Te parau mau taui ore no te tauiraa i te mau tau

To‘u mau taea‘e e te mau tuahine here, o ta‘u e hi‘o atu nei e o tei ta‘iruru na te ao atoa nei, te ani nei au i ta outou mau pure e to outou faaroo a pahono ai au nei i te faaueraa e te rave‘a maitai no te paraparau atu ia outou.

E haamata vau na roto i te faateniteni ia outou atoa. I roto i teie ao tamataraa, ua riro te feia apî o te Ekalesia ei feia maitai roa‘e. Ua riro te faaroo, te taviniraa e te mau ohipa a to tatou mau melo ei arueraa. E mau taata pure [Atua] tatou e o tei î i te faaroo, te tutava tamauraa ia riro ei feia peu ma e te parau ti‘a. Te haapa‘o nei tatou te tahi e te tahi. Te tamata nei tatou i te faaite i te here i to tatou mau taata tupu.

Area râ, a ore ai tatou e mauruuru noa, e faahiti atu vau no roto mai i te 2 Nephi o te Buka a Moromona:

« Ei taua mahana ra, e riri ai oia [te diabolo]… e e faata‘oto ho‘i ia ratou i te ta‘oto hau roa, e parau ai ratou e: E maitai to Ziona; oia ïa, ua manuïa Ziona, e maitai to’na; e na reira te diabolo i te haavare i to ratou varua. »¹

Ua parau te tahi taata e, e rave rahi amaa to ta tatou tumu raau maitai ra, e i te tau mahanahana tata‘itahi e rahi atu te mau imoa ia oteo mai.

Eiaha tatou e ora ti‘aturi noa. Te ora nei tatou i roto i te mau taime ati rahi; ua haatihia tatou e te mau tapa‘o. Te ite nei tatou i te mau mana ino i roto i to tatou sotaiete o te ume nei i te mau utuafare e ora nei i te mau peu tumu. I te tahi mau tau, te haapuroro nei te afata teata e te mau hoho‘a teata i te mau peu faufau no te mau aito tane e te mau aito ahine, e te tamata nei i te faateitei i te mau ti‘araa o te mau tane e o te mau vahine hauti teata e ere to ratou oraraa i te hoho‘a maitai. No te aha tatou e pee ai i te hoê arata‘i matapô ? Te puai nei te mau radio i te ha‘uti i te mau pehe e mau parau faa’ino i te mau arata‘iraa faufaa, te mau faatianianiraa atâata, e te mau faataaraa ti‘a-ore.

Ei mau melo no Te Ekalesia a Iesu Mesia i te Feia Mo‘a i te Mau Mahana Hopea Nei, a ti‘a papû i mua i te mau ‘ati e haati nei ia tatou e to tatou mau utuafare. No te tauturu ia tatou i roto i ta tatou mau faaotiraa, te horo‘a’tu nei au i te tahi mau mana‘o tauturu e te tahi mau hi‘oraa no roto mai i to‘u iho oraraa.

E haamata vau na ni‘a i te pureraa pô utuafare. Eiaha tatou e haapa‘o-ore i teie faanahonaraa faauruhia. E hopoi mai te reira i te tupuraa pae varua o te melo tata‘itahi o te utuafare, ma te tauturu ia’na ia ti‘a atu i mua i te mau tamataraa e vai nei i te mau vahi atoa. Te mau haapiiraa e haapiihia i roto i te utuafare, e vai maoro te reira. Mai ta te peresideni Gordon B. Hinckley e te feia na mua mai ia’na i parau e: « O te utuafare te tumu no te hoê oraraa parau-ti‘a, e aita atu e mauihaa e nehenehe e rave i to’na tura e e ore ho‘i e rave i ta’na mau ohipa faufaa. »²

Ua papa‘i te Taote aravihi ra o Glenn J. Doman e: « Te aiu fanau apî, e au oia mai te hoê rorouira maa ore… ua hau a‘e râ oia i te rorouiraa i roto i te mau tuhaa atoa…. Te mea e tuuhia i roto i te [feruriraa] o te hoê tamarii i roto i na matahiti matamua e va‘u o te oraraa, e vairaa papû ïa…. Mai te peu e tuu outou i te faaiteraa hape i roto i to’na [feruriraa] i roto i te reira [area taime], e mea fifi roa ïa ia tuma faahou. » Tei faahou ta te Taote Doman i parau, te matahiti maitai-roa‘e no te taata nei ia farii maitai, tei roto ïa i te piti e aore râ, i te toru matahiti. » ³

E mea au na‘u teie mana‘o: « E au to outou feruriraa mai te hoê pa‘epa‘e o ta outou e faaî nei. » E mata na tatou i te faaî i tatou mau pa‘epa‘e e te mau pa‘epa‘e o te mau melo o to tatou utuafare, i te mau mea o te paruru i to tatou varua no te ho‘i atu i to tatou Metua i te Ao ra. I ni‘a i taua mau pa‘epa‘e ra, e nehenehe atoa ia tuuhia’tu te haapiiraa evanelia, te faaroo, te pure, te here, te taviniraa, te haapa‘o, te hi‘oraa maitai e te aroha.

I teie nei, e horo‘a’tu vau i te tumu parau no ni‘a i te tarahu. E tau tarahuraa teie, e tau no te mau tareta-tarahu e rave rahi e haponohia mai nei i roto i ta tatou mau afata rata i te mau hebedoma atoa. Te pûpûhia mai nei te hoê faito moni taime raro roa, no te hoê tau poto; te mea râ o te ore e tau‘ahia nei e te taata maori râ, i muri a‘e i taua tau ra, e maraa rahi roa te faito moni taime. E faaite atu vau ia outou te hoê parau i faahitihia e te peresideni J. Reuben Clark Tamaiti., o tei riro na no na matahiti e rave rahi, ei melo no te Peresideni Matamua. Aita to te parau mau e tau. O ta’na ïa parau:

« E ture no to tatou oraraa i te pae faufaa e i te pae faarava‘iraa faufaa i te ao atoa nei e, e mea ti‘a ia faaho‘i i te moni taime i ni‘a i te moni i tarahuhia…

« Eita te moni taime e taoto, eita ho‘i e ma‘ihia, eita atoa e pohe; eita roa e haere i te fare ma‘i; e ohipa noa oia i te Sabati e i te mahana faaearaa ohipa; eita e hahaere e farerei e ore ho‘i e reva haere; eita e rave i te taime faaoaoaraa; eita roa e vaiihohia mai i te ohipa, eita ho‘i e hurihia i rapae i te ohipa; eita roa e rave i te mau hora haapoto…. Ia topa ana‘e i roto i te tarahu, e riro ïa te moni taime ei hoa no outou i te mau minuti atoa o te mahana e o te pô; eita e nehenehe ia horo tapuni e aore râ, ia ‘ape i te reira; eita e farii i te taparu, i te mau aniraa e aore râ, i te mau faaueraa, e mai te mea e faaapiapi outou i to’na e‘a aore râ, aita outou i farii i ta’na aniraa, e haaperehu te reira ia outou. »⁴

To‘u mau taea‘e e to‘u mau tuahine, te ri‘ari‘a nei au i te mau faatianianiraa o ta‘u i ite e o ta‘u e faaroo nei no ni‘a i te mau tarahu no te fare. E ia piri-faahou i te fare no te piti o te tarahu. Te auraa no teie faatianianiraa oia ïa, no te faahema ia tatou ia tarahu mai ia rahi atu â te moni. Te mea râ o te ore e faaitehia, ia ore te « piti » o te tarahu fare e pee, e rave-ê-hia’tu to’na fare.

A ara i te mau philosophia e, te mau tao‘a nehenehe o nanahi ra, e riro ïa ei mau mea titau-roa-hia no teie mahana. E ere râ ho‘i i te mea faufaa maoti râ, ia haafaufaa tatou i te reira. Te haamata nei to tatou feia faaipoipo apî i te oraraa na ni‘a rave rahi mau pereoo e te huru o te fare mai to Mama e to Papa o ta raua i aufau i te moni ohipa o te hoê oraraa taato‘a. Ua faaŏ ia ratou i roto i te tarahu tau roa i ni‘a i te faito e piti moni ava‘e. Penei a‘e, ua taere to ratou iteraa i te tauiraa, te fanau mai nei te mau vahine i te mau tamarii, te ta‘iri nei te ma‘i i te tahi mau utuafare, te ereraa i te ohipa, te tupuraa te mau ‘ati o te natura e te tahi atu â mau mea, e inaha, aita’tura e nehenehe e faaho‘i i te tarahu, tei faaotihia i ni‘a e piti ava‘e moni ohipa.

E mea faufaa ia ore tatou e haamau‘a hau atu i ta tatou moni ava‘e.

Te hinaaro nei au i te a‘o i te mau metua vahine, i te mau metua tane, i te mau tamaiti e te mau tamahine.

Te parau nei au i te metua vahine e i te metua tane tata‘itahi – ia riro ei taata faaroo maitai. E mea faufaa te aparauraa i roto i teie ao rû to tatou. A rave i te taime no te faaroo. E ia outou e te mau tamarii, a paraparau atu i to outou metua vahine e i to outou metua tane. E mea fifi no outou ia tau‘a i ta ratou parau tera râ, ua faaruru to outou mau metua i teie mau tamataraa o ta outou e ti‘a nei i teie mahana. E mea taa a‘e ia ratou teie mau mea ia outou na. Te pure nei ratou no outou i te mau mahana atoa e te farii nei i te faaururaa a to outou Metua i te Ao ra no te a‘o e no te arata‘i ia outou.

E te mau metua vahine a opere i te ohipa o te fare. Oia mau, e mea ohie a‘e ia rave outou i ta outou iho ohipa i te faahepo i ta outou mau tamarii ia tauturu mai area râ, e mea ti‘a ia ratou ia haapii i te faufaa no te raveraa i ta ratou tuhaa.

E te mau metua tane, e a‘o vau ia outou ia faaite i te here e te mârŭ i ta outou vahine. A faaoroma‘i i ta outou mau tamarii. Eiaha e faati‘ati‘a i to ratou mau hinaaro, ia haapii râ ratou ia haamaitai i to ratou iho oraraa.

Te faaitoito nei au ia outou ia vai vata noa outou no ta outou mau tamarii. Ua faaroo vau i te parau-raa-hia e, eita roa te hoê taata e parau ia piri mai te pohe e, ahiri au i haamau‘a i to‘u taime iroto i ta‘u piha ohipa.

E mea au roa na‘u teie hi‘oraa, no roto mai i te hoê irava « Te Hoê Mahana i Tahatai », na Arthur Gordon. Teie ta’na i parau:

« I te ahuru ma toruraa o to‘u matahiti e to‘u teina hoê ahuru matahiti, ua opua to maua Metua Tane i te afa‘i ia maua i te hoê tahua faaarearearaa [cirque]. Area râ, i te taime o te tamaaraa, ta‘i maira te niuniu: E ohipa rû te titau maira ia’na i te oire. Ua amui toopiti maua i roto i te oto. I muri iho, faaroo atura maua ia’na i te parauraa e, ‘Aita, eita vau e tae atu. E nehenehe te reira e tia’i.’

« I to’na ho‘iraa mai i te ‘airaa maa, parau atura to‘u Mama ma te ataata, ‘Ua ite oe, e ho‘i tamau noa mai te tahua faaarearearaa.’

« Pahono maira Papa e ‘Ua ite au, Eiaha râ te tamarii-rii-raa.’ »⁵

E to‘u mau taea‘e e to‘u mau tuahine, te taime i pihai iho i ta outou mau tamarii, e ma‘ue ê te reira. Eiaha e haamau‘a i taua taime ra. Te parau ra te hoê taata e: A ora no ananahi noa, oi roaa ia outou te ananahi faufaa ore.⁶

E te mau metua, a tauturu i ta outou mau tamarii ia haamau i te mau fâ no ni‘a i te haapiiraa e te mau ohipa toro‘a. A tauturu i ta outou mau tamaroa ia haapii i te mau peu mâ e i te faatura i te mau vahine e i te mau tamarii.

Te na o ra te peresideni Hinckley e: « A haapii ai tatou i te hoê u‘i apî, o te reira atoa ïa te huru o te ao i teie mau matahiti e haere mai nei. Ia haape‘ape‘a outou no ananahi, a hi‘o i te haapiiraa a ta outou mau tamarii. »⁷

Ua parau te Aposetolo Paulo i ta’na Timoteo herehia: « Ei haapa‘oraa ra oe na tei faaroo ra, i te parau, i te haere‘a, i te aroha, i te huru o te aau, i te faaroo, i te viivii ore. »⁸

E te mau metua, a ora ti‘amâ ia riro outou ei hoho‘a no ta outou mau tamarii ia pee.

Te a‘o u‘ana nei au i te mau utuafare atoa: a imi i to outou fatu raa ai‘a. E mea faufaa ia mataro i te feia o tei haere mai na mua‘e ia outou. E haapii mai tatou i te tahi mau mea no ni‘a ia tatou iho ia ite ana‘e tatou i to tatou mau tupuna.

Te haamana‘o nei au i to‘u tamarii raa i te mau ohipa tei tupu i to‘u tupuna Miller. I te tau mahanahana no te matahiti 1848, ua faafariuhia mai to‘u mau metua ruau, o Charles Stewart Miller e Mary McGowan Miller i roto i te Ekalesia i te fenua Ekotia, e ua faaru‘e i to raua nohoraa i Rutherglen i Ekotia no te fano na te moana Atalanitika. Ua tapae i New Orleans e ua tere faahou na ni‘a i te Anava‘i Mississippi i St. Louis, Missouri, e te hoê pŭpŭ Feia Mo‘a, tei tere i reira i te matahiti 1849. Hoê o ta raua na 11 mau tamarii o Margaret tei riro ei mama ru‘au tupuna no‘u.

I te taeraa mai i St. Louis, ma te opua ia imi i te moni no te haere i Roto Miti, ua ta‘irihia teie vahi i te ma‘i pee e cholera. Ua roohia te utuafare Miller i teie ma‘i: e piti noa hebedoma, ua pohe te mama, te papa e, e piti o ta raua mau tamaiti. 13 ïa matahiti to to‘u mama ruau tupuna o Margaret Miller i taua ra.

No te mea e mea rahi te feia o tei pohe, aita e afata e nehenehe e hoo mai – no‘atu eaha te moni. Ua iritiriti haere te mau tamaroa paari i mau raau hahu-ore-hia o te aua puaatoro no te hamani i te mau afata no te mau melo o te utuafare tei pohe.

Ua faru‘e mai e iva o na tamarii otare a Miller ma e te tane a te hoê o te mau tamahine paari a‘e i St. Louis i te tau mahanahana no te matahiti 1850 e na puaatoro e maha e hoê pereoo puaahorofenua, e ua tapae i Roto Miti i taua ihoa matahiti ra.

E mauruuru rahi to‘u i teie e vetahi atu mau hui-tupuna o tei here hohonu i te evanelia e i te Fatu e ua hinaaro i te faatusia i te mau mea’toa e vaira ta ratou oia’toa to ratou iho ora no Te Ekalesia a Iesu Mesia i te Feia Mo‘a i te Mau Mahana Hopea Nei. E mauruuru rahi to‘u no te mau oro‘a o te hiero o tei ruuruu amui ia tatou no te mau tau e amuri noa’tu.

Te haapapû nei au i te faufaa rahi o te ohipa e ravehia nei e tatou i roto i te mau hiero o te Fatu no to tatou feia tei pohe.

E piti noa ava‘e i ma‘iri a‘e nei, ua putuputu amui mai te mau melo o to‘u utuafare i te hiero no Roto Miti no te rave i te mau taatira no te tahi o to matou mau tupunua tei pohe. Hoê ïa o te mau iteraa pae varua rahi roa‘e i tupu ta to matou utuafare i farii amui e o tei faarahi i to matou here no te tahi e te tahi e no titauraa ia tatou ia ora ti‘amâ no ta tatou fatu raa ai‘a.

Tau matahiti i ma‘iri a‘e nei a haere ai ta maua tamaiti apî roa‘e o Clark te haapiiraa evanelia i te Fare Haapiiraa Tuatoru no Brigham Young, ui maira te orometua ia’na, e « Clark, eaha te hoê hi‘oraa no te oraraa i pihai iho i to oe metua tane ta oe e haamana‘o nei ? »

Teie ta te orometua i papa‘i mai ia‘u i te pahonoraa a Clark i horo‘a i mua i te mau piahi. Teie o ta Clark i parau: « I to‘u riroraa ei diakono i roto i te Autahu‘araa a Aarona, ua haere maua to‘u Papa e pupuhi i te moa fatata atu i Malad, Idaho. E Monire taua mahana ra – te mahana hopea no te tau pupuhiraa moa. Ua haere maua na roto i te mau fenua faaapu ma te maimi i te mau moa tera râ, aita rae‘a. Parau maira to‘u Papa e ‘Clark’ ma te hi‘o i ta’na uati, ‘e iriti taua i te mau ofa‘i pupuhi. E tuturi taua no te pure.’ Ua mana‘o vau e ani to‘u Papa ia rahi mai te mau moa tera râ, ua hape roa vau. Ua faataa maira oia ia‘u e, e ma‘i rahi to Elder Richard L. Evans, no te Pŭpŭ no te Tino Ahuru Ma Piti, e i te hora 12 o taua Monire taa-ê-ra, e tuturi te mau melo no te Tino Ahuru Ma Piti – noa’tu te vahi e ti‘ahia ra e ratou, e ia pure amui ma te mana‘o hoê e na roto i te faaroo no Elder Evans. Iriti ihora maua i to maua taupoo, e pure ihora. »

Te haamana‘o maitai nei au i taua taime ra, aita râ vau i moemoeahia i te hoê tamaiti, te hi‘opo‘a ra, te haapii ra, te faatupu ra i to’na iho iteraa papû.

Rave rahi matahiti i ma‘iri a‘e nei, te vai nei te hoê tamaiti iti apî opere ve‘a tei opere tano-ore i te mau ve‘a. I te tahi mau taime, eita oia e afa‘i mai i te mau ve‘a i te opani fare, e taora noa râ oia i teie mau ve‘a e topa’tu i roto i te mau uru raau rii e aore râ, i te hiti puromu. Opua ihora te tahi mau taata i te tuurima i te tahi parau faahaparaa. I te hoê mahana, tae mai nei teie pŭpŭ i to‘u fare e ani atura ia Frances ta‘u vahine ia tuurima i teie parau. Aita oia i farii e parau atura, « E tamarii rii roa oia, e e mea teiaha teie mau ve‘a no’na. Eita roa vau e faahpa ia’na, no te mea ua faaitoito noa oia. » Ua tuurima râ te rahiraa e ua hopoihia teie parau i to’na feia faatere.

Aita rae‘a mahana i muri mai, ua ho‘i mai au i te fare e te ta‘i nei Frances. Ia nehenehe oia ia paraparau, faaite maira oia ia‘u e ua faaroo oia e, ua haapohe teie tamaiti iti opere ve‘a ia’na i roto i te fare vairaa pereoo. E mea papû e, ua teiaha roa te faahaparaa ia’na, e aita i roaa ia’na te faaoroma‘i. Ua oaoa roa maua i te mea e, aita maua i faaŏ noa’tu i roto i teie faahaparaa. Aue ïa haapiiraa ora teie no ni‘a i te faufaa rahi i te oreraa e haava e i te haamaitairaa i te mau taata’toa.

E ti‘a i te Faaora ia riro ei hi‘oraa no tatou. Mai tei papa‘ihia No’na, ua « faarahi oia i te tupu i te rahi e te paari, e te herehia mai e te Atua e te taata atoa ra. »⁹ Oia « tei hamani maitai haere… no te mea, tei ni‘a Ia’na ra ho‘i te Atua. »¹⁰

A haamana‘o tamau noa e, e riro te paari o te Atua ei mea maamaa i te taata nei area râ, te haapiiraa rahi ohie roa‘e ta tatou e nehenehe ia haapii mai i te tahuti nei oia ïa, ia parau ana‘e mai te Atua e, e haapa‘o ïa te hoê taata, ia vai parau-ti‘a noa taua taata ra.

Ia pee noa tatou i te Tamaiti Arii no te Hau, tei faaite hu‘a mai i te e‘a e ti‘a ia tatou ia pee, e na roto i taua rave‘a ra, e ora‘i tatou i teie mau tau arepurepu. E faaora Ta’na opuaraa hanahana ia tatou i te mau ati e haati nei ia tatou. Te faaite mai nei To’na hi‘oraa i te e‘a. I te taime a ŭ ai i te faahemaraa, ua ape Oia i te reira. I te taime a pûpûhia mai ai te ao, ua pato‘i Oia. A anihia mai ai To’na ora, ua horo‘a Oia i te reira.

Teie te taime. Teie te vahi. Ia pee tatou Ia’na, te pure nei au, na roto i te i‘oa o Iesu Mesia ra, Amene.