Te Boki ae iai Taian Kaeka iai

Ngke I tabe ni mataku n rongorongon buakonikain te Amazon, I reiakinna bwa mitinare man aaro aika mwaiti a tia ni reireinia Kaain te aba i America taekan Iesu Kristo. E roko irou iangoan aron kamaiuakia aia bakatibu aika mirion ma mirion mwaitia aika tuai n ongo taekan Iesu, te euangkerio, ke otenanti ni kamaiu n aron te bwabetito. Ngkana e roko te Tia Kamaiu ibukin kamaiuaia aomata ni kabane, tera bukina ngkai a mwaiti inanon rongorongon ngkoa aika katinanikuaki man Ana rongorongo ae mimitong?

I kakaei taian kaeka n te Baibara, ma akea te bwai teuana ae taekinna bwa te Old World e ataia ae iai aomata aika maeka n aonon America. Akea te minita, te ibonga, ke ataein te reirei aika reiakina taekan te Baibara ae kona ni kaekai au titiraki.

N te bong teuana ao I namakina te tamnei n te anene ae I ongo. I reiakina te anene anne n oin au taetae, te taetae n Portugal, ao I keiakinna n rairia nakon te taetae n English, I uringa bwa kaain rarikiu ae te Aomata ae Itiaki ni Boong Aika Kaitira, Jesuina, e aki toki ni butimwaia mitinare mai America nakon mweengana. I butia ngkana a kona mitinare n rairia ibukiu. N te bong are imwiina ao a katuka rairana ma aia rongorongo ae uarereke ae kangai, “Ti bon rangi ni kurkurei ni buokiko. Ti kan kaitibo ma ngkoe n te bong teuana.”

Ngke I kaitibo ma mitinare teuana te wiiki imwiina, a kaoai bwa N na ira aia taromauri. Ma I bon riribaia tenaan Moomon. Kaain au utu ao taan kairiiri n aaro ake tabeua ake I kakae rongorongoia a bon kabuakakaia, a arania bwa te bootaki ae kakamaku. A taekini kabuakaka aika akea nanoia ao I kakoauai bwa a koaua. E ngae n anne, n te tai ae aki maan imwiina n te Taabati teuana ae kakarau, I uti ma te nano ae korakora bwa N na kawara aia taromauri—bwa N na kaboa mwiin aia akoi ao ibukina bwa I kan ataia raoi. N tain te moan bootaki, a nako aomata nakon te tabo n taetae ao a taekina aia koaua bwa ataia ae te Ekaretia ao Ana Boki Moomon a bon koaua ao bwa Iotebwa Timiti bon ana burabeti te Atua. I kitana te bootaki nakon te Reirei n Taabati, ma te aki raunnano.

Ngke e taekini koroboki aika tabu ke karaki man te Baibara te tia reirei, I bon ingainga ni kan ira te waaki. Ma ngke e taekina Ana Boki Moomon, I aki kakarongoa ao I iangoia. E aera ngkai iai riki te boki teuana ngkana iai iroura te Baibara? Imwaain nakou, e karabwaai te tia reirei ibukin irakin te waaki ao e bon kakubanakoai ngke e a anganai naba ana boki are Ana Boki Moomon.

Ngke I okira mweengau, I nakon au ruu, I katorobubua iaon tano, ao I moana au marooro ma nanou ni koaua ma Tamara are i Karawa. I tuangnga bwa I namakina te bwai ae onoti ibukin Ana Ekaretia te Moomon ma I aki tangiria bwa e na kamwaningaai Taatan. I tataro bwa E na buokai ni katoka au nanokokoraki ao ni kaota nakoiu te ekaretia ae koaua.

I mwiina ao I namakinna bwa e korakora nanou ni kan wareka Ana Boki Moomon. I a manga tataro ibukin kakorakorakiu ao kairakiu. N au tai n tataro, e roko irou te namakin ae korakora man tamaroa—te kukurei inanou. I ataia ae tiaki ti ngai n te tai arei. E roko te iango irou n te tai naba arei: “Wareka te boki!”

I kaukia ao I moanna ni warekia. Imwaain ae bane kabwarabwaraana, a bwaro ranin matau ngke e kaota te Uea nakoiu kamimiia Kaain te Aba i Amerika. E tara n ae e bon katauraoaki Ana Boki Moomon bwa e na kaekai tabeaiangau. I namakina te kimwareirei ae korakora ngke a kaekaaki au titiraki. Titebo ma kaain America n taai ake ngkoa a taetae man ruanimateia n tuangai rongorongon maiuia ao ni kakoaua bwa ngaiia naba ata Iesu ao bwa E maraki ibukiia naba.

I rangi ni miimi n au kukune, I kakaeia mitinare ao I ongora n aia reirei. N Taabatin te Itita, Maati 31, 1991, I ruorikaaki nako nanon te ran ni bwabetito—te kabanea n tamaroa ni babaire ae I a tia ni karaoia.

I namakina te kakaitau ae korakora nakon Tamara are i Karawa ibukin Ana nanoanga ao wanawanana ae korakora. I ataia bwa e momotiraoi, bwa akea natina ae mwanuokinna, ao e ingainga ni kan kaota Ana babaire nakoia aomata. I ataia bwa Ana Boki Moomon bon te boki ae tabu. E bon koaua.