Te mau hotu no te orama matamua

E ono noa iho ava‘e i ma‘iri a‘enei ua paturu mai outou te mau melo faaroo no te Ekalesia a Iesu Mesia ia‘u ei melo no te Tino Ahuru ma Piti Aposetolo. Ua tae mai teie nei piiraa mai te hoê hiti mahuta rahi no te feia e rave rahi, i ta maua ihoa râ mau mootua, tei parau mai e, « O oia ho‘i to matou papa ruau ! E taata oia mai te mau taata atoa. Ua hauti oia na muri ia matou, e na’na ho‘i i tapu i to matou rouru ! »

I muri a‘e i te amuiraa rahi no Atopa, ua parau to‘u hoa faaipoipo e o vau nei i ta maua mau tamarii na roto i te niuniu paraparau, e ua parau mai te hoê o ta maua mau mootua tamaroa, « No te mea ho‘i e mea atea roa matou ia orua e eita e nehenehe ia matou ia parahi i pihaiiho ia orua i Roto Miti, ahani pai oe i tarape mai ia matou nei a horo‘a’i oe i ta oe a‘oraa no te amuiraa. » Aita â maua i ite atura i ta maua mau tamarii e te mau mootua e tae noa mai i teie nei amuiraa rahi, no reira te tarape nei au i teie nei mahana ma te ti‘aturi e, e oaoa mai te hoê mootua tamaroa. Te tarape atoa’tu nei au ia outou atoa te mau melo faahiahia, e mea faufaa rahi e e mea mauruuruhia ta outou mau pure e to outou here e to‘u hoa faaipoipo e o vau nei.

I roto i te mau matahiti a paari ai au i te fenua Helemani, ua haere atu vau i te pureraa i te mau vahi e te mau taime huru rau e rave rahi–i roto i te mau piha haehaa i muri, i roto i te mau nohoraa nehenehe, e i roto i te mau fare pureraa api au maitai. Te vai nei i roto i teie nei mau fare atoa te hoê mea faufaa rahi i itehia i roto i te taato‘araa: I reira te Varua o te Atua i te parahiraa; e nehenehe te here o te Faaora e itehia a putuputu mai ai matou ei amaa a ore râ ei paroita.

Te vai nei i roto i te fare pureraa no Zwickau te hoê hamonia tahito faaterehia e te mata‘i. I te mau Sabati atoa e faataahia te hoê feia apî tamaroa no te tura‘i i ni‘a e i raro i te rima etaeta e faatere ra i te mau puhipuhiraa mata‘i no te faatere i te hamonia. Na mua a‘e au a farii ai i te Autahu‘araa a Aarona, ua farii au i teie nei haamaitairaa rahi ia tauturu i teie nei ohipa faufaa rahi.

A himene noa’i te amuiraa i ta matou mau himene herehia no te Faaho‘i-raa-hia-mai, e pamu vau ma to‘u puai atoa ia ore te hamonia e ere i te mata‘i. E faaite papû mai te mata o te taata faata‘i hamonia mai te mea e, e mea maitai ta‘u ohipa aore râ e ti‘a ia‘u ia faarahi vitiviti noa i ta‘u mau pamuraa. Ua ite noa vau i te mau taime atoa i te hanahana no te faufaa rahi o teie nei ohipa e te ti‘aturiraa ta te faata‘i hamonia i tuu mai i ni‘a iho ia‘u. E mana‘o faahiahia mau no te ohipa i rave-faaoti-hia i te fariiraa i te hoê hopoi‘a e te riroraa ei tuhaa no teie nei ohipa rahi.

Te vai faahou ra te tahi maitai hau atu e noaa na roto i teie nei ohipa: e parahi te taata faatere i te puhipuhiraa mata‘i i ni‘a i te hoê parahiraa o te horo‘a mai i te hoê hi‘oraa faahiahia mau i ni‘a i te hoê hi‘o haamaramarama penihia o te faaunauna i te muaraa o te fare pureraa. Te faahoho‘a nei te hi‘o peni i te Orama Matamua, o Iosepha Semita i te tuturiraa i roto i te Uru Raau Mo‘a e te hi‘oraa i ni‘a i te ra‘i, i roto i te hoê pou maramarama.

I te taime himeneraa a te amuiraa e tae no‘atu i te taime no te a‘oraa e no te iteraa papû horo‘ahia e to matou mau melo, e hi‘o pinepine au i teie nei hoho‘a peni o te hoê taime hau roa i te mo‘a i roto i te aai o te ao nei. I roto i to‘u feruriraa, te ite ra vau ia Iosepha i te fariiraa i te ite, te faaiteraa papû e te mau arata‘iraa no te ra‘i mai, a riro ai oia ei mauhaa haamaitaihia i roto i te rima o to tatou Metua i te ao ra.

E ite au i te hoê varua taa ê ia hi‘o ana‘e au i te hoho‘a nehenehe i roto i teie hoho‘a peni i ni‘a i te hi‘o no te haamaramarama no te hoê tamaiti apî faaroo i roto i te hoê uru raau mo‘a, tei rave i te hoê faaotiraa itoito, ia pure ma te aau tae, i to tatou Metua i te ao ra, tei faaroo e tei pahono atu ia’na ma te here.

Teie au i ô nei, te hoê tamaiti apî i te fenua Helemani i muri a‘e i te Tama‘i Rahi Piti, e ora ra i roto i te hoê oire tei tupararihia, tauatini kilometera i te atea i Palmyra i Amerika Apatoerau e hau atu i te hanere matahiti i muri a‘e i te tupuraa mau o teie nei orama. Na roto i te mana rahi o te Varua Maitai, ua ite au i roto i to‘u aau e i roto i to‘u feruriraa e, e parau mau ïa te reira, e ua ite mau o Iosepha Semita i te Atua e ia Iesu Mesia e ua faaroo i To raua reo. Ua tamahanahana mai te Varua o te Atua i to‘u varua i teie faito matahiti apî e te hoê haapapûraa no te tupuraa mau o teie nei taime tei faatupu i te haamataraa no te hoê tautooraa na te ao taato‘a tei faataahia « ia tere atu e tae noa’tu i te taime i î ai te ao nei i te reira » (PH&PF 65:2). Ua ti‘aturi au i to Iosepha Semita iteraa papû no taua ohipa hanahana i roto i te Uru Raau Mo‘a i taua taime ra, e ua ite au i te reira i teie nei. Ua paraparau faahou â te Atua i te taata nei !

Ia hi‘o ana‘e au i muri, te mauruuru nei au no te mau hoa e rave rahi tei tauturu ia‘u i to‘u apîraa ia noaa te hoê iteraa papû no te Ekalesia a Iesu Mesia tei faaho‘ihia mai. A tahi, ua faaohipa vau i te faaroo ohie i roto i to ratou mau iteraa papû, e i muri iho ua farii au i te iteraa hanahana a te Varua i roto i to‘u feruriraa e to‘u aau. Ua faariro vau ia Iosepha Semita mai te mau taata tei tauturu ia‘u na roto i to ratou mau iteraa papû no ni‘a i te Mesia ia faarahi i to‘u iho iteraa papû no ni‘a i te Faaora. Hou vau a ite ai i te tautururaa a te Varua e faaite ra ia‘u e ua riro o Iosepha Semita ei peropheta na te Atua, ua ite to‘u aau apî e, e hoa oia no te Atua, e no reira e riro atoa ihoa oia ei hoa no‘u. Ua ite au e ua nehenehe ia‘u ia ti‘aturi ia Iosepha Semita.

Te haapii nei te mau papa‘iraa mo‘a ia tatou e ua horo‘ahia mai te mau horo‘araa a te varua ia ratou tei ani i te Atua, tei here Ia’na, e tei haapa‘o i Ta’na mau faaueraa (a hi‘o PH&PF 46:9). « No te mea aore i hope te mau horo‘a i te horo‘ahia na te mau taata atoa; no te mea e rave rahi te mau horo‘a, e ua horo‘ahia mai te hoê horo‘a i te taata hoê atoa e te Varua o te Atua ra.

« Ua horo‘ahia te hoê i te tahi, e ua horo‘ahia te tahi ê ia vetahi ra, ia maitai te mau taata atoa na roto i te reira » (PH&PF 46:11-12).

I teie nei mahana ua ite au e ua maitai rahi to‘u iteraa papû apî na roto i te iteraa papû o te peropheta Iosepha Semita e o te mau hoa e rave rahi i roto i te Ekalesia tei ite « na roto i te Varua Maitai… e o Iesu Mesia ra o te Tamaiti ïa no te Atua, e ua faasataurohia ho‘i oia no te mau hara a to te ao nei » (PH&PF 46:13). Ua haamaitai to ratou hi‘oraa maitai, to ratou here atuatu, e to ratou mau rima tauturu ia‘u no te farii i te tahi ê atu horo‘a o te Varua tei faaitehia i roto i te mau papa‘iraa mo‘a a hiaai ai au no te tahi atu â maramarama e te parau mau: « Ua horo‘ahia ia vetahi ê ra ia faaroo i to ratou ra mau parau, ia noaa atoa ia ratou te ora mure ore mai te mea e vai noa ratou [i te faaroo] » (PH&PF 46:14). Auê ïa horo‘a faufaa rahi e te faahiahia !

Ia faahaehaa mau tatou ia tatou iho, e haamaitaihia tatou i teie horo‘a no te faaroo e te ti‘aturi i te mau mea itea-ore-hia e tei ti‘a râ (a hi‘o Alama 32:21). A tamata ai tatou i te mau parau tei horo‘ahia ia tatou e te mau papa‘iraa mo‘a e te mau peropheta ora- e noa’tu e hinaaro noa to tatou i te ti‘aturi- eiaha e pato‘i i te Varua o te Fatu, e faarahihia to tatou mau varua e e haamaramaramahia to tatou mana‘o (a hi‘o Alama 32:26-28).

Ua tatara maramarama mai te Faaora iho i teie nei ture aroha i to te ao atoa i roto i Ta’na pure aroha, tei horo‘ahia eiaha no Ta’na mau Aposetolo ana‘e no te Feia Mo‘a atoa râ, e tae noa’tu ia tatou i teie nei mahana, i te mau vahi atoa ta tatou e ora nei. Ua parau Oia:

« Aore ho‘i au i pure ia ratou ana‘e nei, i te feia atoa râ e faaroo mai ia‘u i ta ratou ra haapiiraa ;

« Ia riro ratou atoa ei hoê; mai ia oe, e tau Metua, i roto ia‘u nei ra, e mai ia‘u ho‘i i roto ia oe na, ia hoê atoa ratou i roto ia tâua, ia faaroo to te ao e na oe au i tono mai » (Ioane 17:20-21; haapapûraa apitihia’tu).

Teie te huru e haamaitai ai te Orama Matamua a Iosepha Semita i to tatou iho mau oraraa tata‘itahi, te oraraa o to tatou mau utuafare, e peneia‘e te taato‘araa o te utuafare taata- e ti‘aturi tatou ia Iesu Mesia na roto i te iteraa papû o te peropheta Iosepha Semita. Ua farii te mau peropheta e te mau aposetolo i roto i te aai o te taata i te mau orama hanahana mai ta Iosepha i farii. Ua ite Mose i te Atua mata e mata e ua ite oia e e tamaiti oia na te Atua, « mai te hoho‘a o [Ta’na] ana‘e Tamaiti Fanau-Tahi » (a hi‘o Mose 1:1-6). Ua faaite te Aposetolo Paulo e ua fâ mai o Iesu Mesia tei faati‘a-faahou-hia ia’na i ni‘a i te purumu no Damaseko e ua faariro ia Paulo te hoê o Ta’na mau misionare faahiahia (a hi‘o Te Ohipa 26:9-23). No to’na faarooraa i te faaiteraa a Paulo no ni‘a i ta’na orama no te ra‘i mai i te taime haavaraa i Kaisarea, ua faaite te Arii mana rahi o Ageripa, « Ua fatata vau i te riro ei Cherisetiano ia oe » (Te Ohipa 26:28).

E te vai nei te tahi atu â mau peropheta tahito e rave rahi tei faaite atoa i te iteraa papû puai no te Mesia. Ua arata‘i teie mau faaiteraa atoa, te tahito e te apî, i te mau taata tei ti‘aturi i te puna hanahana no te parau-ti‘a e te ti‘aturiraa atoa- i te Atua, to tatou Metu i te Ao ra, e i Ta’na Tamaiti, o Iesu Mesia.

Ua paraparau te Atua ia Iosepha Semita no te opuaraa ia haamaitai i te taato‘araa o te mau tamarii a te Atua e To’na aroha e to’na here, i roto i te mau tau papû ore e te paruru ore, te mau tama‘i e te parau tama‘i, te mau ati no te fenua e no te taata tata‘itahi. Ua parau te Faaora: « Inaha, ua faatorohia’tu to‘u rima aroha ia outou, e o te haere mai nei, o ta‘u ïa e ite mai » (3 Nephi 9:14). E ite te mau taata atoa o te farii i teie nei titauraa e « ati-roa-hia i te maitai faito ore o to’na ra aroha » (Alama 26:15).

Na roto i to tatou faaroo i te faaiteraa papû a te peropheta Iosepha iho e te tupuraa mau o te Orama Matamua, na roto i te tai‘oraa e te pure mau e te hohonu, e haamaitaihia tatou e te hoê faaroo papû i te Faaora o te ao nei, tei paraparau atu ia Iosepha, « i te po‘ipo‘i no te hoê mahana nehenehe e te ata ore, i te haamataraa no te tau mahanahana o te matahiti hoê tauatini e vau hanere e piti ahuru » (Te Aamu o Iosepha Semita 1:14).

E ere te faaroo ia Iesu Mesia e te hoê iteraa papû no ni‘a Ia’na e Ta’na Taraeharaa no te taata atoa i te hoê noa haapiiraa faufaa rahi i te pae no te atuaraa. Taua huru faaroo e horo‘a ïa no te taato‘araa, hanahana no temau hiro‘a tumu atoa o teie nei fenua, noa’tu eaha te reo, te nunaa, te iri, te hau fenua, aore râ te tereraa faufaa. E nehenehe te mau mana no te feruriraa e faaohipahia no te taaraa i teie nei horo‘a, area te mau taata o te ite hohonu nei i to’na mau maitai o te mau taata ïa e hinaaro nei i te farii i ta’na mau haamaitairaa, o te tae mai na roto i te hoê oraraa viivii ore e te mâ no te peeraa i te e‘a no te tatarahaparaa mau e te oraraa i te mau faaueraa a te Atua.

Ia haamana‘o e ia faahanahana tatou i te peropheta Iosepha Semita, e î to‘u aau i te mauruuru ia’na. I riro na oia ei tamaiti apî maitai, te parau-ti‘a, te haehaa, te maramarama, e te itoito e te aau maitai e te faaroo aueue ore i te Atua. E taata parau-ti‘a. Ei pahonoraa i ta’na pure haehaa, ua vetea faahou te mau ra‘i. Ua ite mau o Iosepha Semita i te hoê orama. Ua ite oia i te reira, e ua ite oia e, ua ite te Atua i te reira, e e ore roa e nehenehe ia’na ia huna (a hi‘o Te Aamu o Iosepha Semita 1:25).

Na roto i ta’na ohipa e ta’na tusia, ua noaa ia‘u i teie nei te hoê taaraa mau no ni‘a i to tatou Metua i te ao ra e Ta’na Tamaiti, to tatou Taraehara e Faaora, o Iesu Mesia, e e nehenehe ia‘u ia ite i te mana no te Varua Maitai e ia ite i te opuaraa a te Metua i te Ao ra no tatou, Ta’na mau tamarii. No‘u, e mau hotu teie no te Orama Matamua.

Te mauruuru nei au e ua haamaitaihia vau i to‘u apîraa ra i roto i to‘u oraraa e te hoê faaroo ohie e ua riro Iosepha Semita ei peropheta na te Atua; e ua ite oia i te Atua te Metua e Ta’na Tamaiti, o Iesu Mesia i roto i te hoê orama. Ua iriti oia i te Buka a Moromona na roto i te horo‘a e te mana o te Atua. Ua haapapûhia mai ia‘u taua iteraa ra e rave rahi mau taime.

Mai te hoê o te mea iti roa‘e i rotopu ia outou, i roto râ i to‘u piiraa ei hoê o te mau Aposetolo na Iesu Mesia, te faaite papû nei au e te ora ra Oia, e o Oia te Mesia. E iteraa papû to‘u no Iesu Mesia, te Faaora e te Taraehara o te taata atoa. Ua farii au i teie nei iteraa na roto i te hau e ore e noaa i te parauhia e te mana o te Varua o te Atua. Te hinaaro o to‘u aau e to‘u nei feruriraa o te vai-mâ-noa-raa ïa e te itoito i te taviniraa Ia’na i teie nei e a muri noa’tu.

Te faaite papû atu nei au i te reira i te i‘oa o Iesu Mesia, amene.