Mei Tana ki he Temipalé

Ko e faingamālie ko ia ke ʻalu ki ha temipale ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko ha fakaʻānaua ia ʻoku ngali taukakapa kae mahuʻinga kiate kinautolu ʻoku nofo mamaʻó. Naʻe houngaʻia ha kiʻi kulupu mei he kiʻi motu ʻo Tana ʻi Vanuatú, ʻi heʻenau folau kimuí ni mai ki Suva Fisi ke moihū ʻi he temipale ʻi aí.

Kuo kātekina ʻe he kakai ʻo Taná ha faingataʻa lahi ʻi he ngaahi taʻu kimui ní ʻi hono maumauʻi ʻe he ngaahi afaá ʻa e ngaahi ʻapi mo e ngoue lahi. Naʻe hoko ʻa e folau ko ʻeni ki he temipalé ko ha fakamaama mo e tākiekina ʻi he hokohoko atu ʻenau langalanga hake ʻenau moʻuí.

Ki ha mēmipa ʻe taha ʻo e kulupú ko Leki Mōkani Ialulu, naʻe hoko ʻa e moihū ʻi he Fale ʻo e ʻEikí ko ha “aʻusia fakangalongataʻa.” Naʻá ne pehē, “Naʻa mau fiefia ʻaupito ke ongoʻi ʻa e ʻofa ʻa hotau ʻEikí mo e Fakamoʻui ko Sīsū Kalaisí ʻi he temipalé. ʻOku ou ʻilo ʻoku moʻui ʻa e ʻOtuá, ʻokú Ne ʻofa ʻi Heʻene fānaú pea ʻi ai ha palani ke nau toe foki hake ai kiate Ia. Ko e temipalé ko e Fale ia ʻo e ʻEikí.”

Naʻe toutou foki ʻa Sīsū Kalaisi ki he temipale ʻi Selusalemá ʻi he kotoa ʻEne moʻuí, ke ako, moihū, mo maʻu ha mālohi mei Heʻene Tamai Hēvaní. Ko e Kāingalotu ʻi Taná, mo e lau miliona kehe ʻi he funga ʻo e māmaní ʻi heʻenau hoko ko e kau muimui ʻo Sīsū Kalaisi ʻi he ʻaho ní, ʻoku nau omi ki he temipalé ʻi he ʻuhinga tatau.

ʻOku akoʻi ʻe he sākalamēniti pe ngaahi ouau ʻo e temipalé, ʻa e palani ʻa e ʻOtuá maʻa ʻEne fānaú, kau ai ʻa e ongoongolelei ʻo Sīsū Kalaisí. ʻOku fakaʻatā ʻe he temipalé ke malava ʻa e kau moihuú ʻo fakahoko mo tauhi ʻa e ngaahi palōmesi toputapú, pe ngaahi fuakava mo e ʻOtuá, pea nofo fakataha ko e ngaahi fāmili ʻo taʻengata.