Butimwaean te Rawawata ae Karina iroun te Ekaretia e Kaota te Birimwaka ma te Tauraoi ni Bitaki

Mwaingingin te aba i Peru ao te angibuaka i Mexico ni boong aika a itenatena imarenaia e kaota birimwakan ao tauraoin ana waaki te Ekaretia ni kaekai taian kainnano aika karina.

E taku Dennis Lifferth, te manatia ni kairiri n te Welfare Services Department n ana tabo te Ekaretia i Salt Lake City, “Mwakuri ni karawawata aika uoua aikai a katerea bwa mataniwiin te Ekaretia iai irouia te buoka ma te kona ni waetata ni kaitarai taiani kainnano aika karina ibukin kaboan ao kawakinan bwaai aika a tangiraki n te tabo are e reke iai te kabuanibwai.”

N te tai ae waetata imwiin te angibuaka ae roko korakorana n 8.0 n te aba ae Peru n Aokati 2007—te kabanea ni kamamate ni mwaingin te aba ae e orea te aba aei inanon 35 te ririki n nako—mataniwiin te Ekaretia n te tabo aei a moanna ni babairea te bwai ae a rangi ni kainnanoia kaain Peru, tiaki tii ibukiia Aomata Aika Itiaki ni Boong Aika Kaitira, n te kawa ae Pisco ae rangi ni korakora oreana.

Ngke e a waakina kawaina nako Peru te wanikiba ni kaako ae te 747 ae kanoaki i Salt Lake City ma bwaai n aoraki aika a rangi ni kainnanoaki, bwaai ni korokoro ibukin te aoraki, baoki n amwarake ibukiia utu, bwaai n tararua ibukin te mauri ao taboreen, Unimwaane Walter F. Gonzalez Beretitentii man te Itingaun, te Beretitenti ngkoa n te Aono i Maeao i Amerika Maiaki, a kaira te babaire ibukin kaboan taian amwarake n te tabo anne ao a kauki aua auti ni bootaki ibukin te katantan.

Uoua te bong imwin te mwainging aei, Unimwaane Gonzalez, e tei ibukin te Ekaretia n te bootaki ae mimitong are a bwaintangiraaki iai taiani burangketi ae raka iaon 8,000 mwaitiia nakon Pilar Nores de Garcia, te moan aine n te aba ae Peru, bwa a na tibwatibwaki nakoia ake a rootaki n te kainnano imwiin te mwainging.

Imwiin te mwainging aei, te bwai ae kakamaku ae boou e a manga waakina kawaina nako Mexico. Te angibuaka ae arana Dean e kantaningaki bwa e na orea Cancun, ngaia are mataniwiin te Ekaretia n te tabo ae kaan ma are e kantaningaki bwa e na oreia te angibuaka, a katauraoi taian amwarake ma bwaai ni mwakuri aika kainnanoaki. Ngke e a manga bita kawaina te angibuaka ni kaitara Yucatan Peninsula, a manga kamwaing bwaai ake a tia ni katauraoi mataniwiin te Ekaretia nakon te tabo teuana i Chetumal. E a manga kaoka kawaina te angibuaka n nako buakonikai ngaia are te kateniua n tabo e a manga katauraoaki.

Te rabakau ae boou e a tia ni karaoa tabena ae kakaawaki n te katauraoi ibukin kangaanga aika karina, e kabwarabwara Rick Foster, te tia kairiri n te bootaki ni babaire man te Welfare Services Department n ana tabo kautuun te Ekaretia. Ngkai ae mwaiti riki nakon taai ake mai mwaina, kabuanibwai n aekakin aei a kona n ataaki—n tabetai a kona ni katerea te tabo are e na roko mai iai.

E taku te Tari Foster, “Ni karekean te rongrongo aei e anganiia mataniwiin te Ekaretia ma taani mwakuri ao taani ibubuoki n taabo ake a uakaan ma te tabo are e kanamakinaki bwa nnen te angibuaka bwa a na moana te katauraoi ibukin kabooan taiani bwai ake a kainnanoaki ao kamwaingaia aomata nakon taian tabo ni kamanomano.”