IANGO IBUKIIA TAAN REIREI N TE MWEENGA

A kona ni kabonganaaki iango n anga reirei aikai n te umwanreirei n ikotaki ma te mweenga. Ko kona ni kangaraoi iango aikai nakoia kaain am utu ke nakoia kaain te kiraati.

“Karaoan Bwaai Aika Kainnanoaki Riki,” iteraniba 10: A kona n rangi n ibuobuoki mwakuri ni kakukurei aikai ibukin kaotaan bwaai aika kakawaki riki nakon ake aki rangi ni kakawaki. Ngkana ngkoe ma kaain am utu a bae tangaroami n te rereua, tera bwaai aika 10 ake ko na rangi ni kainnanoi? Ngkana ngkoe ma kaain am utu a bae tangaroami n te maiu n tamnei, tera bwaai aika 10 mwaitiia aika ko na rangi ni kainnanoi? Kabotaui iango akana uoua aikanne. Tibwaua nakoia kaain am utu te mwakoro ae “Te Maiu Ae Boboto Iaon Berita Aika Tabu.” Marooroakinna bwa e na kanga karimoaan ana bwai te Atua n rangi ni kakawaki riki nakon bwaai riki tabeua ake a rangi ni kakaawaki naba.

“Ana Boki Moomon: Kakannato Ibukin Karekean Ana Rau Te Tia Kamaiu,” iteraniba 18: Kaota nnen te mooi ma kanoana te ran, ao anganiia kaain te utu. Marooroakinna bwa a kanga rabwatara n taka n tangira te ran man namakina te marurung imwiin nimakina. Kabotaua te ran ma Ana Boki Moomon ao takara ni kani mooi ibukin te rau ao te koaua. Man kabonganaan ara atatai ma taian karaki man te boki aei, rinanoi itera tabeua aika kaokoro aika ti kona ni kunea iai te rau man warekan Ana Boki Moomon.

“Te Reirei Ibukin te Bootaki n Aine Ae Bita Ara Utu,” iteraniba 26: Warekia ni kabaibati karakinan te reirei man te Bootaki n Aine. Tuangiia kaain am utu bwa ana buokiko ni koroi uoua karinanin bwaai, teuana are e karinani “kataaki aika kakamaaku” ake a tia ni kaitarai kaain am utu ao te kauoua karinanin bwaai ake ti kona iai n nakon te Tia Kamaiu ibukin kamanoara. Marooroakinna bwa a na kanga bwaai ake n te kauoua ni karinan ni kamanoko. Kaota am kakoaua bwa e kanga ngkana ko kabanea nanom nakon te Tia Kamaiu n anganiko te korakora ni kona ni kaitarai kataaki aika kakamaaku inanon maium.

“Itoman aika Kabaeaki,” iteraniba R10: Warekia ni kabaibati te karaki man te tai are e iangoia tinan Ryan bwa teuaei e na nakon te bitiobi ibukin buokana. Titirakiniia kaain te utu iango ake e kona ni karaoi Ryan. Karakina te karaki ni karokoa e bane. Maroroakinna bwa e kanga ana namakin Ryan ngke e ataia ae bon kaain ana utu kaain te uoote ao te bitiobi te tia buokia. Kaoia kaain te utu bwa a na korea aia taeka ae uarereke ni kakaitau nakon am bitiobi ke am beretitenti n te mwaanga.