Namakinan te Uoote ae Boou bwa Aron te “Mweenga”

N ririki aika bwakanako, ngke I a okira te ekaretia n te aro ae teimatoa imwiin te tai ae maan n aki kakaonimaki, I bon aki nanokokoraki bwa ni kabane aomata n te uoote a ataia ae bon te tia bure ae nanokawaki ae ukoukora te rairannano. E tara n ae raoiroiia nakoiu e bon otara ni moangareia ae takiakia ao aia koaua ae kakateke ao bwa e a tia bureu n anganai te karinanoaki ae kananoanga ni kabotauaki nako iai. Ngkana I tanrikaaki, I ataia ae aomata aika boou n aanga aika riki n aekaia nako a kona n namakina te kai noraki mairouia tabeman ke te kai namakinaaba. Ngke I nakonako inanon te auti n taromauri ae boou, ao n tekateka irarikia aomata aika ko aki kinaia, ao te anene man te boki n anene n taromauri n tii ngkoe e kona n riki bwa te bwai ni kabwaranano ngkana ko a onrake ma te namakin ae iai kabwakam.

Ngkai ngai te aine ae tuai iein ae akea natina, I a tia ni kunea bwa moanakin te maiu ae boou n te uoote ae boou e kona n riki bwa te bwai ae kakamaku. Ma te mwananga ni buannano n rinnako n te umwantabu ae kaainaki irouia ianena bon teuana te bwai ae I a tia n okiria ao ni manga okiria ngkai I a tia ni mwamwainging n taai aika bati ni iriira au mwakuri. Inanon ririki I a tia n reiakinna bwa N na tobwa te anua ae boou ibukiia kaain au uoote ao ni mwakuria bwa a na oneaki ianena aikai n riki bwa raao ao aomata aika ko kinaia aika kakateke n te tai teuana. Waakinan te mwakuri ae kaotaki ikai e kona ni buokira ngaira ni kabane bwa ti namakina te mweeraoi inanon te uoote teuana ke te mwaanga, n aki tabeakinna bwa ti mena iaa n te aonaaba.

Uringnga bwa bukin tera ngkai ti roko nakon te umwantabu. Te umwantabu bon te tabo ae tabu ao te tabo ae mano ibukiia natin Tamara are i Karawa bwa a na bootaki n Taromauriia. Ikekei are ti kona iai ni katiteuanaaki inanon te tataro, te anene, ke te kantaninga. Totokoa motikan taekaia tabemwaang ke ni iangoia bwa tabeman a motika taekam. E buokai bwa N na uringnga bwa ni kabane ake a kekeiaki n roko nakon te taromauri a bon kataia, n ai arou, bwa a na katoonga ana Mwakuri ni Kamaiu te Tia Kamaiu ao ni kawakina Ana tua.

Kaota aram. I a tia n reiakinna bwa N na ukoukoriia kaain te bitiobiriki ao ni kaota arau bwa te moan bwai n te aro are a na kona n ataia ae I boou. Imwiin anne, N na kakoauaa raoi bwa antai te tia kairiiri n aia bootaki kaain te ibonga ae rietata ibukina bwa e na katabeia ibonga aika rietata bwa au taan tia reirei n te mweenga. Ni ikotaki ma anne, ngkai ngai te aine, N na kakoaua raoi bwa N na kinaia bwa antai kaain te beretitentii n te Bootaki n Aine. Te kiraaka n te uoote e tangira naba au atureti ao nambwan au tareboon, ao e kona ni bubuti au rekooti man au uoote are mai mwaaina. Aomata aikai a tia ni kaotai nakoia kaain te uoote ake tabemwaang, ao ni buokai ni kakaea kawaiu nakon waaki ni kukurei n te uoote ao te titeiki, ao n anganai te boutoka ngkana I a tia n anganaki weteau.

N taai aika nako I tetekateka n te kabanea ni kaintekateka n te umwantabu, ni kaan ma te mataroa, n te aro are n te tai ae waekoa imwiin te tataro ni kainiin, N na kona ni waekoa n otinako imwaain ae e kataetaeai temanna ao n titiraki bwa antai ngai. Ma te rinnako ao te otinako man taian bootaki n taromauri ma matam ae taraa aontano—ke ni katoka matam n te mataroa n otinako—e karaoa ae uarereke ni buokiko bwa ko na moana taneiaim inanon te uoote ae boou.

Mwaninga nakon nanom, ao rooko iroun te aomata are i moam. Iobai ma naake a angareirei n te kiraati are ko kaea ke naake a taetae n tain bootakin te toa (ko kona ni kaitibo ma ngaiia ni kawain te umwantabu i tinaniku imwiina riki). Ngkana ko karekea am tai n taratara nako inanon te ruu imwaain ae ko tekateka, ko kona ni kaitibo ma aekakin aomata aika kakaokoro ao utu nako ni katoa te tai are ko kaea iai te taromauri. Kataia n uburake n tuatua anaakim nakon te waaki ni kukurei n te uoote ke te mwaanga. E beebete riki te rinnako ma raom nakon ae ko rinnako tii ngkoe. Bubuti ibukin araia kaain te uoote ke te mwaanga; e na bon buokiko n uringi aara. N te tai ae aki maan, ao aara ma uubu a na moana reitakiia, ao a na moanna n aki riki ni ianena aomata. Ao ai uana naba ma ngkoe.

Mwakuri ni Ibuobuoki. Kakaei kawai ake ko kona iai ni buokiia kaain rarikim ao kaain te uoote ke te mwaanga, ao ai arona naba ma tautauan te mataroa bwa e na uki ao ni kamauraia ngkana a na rinnako. (Aio e na buokia tabemwaang bwa a na ururingko.) Tiaina aram iaon te rinan ibukia taan tia ibuobuoki. Kakaea bwa antai ae aoraki ke ae tangira buokana ibukin te aoraki, ao kawariia. Butimwaai taian wewete. N aron ae riai, kariaia te bitiobi ke te beretitenti n te mwaanga bwa e na ataia bwa tera am konabwai ake ko kona n ibuobuoki iai i rarikin weteam, ao tuangnga ae e kona ni wareniko ngkana iai kainnano aika kaoti.

Bwaina te Tatauraoi ni Iriiri Bootaki. Bootakin te Reirei n Taabati ao te nakoanibonga ao te Bootaki n Aine a ira te kainibaire ae baireaki ibukin te reirei. Karekei booki n reirei, wareki reirei imwaain taiia ao bwaina te tatauraoi ni wareware ni booki aika tabu ke ni kamataatai moan tuua ake a reireiaki man tibwauakin te bwai ae ko a tia ni maiuakinna. Ngkai te taetae i mataia aomata e kona n roota korakoram, kanakoa maakum, ao bwaina te tatauraoi n tibwaua am koaua ibukin koauan te euangkerio.

Ukeuke ibukin ubu aika boou. Iraorao nakoia tabemwaang n te kawai are ko na tangiriia naba bwa a na iraorao nakoim. Imwiin te tai ae aki maan ko na kunea bwa ko a “aki manga riki bwa ai te ianena ke te iruwa, ma ai raoia aika itiaki, ao kaain batan te Atua” (I-Ebeto 2:19). Ko a mweengaraoi inanon am utu ae boou n te Ekaretia.

Utu inanon te uoote ke te mwaanga a bane n tauraoi ni butimwaai—akea ae kakatinanikuaki. E kona n aki reke ae ko na iraorao ma kaain te ekaretia ni kabane, ma ngkana ti tibwaua ara tangira n te euangkerio, ngkana a itiaki ara koaua, ngkana ti tatauraoi n buoka rawaawatan temanna, ao ngkana ti kakamwakura tangiran te kan beku ibukin te Uea rinanon buokakin temanna, bon ngaira te utu. I rangi ni kakaitau bwa e aki kakaawaki bwa I nakea n te aonaaba aei, ma uoote ao mwaanga ni kabane a kaainaki irouia natin Tamara are Karawa ake tabeman. I kona ni kakoaua ma te koaua bwa te uoote are I mena iai ngkai bon te kabanea ni kakukurei n tabo ibukiu.