E Mena Ikai Ngkoa Riaai?
E kaotaki raoi tamnein mwanangan Riaai ma ana utu n aron bwaai ake a riki nakoia n aron karawawata ao tokanikaia imwiin kitanan mweengaia i Ierutarem ao ni mwananga rinanon te rereua. Inanon am tai ni wareware, ko namakinna bwa ko kona n ota ao n reitaki ma ngaia n aron bwaai ake a tia n riki nakoia. Ngkai ti aki kona ni katanea raoi mwiin kawaia, ti bon teimatoa ni kona ni karekea aron iangoan te aono ni kabane ake a tia ni mwananga iaona Riaai ma ana utu ao, ni karaoan aei, e karikirakea riki te kakaitau ibukin te bwai are a tia n rinanona. N te kakaei ae ngkai naba e anganira raoi te tamnei ae ota ibukin aono aikai ao aron waaki ake a tia n aitara ma ngaai ana koraki Riaai.1
Imwin kitanan Ierutarem iroun Riaai ma ana utu, a toki n te tabo ae a aranna bwa te “tawaana ae Remuera” (1 Nibwaai 2:14), are bon teniua-bongina n te rianna man tabokeken te Taari ae Uraura mai meang mainiku (tara 1 Nibwaai 2:5–6). Te tawaana e mena “irarikin te karaanga n ran,” are e aranna Riaai bwa Reimwan ao ae bon “reitinako n rangaa” (1 Nibwaai 2:6, 9). E arana te tawaana Riaai bwa Remuera “matoatoa ao n teimatoa n nene, ao n aki kakai kamwaeaki” (1 Nibwaai 2:10).
A reitanako mwanangaia Riaai ma ana utu, “ni mwananga ni kuri n titebo ma tein kawaia are n te moan tai” inanon “boong aika mwaiti” (1 Nibwaai 16:33). Imwiina e mate Itimaera ao e “taunaki n te tabo ae aranaki bwa Naom” (kibu 34). Te tabo ae kaotaki tamneina ikai e mena n te aono ae kabuta ike a tia ni mwamwananga iai te koraki ao inanon ririki aika mwaiti a tia n reitaki ma te ara ae Naom ma arona nako aika a kakaokoro.
Imwiin kitanan Naom, a mwananga Riaai ma ana utu “ao a mwananga nako mainiku man te tai arei. Ao [ngaia] a mwananga ao n rinanon te korakai ae korakora inanon te rereua” (1 Nibwaai 17:1).
N irakin te kawai ae nako mainiku, a na tia n roko ana koraki Riaai n tabokeken Arabia ni mataniwin te aba are maiaki mainiku. Tabeua taabo iaon mataniwin te aba aei a kaotaki ikai. Kioina bwa a tibwa tia n rinanon te aba ae rereua man aki karikiuaa, ngaia are a bon arana te tabo ae aron aei bwa te Aba ni Mari, “ibukin mwaitin uaan kaai ma karewen te manibeeru iai” (1 Nibwaai 17:5).