Karimoaan Au Mare Imwaain Au Kainikatonga

N ai aroia taanga, ngai ma kainabau ti a tia n aki boraoi ni iango inanon ara mare. Ma iai teuana te bwai ae riki ae teimatoa n titiku n au iango. I aki kona n uringa bukin ara aki boraoi ni iango, ma ti toki ma te aki kataetae, ao I uringa namakinan ae bon ana kaairua ni kabane kainabau. I namakinna ae bon akea te bwai ae I karaoia are N na riai ni kabwara bure ibukina.

Ngke e a nako te bong, I tataninga kainabau bwa e na taekina ae e kabwara ana bure. Ma ni koauana e bon aki noora kaairuana. E bon kai noora ae e a tia n urua nanou. I namakinna bwa I riai ni bon tei ibukiu; bon te tua ae kakaawaki.

Ngke e toki te bong, I moanna n ataia ae bon akea te bwai a na kaantaningaia, ai ngaia are I a nakon te Uea n te tataro. I tataro bwa e riai n ataia kainabau bwa tera ae e a tia ni karaoia ao arona n tia ni kammaraka ara mare. I tataro bwa e na kairaki bwa e na kabwara ana bure bwa ti aonga ni katoka ara aki boraoi ni iango.

Ngke I tataro, I namakina te koaua ae matoatoa bwa I riai ni kawara kainabau ao ni kabwara au bure. I bon mimi teutana n te koaua aei ao I waekoa ni katerea inanon au tataro ae akea te bwai teuana ae I karaoia ae bure ao ai ngaia are e aki riai bwa N na atonga ae I kabwara au bure. E roko te iango ae korakora nakon au iango: “Ko tangiria n riki bwa te aomata ae eti, ke ko tangiria n tiku ni iein?”

Ngke I tabe ni iangoa te titiraki aei, I a ataia ae I kona ni kamatoai n au kainikatonga ao n aki konaaki ni karokoa ae e kabwara ana bure, ma e na maanra aron karaoan anne? Bong aika bati? I taonaki n te nanokawaki ngke ti bon aki kakataetae imarenara. I ataia bwa te bwai ae riki aei bon tiaki ngaia ae na katoka ara mare, ma ngkana I teimatoa n aki kan konaaki, e na riki bwa te bwai ae rangi ni korakora urubwaina inanon ririki aika bati. I baireia bwa e na rangi ni kakaawaki riki karekean te mare ae kakukurei, ae iai te tangira iai nakon ae N na kaawakina au kainikatonga bwa e na aki uruaki iaon te bwai ae e na tara n akea manenana imwiina.

I nakon kainabau ao ni kabwara au bure ibukin ae I kaunna. E kabwara naba ana bure, ao n te tai ae waekoa ao ti a manga kukurei ao ni katiteuanaaki riki inanon te tangira.

Man te tai anne ao iai taai tabeua ae I a manga kainnanoia n titirakinai te aeka n titiraki anne naba: “Ko tangiria n riki bwa te aomata ae eti, ke ko tangiria n tiku ni iein?” Ai kakaitaura ngai ibukin te reirei ae bongana are I a tia n reiakinna n te moan tai are I kaitibo iai ma te titiraki anne. E a tia naba ni buokai ni manga kaeta rinanoan aroarou ao ni karimoaa kainabau ao au mare imwaain au kainikatonga.