Kabaean te Itoman

“Iiiii … e aki kona n riki aei!”e kataetaea tamneina n te tirotaam Ryan. E tarai tabon ana neketai ake a tarobaroba. Ai bon ti te itera n aoa ana tai ni kakaea angana. Ai kangangara?

E karebwerebwe tinana ni mataroan te roki n tebotebo. E karaurau n taekina “Ryan?”.

“Rinnako,” e tangitangi.

E matangare tinana nakoina ngke e kauka te mataroa. “E uara?”

“E aki raoiroi,” e taku. “I bia kona ni karaoia n arona are iroun Baaba.”

E mata ni miimi teutana tinana ma e a manga kaakea. E kan kaakea te bwai are e taekinna Ryan ibukin tamana, ma e aki kona n taona nanona.

E rairi tabon te neketai tinana. “N am iango ti kona ni kakaea angana man aia boki ni kairi Tikauti?” E nako ni kakaea.

E rangi n tara ni kangare iroun Ryan ngkai e a tia ni koro ana ka-12 ao e tuai man rabakau ni kabaea ana neketai. E kakabaea tamana ibukina. Ma ngkai a tia ni buraure Tinan ao Tamana, ao Tamana e maeka ni iteran te kaawa are teuana.

E manga kaoti Mom ma te boki ae uki nakon te iteraniba teuana. E titiraki “I kona ni kataia?”

“Eng,” e taku Ryan, ao e kataia ni karaoa ae riai. E rangi niniwana Tinau, ma kanga e aki bati ni kinaaki ibukin rabakauna ni kabaebae.

E kabaea te bwai ae titebo ma karaoan te beeba ae rukurukumaki Tinau ao imwiina e a manga kabwara te kunikai are tirika ni manga moan moanna. Imwiin aki nakoraoin karaoana teuana riki te tai, ao e ikenrawa.

Akea bwa e a ti kaoti naba mwanen Ryan te ikawai ae Katie, ao e kawaekoa n rin n te roki n tebotebo. E taku, “Ryan! Tera ae riki nakon am neketai?” e titiraki, kanga aiaron ae te neketai te bwai ae aki tataneiai iai te aba.

“Akea!” e taku Tinau, ao e kaeta tein te kunikai. “Bwaai ni kabane.”

“I a kan rimwi,” e taku Ryan, ao e kataia n aki bwana n nanokaawaki. Ma e bon nanokaawaki. Aio bon ana moan bong ni kabuta te toa man te tai are e katabuaki iai bwa te rikan, ao e a bon rangi n tarabuaka ana neketai.

E taku Katie, “Eng, ko aki kona ni kabuta te toa n arom anne”.

E karaurau Tinau ni kaotinakoa Katie man te roki n tebotebo ao e a manga oki n rin nako. E taku “Iai au iango”.

E taraia Ryan ma te nanokokoraki.

“E uara ngakana ko moantaai n nakon te umwantabu ao ko a butia te bitiobi bwa e na karaoia?”

Te btiobi? Ai kabwainrangira! E iangoia Ryan bwa e kukurei n tiku n te auti nakon ae na nakonako nakon te umwantabu ma ana neketai I baina ao ni kawara te bitiobi imataia aomata ni kabane.

“Au kaantaninga bwa e bubuoka Peter ni kabaea ana neketai n taai nako,” e taku Tinau.

Peter bon natin te bitiobi. “Ai ngkam nako,” e taku Ryan. E mata n nanokaawaki n tara te tirotaam ao e katika ana neketai.

Ngke e roko ni mataroan te umwantabu Ryan, e namakina ae e ura moan bwa e bwainrang. Tera aia iango ataeinimwaane ake tabeman ngkana a nooria ni butiia te bitiobi? E aera ngkai e aki kona ni karaoia tinau ibukiu? E iangoia bwa e nang tannako. Ngke e a tuangaki naba iroun te bwai ae rau ma ni korakora bwa e na rin nako n te umwantabu ao e a nakoraoi naba.

E ikerake ao e a rin nako n te mataroa. E bon moantaai, ngaia are bon ti tabeman kaaina bwa te tia katanga te aokan ao tabeman aomata aika tekateka mai moa. Ao bon arei Bitiobi Anderson are e bobaraki, ni wareware ni booki aika tabu. N te tai naba arei ao e euta matana bitiobi n tara Ryan. E katuka ana boki aika tabu ao e a nakonako n te tabo n nakonako. E arora baina.

“Mauri, Ryan. Ko kukurei ngkai ko nang kabuta te toa n te bong aei?” e titiraki.

E taku Ryan, “Eng, ma iai au kangaanga”.

“Tai raraoma. A bane ni buannnano aomata ngkana aia moan tai. I toua waen temanna te aine ngke rorou ngkoe. Ma a bon bane n nakoraoi.”

“Tiaki,” e taku Ryan, ao e takina baina ma ana neketai.

“O. Nakomai irai,” e taku te bitiobi.

A uaia n otinako nakon te ru are mai moa. E reireina Ryan te bitiobi aron kabaean te kunikai, ao imwaain ae na reke ana tai Ryan ni iangoia, e a bon tara raoi n neketai. Bitiobi Anderson e aki bwainingare ke n taraia bwa e na riai ni kaman rabakau karaoana. E aki naba tara n ae nanoanga Ryan.

“I rangi ni kukurei ngkai ko tuangai bwa N na buokiko n aio,” e taku Bitiobi Anderson ngke a nako n oki n rin n te umwantabu.

E katoua atuna Ryan. E boni maama ma e a bebete riki ngkai e a nim ana neketai.

E katoka baina te bitiobi iaon angan Ryan. “Te uoote aio airon te utu ae bubura, ao I namakina te raunnano ngkana a tararuaki kaain au utu.” Imwiina e a taonako nako moa n te umwantabu.

Ngke e kabuta te toa Ryan, e noori ubu aika e kinai, aika moangare. E iangoa te bwai are e taekinna te bitiobi. Te uoote aio airon te utu ae bubura, ao bon te utu ae tangiria n riki bwa kaaina.