Koroboki aika Tabu a Tauraoi inanon te MP3 n te taetae n Spanish ao Portuguese

Ni kakoroan nanon te kouru ibukini katauraoan bwaai aika a kariaiakaki nakoia kaain te Ekaretia ni kabuta te aonaaba, a tauraoi ngkai nnen bwaai ni kaongora iaon booki aika tabu n taetae n Spanish ao n Portuguese n tein kawain te MP3 n ana Webu tiaite te Ekaretia. E kona n raweaki n akea boona.

Nnen bwaai ni kaongora aikai a katauraoi booki aika tabu nakon te botanaomata ae rikirake aika kabongana te bwai n ongora ni kabuta te aonaaba. Te rabakau ae boou aei e karekea te angaraoi nakoia ake a kan ongora kanoan Ana Boki Moomon, Doctrine and Covenants, ao te Pearl of Great Price. E karekea naba te anga n reirei teuana ibukiia kaain te Ekaretia.

Imwain Tebetembwa 2007, ti booki aika tabu n te taetae ni I-Matang aika tauraoi ibukiia ake a kabongana te MP3. Rob Jex, te tarekita ni kabutan waakin booki aika tabu ibukin te Curriculum Department, e kabwarabwara bwa te taetae n Spanish ao ni Portuguese a rineaki bwa a na karinaki ngkai boni ngaia taetae aika a mwaiti riki aika kabongana irouia kaain te Ekaretia irarikin te taetae ni I-Matang. Irarikina ao te ongora n taetae aikai a bon tia naba ni karaoaki nakon tein kawai riki tabeua, n te aro are e kai beebete riki te onoono nakon tein kawain te MP3.

E katuruturua bwa te nnen bwaai n te MP3 a katauraoaki bwa a na “kanakoraoa te kamatebwai ae korakora mwiina iaon ana taeka te Atua.”

Babaire ibukin kamwaitan riki nnen bwaai ni kaongora bwa a na tauraoi n ana Webu tiaite te Ekaretia a karini riki 28 taian taetae ake tabeua inanon tabeua riki te ririki aika imwaira. Te Tari Jex e taku bwa Ana Boki Moomon e tauraoi ni boretiaki n taetae aika 106 ao te (Baibara ae teniua kanoana) bootaki ni boki ake teniua n te mwaiti ae 49. E waaki nako te raitaeka nakon taeka aika a mwaiti riki n aron ana mwakuri te Ekaretia ni katauraoa ana taeka te Atua nakon te aonaaba.

Ngkana ko kan nooria ao kawara www.lds.org/audio.

Unimwaane L. Tom Perry man te Kooram n Abotoro ake Tengaun ma Uoman e kabwarabwara n tain te maungatabu ni kabuta n Eberi 2000: “Te rabakau ae boou e anganira te kakabwaiaki n taiani kukune aika boou ibukin katanoataan rongorongon te euangkerio rinanon te tiataraite, oin ara itoman n te Webu tiaite, te terewition, rerio ao rinanon naba te koroboki n ara maekatiin ao ara beeba ni kaongora. Aikai ni kabane a karikirakea ara anga ni katanoata, are e karikirakea naba ara konabwai ni butimwaei taian rongrongo ake a katanoataki” (“Thou Shalt Give Heed unto All His Words,” Riaona, Tiurai 2000, 27; Ensign, Mei 2000, 23).