အခန်းကြီး ၁၆
လာမန်အမျိုးသားတို့သည် အမ္မုန်နိဟပြည်မှ လူတို့ကို ဖျက်ဆီးကြ၏—ဇော်ရမ်သည် နီဖိုင်းအမျိုးသားတို့ကို လာမန်အမျိုးသားတို့အပေါ် အောင်နိုင်ခြင်းငှာ ဦးဆောင်၏—အယ်လမာ၊ အာမြူးလက်နှင့် များစွာသောအခြားသူတို့သည် နှုတ်ကပတ်တော်ကို ဟောပြောကြ၏—ခရစ်တော်သည် သူ၏ရှင်ပြန်ထမြောက်ခြင်းနောက်၌ နီဖိုင်းအမျိုးသားတို့ထံသို့ ပေါ်လာတော်မူမည့်အကြောင်း၊ သူတို့သွန်သင်ကြ၏။ ဘီစီ ၈၁–၇၇ ခန့်။
၁ ဤသို့အားဖြင့်အချိန်တန်လာသောအခါ၊ နီဖိုင်းလူမျိုးတို့အပေါ် တရားသူကြီးများအုပ်စိုးခြင်းတစ်ဆယ်တစ်နှစ်မြောက်၊ ဒုတိယလ၊ ငါးရက်နေ့တွင်၊ ဇရဟင်မလပြည်၌၊ များစွာသောငြိမ်းချမ်းခြင်းရှိပြီးနောက်၊ တစ်ဆယ်တစ်နှစ်မြောက်၊ ဒုတိယလ၊ ငါးရက်နေ့တိုင်အောင်ပင်၊ နှစ်အရေအတွက်အချို့ကြာအောင်၊ စစ်တိုက်ခြင်းများသော်လည်းကောင်း၊ ရန်တွေ့ခြင်းများသော်လည်းကောင်း မရှိရာမှ၊ ပြည်တစ်လျှောက်လုံးတွင် စစ်တိုက်ခြင်းသတင်းကို ကြားရ၏။
၂ အကြောင်းမူကား၊ ရှုလော့၊ လာမန်အမျိုးသားတို့၏တပ်များသည်၊ တောရိုင်းဘက်၌ ထိုပြည်၏နယ်နိမိတ်ထဲသို့၊ အမ္မုန်နိဟမြို့ထဲသို့ပင် ဝင်၍၊ လူတို့ကို ကွပ်မျက်ပြီး၊ မြို့ကို ဖျက်ဆီးစပြု၏။
၃ ယခုမူကား၊ အချိန်တန်လာသောအခါ၊ နီဖိုင်းအမျိုးသားတို့က သူတို့ကို နှင်ထုတ်ရန် လုံလောက်သောတပ်ကို မဖွဲ့စည်းနိုင်မီတွင်၊ သူတို့သည် အမ္မုန်နိဟမြို့ထဲ၌ရှိကြသောလူများ၊ ထို့အတူ၊ နောဧပြည်၏နယ်နိမိတ်ပတ်ဝန်းကျင်မှ အချို့သောသူတို့ကိုလည်း ဖျက်ဆီး၍၊ အခြားသောသူတို့ကို တောရိုင်းထဲသို့ ဖမ်းဆီးချုပ်နှောင်ပြီး သယ်ဆောင်သွားကြ၏။
၄ ယခုတွင်၊ အချိန်တန်လာသောအခါ၊ နီဖိုင်းအမျိုးသားတို့သည် တောရိုင်းထဲသို့ ဖမ်းဆီးချုပ်နှောင်ပြီး သယ်ဆောင်သွားခံရသူများကို ရယူလိုကြ၏။
၅ ထို့ကြောင့်၊ နီဖိုင်းအမျိုးသားတို့၏တပ်များ၌ ဗိုလ်ချုပ်မင်းအဖြစ် ခန့်အပ်ထားခံရလေသောသူ၊ (သူ၏အမည်မှာ ဇော်ရမ်ဖြစ်ပြီး၊ သူ့တွင် လေဟိနှင့် အာဟ သားနှစ်ယောက် ရှိ၏)—ယခုတွင်၊ ဇော်ရမ်နှင့် သူ၏သားတို့က အယ်လမာကို အသင်းတော်၌ ယဇ်ပုရောဟိတ်မင်းဖြစ်ကြောင်း သိ၍လည်းကောင်း၊ သူ့၌ ပရောဖက်ပြုဟောသောဝိညာဉ် ရှိလေကြောင်း ကြား၍လည်းကောင်း၊ ထို့ကြောင့်၊ သူ့ထံသို့၊ သွား၍၊ လာမန်အမျိုးသားတို့အားဖြင့် ဖမ်းဆီးချုပ်နှောင်ပြီး ခေါ်ဆောင်သွားခံရလေသည့် သူတို့၏ညီအစ်ကိုများကို ရှာဖွေရန် သူတို့ကို တောရိုင်းထဲ၌ အဘယ်အရပ်သို့ ကိုယ်တော်ရှင်သွားစေတော်မူလိုသည်ကို သိရခြင်းငှာ သူ့ကို မေးကြ၏။
၆ ဤသို့အားဖြင့်အချိန်တန်လာသောအခါ၊ အယ်လမာသည် ထိုအမှုနှင့် စပ်လျဉ်း၍ ကိုယ်တော်ရှင်ထံ မေးလျှောက်၏။ ထို့အတူ၊ အယ်လမာသည် ပြန်လာပြီး၊ သူတို့ကို ဆိုလေသည်ကား၊ ရှုလော့၊ လာမန်အမျိုးသားတို့သည် မန်တိပြည်၏နယ်နိမိတ်ထက်သာ၍ဝေးရာ အထက်ပိုင်းရှိ တောင်အရပ်တောရိုင်း၌ ဇိဒုန်မြစ်ကို ဖြတ်ကူးလိမ့်မည်။ ရှုဦးလော့၊ သင်တို့သည် ဇိဒုန်မြစ်၏အရှေ့ဘက် ထိုအရပ်၌ သူတို့ကို တွေ့လိမ့်မည်။ ထိုအရပ်၌ပင်၊ လာမန်အမျိုးသားတို့အားဖြင့် ဖမ်းဆီးချုပ်နှောင်ပြီးခေါ်ဆောင်သွားခံရလေသည့် သင်တို့၏ညီအစ်ကိုတို့ကို သင်တို့ထံ ကိုယ်တော်ရှင်အပ်တော်မူလိမ့်မည်။
၇ ဤသို့အားဖြင့်အချိန်တန်လာသောအခါ၊ ဇော်ရမ်နှင့် သူ၏သားတို့သည် တပ်များနှင့်အတူ၊ ဇိဒုန်မြစ်ကို ဖြတ်ကူး၍ မန်တိပြည်၏နယ်နိမိတ်ထက်သာ၍ဝေးသော ဇိဒုန်မြစ်၏အရှေ့ဘက်ရှိ တောင်အရပ်တောရိုင်းထဲသို့ ချီတက်ကြ၏။
၈ သူတို့သည် လာမန်အမျိုးသားတို့၏တပ်များကို တွေ့ပြီးတိုက်ခိုက်၍၊ လာမန်အမျိုးသားတို့သည် ကွဲပြားပြန့်ကျဲ၍၊ တောရိုင်းထဲသို့ နှင်ထုတ်ခံရလေ၏။ သူတို့သည်လည်း လာမန်အမျိုးသားတို့အားဖြင့် ဖမ်ဆီးချုပ်နှောင်ပြီး ခေါ်ဆောင်သွား ခံရလေသည့် သူတို့၏ညီအစ်ကိုများကို ခေါ်ဆောင်ကြ၏။ ဖမ်းဆီးချုပ်နှောင်ပြီးခေါ်ဆောင်သွားခံရသော သူတို့မှ တစ်ဦးမျှ မကျဆုံး။ သူတို့သည်လည်း သူတို့နေရင်းပြည်ကို ပိုင်ဆိုင်စေရန် သူတို့ညီအစ်ကိုများအားဖြင့် ခေါ်ဆောင် ခံရကြ၏။
၉ ထိုကဲ့သို့အားဖြင့်၊ တရားသူကြီးများအုပ်စိုးခြင်း တစ်ဆယ်တစ်နှစ်မြောက် ပြီးဆုံးခဲ့ပြီး၊ လာမန်အမျိုးသားတို့သည် ထိုပြည်မှ နှင်ထုတ်ခံရလေ၍၊ အမ္မုန်နိဟပြည်မှလူတို့သည်လည်း ဖျက်ဆီးခံရ၏။ အမှန်စင်စစ်၊ အမ္မုန်နိဟိုက်အမျိုးသားတို့မှ အသက်ရှင်သူတိုင်း ဖျက်ဆီးခံရလေ၏။ ကြီးမားခြင်းကြောင့် ဘုရားသခင်မဖျက်ဆီးနိုင်ဟု သူတို့ဆိုလေသည့် သူတို့၏မြို့ကြီးသည်လည်း ဖျက်ဆီး ခံရလေ၏။
၁၀ သို့ရာတွင်၊ ရှုလော့၊ တစ်နေ့တွင်၊ ထိုမြို့သည် လူဆိတ်ညံ၏။ အသေကောင်တို့ကို ခွေးများနှင့် တောသားရဲတို့ ကိုက်စား၍ ရုပ်ပျက်ဆင်းပျက်ဖြစ်လေ၏။
၁၁ အဘယ်သို့ပင်ဖြစ်စေ၊ နေ့ပေါင်းများစွာကြာပြီးနောက်တွင်၊ သူတို့၏အသေကောင်တို့ကို မြေကြီးမျက်နှာပြင်ပေါ် ၌ စုပုံ၍ တိမ်စွာမြှုပ်ထားလေ၏။ ယခုမူကား၊ ထိုအသေကောင်တို့၏အနံ့သည် အလွန်ပြင်းသဖြင့် လူတို့သည် နှစ်ပေါင်းများစွာကြာအောင် အမ္မုန်နိဟပြည်ကို ပိုင်ဆိုင်ရန် မဝင်ရောက်ခဲ့ကြ။ နေဟောလူဆိတ်ညံရာအရပ်ဟုလည်း ခေါ်ကြ၏။ အကြောင်းမူကား၊ ကွပ်မျက်ခံရလေသူများမှာ နေဟော၏ဘာသာကို ယုံကြည်သူများ ဖြစ်၏။ သူတို့၏ပြည်သည်လည်း၊ လူဆိတ်ညံရာအဖြစ် ဆက်၍တည်ရှိခဲ့၏။
၁၂ နီဖိုင်းလူမျိုးတို့အပေါ်တရားသူကြီးများအုပ်စိုးခြင်း တစ်ဆယ်လေးနှစ်မြောက်သည့်တိုင်အောင်ပင်၊ လာမန်အမျိုးသားတို့သည်လည်း နီဖိုင်းအမျိုးသားတို့ကို ဆန့်ကျင်၍ တစ်ဖန်စစ်တိုက်ရန် မလာကြ။ ထိုကဲ့သို့အားဖြင့်၊ နီဖိုင်းလူမျိုးတို့သည် ထိုပြည်တစ်ခုလုံး၌ သုံးနှစ်ကြာအောင် အဆက်မပြတ် ငြိမ်းချမ်းခြင်းရှိ၏။
၁၃ အယ်လမာနှင့် အာမြူးလက်တို့သည်လည်း၊ သွား၍ လူတို့အား သူတို့၏ ဗိမာန်တော်များထဲ၌လည်းကောင်း၊ သူတို့၏ ဝတ်ပြုရာဌာနများ အထဲ၌လည်းကောင်း၊ ထို့အတူ၊ ယုဒလူမျိုးတို့၏ထုံးစံအတိုင်း တည်ဆောက်ထားသည့် သူတို့၏ တရားဇရပ်များ အထဲ၌လည်းကောင်း နောင်တရခြင်းကို ဟောပြောလျက်ရှိကြ၏။
၁၄ သူတို့၏စကားကို ကြားလိုသူမှန်သမျှကိုလည်း လူမျက်နှာကိုမငဲ့ဘဲ ဘုရားသခင်၏နှုတ်ကပတ်တော်ကို အစဉ်မပြတ်ဝေငှကြ၏။
၁၅ ထိုကဲ့သို့အားဖြင့်၊ အယ်လမာနှင့် အာမြူးလက်တို့နှင့်အတူ၊ အမှုတော်အတွက် ရွေးကောက်ထားခံရသည့် များစွာသောသူတို့သည်လည်း ထိုပြည်တစ်လျှောက်လုံး၌ နှုတ်ကပတ်တော်ကို ဟောပြောခြင်းငှာ သွားကြ၏။ အသင်းတော်၏ တည်ထောင်ခြင်းသည်လည်း ထိုပြည်တစ်လျှောက်၊ အလုံးစုံသောပတ်ဝန်းကျင်ဒေသ၊ နီဖိုင်းအမျိုးသားတို့၏ လူမျိုးခပ်သိမ်းတို့၌ ပျံ့နှံ့၍လာ၏။
၁၆ သူတို့၌ မမျှတခြင်းလည်းမရှိ။ ကိုယ်တော်ရှင်သည် သူ၏ဝိညာဉ်တော်ကို ထိုပြည်၏မျက်နှာပြင်တစ်ခုလုံးပေါ် သွန်းလောင်းတော်မူသည်ကား၊ လူသားတို့၏စိတ်ကို ပြင်ဆင်ခြင်းငှာ၊ သို့မဟုတ်၊ သူကြွလာတော်မူသည့်အချိန်မှာ သူတို့၌သွန်သင်ပေးမည့် နှုတ်ကပတ်တော်ကို ရရှိစေရန် သူတို့စိတ်နှလုံးကို ပြင်ဆင်ခြင်းငှာ—
၁၇ သူတို့သည် နှုတ်ကပတ်တော်ကိုဆန့်ကျင်၍ မမာကျောစေခြင်းငှာ၊ မယုံကြည်၍ ပျက်စီးသည့်တိုင်အောင် သူတို့ဆက်ပြီး မပြုနိုင်ကြစေခြင်းငှာ၊ သို့ရာတွင် သူတို့သည် နှုတ်ကပတ်တော်ကို ဝမ်းမြောက်စွာလက်ခံပြီး၊ မှန်သော စပျစ်နွယ်ပင်သို့ အကိုင်းဆက်၍စိုက်သည့်အခက်သဖွယ်ဖြစ်ကြစေခြင်းငှာ၊ သူတို့၏ဘုရားသခင်ကိုယ်တော်ရှင်၏ချမ်းသာထဲသို့ ဝင်နိုင်စေခြင်းငှာပေတည်း။
၁၈ ယခုတွင်၊ လူတို့ထံ ထွက်သွားသောထိုယဇ်ပုရောဟိတ်တို့သည် အလုံးစုံသော မုသားပြောခြင်း၊ လှည့်စားခြင်း၊ ဂုဏ်ပြိုင်ခြင်း၊ ရန်တွေ့ခြင်း၊ ရန်ငြိုးထားခြင်း၊ ကဲ့ရဲ့ပြောဆိုခြင်း၊ ခိုးယူခြင်း၊ လုယူခြင်း၊ လုယက်ခြင်း၊ လူ့အသက်ကိုသတ်ခြင်း၊ သူ့သားမယားအား ပြစ်မှားခြင်းကို ကျူးလွန်ခြင်းတို့နှင့် အမျိုးမျိုးသော ကိလေသာလွန်ကျူးခြင်းတို့ကို ဆန့်ကျင် ဟောပြော၍၊ ဤအမှုများမဖြစ်ကောင်းစေကြောင်း ဟစ်ကြော်လျက်—
၁၉ မကြာမြင့်မီဖြစ်လာရမည့်အမှုများ အကြောင်းကို ဟောပြောလျက်၊ အထူးသဖြင့်၊ ဘုရားသခင်၏သားတော်ကြွလာတော်မူခြင်း၊ သူ၏ဒုက္ခဝေဒနာခံစားခြင်းနှင့် သေခြင်း၊ ထို့အတူ၊ သေသူတို့၏ရှင်ပြန်ထမြောက်ခြင်းအကြောင်းကို ဟောပြောလျက်ရှိကြ၏။
၂၀ များစွာသောလူတို့ကလည်း၊ ဘုရားသခင်၏သားတော် ကြွလာတော်မူမည့်နေရာနှင့်စပ်လျဉ်း၍ မေးမြန်းကြ၏။ သူ၏ရှင်ပြန်ထမြောက်ခြင်းနောက်၌ သူတို့ထံပေါ်လာတော်မူလိမ့်မည့်အကြောင်း၊ သူတို့ သွန်သင်ခံရကြလေ၏။ ဤအမှုကို လူတို့သည် ကြီးစွာသောဝမ်းမြောက်ခြင်းနှင့် ဝမ်းသာခြင်းတို့ဖြင့် ကြားနာကြ၏။
၂၁ ယခုမူကား၊ အသင်းတော်ကို ထိုပြည်တစ်လျှာက်လုံး၌ တည်ထောင်ကြလေပြီးနောက်—နတ်ဆိုးကို အောင်နိုင်၍၊ ဘုရားသခင်၏နှုတ်ကပတ်တော်ကို စင်ကြယ်သည့်အတိုင်း ထိုပြည်တစ်ခုလုံး၌ ဟောပြောလျက်၊ ကိုယ်တော်ရှင်ကလည်း မိမိကောင်းချီးမင်္ဂလာများကို လူတို့အပေါ် သွန်းလောင်းတော်မူလျက်ရှိပေ၏—ထိုကဲ့သို့အားဖြင့်၊ နီဖိုင်းလူမျိုးတို့အပေါ် တရားသူကြီးများအုပ်စိုးခြင်းတစ်ဆယ်လေးနှစ်မြောက် ပြီးဆုံး၏။