Te Bwai ae I Aki Kaantaningaia

N te reirei ae te kauarinan ao I irekereke ma te ataeinimwaane ae aki kukurei irouna au utu. N tokina, ibukin aia kairiribai, I a riribaia tariu ma mwaaneu ao I ribaia au karo. Te kananokaawaki, bwa I bon kakoaua bwa aki ata te bwai ae raoiroi ibukiu; bon ti ngai ae I ataia. A kanga n rangi n riba raou? E koaua, e taekini bwaai aika aki raraoi nakoiu n tabetai. Ma I kakoaua bwa e kamarakai ibukina bwa e tangirai. I namakinna bwa akea riki temanna ae mwannanoai.

Tiku inanon te reitaki ae I bwainikirinaki iai e bita aron au namakin ao au taratara. I un irouia aomata ni kabane n te tai teuana ao imwiina I a manga bon un irou. I aki iriira te taromauri, I kakararoaai ma aomata ake a tangirai raoi, ao I kararoaai ma bwain te tamnei, ao riki katangitangi aika raraoi. I maraki, ma I aki kan kakoaua.

Ngke I tabe ni kekeiaki ma maiu ao aomata ake i rarikiu, au tia reirei n te violin e butiai bwa N na buokia. Neiei bon te tia kairiri n te katangitangi n te Moanrian n ana uoote, are a tabe ni bairea kanoan te taromauri n toa man taian anene n te Moanrinan. Au tia reirei e titirakinai ngkana I kukurei ni katanga te violin ibukin anene tabeua. I aki kan karaoia, ma I bon kariaia. Ngke e anganai te anene, I tarataraia atuuia. Te kabanea n anene bon “Ngai Natin te Atua” (Anene n Taromauiri ma Aia Anene Ataei iteraniba 301).

I bon aki kukurei ibukina bwa I ataia ae korakora mwaakan te tamnei n te anene anne. E ngae n anne ma I moana reiakinan te anene, ma I kabanea au kona ni kararoa te Tamnei—I kataia ni kakea man au iango te anene ngkana I aki reiakinna man iangoa ribakia au utu.

Ngke e a roko te Taabati ibukin te buroukuraem aei, I rangi ni bareka tokina. N tain te buroukuraem, I kataia ni kaakea te Tamnei, ma ngke e a roko te anene ni kainin, e karaoa te bwai ae I aki kaantaningaia au tia reirei nte violin. E rairaki ao e kaoia kaain te taromauri bwa a na anene naba.

I katoka kain te violin iaon karaina ni katanga te moan nooti. I ringaki iroun te Tamnei n aro ae moan te korakora are a bwaro iai ranninmatau imwaain banen te kauoua n rain. E tuangai te Tamnei bwa N na kakauongo nakon taekan te anene ao n uringnga bwa ngai natin te Atua, I kakaawaki irouna n taai nako, ao I aki kainnanoa raou ae bwainikirinai. I kainnanoa te Atua.

Tangini bwana akekei—kairake ao kaaro—n anenea taekan te anene aika bebete a buokai ni ongo ao n ata nanon Ana taeka, aia taeka au utu, ao aia taeka taan kairiiri n te Ekaretia. Te katangitangi bon ngaia ae kona n uruana otangau are I kateia n totokoa mwaakan te Tamnei. Tamara are i Karawa e ataia ae e na buokau te katangitangi n ata te bwai ae kakaawaki. Boni ngai ae I kainnanoa te bitaki, ao tiaki au utu.

E ataia ao e atatai iaon mwaakan te katangitangi (tara D&C 25:12). E kona n tabekira rake ao ni kauka nanora ao ara iango nakon te Tamnei. N na bon kakaitau n taai nako ibukin te katangitang ao te tamnei are uotia naba nakon maiu n te bong aei.