N na Kanga n Nako n Taromauri?

N te 1997 I mwananga ibukin katabeau n te mwakuri ae 10 te bong maanna i La Victoria, Venezuela. Ngke I kunea bwa N na aki okira mweengau i Italy n te tai are I kaantaningaia, I a moanna ni kakaea aia umwantabu Aika Itiaki ni Boong Aika Kaitira bwa I aonga n taromauri n te Taabati.

N te bong teuana n tain te katawanou I karekea raraou te intinia ae kairake ae kaain Italy are e ata te tabo are e na reke iai te umwantabu i Maracay. E karaoa te mabe ibukiu. Iai te kaa ae I anganaki bwa N na kamanena, ma te kananokaawaki bwa I tuai karaoa au tutuo ibukin marurungiu are e kainnanoaki ibukin karekean te kariaiai ni kabuti kaa n te tai ae aki maan.

I bon boou n te aono aei, bon ti teutana au atatai n te taetae n Spain, ao a mwaiti aomata aika tuangai bwa N na aki toka ni bao ni mwamwananga ibukin te bootanaomata n ti ngai. I a kaitara ma te kanganga. Ngke e nang roko Taabatin te Itita, I rangi n tangiria ni kabooui au berita aika tabu man tauan te toa. Ngkana I aki kabuta te kaa, N na kanga ni ira te taromauri i Maracay? Ngkana I kabuta te kaa, I kona ni kateaki ibukina bwa akea au beeba ni kabuti kaa.

Ngke I a karaua ni iangoi au rinerine, e roko uringan taekan te onimaki are te ka-tebwimauoua: “Ti kakoaua ae ti riai n … ongotaeka, karineia, ao ni boutokaa te tua.” I mwaain ae N na kabuti kaa, I ataia bwa I riai n ongeaba n tuan te aba (tara D&C 58:21), e ngae ngkana nanona bwa N na aki ooa te taromauri.

Tabeua te bong imwiina ao I mwaing nakon te outero (hotel) are a mena iai angia raou ni mwakuri. Ni ingabongin te Taabati, imwiin nakonakou ao I okira te outero, ao I tabe naba ni kakaea angan are na kona iai ni ira te taromauri n te bong are imwiina. Ngke I rirarikin te tabo n titiraki, ao I bon kubanako ngke I noora katooton te Riaona n te taetae n Spain.

“Antai kaain te Ekaretia ikai?” I titiraki. E kaekaai temanna bwa te maekatin bon ana bwai temanna te tia mwakuri n te outero. Te tia butimwaaia aomata e nakon ana aobiti teuaai ao e kaoa bwa e na kaitibo ma ngai. Ngke ti marooroakin taekan te Ekaretia, te tari ae raoiroi aei e tuangai bwa iai te uoote ikai i La Victoria ao te umwantabu e bon kaan n te nakonako man te outero. E tuangai bwa e kukurei ni kaitibo ma ngai n te ingabong ao n irai nakon te taromauri. Ai kakukureira!

N tokina ao I bon tiku i La Victoria ibukin uoua te namwakaina. Inanon te tai anne ao a mwaiti raraou aika reke inanon au tai ni kukurei ni iriiri bootaki ao taian waaki. Tabeua te tai imwiin te Itita, I a karekea te kariaia n te tua bwa N na kabuti kaa, are I a kona iai n ira te maungatabu n te titeiki i Maracay.

Ngke I tiku i Venezuela, au koaua ibukin kakaawakin te ongeaaba nakon tuan te aba—e ngae ngke e angabuaka—e bon kamatoatoaki. I karekea naba au koaua bwa bwaai aika boretiaki n te Ekaretia bon te anga teuana ae tamaroa ibukin tibwauaan ana kakabwaia te Uea.