E Angareirei Iesu Kristo ibukin Oin te Kantaninga ni Maiura iaon te Aba

Beretitenti Spencer W. Kimball (1895–1985): “A karikaki, aomata ni katotongan te Atua, a katukaki iaon te aba n rinanon te maiu ae mamate, ae bon te tai imarenan te maiu imwain te maiu ae mamate ao te maiu ae aki mamate.

“Ara moan karo, Atam ao Ewa, aki ongeaba nakon te Atua. Ni kanakin te uaanikai ae tabuaki, a riki ni mamate. N tokina, ngaia ao kanoaia ni kabane a bane n rootaki nakon te maiu ae mamate ao te mate n tamnei (te mate n ae mamate, bon raure nakon te rabwata ao te tamnei; ao te mate n tamnei, bon raure nakon te tamnei mai matan te Atua ao te mate ni kaineti ma bwaai ibukin te tamnei).

“Ibukin karekean te anga nakon Atam bwa e na manga kaoka aron moan tibwangana (ni mena imatan te Atua), e na kainnanoaki te mwakuri ni kamaiu ibukin ana aki ongotaeka. Inanon ana babaire te Atua mai karawa, e a tia ni baireaki ibukin te tia kabooira are e na kataea ana kai te mate ao, n rinanon te mangauti, e na kona n reke te manga ikotaki ibukin te tamnei ao te rabwata ibukia aomata ni kabane ake a maeka iaon te aba.

“Iesu ae te I-Natareta bon ngaia are, imwain karikan aonaaba, e a tia n rinean bwa e na roko nako aon te aba ni karaoa te mwakuri aei, n tokanikai iaon te mate n rabwata ae mamate” (“The True Way of Life and Salvation,” Ensign, Meei 1978, 6).

Beretitenti Ezra Taft Benson (1899–1994): “Ngke a katukaki Atam ao Ewa iaon te aba iroun Tamara are i Karawa, E karaoa aei ma oin te kantaninga ae a na reireinaki aroia ni manga oki nako Matana. Tamara e a tia ni berita ibukin te Tia Kamaiu ni kabooia man aroia ni bwaka. E angania te babaire ni kamaiu ao man tuangia bwa a na reireinia natia n rairinanoia ao n onimakina Iesu Kristo. Imwina riki, ao a tuangaki Atam ma kanoana iroun te Atua bwa a na bwabetitoaki, ao ni karekea te Tamnei ae Raoiroi, ao ni karaoi waaki ni katabuaki ibukin ana waaki Natin te Atua … , are e na ti karekeaki bwanininna inanon ana Auti te Uea” (“What I Hope You Will Teach Your Children about the Temple,” Tambuli, Eberi–Meei 1986, 4).

Julie B. Beck, beretitenti ni kabuta n te Bootaki n Aine: N te aonaaba n tamnei n te maiu imwain te maiu ae mamate, a karekei aia moan reirei aine ao a katauraoi n roko ikai nako aon te aba (tara D&C 138:56). A bon mena ibuakoia naake a karineaki ao ni kakannato (tara D&C 138:55) ake a ‘takaka ni kakatonga’ (Iobi 38:7) n tain karikan aon te aba ibukina bwa a na anganaki rabwataia ma aia tai ni karekean kataaki inanon te tabo ni mamate (tara Abraham 3:25). A tangiria ni ikotaki ni mwakuri ma naake a kororaoi ni kakoroi nanon aia kouru ake akea tokiia ake a na bon aki kona ni karekei n ti ngaia.

“Katabeaia aine e aki moanaki iaon te aba, ao e aki toki ikai. Te aine ae kakaawakina raoi nakoana n tina n te aonaaba aei e na karekea naba aei ibukin te aonaaba ae na roko, ao ‘bwa ike [ana] e mena iai ami bwai, e mena naba [neiei] iai nanomi’ (Mataio 6:21). Ni karikirakean te nano n tina, ataeinaine ao aine n tatabemania a katauraoia nakon aia mition mai karawa, ibukin te nakoa n tina ae akea tokina… .

“Inanon te waaki ae I ataia I a tia n noori nanoia tabeman tina ni koaua ni karaoan raoi katabeaia n aine ake aki kaikawaia oin natiia ibukin te maiu aei, bwa a bon ataia ae bwaai ni kabane a na bon roko n tokin taia ao bwa a kawenea iai aan te mwakuri ae moan te kakannato’ (tara D&C 64:32–33)” (“A ‘Mother Heart,’” Liahona, Meei 2004, 76).