Tibwauaan Te Tai

Maiu Bon te Bwain Tangira; Iai te Babaire ibukin Maiu

Iroun Linda Christensen

“Nikabane aomata—mwaane ao aine—a karikaki ni katootongan te Atua. Ngaia n tatabeman nako bon naati mwaane ao aine aika tamnei aika tangiraki irouia aia karo ake i karawa, ao, n aron anne, ngaia n tatabemania bon iai aroia ae moani kakaawaki ao ni kakannato n aron bairean aroia n te aro n atua.” (“Te Utu: Te Katanoata Nakon te Aonaaba”).

Maiu bon te bwain tangira; iai te babaire ibukin maiu. Iai te kaantaninga ni maiu; e moanaki i karawa.

I rineia bwa N na nakon mweengau ae tamaroa n te aonaaba

Ni ukoukora otan te Atua ae na kairai man bungiakiu.

(“I Will Follow God’s Plan,” Children’s Songbook, 164–65)

Taeka aikai a reirei bwa ti maeka ma Tamara are i Karawa imwaain rokora n te aonaaba. Boni ngkoe natina. Tamara are i Karawa e tuanga Natina, Iesu Kristo, bwa e na karika te aonaaba. E katauraoaki te aonaaba bwa ko aonga n roko ni karekea rabwatam. Ko anganaki naba te inaomata, ao ko rineia bwa ko na nakon te aonaaba ao n reiakina aron irakin ana babaire Tamara are i Karawa.

Ko kona n reiakina taekan ana babaire Tamara are i Karawa inanon booki aika tabu. Iakobwa, te burabeti n Ana Boki Moomon, e reirei bwa Iesu Kristo e bon rineaki bwa ara Tia Kamaiu. E na roko ni maeka n te aonaaba, e na katoka buren te aonaaba iaona, ao ni karekea te kawai ibukia natin Tamara are i Karawa ni kabane bwa a na okiria. Ibukin Iesu, ao ko a kona n rairananom ao ni kabwaraaki am bure. E taku Iakobwa, “Ai korakorara ana baire Atuara!” (2 Nibwaai 9:13).

E tangiriko Tamara are i Karawa. E a tia n anganiko Ana taeka—booki aika tabu—bwa ko aonga n reiakina Ana babaire. Ngkana ko iriira Ana baire, ko na kukurei n te aonaaba ao n oki ni maeka ma Ngaia n te bong teuana.

Waaki ni Kukurei

Kouta te iteraniba R4, ao kanimmwa iaon te beeba ae matoatoa. Korei tamnei aikana a kataneaki n te rain ae roro, ao kanimwa te kunikai ae karekereke ke te kunnikai ae maten i akuna. Kabongana kabwarabwaran te tamnei are tabwanin iaon te burakiboti ae rabunaki n te kunikai ae karekereke bwa buokam ni kanimwi tamnei ni neia ae eti. Reiakina taekan te baire ni kamaiu, ao tibwaua are ko a tia n reiakinna ma am utu. Baireia bwa ko na karaoa te waaki ni kukurei aei bwa te reirei n tain botakin te utu n te tairiki.

Iango Ibukin Tibwauaan te Tai

Kaota tamnein te Moan Beretitentii ao Aia Kooram Abotoro Ake Tengaun ma Uoman ao katooton “Te Utu: Te Katanoata Nakon te Aonaaba” (Riaona, Okitobwa. 2004, 49). Marooroakin kakaawakin te katanoata, ao buokia ataei ni kamate nanoa te moan kibu n taeka n te kauoua ni barakarabe. Kabwarabwara bwa ngkai ti “karikaki ni katootongan te Atua” nanona bwa iai rabwatara ao ti kona n riki n aiaron Tamara are i Karawa. Marooroakini kakabwaia man karekean rabwatara. Tara My Gospel Standards: “N na kawakina au iango ao rabwatau bwa a na tabu ao n itiaki, ao N na aki iri karaoan bwaai aika buakaka ibukiu.” Taekini waaki aika kaota karinean rabwatara.
Taekina, “Iai bairean arou n te aro n atua,” ao titirakinia ataei bwa tera n aia iango ae nanonaki n aei. Marooroakini nanon taeka aika mairoun te atua (e roko mai roun te Atua) ao bairean arou (te baire ae kaman karaoaki). Baane wareka Ieremia 1:5. Katanea te rain iaan te ikota n taeka ae “Ngke I tuai ni karikiko … ao I ataiko” ao “I motika bukim bwa te burabeti nakoia botanaomata.” Katuruturua bwa Tamara are i Karawa e kina ao e tangira Ieremia n te maiu are i mwaain te maiu aei. Tibwauai katooto ibukia tabeman ake a kaman rineaki imwaain bungiakia bwa a na kakoroa nanon te mwakuri ae kakannato: Iotebwa Timiti (tara 2 Nibwaai 3:14–15), Gordon B. Hinckley (tara “Ukoukora Uean te Atua,” Riaona, Meei 2006, 82), ao Iesu Kristo (tara Moses 4:1–2). Kauringia ataei bwa iai aia mwakuri ae kakaawaki mai iroun Tamara are i Karawa ae a na kakoroa nanona ngkai a mena n te aonaaba. Titirakinia, “Tera n ami iango bwaai aika e tangiri Tamara are i Karawa bwa ti na karaoi?” Kaota am koaua bwa aomata n tatabemania nako bon iai bairean aroia mai iroun te Atua, ao rinean te eti e na buoka kakoroan nanona.