Karaoan Bwaai Aika Kainnanoaki Riki
I bungiaki ao ikawairake i Korea inanon te utu ae akoi, ao I kaaina te Ekaretia ngke tebuitabun au ririki. I kan tibwauaia nakoimi aron rairakiu.
Ngai ma raou n reirei ti uaia ni mwakuri n ana umwaniboki te reirei imwiin te motirawa n te kamwaitoro ngke e titirakinai ngkana iai nanou ni kan nako n taromauri ma ngaia. I titirakinna bwa te aekakira te aro ae taekinna, ao e tuangai bwa e mena irarikin ara reirei. E taku bwa e rawata te kakukurei iai, ao a rawata naba iai aine. Bon 16 au ririki n te tai anne, ao te aekakin ni kabwarabwara anne e anaa nanou. I motikia bwa N na nako. I a tia n ira te aro ae te Presbyterian inanon ririki aika mwaiti man au tai n reirei ngke I uarereke, ao iai uringakin te ekaretia aei aika tamaroa.
Raoraou ao ngai ti nakon te waaki ni kukurei n te Kaonobong, ao a bane n roko aomata ni kamaurai ao ni butimwaeai. E rangi n rootaki nanou ngke a rangi ni butimaea ma te tangira te aomata ae rangi ni uarereke ae aki rangi ni kina. I nakon te taromauri n te bong are imwiina, ao I a moan kaitibo ma mitinare.
A reireinai mitinare taekan moan tuua aika bebete, taekan Iesu Kristo, ao manga Kaokan te euangkerio rinanon te Burabeti Iotebwa Timiti. Reirei ni kabane ake I reireinaki iai a bane n tau ma n nakoraoi, ao I rangi n rootaki n aron te rikirake ibukin te maiu are akea tokina ao te baire ni kamaiu. I aki toki n iangoia bwa bukin tera ngkai I kanakomaiakaki nako aon te aba ao tera bwaai aika tataningaai imwiin te mate. E rangi ni karaunano ataakin bwaai aika I kona ni karaoi, ao te Tia Kamaiu e na karaoi ake imwiina.
Uoua te namwakaina imwiina ao I tangiria ni bwabetitoaki mani kamatoaki, ma e tangiraki moa te kariaiakaki mai irouia au karo. Bon kaain te aro ae te Buddhist, ma a onimakinai. Iangoia bwa N na tuanga moa tinau, ngaia ae I tuangiia mitinare bwa ana roko nakon mweengau n te nÁau bwa e na bae n iai aia irua ae a na roko n titirakinna te bwai teuana ao e na atonga ae kangai ngaia. Ao I birinako tinaniku ni kaea au reirei. Ngke I oki, e tuangai tinau bwa iai uoman ana irua ae kaain Amerika aika botonimwaane. E taku neiei bwa a rangi ni bwaati n taetae ni Korea, ao e rangi n anaaki nanona ao e kangai eng. Ngaia are I a tia ni karekea te kariaiakaki mairouia au karo bwa N na kaaina te Ekaretia.
Boboto Maiura iaon Te Berita Ae Tabu
Ngke ti a bwabetitoaki, ti karaoi berita, ao anne moan waakin maiura n te euangkerio. Ti karaoi ao n iri berita ake tabeua inanon maiura, n aron tauan te toa ke, ibukiia ataeinimwaane, karekean te nakoanibonga. Maiura aanaki n te berita. E kantaningaira Tamara are i Karawa bwa tina kakaonimaki nakon ara berita ake ti karaoi, ao ngkana ti karaoia, E na rangi ni kakaonimaki nakon te berita are E a tia ni karaoi bwa tina kakabwaiakaki iai.
Te rongorongo are I kan angani ngkami ataeinimwaane aika kam uarereke bon babairean bwaai aika moan te kakaawaki, ataakin te berita are ko a tia ni karaoia, ao am kakaonimaki nakon berita aikanne riki ngkana ko tangiraki bwa ko na karaoa te mwakuri n anganano. Ngkana ko kakaonimaki man iai am kantaninga ibukin te maiu are akea tokina, e na bon kakabwaiako te Uea, tiaki ti ibukin taai aika a na roko ma n am tai ni maiu n te aonaaba aei.
Te katooto teuana, n au bong n reirei n te kuura ae rietaata I baireia bwa n naaki kamatebwai n te Taabati. N na ti kamatebwai ni karokoa te nukanibong n te Kaonobong ao n tuanga tinau bwa e na moantaai ni kautai n ingabongin te Moanibong. I kawakina te Taabati bwa te bong ae tabu. N tabetai ao e reke irou te aki rau ibukina bwa a kabanea aia tai raou n reirei n te bong anne. I Korea, te rin inanon te iuniwetiri ae tamaroa bon te kantaninga ae aki manikangare. Riki ngkana iai au ukeuke n te Moanibong, I aki kamatebwai n te Taabati. Bukina bwa iai teuana te bong kerikakin au tai ni kamatebwai, N na bon riai ni kabanea nanou nako iai. I taku bwa I a tia ni kabongana raoi riki au tai ni kamatebwai ibukin te iango aei. N tokina I riki bwa temanna ataein te reirei ma ibuakoia ataei ake tengaun ake a rangin n tikiraoi aia bui, ao I rin n te kabanea ni kinaki n iuniwetiri i Korea.
N te tai are ti kabanea ara tai n te Ekaretia ao nakon moan tuua n te euangkerio, ao tina kona ni kabonganai moan tuua akanne nakon bwaai ni kabane ake ti karaoi, ao ti kona ni karekea te ibuobuoki mairoun te Uea ao man kakabwaiakaki.
Te Nano Ae Ti Teuana ae Kaineti Nakon Mimitongin te Atua
Teuana te kibu ae mamaten nanou bon D&C 4:5, are e taekina aron bwaai aika kakaawaki ae a na iai iroun te tia kairiiri. E taekina karekean “te mata ae ti teuana ae kaineti nakon mimitongin te Atua.” N taainako ngkana I karaoi mwakuri n anganano ibukin te Ekaretia, ao I aki toki n titirakinai, E nakea au taratara? I tara mimitongin te Atua ao akea riki?
Inanon te maan ae 28 te ririki ao I mwakuri ibukin IBM i Korea. N te tai anne ao I taui nakoa aika kakaokoro n te Ekaretia, n aron te tia koroboki ni kakoroi mooti n te titeiki, te kauntira n te titeiki, te beretitenti n te titeiki, te tia tei man te tabo, ao te Itingaun n te Aono. I aki toki ni kabaeranti bwaai aika kakawaki n te utu, te mwakuri, ao nakoau n te Ekaretia, ao n au tai ibon irou. Ao I aki toki ni karaoi bwaai ake I riai ni karaoi.
Ngke te tia tei ngai n te tabo ao te Itingaun n te Aono, n na riai n nako Salt Lake uoua te tai n te ririki ni kaei maungatabu ni kabuta, ao ngke I riki bwa te tia kakoroi mooti, I kunea bwa kitanan te aobiti n te maan ae raka iaon teuana te wiiki bon te bwai ae kangaanga. Ma I kaungaaki bwa N na karaoa te mwananga, ao te beretitenti n te kambwana e kinaai man onimakinai ngke I kangai n na tararuaia. Ngkana ti babairei bwaai aika kakaawaki, ao ti kona ni kanakoraoi ara kangaanga. I aki tangiria ni karaoa te berita ibukin au koaua ibukin te karikirake n te mwakuri. N te tai are ko a tia ni bairea raoi am tai, ao ikanne are ko na namakina te rau i nanom ibukina bwa ko karaoa te bwai ae eti. Kawakinan katabeakira ao ara berita e bon kangaanga ao e tangira te anganano ae korakora, ma ngkana ti karaoia, te kakabwaia ae tina karekea e na korakora riki nakon are ti a tia ni karaoia.
Atibu Ibukin te Nakonako
Iangoia bwa ao ngkoa ko mena n iteran te karaanga are teuana, ao n iterana are teuana bon am kimwarerei are akea tokina. E riai bwa e na iai am atibu ibukin te nakonako inanon maium bwa ko aonga ni kona n nakon iterana are teuana. Te katooto teuana, rineia bwa ko na nako ni mitinare, mare n te tembora, man karekea am utu. Ngkana ko katauraoi nakon bwaai aikai, ko na karaoi mwakuri aika riai man waaki nako ibukin kakoroan am kantaninga.
Ngke e katanoataaki te Seoul Korea Tembora, ti bane ni kakatonga. Ti ataia bwa ngkana akea te tembora, ao ti aki kona ni kakoroi nanon te maiu inanon te euangkerio. E na kabanea te tai ae abwabwaki ibukin katean te tembora, ma kakabwaia man te tembora a kakorakorai riki aan aia koaua ao aia onimaki aomata. Ngkana a nakon te tembora, ao a na bane riki aia tai ibukin te euangkerio, ao a na waaki nako ibukin kakoroan aia kantaninga.
Ma ngaia ae I kaumaki ngkami ataei aika kam uarereke bwa kam na karaoi ami kouru ibukin ami atibu ibukin te nakonako teuana imwiin teuana nakon te tabo are ko uaiakinna n roko iai. Ana angani ngkami ibuobuoki ao kamanoami. I ataia bwa ngkana ti kakaonimaki nakon ara berita, ao e na uaana riki aron maiura, man kakabwaiakaki.