Te Burokuraem ibukin ana Auti ni Bwai te Bitiobi e Rikirake ni Kabuta te Aonaaba imwin 75 te Ririki

N rorona ae 16 te ririki, te ataeinimwane ae Glen L. Rudd e uota irikon te moa ae mena rawatana imarenan 800 ao 900 te bwauna (360 nakon 400 te kirokuraem) nakon ana titoa te Bitiobi i Salt Lake City ibukin tamana.

E mataku ngke e tabekaki rake uotana nako aon te tabo are e baireaki iai inanon te auti ae e rangi ni kinaki irouna. E a tia n ongo bwa te tera ae kakaraoaki inanona, ma e bon tuai n noria ni matana. E ataa te bwai ae riki nakoia angiin te utu inanon te titeiki are e mena iai; a mwaiti tamaia raoraona aika aki mwakuri ibukin te Kangaanga ae Korakora.

Ma n te bong anne e bon noora raoi te bwai are e riki. “I ataia bwa ti buokiia aika kainnano, aomata aika a tangira buokaia,” e ururing rikaki Unimwaane Rudd, temanna ae kaain te Kaitingaun ngkoa ao e kabanea 25 te ririki ni manatia n te Welfare Square, mwaangan te moan auti ni kaikobwai.

N ana tai n roronga, e kakoaua bwa inanoni korakoran raoi te Kangaanga ibukin kerikakin iokinibwai aei, e kania 70 te katebubua mwaane aika kaain ana titeiki aika akea aia mwakuri, ma te Ekaretia e anga te ibuobuoki. N te auti ni kaikobwai ao iai te tabo ibukin te kai ma te kooro itinaniku, te tabo ni mwakuri ibukin karaoan bwain nanon te auti, te tabo ibukin tininakin taian amwarake ma te tabo n itutu, ao te amwarake—angina bon taiani bwai n tangira mairouia aomata n aron tamana, ae iai ana tabo ibukin karaoan irikon te moa.

Aokati 19, 2007, boni kauringaan te ka 75 n ririki are e moa ni kaukaki iai te auti ni kaikobwai anne, ae ana moan titoa naba te Ekaretia. N te bong aei, te Ekaretia e kammwakuri 108 auti ni kaikobwai iaon Amerika ma Canada ni ikotaki ma 29 naba iaon Latin America. Iai naba auti ni kaikobwai n aba aika Argentina, Brazil, Chile, Colombia, The Dominican Republic, Ecuador, El Salvador, Quatemala, Honduras, Mexico, Paraquay, Peru, Uruquay ao Venezuela.

Irarikin aei, ao te Ekaretia e kammwakura 285 Tienta ibukin Karekean te Mwakuri, 44 titoa aika boraoi ae wakinaki iroun te Deseret Industries, ao 100 taian tienta ibukin te kaikobwai n te mweenga ni katobibia te aonaaba. Kaain te Ekaretia a bwaintangira ni karaoa te makuri n akea booia nakon taabo ni kamwengaraoi n te maan ae 623,153 te bong n te ririki ae 2006, ao 239,410 aomata ni kabuta te aonaaba ake a karekea te kataneiai ma aia mwakuri man korakoran aia Ibuobuoki ni kamwakuri aika Itiaki ni Boong aika Kaitira, n aron te rongorongo are karekeaki man te Welfare Services.

“I totoua te tabo aei irangaa te tai,” e taku Unimwaane Rudd, ngke e taetae ibukin ana moa n auti ni kaikobwai te Ekaretia ma aron bonganana. “E rangi ni kokorakora au namakin ibukina. Aio ai tibwa moana.”

“E baireaki imwiin te kakarabakau ae raoiroi bwa a riai ni waaki ni mwakuri ao ni karoia naba n te tai ae waetata,” e taku Unimwaane Rudd. “E kamatoaki te babaire bwa a na katea te auti ni kaikobwai ao n reireiniia aron kanoakina.”

Mataniwiin te titeiki a karekea te kariaiakaki bwa a na kabongana te auti ae bubura ae mena i Pierpont Avenue ao taani Ibuobuoki a katauraoa te auti. Kaain te Ekaretia n te Titeiki ae Pioneer a karaoa te aki mamatam n bongin te kaukuki ao a urakin aia bwaintangira nako nanona.

“Bon te bwai ae rangi ni kakukurei bwa ngke e a toki kanoakina, e bon tau mwaitin te amwarake ma bwaai riki ake a bwaintangiraki ni kaona te auti ni kaikobwai,” e koreia Unimwaane Rudd n ana ribooti ibukin te auti ni bwai. “Iai naba, te tamnei inanon te titeiki ni kabuta n aron are bon tuai man riki mai mwaina—te nano ni itangitangiri ae itiaki.”

Te auti ni kaikobwai, ae kanoa butin te waaki ae ti tebo ma are karaoia aobitin te kabwianibwai ngkoa, ae e kamwakuri iaan taian moan tua aika ti tebo bwa aia auti ni kaikobwai aika Itiaki ni Boong aika Kaitira ni boong aikai. “A kantaningaki aomata ni kabane bwa a na mwakuri. Anne ae uaiakinna te Ekaretia, bwa e na buokiia aomata bwa a na kona ni buokiia ibon irouia,” e katerea Unimwaane Rudd.

E taku Unimwaane Rudd bwa ngkai a rangi ni bwaka inanon kaboan te iokinabwai n te ririki 1930 tabun, a mwaiti taan ununiki aika aki kona ni kateirakeia taani mwakuri bwa a na buokiia ao angiia a ti taia naba are a kona mani katukui nikiraia bwa a na mka. Taani mwakuri n auti ni kaikobwai—ni ikotaki ma ana kauntira Beretitenti Lee ae Paul C. Child ao manatian te auti ni bwai ae Bishop Jesse M. Drury—a katabea Fred J. Heath ao tabeman riki mmwane aika akea aia mwakuri bwa a na reitaki ma taan ununiki, ao a boni mwaiti mwaane aika a kanakoaki nakon taian tabo n ununiki n te tabo ae Wasatch Front ni karoko i Idaho ae moan te raroa bwa a na rikoi uanikai are e a manga bon tibwauaki ma naake a mwakuri ni ibuobuoki.

Kaa aika bubura aika onrake n taiani uanikai ma marin tabo n ununiki riki tabeua a uoti nakon te auti ni kaikobwai. E mwaiti te uanikai ae karinaki n te tin, e ururing Unimwaane Rudd.

E taetae iaon teuana te bwai ae riiki ni mwaitin te anian (bwa e korakora bwaintangirakina) ao amwarake aika kawakinaki inanon te tiin bwa a kawakinaki ni borauataon te auti ni kaikobwai are e a karika iai bwaouan te tiiring. Kaai n totoko a kateaki bwa a na buoka te tiiring bwa e na aki bwaka. A iokinibwaiaki taian anian ibukin tabeua bwaai aika a kainnanoaki. Te auti ni kaikobwai e karekea te ibuobuoki. E taku naba, bwa akea ae a tia n aki butimwaeaki.

A bubuti n te tai ae tawe kaain te Salt Lake Titeiki bwa a kan reitaki ma aia auti ni kaikobwai kaain te Pioneer Titeiki, ao aua te ririki imwiina a kamwaingi bwaai nako nakon te auti ae bubura riki. A manga kateaki tabeua riki auti ni kaikobwai ibukin te Murray ao te Liberty Titeiki. N reitaki ma aei, aobiti ibukin taabo ni kateirake n te mwakuri a waaki inanon onoua titeiki ao imwiina a kabuta te waaki n te Salt Lake Valley.

“[Ana auti ni kaikobwai te Pioneer Titeiki] e riki bwa te banna ni katoto ibukin taian auti ni kaikobwai,” e taku Unimwaane Rudd, “n aron naba te auti ni bwai ae moan te bubura are e kateaki iroun te General Welfare Committee n 1938 ao 1939 aika tei n te tabo ae e teimatoa ni kinaki iai bwa te Welfare Square.”

Karekeaki man Church News, Aokati 25, 2007.