Te Kabanea Ni Mangori n Tia Kairiiri?
Te riikan ae boou e reireinai—ana bitiobi—bwa tera ae nanonna te Tia Kamaiu ngke E kangai, “Bwa ane mangori riki i buakomi ni kabaneingkami, ao e kakanato” (Ruka 9:48).
Ara uoote e kainnanoa te beretitenti ae boou ibukin te kooram n rikan. Ngai ma au kauntira tiaki toki ni katorobubua n tain ara boowi ni bitiobiriki, n aron ae ti bon kakaraoia, ni karekea ana kariaia te Uea iaon aei ao n nakoa riki tabeua.
Man namakinan koauan te Tamnei, I karekea au marooro ma Víctor Leonardo Jiménez Gonzáles, te ataeinimwaane ae a tibwa koro 12 ana ririki ao man tia n riki bwa te tia koroboki n te kooram n rikan.
N tain te maroro, I titirakina Víctor ibukin nakoana ae ngkai ao tera ana namakin iai.
“I raraoma, Bitiobi,” e kaeka. “I rangi n tabeaianga iai.”
“Bukin tera ae ko tabeaianga?”
“I tangiriia rikan ni kabane bwa ana taromauri. Ngaia n te bong aei iaon kawaiu n nakomai, I nakon ana auti Nicholas ao Anthony man kautiia, ao imwiina I a manga nakon Jimmy ao Luis n tuangia bwa ana roko. I bon rangi n raraoma, Bitiobi,” e taku Víctor.
I bon rangin ni mimi n aron te bwai are taekinna bwa te tia koroboki n te kooram n rikan ae 12 ana ririki e na rangi n tabeaianga irouia kaain ana kooram ake tabeman.
“I roko ikai bwa N na ibuobuoki,” e reitia nako, “ao I tangiria ni karaoia raoi, ma ngai te kabanea ni mangori n tia kairiiri.”
“Tera ae ko nanona n ae ‘te kabanea ni mangori n tia kairiiri’?” I titiraki.
“Bukina bwa ngai te tia koroboki. Tiaki ngai te beretitenti ke te kauntira. Ngai te tia koroboki, ao anne ae karikai bwa te kabanea ni mangori n tia kairiiri. Ma a riai ni mena ikai rikan ma aki roko, ngaia are I a nako ni weteia ibukina bwa aio te tabo ae a riai ni mena iai. I aki ataia bwa bukin tera ngkai aki roko. Ma I bon riai ni weteia, Bitiobi!”
A bon aki kona n tauaki ranin matau, ao a tinako man matau. I taetae ma te rawawata, I taku, “Ko a tia ni kauringai bwa tera bukina ngkai I weteaki bwa te Bitiobi. Bwa N na riai n tabe ibukiia tabeman, ni kawariia man tabeakiniia n aron are e karaoia te Uea Beniamina. Ngkana ti ibuobuoki ibukiia tabeman ao ti bon ibuobuoki naba ibukin te Atua. Tiaki ngkoe te kabanea ni mangori n tia kairiiri. Ni kabane aomata ake a mwakuri n ibuobuoki a karaoa te mwakuri ae kakaawaki nakon Tamara are i Karawa ao Ana Ekaretia.”
N aei, ao e taku, “Anne ae I a tia n reiakinna mairoun tamau. Ao ngkai I noriko n tang, ao I uringa te tai aei ngke e taetae nakoiu—-e bon tang ngke e taetae nakoiu, ‘Ngkana iai katabeakim, ao ko riai ni karaoia raoi.’”
Ranin matau a kamarurunga tamneiu, ao ana taeka te ataeinimwaane e kamarurunga au ururing. I uringa kakaawakin natin Tamara are i Karawa ngke I nora aron te ataeinimwaane aei ni kaota aron kakaawakiia n tatabemania nako kaain ana kooram.
I kanakoa te wewete ibukin te beretienti n aia kooram rikan nakon Víctor. N ana kaeka e taku, “Ngkai n nang mwakuri korakora. N na aki manga karawawatako, Bitiobi.”
Ao ngkai, tabeua te tai imwiina, e wawanako ranin matau ngkana I uringa te marooro ae iaki kona ni mwaninga aei. I atai ana konabwai aika raraoi te ataeinimwaane aei. E mataata bwa e na nakoraoi aron ana waaki nakon taai aika ana roko n te aro ae aki bibitaki, ao ana taratara ibukin te bwai ae kakaawaki.