala famli we oli kamaot long ol kantri we wo i spolem. Olgeta pipol ia, oli no gat semfala fet olsem yumi, be oli ol brata mo sista blong yumi, mo oli nidim help kwiktaem. Hat blong mifala i harem gud tumas taem mifala i luk, long ae blong mifala, olsem wanem fet blong ol memba blong Jos blong yumi i wok, taem oli kam givhan, oli help, mo oli givim hop long olgeta fren ia long nid, nomata wanem relijin, sitisensip, o edukesen blong olgeta.

Fet we i joen wetem aksen we i hapen oltaem i fulumap hat wetem fasin we i kaen, i fulumap maen wetem waes mo andastaning, mo i fulumap sol wetem pis mo lav.

Fet blong yumi i save blesem mo i save lidim tingting blong olgeta raon long yumi, mo yumiwan long stret mo gud fasin.

Fet blong yumi i save fulumap wol wetem gud fasin mo pis.

Fet blong yumi i save tanem rabis fasin i kam lav, mo i save tanem enemi i kam fren.

Olgeta we oli stret, nao, oli stap laef taem oli tekem aksen wetem fet; oli stap laef taem oli trastem God mo oli stap wokbaot long rod blong Hem.

Mo kaen fet ia i save jenisim laef blong wanwan man, woman mo famli, nesen mo wol.