TE BOTONIANGO IBUKIN TE IWAWAAKI 2008
Nanomatoa ao N Aki Kona Ni Kamwaeieaki
“Bwaina te nanomatoa ao te aki kona ni kamwaeieaki, n tei n taainako ni mwakuri aika raraoi ” (Motiaea 5:15).
Tera ae nanonaki n te nanomatoa ao te aki kona ni kamwaeieaki? Te riki n nanomatoa bon te tei ni matoatoa ao n aki manga kona ni bitaki, te riki ni matoatoa n te koaua ao te motinnano, ao te riki ni karinerine ao ni kakaonimaki. Ti tebo naba, te riki n aki kona ni kamwaeieaki bon te riki ni imanono ao n aki kona ni kai kamwaingaki ke ni kaeieiaki. Te riki n nanomatoa ao te aki kona ni kamwaeieiaki n ana euangkerio Iesu Kristo bon te anganano ni Iriirakina, ma ngaia are tei n taainako ni mwakuri aika raraoi.
Katooto Irouia Ake A Nanomatoa ao Aki Kona Ni Kamwaeieaki
Iesu Kristo bon te bwaa ao aara ni koaua are ti bon riai ni kateitei iaona. Bon ara katooto ni koaua ae kororaoi are ngaia are e tei n nanomatoa ao n aki kona ni kamwaeieaki, n tei n taainako ni mwakuri aika a raraoi.
Iai naba ara burabeti aika maiu ao abotoro ake a tei ni matoatoa. N te aonaaba are a nooria tabeman bwa e rikirake n roo ao n aki kona ni koaua raoi iai, ara burabeti, Beretitenti Gordon B. Hinckley, e nora aei bwa te tai ae raoiroi bwa ti na maiu iai. E teimatoa n riki bwa te banna ae kakannato bwa temanna ae e nanomatoa ao n aki kona ni kamwaeieaki.
Iai naba ataeinimwaane ao ataeinaine aika tamaroa rinanon booki aika tabu ake a tei n nanomatoa ao n aki kona ni kamwaeieaki ni maiuia are a kakoauaa. N ana Boki Moomon ti reiakinna bwa Moronai bon te mwaane ae aintoa ma ni korakora; ao bon te mwaane ae kororaoi ana atatai; … te mwaane ae tamneina e bon kimwareirei n te kainaomataaki ma inaomatan abana … ; te mwaane ae onrake nanona n te karabwarabwa nakon te Atua … ; te mwaane ae korakora ana beku ibukin mweraoia ao kawakinakia ana botanaomata… . Bon te mwaane ae matoatoa n ana onimaki iroun Kristo” (Aramwa 48:11–13).
Aekara aron te aonaaba ngkana ngaira ni kabane ti kona n riki n ai arona? E tuangira koroboki aika tabu, “Bwa ngke arona bwa aomata ngkai, ao ngkoa, ao n taai aika a na roko a bane ni katotonga Moronai, nooria, a na bon mamaara mwaakan moone n aki toki; eng, ao te riaboro e na bon akea korakorana iaoia nanoia natia aomata” (Aramwa 48:17).
E ibuobuoki Moronai ma Ereman ao tabeman riki taari ake “a rang manena nakoia aomata” (Aramwa 48:19). E tei Ereman bwa mataniwiia te taanga ni buaka aika 2,000 rorobuaka n ataeinimwaane aika, ti tebo ma kairake aika ninikoria ni boong aikai, aika a “kokoaua man taua ma nanoia … , bwa a bon tia n reireinaki bwa a na kaawakin ana tua te Atua man nakonako ma te eti i matana” (Aramwa 53:20–21). Kairake ni mwaane aikai a koaua ao a tatauraoi ma nanoia.
Etita bon temanna naba te aomata ae kairiiri ni bannana ae e matoatoa ao ni imanono. E ataia ae e a tia ni karokoaki mai karawa nakon te tabo ao n te anga aei are e na kamaiuiia iai ana aomata. N aron are e tuanga Morotekai, “Ao ai antai ae ataiko b’a tao ko a roko n te aro ni uea i bukin te tai ae ai aron aei?” (Etita 4:14). E riki bwa bannan te onimaki ao te nanomwaaka.
Ti karekeia naba banna ni katobibira ake a nanomatoa, n aki kona ni kamwaeieaki, n tei n taainako ni mwakuri aika raraoi. A mwaiti mai buakora aika a nooria aia karo ni kaawakin aia berita aika tabu n te tembora ma te ungannano. Ti nooria mitinare rinanon te aonaaba ake a korakora n ongeaba ao ni kakaonimaki n aia mwakuri ni ibuobuoki. Mataniwi, taan ibuobuoki, taari, aine, ao raao a kona ni kaoti aekan anua aikai.
Ko na kanga ni ira aia katooto ao n nanomatoa ao n aki kona ni kamwaeieaki? Ngaira n tatabemaniira nako ti kona ni matoatoa ao ni imanono n ara ongeaba ao ni kororaoira. Ti riai ni keiaki mwaaka ni kabwanina ara kakaonimaki n te tataro, kamatebwaian koroboki aika tabu, kabwakaakin ara kabwianibwai, maiuakinan Tuan te Mauri, kaean ara bootaki nako, te riki ni itiaki n ara iango ao ara mwakuri, karinean te nakoanibonga, ao te riki n akoi nakoia ara utu ao raoraora.
Kakabwaia n te Riki n Nanomatoa ao Aki Kona Ni Kamwaeieaki
Te kibu ibukin te botoniango n te Iwawaaki ibukin 2008 e roko man kabanean ana kabwarabwara King Beniamina (tara Motiaea 2–5). A rangi n ringaki aomata n ana taeka ai ngaia are e a korakora bitakin nanoia: ai bon akea nanoia ni kan karaoa ae buakaka ma n teimatoa ni karaoa ae raoiroi (tara Motiaea 5:2). Ibukin te bitaki aei, e tuangia aomata King Beniamina bwa te Uea e na “kanikina [i aoia] bwa ana aomata, bwa [a] aonga ni kairaki nako karawa [ao] ni karekea te kamaiuaki ae akea tokina” (Motiaea 5:15).
Unimwaane David A. Bednar man aia Kooram Abotoro ake Tengaun ma Uoman e kabwarabwara bwa te taeka ae kanikina e kaineti nakon “te mwaaka ae kariaiakaki mairoun te Tamnei ae Raoiroi… . Ni butimwaea te ‘kamatoaki aei bwa ko a tia n ongeaba’ mairoun te Tamnei ae Raoiroi bon mwiin te kakaonimaki, ao te nanomatoa ni karinean berita aika tabu n te euangkerio.”1
Ngkai ti kateitei iroun Iesu Kristo ae aara ni koaua, ngaira naba bon taan karekei kakabwaia aika korakora. Ti kona ni karekea te bitaki n nano ae korakora, ni kabaeaki nakon te maiu ae akea tokina rinanon te mwaaka ae kariaiakaki mairoun te Tamnei ae Raoiroi, ao n tokina ti karekei bwaai ni kabane ake e karekei te Tia Kamaiu.