ភ្នែករបស់មនុស្សខ្វាក់ នឹងមើលឃើញ
ដោយ អែលឌើរ លីន ជី រ៉ូប៊ីន
ក្នុងគណៈប្រធាននៃពួកចិតសិបនាក់
យើងអាចពិចារណាពីការចេញមកនៃព្រះគម្ពីរមរមន ទុកជាការស្តារឡើងវិញដ៏អស្ចារ្យនៃចក្ខុវិស័យខាងវិញ្ញាណ ។
ខាងលើបំផុត ៖ រូបភាពដកស្រង់មកពី ព្យាការីអេសាយព្យាករពីការប្រសូតរបស់ព្រះគ្រីស្ទ ដោយ ហារី អែលឌើរសុន
អេសាយបានព្យាករថា នៅថ្ងៃចុងក្រោយ ព្រះអម្ចាស់នឹងបន្តធ្វើ « ការណ៍ យ៉ាងអស្ចារ្យ ហើយចំឡែក » ហើយលោកបានព្យាករពីការចេញមកនៃព្រះគម្ពីរមរមនដោយថ្លែងថា « ភ្នែករបស់មនុស្សខ្វាក់នឹងមើលឃើញ ពីក្នុងសភាពជាងងឹត ហើយសូន្យសុង » ( អេសាយ ២៩:១៤, ១៨ ) ។
« សភាពល្ងិតល្ងង់ »
នៅក្នុងសម័យពីមុនការនិមិត្តដំបូងដ៏រុងរឿង ការរំជើបរំជួលខាងសាសនានៅភូមិ ម៉ែនឆែសស្ទើរ រដ្ឋ ញូវ យ៉ក ស.រ.អា. មានភាពច្របូកច្របល់យ៉ាងខ្លាំង ។ យ៉ូសែប ស៊្មីធបានថ្លែងថា « ការរំជួល និង ការឈ្លោះប្រកែកគ្នាជាខ្លាំងក្នុងចំណោមបក្សពួកផ្សេងៗ ដល់ម៉្លេះបានជាពិបាកដល់ជនដូចរូបខ្ញុំ … ឲ្យចេះ សម្រេចចិត្តថានរណាមួយត្រូវ ហើយនរណាមួយខុសនោះឡើយ » ( យ៉ូសែប ស្ម៊ីធ–ប្រវត្តិ ១:៨ ) ។
ព្រះគម្ពីរមរមននិយាយសំដៅលើការរំជើបរំជួលពីមុនការស្តារឡើងវិញនេះថាជា «សភាពល្ងិតល្ងង់ … ដោយមកពីភាគដ៏ច្បាស់ និង ពិសេសទាំងប៉ុន្មាននៃដំណឹងល្អរបស់កូនចៀម ត្រូវបានយកចេញដោយសាសនាចក្រដ៏គួរខ្ពើមឆ្អើម » ( នីហ្វៃទី ១ ១៣:៣២ការសង្កត់ធ្ងន់ត្រូវបានបន្ថែម ) ។
ជាច្រើនសតវត្សរ៍មកហើយ ចក្ខុវិស័យខាងវិញ្ញាណដ៏ច្បាស់បានត្រូវផ្តល់ឲ្យតាមរយៈ ភាពស្រពិចស្រពិល នៃព្រះគម្ពីរប៊ីប ដោយសារភាគដ៏ច្បាស់ និង ពិសេសៗទាំងប៉ុន្មានបានបាត់បង់ ពេលខ្លះបាត់បង់ដោយអចេតនាតាមរយៈការបកប្រែដោយខុសឆ្គង ហើយពេលខ្លះបាត់បង់ដោយចេតនាតាមរយៈការកែប្រែដ៏ពុករលួយ « ដែលពួកគេអាចធ្វើដើម្បីបង្ខូចផ្លូវដ៏ត្រឹមត្រូវទាំងឡាយនៃព្រះអម្ចាស់ ដើម្បីឲ្យពួកគេអាច ធ្វើឲ្យភ្នែកទាំងឡាយខ្វាក់ ហើយធ្វើឲ្យចិត្តទាំងឡាយនៃកូនចៅមនុស្សរឹងរូស » ( នីហ្វៃទី ១ ១៣:២៧ការសង្កត់ធ្ងន់ត្រូវបានបន្ថែម ) ។
« ពីដើមខ្ញុំខ្វាក់ តែឥឡូវនេះខ្ញុំមើលឃើញ » ( យ៉ូហាន ៩:២៥ )
ការណ៍ដ៏អស្ចារ្យបំផុតមួយរបស់ព្រះអង្គសង្គ្រោះ គឺការស្តារឡើងវិញនូវចក្ខុវិស័យដល់ភ្នែកដែលខ្វាក់នោះ ។១ ប៉ុន្តែបេសកកម្ម និង អព្ភូតហេតុដ៏សំខាន់ជាងនេះទៀតរបស់ព្រះអង្គសង្គ្រោះនោះគឺការព្យាបាលភាពខ្វាក់ខាងវិញ្ញាណ ។ ទ្រង់បានបន្ទូលថា « ខ្ញុំបានមកក្នុងលោកីយ៍នេះ ឲ្យពួកអ្នកដែលមើលមិនឃើញបានភ្លឺឡើង » ( យ៉ូហាន ៩:៣៩ ) ។
ដោយប្រើការប្រៀបប្រដូចរបស់អេសាយ និង ការនិមិត្តនៃភាពខ្វាក់ខាងវិញ្ញាណរបស់នីហ្វៃនៅក្នុងសម័យចុងក្រោយនេះ យើងអាចពិចារណាពីការចេញមកនៃព្រះគម្ពីរមរមន ថាជាការស្តារឡើងវិញដ៏អស្ចារ្យនៃចក្ខុវិស័យខាងវិញ្ញាណ ។
« ហើយព្រះអម្ចាស់ដ៏ជាព្រះ ទ្រង់ក៏មិនព្រមឲ្យពួកសាសន៏ដទៃបន្តស្ថិតនៅក្នុងសភាព ល្ងិតល្ងង់តទៅទៀតឡើយ ។ …
« … យើងនឹងមេត្តាដល់ពួកសាសន៍ដទៃនៅថ្ងៃនោះ គឺដរាបដល់យើងនឹងនាំចេញមកដល់ពួកគេ ដោយអំណាចយើងផ្ទាល់ នូវភាគច្រើននៃដំណឹងល្អរបស់យើង ។ …
« ដ្បិតមើលចុះកូនចៀមមានព្រះបន្ទូលថា ៖ យើងនឹងសម្តែងខ្លួនឲ្យពូជអ្នកឃើញ ដើម្បីឲ្យពួកគេសរសេរអំពីអ្វីៗជាច្រើន ដែលយើងនឹងធ្វើការងារបម្រើដល់ពួកគេ … [ ហើយ ] សេចក្តីទាំងនេះនឹងត្រូវបានលាក់ទុក ដើម្បីឲ្យបានចេញមកដល់ពួកសាសន៍ដទៃដោយអំណោយទាន និង ព្រះចេស្តានៃកូនចៀម ។
« កូនចៀមមានព្រះបន្ទូលថា ទាំងដំណឹងល្អ និង ថ្ម ហើយនឹងសេចក្តីសង្គ្រោះរបស់យើង នឹងត្រូវបានសរសេរទុកនៅក្នុងគម្ពីរទាំងនេះ ។
« … បញ្ជីចុងក្រោយទាំងឡាយនេះ … នឹងតាំងនូវសេចក្តីពិតអំពីគម្ពីរមុន ។ … បញ្ជីទាំងពីរនឹងត្រូវបានតាំងឡើងជារបស់តែមួយ » ( នីហ្វៃទី ១ ១៣:៣២, ៣៤–៣៦, ៤០–៤១ការសង្កត់ធ្ងន់ត្រូវបានបន្ថែម )—ចេញមករួមគ្នាដើម្បីជួយអ្នកឲ្យឃើញពីសេចក្តីពិត ។
បញ្ជីទាំងពីរ « នឹងត្រូវបានតាំងឡើងជារបស់តែមួយ » គឺជារបៀបមួយដែលភ្នែកទាំងពីរមើលឃើញ ឬ ដំណើរការ ។ ដោយសារខ្ញុំមានជំងឺទឹកដក់ក្នុងភ្នែក នោះខ្ញុំត្រូវតែបន្តក់ថ្នាំដាក់ភ្នែកខ្ញុំទាំងសងខាងពីរដងក្នុងមួយថ្ងៃដើម្បីការពារកុំឲ្យខ្វាក់ភ្នែក ។ ពីមុនវេជ្ជបណ្ឌិតបានរកឃើញថាខ្ញុំមានជំងឺទឹកដក់ក្នុងភ្នែក នោះភ្នែកម្ខាងរបស់ខ្ញុំបានមើលឃើញដោយស្រវាំងទៅហើយ ។ ខ្ញុំមានអំណរគុណយ៉ាងខ្លាំងចំពោះថ្នាំសម័យទំនើបនេះ ដែលធ្វើឲ្យភ្នែកខ្ញុំមិនខ្វក់ ។ ខ្ញុំមានអំណរគុណផងដែរចំពោះភ្នែកទីពីរដ៏ល្អរបស់ខ្ញុំ ដែលវាជួយរក្សាតុល្យភាពនៃភ្នែកម្ខាងទៀតកុំឲ្យចុះអន់ខ្សោយ ។ រឿងប្រដូចនៃភ្នែកទាំងពីរនេះមានទំនាក់ទំនងយ៉ាងជ្រាលជ្រៅ និង ផ្ទាល់ខ្លួនចំពោះខ្ញុំ ។
ការវិភាគជាច្រើននៃវិទ្យាសាស្ត្រ បង្ហាញពីគុណសម្បត្តិនៃការមានភ្នែកពីរជាជាងមានភ្នែកតែមួយ ។ ខ្ញុំនឹងបង្ហាញគុណសម្បត្តិទាំងប្រាំមួយនេះ និង រឿងប្រៀបប្រដូចខាងវិញ្ញាណនៃគុណសម្បត្តិទាំងនោះ ជាមួយនឹងព្រះគម្ពីរមរមនដែលជា សាក្សីជាក់នឹងភ្នែក ទីពីរនៃព្រះយេស៊ូវគ្រីស្ទនៅក្នុង ការស្តារឡើងវិញ នៃចក្ខុវិស័យខាងវិញ្ញាណដល់ពិភពលោកនេះ ។
១. ភ្នែកទាំងសងខាងបង្កើនដែននៃគំហើញ និង ភាពឃើញច្បាស់
មនុស្សមានដែនគំហើញជាអតិបរមាប្រមាណជា ១៩០ ដឺក្រេដោយប្រើភ្នែកទាំងគូ ប្រហែលជា ១២០ ដឺក្រេនៅពេលដែនគំហើញនៃភ្នែកទាំងពីរត្រួតស៊ីគ្នា ឬ ឃើញដោយភ្នែកទាំងពីរ ។ លើសពីដែនគំហើញដែលប្រសព្វគ្នា ភ្នែកម្ខាងៗក៏អាចមានដែនគំហើញនឹងកន្ទុយភ្នែកយ៉ាងពិសេសរបស់វាដែរ ។២
បន្ទាប់ពីច្រើនសតវត្សរ៍នៃការបាត់បង់នូវភាពច្បាស់ និង ពិសេសៗមក ព្រះគម្ពីរប៊ីបបានរីករាយនឹងចក្ខុវិស័យដ៏ល្អឥតខ្ចោះតិចតួចណាស់ ។ ការចេញមកនៃព្រះគម្ពីរមរមនជាមួយនឹងចក្ខុវិស័យដ៏ល្អឥតខ្ចោះរបស់វា ពុំគ្រាន់តែបង្កើននូវដែនគំហើញខាងវិញ្ញាណប៉ុណ្ណោះទេ ប៉ុន្តែថែមទាំងបានផ្តល់នូវភាពច្បាស់លាស់ដ៏ចាំបាច់ជាច្រើន ទៅលើផ្នែកត្រួតស៊ីគ្នានៃភ្នែកខាងវិញ្ញាណទាំងពីរ ឬ ដែនគំហើញនៃភ្នែកទាំងគូ ( សូមមើលរូបភាពទី ១ )—ដែលយើងហៅតាមព្រះគម្ពីរថាជាច្បាប់នៃស្មរបន្ទាល់ពីរនាក់ ( សូមមើល ម៉ាថាយ ១៨:១៦; អេធើរ ៥:៤; គ. និង ស. ៦:២៨ ) ។
ដែនគំហើញត្រួតស៊ីគ្នា ឬ គំហើញត្រួតស៊ីគ្នាដោយភ្នែកទាំងពីរ បង្កើនលទ្ធភាពដើម្បីមើលឃើញវត្ថុដែលព្រាលៗនោះបានច្បាស់ ។៣ យើងមើលឃើញច្បាស់ជាងនៅពេលរូបភាពផ្សេងៗដែលភ្នែកនិមួយៗនោះមើលឃើញ ផ្គុំគ្នាទៅជារូបភាពតែមួយ ដោយផ្តល់នូវចំណុចរួមមួយនៃ អ័ក្សគំហើញ៤ ហេតុដូច្នោះហើយវាលុបបំបាត់ចោលនូវ « ការរំជួល និង ការឈ្លោះប្រកែកគ្នា » ដែលធ្វើឲ្យយ៉ូសែបវ័យក្មេងសុញគំនិតនោះ ( សូមមើល យ៉ូសែប ស្ម៊ីធ–ប្រវត្តិ ១:៨ ) ។
ការពិតនោះគឺថា មានភ្នែកទាំងគូគឺប្រសើរជាងមានភ្នែកតែម្ខាង ដែលជាការពិតដ៏សាកល និង ជាក់ស្តែង ដែលព្យាការីអេសាយប្រហែលជាពុំអាចរើសយកការប្រៀបប្រដូចណាទៀតបានសម្រាប់ការទទួលស្គាល់ទូទាំងពិភពលោក ដែលថា ៖ « ភ្នែករបស់មនុស្សខ្វាក់នឹងមើលឃើញ »( អេសាយ ២៩:១៨) ។ យើងសង្ឃឹមថាបច្ចុប្បន្ននេះអស់អ្នកដែលមើលឃើញដោយភ្នែកខាងវិញ្ញាណតែម្ខាង គឺព្រះគម្ពីរប៊ីប នោះនឹងទទួលស្គាល់ពីប្រាជ្ញានៃការពុំបដិសេធព្រះគម្ពីរមរមនដែលជាសាក្សីជាក់នឹងភ្នែកទីពីរនៃព្រះយេស៊ូវគ្រីស្ទ ពីមុនពួកគេសាកល្បងវាសិន ។ ពួកគេនឹងដឹងថា « បន្ទះឈើរបស់ពួកយូដា » និង « បន្ទះឈើរបស់ពួកយ៉ូសែប » ( អេសេគាល ៣៧:១៩ ) ផ្គុំគ្នាជាភ្នែកទាំងគូដែលបញ្ចូលគ្នាយ៉ាងល្អឥតខ្ចោះ ហើយមានភាពច្បាស់រួមគ្នា—ជា បទពិសោធន៍ គួរឲ្យអស្ចារ្យពេកក្រៃ !
២. ការចាប់យកគំហើញ—ការចៀសវាងពីការឆបោក
« គំហើញនៃភ្នែកទាំងពីរ… ធ្វើឲ្យមនុស្សដើរឆ្លងកាត់ ឬ ដើរជុំវិញឧបសគ្គនានាដោយល្បឿនកាន់តែលឿន និង កាន់តែមានទំនុកចិត្ត » ដោយសារការចាប់យកគំហើញមានសភាពកាន់តែច្បាស់ ។៥ ឧទាហរណ៍មួយអំពីការចាប់យកគំហើញយ៉ាងច្បាស់នៃផ្ទៃសើរៗ គឺត្រូវបានបង្ហាញនៅក្នុងរូបភាព 3-D នៃកែវយឹតលើរូបភាពសាមញ្ញមួយ ( សូមមើលរូបភាពទី ២ ក ) ។
ចំពោះសត្វ ភ្នែកទាំងពីររបស់វាផ្តល់នូវសក្តានុពលនៃ ការចាប់យកគំហើញ នៃអាហារ ឬ ចាប់យកគំហើញយ៉ាងច្បាស់ ហើយមានលទ្ធភាពដូចជា3-D ហេតុដូច្នោះហើយវា « ដឹងពីការលាក់ខ្លួននៃ [ ពួកសត្វកាចសាហាវ ] »៦ ( សូមមើលរូបភាព ២ ខ ) ។
រូបថតសត្វពស់ © iStock/Thinkstock
ព្រះគម្ពីរមរមនបានផ្តល់ការការពារដល់ពិភពលោកនេះស្រដៀងនឹងការណ៍នេះផងដែរ ដោយការស្តារឡើងវិញនូវភាពច្បាស់លាស់ និង ការញ្ញាណដឹងយ៉ាងជ្រាលជ្រៅពីព្រះតាមរយៈដែនគំហើញដ៏ច្បាស់នៃកែវយឹតខាងវិញ្ញាណ ដោយធ្វើឲ្យយើងអាចចៀសផុតពីការបន្លំ និង ការឆបោករបស់សាតាំង ។ លោកបានណែនាំពីការភាន់ច្រឡំនោះបានយ៉ាងឈ្លាសវៃ តាមរយៈការបកស្រាយផ្ទុយពីអត្ថន័យជាច្រើននៃវគ្គបទគម្ពីរនៃព្រះគម្ពីរប៊ីប ។ ព្រះគម្ពីរមរមនបានបំបែកភាពស្រពិចស្រពិលរបស់គម្ពីរប៊ីប ដោយការបញ្ជាក់យ៉ាងច្បាស់ដូចកែវចរណៃ « ចំពោះការផ្ចាញ់ផ្ចាល់នូវគោលលទ្ធិក្លែងក្លាយទាំងឡាយ » ( នីហ្វៃទី ២ ៣:១២ ) និង « ផ្តាច់អស់ទាំងកលល្បិច និង អន្ទាក់ និង ឧបាយរបស់អារក្សឲ្យដាច់ពីគ្នា » ( ហេលេមិន ៣:២៩ ) ។
ប្រធាន អ៊ែសរ៉ា ថាហ្វ ប៊ែនសឹន ( ឆ្នាំ ១៨៩៩–១៩៩៤ ) បានចែកចាយការសន្យាដ៏ទុកចិត្តអំពីព្រះគម្ពីរមរមន ៖ « នៅក្នុងព្រះគម្ពីរមរមនមាននូវអំណាចមួយ ដែលនឹងចាប់ផ្ដើមចូលទៅក្នុងជីវិតអ្នក នៅខណៈដែលអ្នកចាប់ផ្តើមសិក្សាព្រះគម្ពីរនេះដោយហ្មត់ចត់ ។ អ្នកនឹងរកឃើញអំណាចដែលកាន់តែមហិមា ដើម្បីទប់ទល់នឹងការល្បួង ។ អ្នកនឹងរកឃើញនូវអំណាចដើម្បី ចៀសផុតពីការបោកបញ្ឆោត ។ អ្នកនឹងរកឃើញអំណាច ដើម្បីឈរនៅលើផ្លូវតូច និង ចង្អៀត » ។៧
៣. ការមើលឃើញឧបសគ្គនានាដែលនៅជុំវិញ
ការមើលឃើញដោយភ្នែកទាំងពីរជួយមនុស្សម្នាក់មើលឃើញកាន់តែច្បាស់ ឬ ឃើញទាំងស្រុងនូវវត្ថុដែលលាក់កំបាំង ។ គុណសម្បត្តិនេះត្រូវបានពន្យល់ប្រាប់ដោយ ឡេអូណាដូ ដា វីនឈឺ ដែលកត់សម្គាល់ឃើញថា ភាពស្រអាប់នៃវត្ថុមួយអាចបិទបាំងវត្ថុមួយចំនួន ឬ ទាំងអស់ពីភ្នែកខាងឆ្វេង ប៉ុន្តែវត្ថុនោះអាចមើលឃើញដោយភ្នែកស្តាំ ។៨ ( សូមមើលរូបភាពទី ៣ ) ។
ឧទាហរណ៍ខាងវិញ្ញាណនៃការណ៍នេះ គឺ មាននៅក្នុងព្រះបន្ទូលរបស់ព្រះអង្គសង្គ្រោះដល់ពួកសាសន៍យូដា ៖ « ខ្ញុំក៏មានចៀមឯទៀត ដែលមិនទាន់នៅក្នុងក្រោលនេះនៅឡើយ ត្រូវតែខ្ញុំនាំចៀមទាំងនោះមកដែរ វានឹងស្តាប់តាមសំឡេងខ្ញុំ នោះនឹងមានហ្វូងតែ១ និងអ្នកគង្វាលតែ១វិញ » ( យ៉ូហាន ១០:១៦ ) ។
ដោយសារព្រះយេស៊ូវពុំបានប្រាប់អំពីអត្តសញ្ញាណនៃចៀមទាំងនោះ នោះពួកសាសន៍យូដាពុំយល់ពីព្រះបន្ទូលរបស់ទ្រង់ឡើយ ។ ប៉ុន្តែជាមួយនឹង ទស្សនវិស័យបន្ថែម ចេញពីព្រះគម្ពីរមរមន ដែលថាវាត្រូវបានលាក់កំបាំងបានប្រែជាមើលឃើញ ៖ « យើងប្រាប់អ្នករាល់គ្នាជាប្រាកដថា អ្នករាល់គ្នាគឺជាពួកអ្នកដែលយើងបាននិយាយថា ៖ យើងក៏មានចៀមឯទៀតដែលមិននៅក្នុងក្រោលនេះនៅឡើយ ត្រូវតែយើងនាំចៀមទាំងនោះមកដែរ ហើយវានឹងស្ដាប់តាមសំឡេងយើង នោះនឹងមានក្រោលតែមួយ និងអ្នកគង្វាលតែមួយវិញ » ( នីហ្វៃទី ៣ ១៥:២១ ) ។ លទ្ធផលនោះ គឺជាដែនគំហើញយ៉ាងច្បាស់ដោយគ្មានការយល់ច្រឡំពីអ្វីដែលព្រះអង្គសង្គ្រោះចង់មានព្រះបន្ទូល—ដែលគ្មាន ឧបសគ្គ នៃការយល់ខុសទៀតឡើយ ។
៤. គុណសម្បត្តិនៃការមើលឃើញនឹងកន្ទុយភ្នែករបស់ភ្នែកនីមួយៗ
« គំហើញនឹងកន្ទុយភ្នែកគឺជាផ្នែកមួយនៃគំហើញដែល កើតឡើងក្រៅពីការមើលដោយប្រើចំណុចកណ្តាលនៃភ្នែក » ។៩ ឬពាក្យម្យ៉ាងទៀតថា យើងមើលឃើញវត្ថុនានានៅក្នុងដែនគំហើញដែលយើងពុំផ្ចង់មើលវា ។ ផ្នែកនៃដែនគំហើញនោះ—គឺក្រៅពីរង្វង់នៃដែនគំហើញត្រួតស៊ីគ្នា ឬ ការចាប់យកគំហើញ—គឺជាលក្ខណៈពិសេសរបស់ភ្នែកម្ខាងៗ ( សូមមើលរូបភាពទី ១ ) ។
យើងមានអំណរគុណយ៉ាងជ្រាលជ្រៅចំពោះព្រះគម្ពីរប៊ីប និងអ្វីៗដ៏ពិសេស និង អស្ចារ្យដែលបានផ្តល់យើង—សំខាន់បំផុតនោះគឺប្រវត្តិនៃព្រះជន្ម និង ការងារបម្រើរបស់ព្រះយេស៊ូវគ្រីស្ទ ។
យើងក៏មានអំណរគុណយ៉ាងខ្លាំងចំពោះព្រះគម្ពីរមរមន និង គំហើញយ៉ាងល្អឥតខ្ចោះដែលគម្ពីរនេះផ្តល់ដល់យើង ដែលបញ្ជាក់យ៉ាងច្បាស់ពីគោលលទ្ធិនៃព្រះគ្រីស្ទ ហើយបើកសម្តែងនូវការបង្រៀនរបស់ទ្រង់តាមរយៈព្យាការីពីជំនាន់បុរាណនៅអាមេរិក ព្រមទាំងការយាងមកជួបផ្ទាល់ និង ការបម្រើរបស់ទ្រង់ចំពោះសាសន៍នីហ្វៃ ។
ដូចជាភ្នែកទាំងគូដ៏ល្អឥតខ្ចោះដែរ ព្រះគម្ពីរប៊ីប និង ព្រះគម្ពីរមរមនគាំទ្រគ្នាទៅវិញទៅមក ដែលឆ្លុះបញ្ចាំងពីផ្ទាំងទស្សនីយភាពត្រួតស៊ីគ្នាដ៏អស្ចារ្យ ព្រមទាំងទិដ្ឋភាពយ៉ាងពិសេសចំពោះគ្នាទៅវិញទៅមក ។
៥. ការកម្ចាត់ចោលនូវផ្នែកមួយនៃភាពខ្វាក់របស់យើង
យើងទាំងអស់គ្នាមានផ្នែកមួយនៃភាពខ្វាក់នៃដែនគំហើញរបស់យើងដែលវាងាយស្រួលក្នុងការរកឃើញវា ។ សូមកាន់រូបរង្វង់ និង រូបផ្កាយ ( រូបភាពទី ៤ ) ដាក់ចំពីមុខអ្នកចម្ងាយមួយបោះដៃ ។ សូមបិទភ្នែកខាងឆ្វេងរបស់អ្នក ហើយប្រើភ្នែកស្តាំរបស់អ្នកមើលឲ្យចំរង្វង់តូចនោះ ។ ដោយប្រើភ្នែកស្តាំរបស់អ្នកសម្លឹងមើលរង្វង់នោះ សូមចាប់ផ្តើមរំកិលរូបភាពនោះចូលមកជិតអ្នកយឺតៗ ។ នៅពេលរំកិលរូបភាពនោះបានប្រហែលជាពាក់កណ្តាល ផ្កាយនោះ នឹងបាត់ពីគំហើញ នៃកន្ទុយភ្នែក ។
តើគួរឲ្យអស្ចារ្យទេ ? អ្នកពុំដឹងសោះថាអ្នកមានផ្នែកមួយនៃភាពខ្វាក់ដែរ ? ដោយសារភ្នែកទីពីររបស់អ្នកធ្វើឲ្យមានតុល្យភាពចំពោះផ្នែកមួយនៃភាពខ្វាក់នេះ នោះព្រះគម្ពីរមរមនផ្តល់នូវអត្ថប្រយោជន៍ដូចគ្នានេះចំពោះព្រះគម្ពីរប៊ីប ។
ហើយដូចជាផ្កាយនោះបានបាត់ចេញពីភ្នែករបស់អ្នក នោះហេរ៉ូឌដែលពុំបានឃើញផ្កាយនៅបេថ្លេហិម ហើយបានសួរដល់ពួកហោរាថា « តើផ្កាយនោះបានលេចមកពីកាលណា » ( ម៉ាថាយ ២:៧ ) ។ វាគឺជា ផ្នែកមួយនៃភាពខ្វាក់នឹងកន្ទុយភ្នែកនៃវិញ្ញាណរបស់ទ្រង់ ។ មានតែអស់អ្នកដែល សម្លឹង រកមើលផ្កាយតែប៉ុណ្ណោះទើបអាចឃើញវា ។
សព្វថ្ងៃនេះមានមនុស្សជាច្រើនដូចជាស្តេចហេរ៉ូឌ ដែលបដិសេធពុំស្វែងរក និង មើលការណ៍នានានៃព្រះវិញ្ញាណ ។ « វេទនាដល់ពួកខ្វាក់ ដែលមិនព្រមមើល » ( នីហ្វៃទី ២ ៩:៣២ ) ។ ភាពឆ្មើងឆ្មៃក៏បានបណ្តាលឲ្យពួកសាសន៍យូដា « [ មើលងាយ ] ដល់ព្រះបន្ទូលដ៏ច្បាស់លាស់ទាំងនេះ ហើយ… មកពីការខ្វាក់ [ ចំពោះពួកគេ ] ដោយមើលហួសទីដៅ » ( យ៉ាកុប ៤:១៤ ) ។
ភាពច្បាស់លាស់មួយនៅក្នុង-ការយល់ដឹងជ្រៅជ្រះ នៃព្រះគម្ពីរមរមនគឺជាពាក្យព្រមានអំពីផ្នែកមួយនៃភាពខ្វាក់ជាសកលនៃ អំនួត « ជាអំពើបាបដែលងាយ ឃើញ នៅក្នុងខ្លួនមនុស្សដទៃ ប៉ុន្តែកម្រឃើញនៅក្នុងខ្លួនឯងឡើយ » ។១០ វាគឺដូចជាការមានក្លិនខ្យល់ដង្ហើមអាក្រក់—ដែលមនុស្សគ្រប់គ្នាអាចដឹង លើកលែងតែសាម៉ីខ្លួនប៉ុណ្ណោះដែលពុំដឹងខ្លួន ។
« នៅក្នុងក្រុមប្រឹក្សានៃជីវិតមុនជីវិតលើផែនដីនេះ វាជាភាពឆ្មើងឆ្មៃដែលលូស៊ីហ្វើរបានមាន » ។១១ វាគឺជា « ភាពឆ្មើងឆ្មៃ … នៃសាសន៍នីហ្វៃ [ ដែល ] បានបញ្ជាក់ឲ្យឃើញនូវសេចក្តីបំផ្លិចបំផ្លាញ » ( មរ៉ូណៃ ៨:២៧ ) ។ អ្នកមានភាពឆ្មើងឆ្មៃនឹងត្រូវឆេះដូចជាជញ្ជ្រាំងនៅពេលព្រះយាងមកបោសសំអាតផែនដីនេះដោយភ្លើង ( សូមមើល ម៉ាឡាគី ៤:១; នីហ្វៃទី ៣ ២៥:១ ) ។
ការចាប់ផ្តើមនៃផ្លូវតូច ហើយចង្អៀតត្រូវបានដាក់បង្ហាញយ៉ាងច្បាស់ដោយស្លាក « ព្រមាន » ៖ « ចូរប្រយ័ត្នពីសេចក្តីឆ្មើងឆ្មៃ ក្រែងអ្នករាល់គ្នាក្លាយទៅដូចជាពួកសាសន៍នីហ្វៃពីបុរាណ » ( គ. និង ស. ៣៨:៣៩ការសង្កត់ធ្ងន់ត្រូវបានបន្ថែម ) ។ ការចំអកដ៏ឈឺចាប់នោះគឺថាស្លាកសញ្ញានៃ « ការចូរប្រយ័ត្ន » នោះ គឺមាននៅក្នុងផ្នែកមួយនៃភាពខ្វាក់របស់មនុស្សឆ្មើងឆ្មៃជានិច្ច ។ ហេតុដូច្នោះហើយ « ចូរឲ្យអ្នកណាដែល [ ឆ្មើងឆ្មៃ ] ចេះមានប្រាជ្ញា ដោយការបន្ទាបខ្លួន និងដោយការអំពាវនាវដល់ព្រះអម្ចាស់ដ៏ជាព្រះរបស់ខ្លួន ប្រយោជន៍ឲ្យភ្នែកគេអាចបានបើកឡើង ដើម្បីឲ្យគេអាចមើលឃើញ » ( គ. និង ស. ១៣៦:៣២ ) ។
៦. ទំនាក់ទំនងរវាងខួរក្បាល និង ភ្នែក
សមីការនេះ ( សូមមើលរូបភាពទី ៥ ) បង្ហាញពីភាពត្រឹមត្រូវ ប៉ុន្តែវាពុំមែនត្រូវទាំងស្រុងនោះទេ ។ តាមពិតទៅប្រព័ន្ធរូបភាពនៃខួរក្បាលទេ ដែលប្រាប់យើងពីអ្វីដែលភ្នែករបស់យើងមើលឃើញ ។ ខួរក្បាលបង្កើតក្តីសុបិនរបស់យើងនៅពេលយប់ ហើយបកស្រាយនូវអ្វីដែលយើងមើលឃើញនៅពេលថ្ងៃ ។ ការមើលគឺពុំចាំបាច់ថាជាការជឿ ឬ ការមើលឃើញត្រឹមត្រូវឡើយ ។ ឧទាហរណ៍ « ប៉ុន្តែ ទោះបើ[ ព្រះយេស៊ូវ ] បានធ្វើទីសម្គាល់ នៅមុខគេជាច្រើនទាំងម៉្លេះក៏ដោយ គង់តែគេមិនបានជឿដល់ទ្រង់ដែរ » ( យ៉ូហាន ១២:៣៧ )។ ភ្នែកតែឯងពុំអាចជំរុញឲ្យមានសេចក្តីជំនឿ ឬ មើលឃើញការពិតគ្រប់គ្រាន់ឡើយ ។
ដូចដែលខួរក្បាលធ្វើការជាមួយភ្នែកដែរ នោះព្រះវិញ្ញាណធ្វើការជាមួយព្រះគម្ពីរ ដែលជួយយើងឲ្យមើលឃើញខាងវិញ្ញាណ ។ ដោយការគ្រាន់តែអានព្រះគម្ពីរគឺវាមិនគ្រាន់ ដើម្បីបង្កើតគំហើញខាងវិញ្ញាណឡើយ ព្រោះថា « មនុស្សខាងសាច់ឈាមគេមិនទទួលសេចក្ដីខាងឯព្រះវិញ្ញាណនៃព្រះទេ ពីព្រោះជាសេចក្ដីល្ងង់ល្ងើដល់គេក៏រកស្គាល់មិនបានដែរ ដ្បិតត្រង់ឯសេចក្ដីទាំងនោះត្រូវពិចារណាយល់ខាងវិញ្ញាណវិញ » ( កូរិនថូសទី ១ ២:១៤ ) ។
ចំពោះព្រះគម្ពីរមរមនដើម្បីមានដំណើរការដូចភ្នែកខាងវិញ្ញាណ នោះយើងត្រូវតែទទួល និង ធ្វើតាមការអញ្ជើញរបស់មរ៉ូណៃដោយស្មោះសរនៅក្នុង មរ៉ូណៃ ១០:៣–៥។ វាគឺជាការអញ្ជើញដោយមានការសន្យាថាព្រះ «នឹង បង្ហាញសេចក្តីពិតដល់អ្នក ដោយព្រះចេស្តានៃព្រះវិញ្ញាណបរិសុទ្ធ » ( ខទី ៤ការសង្កត់ធ្ងន់ត្រូវបានបន្ថែម ) ។
សាក្សី និង អំណរគុណ
ដើម្បីចៀសវាងពីភាពខ្វាក់ខាងវិញ្ញាណ នោះកូនប្រុសរបស់លីហៃបានប្រថុយជីវិតរបស់ខ្លួន ទៅយកផ្ទាំងលង្ហិន ( សូមមើល នីហ្វៃទី ១ ៣–៤ ) ។ ប្រសិនបើគ្មានផ្ទាំងនោះទេពួកគេ « ច្បាស់ជាចុះអន់ថយក្នុងការឥតជំនឿ » ( ម៉ូសាយ ១:៥ ) ។ សព្វថ្ងៃនេះ យើងមានអំណរគុណដល់កិច្ចការបោះពុម្ព និង ឧបករណ៍ឌីជីថលនានា ដែលយើងអាចទទួលបានព្រះគម្ពីរកាន់តែងាយស្រួល និង កាន់តែឆាប់រហ័ស ។ ប៉ុន្តែវាមានភាពខុសប្លែកបន្តិចចំពោះសាតាំង វារារាំងមនុស្សពុំឲ្យទទួលបានព្រះគម្ពីរ—ដែលជាយុទ្ធសាស្ត្ររបស់វានៅក្នុងយុគសម័យដ៏ខ្មៅងងឹត—ឬល្បួងមនុស្សកុំឲ្យអានព្រះគម្ពីរ—ដែលជាយុទ្ធសាស្ត្ររបស់វានៅក្នុងសម័យចុងក្រោយនេះ ។ ទោះជាតាមរបៀបណាមួយក្តី « អ័ព្ទនៃសេចក្តីងងឹត… ធ្វើឲ្យភ្នែកទាំងឡាយនៃកូនចៅមនុស្សខ្វាក់ … [ ដោយជោគជ័យ ] … ដើម្បីឲ្យពួកគេវិនាស និង វង្វេងបាត់ទៅ » ( នីហ្វៃទី ១ ១២:១៧ការសង្កត់ធ្ងន់ត្រូវបានបន្ថែម ) ។
គឺដូចជាថ្នាំបន្តក់ភ្នែករបស់ខ្ញុំ រៀងរាល់ថ្ងៃដែរ វាមានតែតាមរយៈការ «បន្ត កាន់ដំបងដែកយ៉ាងខ្ជាប់ខ្ជួនជានិច្ច » ( នីហ្វៃទី ១ ៨:៣០ការសង្កត់ធ្ងន់ត្រូវបានបន្ថែម ) ដែលយើងអាចចៀសវាងពីការធ្វើឲ្យខ្វាក់ដោយអ័ព្ទនៃសម័យចុងក្រោយនេះដែលមានល្បិចយ៉ាងប៉ិនប្រសប់ និង ខ្លាំងក្លា ។ នៅពេលណាដែលបុគ្គលម្នាក់ប្រែជាពុំសូវសកម្ម ឬ ចាកចេញពីសាសនាចក្រ វាបង្ហាញស្ទើរតែច្បាស់ថា បុគ្គលនោះបានឈប់អានព្រះគម្ពីរមរមន ។
ព្រះគម្ពីរមរមនជា ៖សក្ខីបទមួយទៀតអំពីព្រះយេស៊ូវគ្រីស្ទ គឺពិតជាកិច្ចការចម្លែក ហើយអស្ចារ្យ ។ វាគឺជា សាក្សីជាក់នឹងភ្នែក ទីពីរនៃព្រះយេស៊ូវគ្រីស្ទ និង ដំណឹងល្អដ៏រុងរឿងរបស់ទ្រង់ ដោយផ្តល់នូវគុណសម្បត្តិទាំងអស់នៃភ្នែកទីពីរ ។
សូមឲ្យយើងកាន់ខ្ជាប់ជានិច្ចនឹងដំបងដែក ដើម្បីយើងអាចនឹងសមទៅនឹងពាក្យសរសើររបស់ព្រះអង្គសង្គ្រោះមានបន្ទូលទៅកាន់ពួកសិស្សរបស់ទ្រង់ ៖ « អ្នករាល់គ្នាវិញ ភ្នែកអ្នកមានពរហើយ ដ្បិតមើលឃើញ » ( ម៉ាថាយ ១៣:១៦ ) ។