Iango Riki Tabeua ibukin Tibwatibwan te Tai, Tianuare 2008

Aika a na oti i nano bon reitan iango ake a kona ni kabonganai taan kairiri n te Moanrinan ma Tibwauan te Tai ake a boretiaki n te Riaona Tianuare 2008. Ibukin te reirei, aro ni kairiri ma waaki n reirei ake a boraoi ma iango aikai, tara “Bon te Bwaintituaraoi Maiu: Iai Bairean Maiu” n te iteraniba R4 ao R5 n aia itera ataei n te boki aei.

1. Tuangia ataei bwa tera ae nanonaki n te ninikoria. Iangoi taeka tabeua aika a katerea nanon te taeka ae ninikoria n aron rimwiin, beku ibukin, kawakina, ongeaba, katine iroun ao a bati riki. Wareka 2 Nibwai 10:23. Reirei taekan te bwaintangira ae te inaomata n rinerine. Marooroakinna bwa tera nanon ae te ninikoria n ara koaua iroun Iesu Kristo.

   Katauraoa katooton te takakaro ae “Katauraoi ibukin Rokon Iesu” ae kona n reke ni bukinibaan te boki ibukin kairan te reirei ae Moanrinan 2. Katauraoa 12 mwakorokoron beebwa aika uarereke ao karekea nneia ae tau. Waakina te takakaro ni weteia ataei bwa a na kerake, n anai aia nambwa ao a na kammwakura te kai ni koto ni mwaitin raoi te marena. Wareka te tikuea. Ngkana e kaota te rinerine ae raoiroi, titiraki bwa bukin tera ngkai anne te rinerine n ninikoria. Ngkana e kaota te rinrine ae bure, titiraki nakoia ataei bwa a na kanga ni kona n rineia bwa a na ninikoria. Karaoa te takakaro n aron mwaitin te tai ae riai. Kainin n te kaoti koaua ibukin kakannaton te ninikoria n ara koaua iroun Iesu Kristo.

2. Katauraoi ake ana koreaki aika 1–1 nakon 1–25 man te bakete n tamnei ae te Moanrinan 1 Kaungaia ataei bwa a na buoka karakinan rongorongon te karikibwai man taian beebwa ake a koreaki. Anga te kakaitau ibukin te aonaaba ae moan te tikiraoi ae e karaoia Iesu Kristo ibukira.

   Kaota te Kete n Tamnein te Euangkerio 101 (Atam ma Eva). Buokiia ataei bwa a na karekea Moses 5:4 ao wareka te rain man te kibuntaeka ae “Atam ao Eva, ae buna, a wewetea aran te Uea.” Marooroakinna bwa tera ae nanonaki n aei. Kaota te tamnei 1–34 (Atam ao Eva a reireinia natiia) man te bakete ae te Moanrinan 1 ao wareka Moses 5:12. Titiraki “Tera ae a karaoia Atam ao Eva bwa a na buokia natiia?”

   Titirakinia ataei bwa a kanga aia karo n reireinia taekan te euangkerio. Katauraoi taiani katooto tabeua ngkana a tangiraki, n aron te banna ae e na katotongaki ae raoiroi ao karaoan bootakin te utu n te tairiki. Anenea te kuna ke anenen te Ekaretia ibukin te utu. Kaota te koaua bwa Iesu Kristo e karika te aonaaba ao Atam ma Eva bon ngaia moani karo n te aonaaba aei.

   Ibukiia ataei aika a ikawai riki: Katauraoa te beebwa ma rinanin taeka aika kakaokoro aika a kabwarabwara te Karikibwai (te ota, te ngaina, te bong, te aonaaba, te aba, te aba ae mau, te uteute, te aroka, te ota ae korakora, te ota ae karako ao tabeua riki). Tuangia ataei bwa a na raira aia boki nakon Karikani Bwaai 1, ao kaotia bwa n te bong ra ae a riki iai bwai akanne, ao korei kiibu ake a oti iai. (Te katooto: Te ota—te moanibong, Karikani Bwaai 1:3–5).

3. Te anene: “Ngai natin te Atua” (Anene n Taromauri ma Aia Anene Ataei, 58). Kabanea am iango ni buokia ataei bwa a na kina ao a na mataata n te tua ae kakaawaki ae reiakinaki n te anene aei. Kaungaia ataei bwa a na ongora raoi ngkana te tia katanga te biano e katanga nootin te koorati ao n teirake ngkana a kina te anene. Ngkana mwaitia ataei a bane n teirake, tuangia bwa a na wirikirikiia aran te kuna. Anenea te koorati nakoia ataei. Tuangia ataei bwa a na anenea te koorati ma ngkoe, ao kakauongo mwanewe ake a katerea bwa tera ae a tangiria bwa e na karaoia temanna ibukiia. Anenea te koorati ao koroi taian kaeka iaon te burakibooti (kairai, kaetai nakonako irarikiu, buokai, reireiai) Titiraki: “Antai ae kairira? Te tai ra ae kakawaaki bwa a na iai te tia kairira? Bukin tera ko tangira temanna bwa e na nakonako irarikim? Bukin tera ko tangira temanna bwa e na buokiko ni karekea te kawai? Tera tabeua bwaai ae ti riai ni karaoi bwa ti na maeka ma Tamara are i Karawa n te bong teuana?” Anenea riki te koorati ao kaoti am koaua ibukin taiani kakabwaia ibukiia kaaro, tan reirei, mataniwi, burabeti, ao te boki ae tabu bwa a na buokira ni karekea te kawai n oki nakon Tamara are i Karawa.

   Ngkana ko anga reirei mani manga rinanoa mwanewen nako te kuna, kabonganai taeka ma kiibu n taeka aika kakaawaki aika a na buokia ataei n uring taian tua aika reiakinaki n taiani kibu. Te katooto: te moani kibu—bwaintituaraoi (mweengara ao ara karo n te aonaaba aei); kauoua ni kibu—booki aika tabu (Ana taeka); kateniua ni kibu—kakabwaia; kaaua ni kibu—Ana berita a koaua.