အယ်လမာ ၅၂

အခန်းကြီး ၅၂

အမ်မော်ရုန်သည် လာမန်အမျိုးသားတို့၏မင်းကြီးအဖြစ်၊ အာမလိခိယ၏အရိပ်အရာကို ခံ၏—မော်ရော်နိုင်း၊ တေအန်ကမ်နှင့် လေဟိတို့သည် လာမန်အမျိုးသားတို့ကို ဆန့်ကျင်၍ အောင်မြင်သောစစ်တိုက်ခြင်းကို ဦးဆောင်၏—မြူးလက်မြို့ကို ပြန်လည်သိမ်းယူ၏။ ဇော်ရမ်အမျိုးသား ယာကုပ်သည်လည်း ကွပ်မျက်ခံရ၏။ ဘီစီ ၆၆–၆၄ ခန့်။

၁ ယခုမူကား၊ အချိန်တန်လာသောအခါ၊ နီဖိုင်းလူမျိုးတို့အပေါ်တရားသူကြီးများအုပ်စိုးခြင်း နှစ်ဆယ်ခြောက်နှစ်မြောက်၌၊ ရှုလော့၊ ပထမဦးဆုံးလ၏ပထမဦးဆုံးနံနက်တွင် လာမန်အမျိုးသားတို့သည် နိုးသောအခါ၊ ရှုလော့၊ အာမလိခိယကို သူ၏တဲထဲ၌ သေသည်ကို တွေ့ရှိကြ၏။ ယင်းနေ့တွင် တေအန်ကမ်က သူတို့ကို စစ်တိုက်ရန် အဆင်သင့်ဖြစ်သည်ကိုလည်း သူတို့မြင်တွေ့ကြ၏။

၂ ယခုမူကား၊ လာမန်အမျိုးသားတို့သည် ဤအမှုကိုမြင်တွေ့လျှင်၊ ကြောက်လန့်လေ၏။ မြောက်ဘက်လားရာပြည်ထဲသို့ ချီတက်ခြင်းဟူသော သူတို့အကြံအစည်ကို စွန့်လွှတ်၍၊ သူတို့၏တပ်ခပ်သိမ်းနှင့် မြူးလက်မြို့ထဲသို့ ဆုတ်ခွာ၍၊ သူတို့၏ခံတပ်များ၌ အကာအကွယ်ကို ရှာကြ၏။

၃ ဤသို့အားဖြင့်အချိန်တန်လာသောအခါ၊ အာမလိခိယ၏ညီသည် လူတို့အပေါ်၌ ရှင်ဘုရင်အဖြစ်ခန့်အပ်ထားခံရလေ၏။ သူ၏အမည်မှာ အမ်မော်ရုန်ဖြစ်၏။ ထိုကဲ့သို့အားဖြင့် အာမလိခိယမင်းကြီး၏ညီ၊ အမ်မော်ရုန်မင်းကြီးသည် သူ၏နေရာ၌ နန်းစံစေရန် ခန့်အပ်ထားခံရ၏။

၄ ဤသို့အားဖြင့်အချိန်တန်လာသောအခါ၊ သူ၏လူတို့သည် အသွေးသွန်းလောင်းခြင်းအားဖြင့် သူတို့သိမ်းယူလေသည့် ထိုမြို့များကို ထိန်းသိမ်းရမည့်အကြောင်း သူအမိန့်ပေး၏။ အကြောင်းမူကား၊ သူတို့သည် များစွာသောအသွေးတို့ ဆုံးရှုံးလေသည်မှတစ်ပါး၊ အဘယ်မြို့ကိုမျှ မသိမ်းယူရလေခဲ့ချေ။

၅ ယခုမူကား၊ တေအန်ကန်သည် လာမန်အမျိုးသားတို့ သိမ်းယူလေသော မြို့များနှင့် ရယူလေသည့် ထိုပြည်၏အစိတ်အပိုင်းတို့ကို ထိန်းသိမ်းရန် သန္နိဌာန်ချကြလေကြောင်း သိမြင်၏။ သူတို့၏အရေအတွက် များပြားခြင်းကိုလည်း မြင်၍၊ တေအန်ကမ်သည် သူတို့၏ခံတပ်များအတွင်း၌ တိုက်ခိုက်ရန်ကြိုးစားခြင်းမှာ မသင့်လျော်ကြောင်း ဆင်ခြင်မိ၏။

၆ သို့ရာတွင်၊ သူသည် စစ်တိုက်ခြင်းအတွက် ပြင်ဆင်ခြင်းများ ပြုလုပ်နေသကဲ့သို့ မိမိလူများကို ပတ်ဝန်းကျင်ဒေသတို့ ၌ ချထား၏။ ထိုမှတစ်ပါး၊ သူတို့တစ်ဖက်၌ သူ့ကိုယ်ကို ကာကွယ်ခြင်းငှာ၊ ပတ်လည်၌ တံတိုင်းများတည်ဆောက်ခြင်းနှင့် မှီခိုရာနေရာများကို ပြင်ဆင်ခြင်းအားဖြင့်၊ အမှန်ပင်ပြင်ဆင်လျက်ရှိလေ၏။

၇ ဤသို့အားဖြင့်အချိန်တန်လာသောအခါ၊ သူသည် မော်ရော်နိုင်း သူ၏တပ်ကို ခွန်အားဖြည့်ပေးခြင်းငှာ များစွာသောလူတို့ကို စေလွှတ်လေသည့်အချိန်အထိ၊ ထိုကဲ့သို့အားဖြင့်၊ ပြင်ဆင်ခြင်းကို ဆက်၍ပြု၏။

၈ မော်ရော်နိုင်းကလည်း သူ့လက်ထဲသို့ ကျရောက်ခဲ့သည့် စစ်အကျဉ်းသားခပ်သိမ်းတို့ကို ထိန်းသိမ်းထားရမည့်အကြောင်း သူ့ထံသို့ အမိန့်ထုတ်ပြန်၏။ အကြောင်းမူကား၊ လာမန်အမျိုးသားတို့က များစွာသော စစ်အကျဉ်းသားတို့ကို သိမ်းယူသွားလေသကဲ့သို့၊ သူသည်လည်း ခပ်သိမ်းသောလာမန်အမျိုးသားစစ်အကျဉ်းသားတို့ကို လာမန်အမျိုးသားတို့ သိမ်းယူသွားလေသော သူများအတွက် ရွေးယူရာအဖြစ် ထိန်းသိမ်းထားရပေမည်။

၉ အလျှံပယ်ပြည်ကို အင်အားခိုင်မာစေရမည့်အကြောင်းနှင့် လာမန်အမျိုးသားတို့ နေရာရပြီး၊ သူတို့ကို အဘက်ဘက်မှတိုက်ခိုက်ရန် အခွင့်မရစေခြင်းငှာ၊ မြောက်ဘက်လားရာပြည်သို့ သွားသည့် ကျဉ်းမြောင်းသောလမ်းကို လုံခြုံစေရမည့်အကြောင်းကိုလည်း သူ့ထံသို့ အမိန့်ထုတ်ပြန်၏။

၁၀ ထို့အတူ၊ မော်ရော်နိုင်းက သူ့ထံသို့ စေလွှတ်၍ တောင်းဆိုလေသည်ကား၊ ပြည်၏ထိုအရပ်ကို ထိန်းသိမ်းရာ၌ သစ္စာရှိပါမည့်အကြောင်း၊ မိမိတို့လက်မှ သိမ်းယူသွားလေသည့် ထိုမြို့များကို ဥပါယ်တံမျဉ် သို့မဟုတ်၊ တစ်စုံတစ်ခုသောအခြားနည်း အားဖြင့်၊ တစ်ဖန် သိမ်းယူကောင်းသိမ်းယူနိုင်ခြင်းငှာ၊ ထိုအရပ်၌ လာမန်အမျိုးသားတို့ကို နှောင့်ယှက်တိုက်ခိုက်ရန် အခွင့်အရေးမှန်သမျှကို သူ့အစွမ်းရှိသမျှရှာဖွေပါမည့်အကြောင်းနှင့် လာမန်အမျိုးသားတို့၏လက်ထဲသို့ မကျရောက်လေသည့် ပတ်ဝန်းကျင်ဒေသရှိမြို့များကိုလည်း အင်အားခိုင်မာစေ၍၊ ခွန်အားဖြည့်ပေးပါမည့်အကြောင်းတို့ ဖြစ်လေသတည်း။

၁၁ ထို့အတူ၊ သူ့ကို ဆိုလေသည်ကား၊ သင့်ထံသို့ ငါလာလို၏။ သို့ရာတွင်၊ ရှုလော့၊ အနောက်ပင်လယ်အနီး ထိုပြည်၏နယ်နိမိတ်တို့၌ လာမန်အမျိုးသားတို့သည် ငါတို့ကို တိုက်ခိုက်လျက်ရှိ၏။ ရှုလော့၊ ငါသည် သူတို့ကို တိုက်ခိုက်ရ၏။ ထို့ကြောင့်၊ သင့်ထံသို့ မလာနိုင်။

၁၂ ယခုတွင်၊ မင်းကြီး (အမ်မော်ရုန်) သည် ဇရဟင်မလပြည်မှထွက်ခွာ၍၊ သူ့အစ်ကို၏ သေခြင်းကို မိဖုရားကို ဖော်ပြလျက်၊ အရေအတွက် များစွာသောလူတို့ကို အတူတကွစုဝေး၍၊ အနောက်ပင်လယ်အနီး နယ်နိမိတ်အရပ်တို့၌ရှိသော နီဖိုင်းအမျိုးသားများဆီသို့ ချီတက်၏။

၁၃ ထိုကဲ့သို့အားဖြင့်၊ သူသည် နီဖိုင်းအမျိုးသားတို့ကို နှောင့်ယှက်ရန်နှင့် သူတို့၏အင်အားစုတစ်ချို့ကို ပြည်၏ထိုအရပ်သို့ သွေးဆောင်၍ခေါ်သွားရန် ကြိုးစားအားထုတ်လျက်ရှိစဉ်တွင်၊ သူချန်ထားခဲ့သူတို့အား သူသိမ်းယူခဲ့သည့် မြို့များကို နေထိုင်အုပ်ချုပ်ရန်နှင့် အရှေ့ပင်လယ်အနီးနယ်နိမိတ်အရပ်တို့၌ နီဖိုင်းအမျိုးသားတို့ကို နှောင့်ယှက်၍၊ ပြည်များကို သူတို့တပ်များ၏အင်အားအတိုင်း သူတို့အစွမ်းရှိသမျှဖြင့် သိမ်းယူရမည့်အကြောင်း အမိန့်ပေး၏။

၁၄ ထိုကဲ့သို့အားဖြင့်၊ နီဖိုင်းအမျိုးသားတို့အပေါ် တရားသူကြီးများအုပ်စိုးခြင်း နှစ်ဆယ်ခြောက်နှစ်မြောက်၏ အဆုံးပိုင်းတွင် နီဖိုင်းအမျိုးသားတို့သည် ထိုဘေးအန္တရာယ်များလှသော အခြေအနေများ၌ ရှိလေ၏။

၁၅ သို့ရာတွင်၊ ရှုလော့၊ အချိန်တန်လာသောအခါ၊ တရားသူကြီးများအုပ်စိုးခြင်း နှစ်ဆယ်ခုနစ်နှစ်မြောက်၌၊ တေအန်ကမ်သည် မော်ရော်နိုင်း၏အမိန့်ဖြင့်—သူသည်ကား၊ ထိုပြည်၏တောင်ဘက်နှင့် အနောက်ဘက်နယ်နိမိတ်တို့ကို ကာကွယ်ရန် တပ်များကို တည်ထောင်လျက်၊ သူတို့ဆုံးရှုံးလေသည့် မြို့များကို ပြန်လည်သိမ်းယူရာ၌ တေအန်ကမ်ကို သူ၏လူတို့အားဖြင့် ကူညီနိုင်ခြင်းငှာ၊ အလျှံပယ်ပြည်ဆီသို့ ချီတက်စပြုလေသူဖြစ်၏—

၁၆ ဤသို့အားဖြင့်အချိန်တန်လာသောအခါ၊ တေအန်ကမ်သည် မြူးလက်မြို့ကို တိုက်ခိုက်ခြင်းပြုရန်နှင့် ဖြစ်နိုင်လျှင် ပြန်လည်သိမ်းယူရန် အမိန့်ကို ရရှိလေ၏။

၁၇ ဤသို့အားဖြင့်အချိန်တန်လာသောအခါ၊ တေအန်ကမ်သည် မြူးလက်မြို့ကို တိုက်ခိုက်ခြင်းပြုရန်နှင့်၊ လာမန်အမျိုးသားတို့ကို ဆန့်ကျင်၍ သူ့တပ်များဖြင့် ချီတက်ရန် ပြင်ဆင်ခြင်းပြု၏။ သို့ရာတွင်၊ သူတို့ကို သူတို့၏ခံတပ်များထဲ၌ ရှိနေစဉ် အနိုင်ရနိုင်ရန်မှာ မဖြစ်နိုင်ကြောင်းကို သိမြင်၏။ ထို့ကြောင့်၊ သူ၏အကြံကို စွန့်လွှတ်၍၊ သူ့တပ်ကို အင်အားရရှိစေရန်၊ မော်ရော်နိုင်းလာမည်ကို စောင့်ခြင်းငှာ အလျှံပယ်မြို့သို့ တစ်ဖန်ပြန်လာ၏။

၁၈ ဤသို့အားဖြင့်အချိန်တန်လာသောအခါ၊ နီဖိုင်းလူမျိုးတို့အပေါ် တရားသူကြီးများအုပ်စိုးခြင်း နှစ်ဆယ်ခုနစ်နှစ်မြောက်၏နောက်ဆုံးပိုင်းကာလ၌ မော်ရော်နိုင်းသည် သူ့တပ်များနှင့်အတူ အလျှံပယ်ပြည်သို့ ရောက်လာ၏။

၁၉ ထို့အတူ၊ နှစ်ဆယ်ရှစ်နှစ်မြောက်၏အစ၌၊ မော်ရော်နိုင်း၊ တေအန်ကမ်နှင့် များစွာသောဗိုလ်ချုပ်မင်းတို့သည် စစ်တိုက်ခြင်းအတွက် တိုင်ပင်ကြလေ၏—လာမန်အမျိုးသားတို့ ထွက်လာ၍ မိမိတို့ကို ဆန့်ကျင်၍ စစ်တိုက်စေခြင်းငှာ၊ မိမိတို့ပြုရမည့်အရာ၊ သို့မဟုတ်၊ ထိုသူတို့အပေါ် အခွင့်သာခြင်းကိုရ၍၊ မြူးလက်မြို့ကို တစ်ဖန်သိမ်းယူနိုင်ခြင်းငှာ၊ ထိုသူတို့၏အခိုင်အမာစခန်းအပြင်သို့ ထွက်လာစေရန် အချို့သော နည်းလမ်းများဖြင့်သွေးဆောင်နိုင်မည့် အကြောင်းပေတည်း။

၂၀ ဤသို့အားဖြင့်အချိန်တန်လာသောအခါ၊ မြူးလက်မြို့ကို ကာကွယ်သည့် လာမန်အမျိုးသားတို့၏တပ်ထံသို့၊ ထိုသူတို့၏ခေါင်းဆောင် ယာကုပ်အမည်ရှိသောသူထံ သံတမန်တို့ကို စေလွှတ်၍၊ မြို့နှစ်မြို့ကြားရှိ လွင်ပြင်၌ တွေ့ရန် ထွက်လာပါမည့်အကြောင်း တောင်းဆိုကြ၏။ သို့ရာတွင်၊ ရှုလော့၊ ဇော်ရမ်အမျိုးသားဖြစ်လေသော ယာကုပ်သည် လွင်ပြင်၌ သူတို့နှင့်တွေ့ရန်၊ သူ၏တပ်နှင့် ထွက်မလာလိုပေ။

၂၁ ဤသို့အားဖြင့်အချိန်တန်လာသောအခါ၊ မော်ရော်နိုင်းသည် သူတို့ကို မျှတသောနေရာ၌တွေ့ဆုံခြင်းအတွက် မျှော်လင့်ခြင်းမရှိ၍၊ ထို့ကြောင့်၊ လာမန်အမျိုးသားတို့ကို သူတို့၏အခိုင်အမာစခန်း၏အပြင်သို့ မျှား၍ခေါ်နိုင်ခြင်းငှာ အကြံအစည်တစ်ခုကို ဆုံးဖြတ်၏။

၂၂ ထို့ကြောင့်၊ သူသည် တေအန်ကမ်ကို အနည်းငယ်သောလူတို့အား ခေါ်၍၊ ပင်လယ်ကမ်းနားအနီးသို့ ချီတက်၍ ဆင်းသွားစေ၏။ မော်ရော်နိုင်းနှင့် သူ၏တပ်သည်လည်း ညဉ့်အချိန်၌ မြူးလက်မြို့၏အနောက်ဘက်ရှိ တောရိုင်းထဲသို့ ချီတက်၏။ ထိုကဲ့သို့အားဖြင့်၊ နက်ဖြန်နေ့၌၊ လာမန်အမျိုးသားတို့၏အစောင့်များသည် တေအန်ကမ်ကို တွေ့လေလျှင်၊ သူတို့၏ခေါင်းဆောင် ယာကုပ်ထံသို့ ပြေးသွား၍ ပြောပြကြ၏။

၂၃ ဤသို့အားဖြင့်အချိန်တန်လာသောအခါ၊ လာမန်အမျိုးသားတို့၏တပ်များသည် တေအန်ကမ်၏ အရေအတွက်နည်းခြင်းကြောင့်၊ သူတို့အရေအတွက်အားဖြင့် သူ့ကို အနိုင်ရမည်ဟု ထင်မှတ်လျက်၊ တေအန်ကမ်ဆီသို့ ချီတက်၏။ တေအန်ကမ်သည်လည်း လာမန်အမျိုးသားတို့၏တပ်များ မိမိကိုတိုက်ရန် ထွက်လာနေသည်ကို မြင်သောအခါ၊ ပင်လယ်ကမ်းနားအနီးမှ မြောက်ဘက်ဆီသို့ ဆုတ်ခွာစပြု၏။

၂၄ ဤသို့အားဖြင့်အချိန်တန်လာသောအခါ လာမန်အမျိုးသားတို့သည် သူထွက်ပြေးစပြုသည်ကို မြင်လေလျှင်၊ ရဲရင့်လာ၍၊ အင်အားဖြင့် လိုက်ကြ၏။ တေအန်ကမ်သည် မိမိတို့ကို အချည်းအနှီးလိုက်လာသော လာမန်အမျိုးသားတို့ကို ထိုကဲ့သို့အားဖြင့် ဝေးရာသို့ ခေါ်ဆောင်သွားစဉ်၌၊ ရှုလော့၊ မော်ရော်နိုင်းသည် သူနှင့်အတူရှိလေသည့် သူ့တပ်၏တစ်စိတ်တစ်ပိုင်းကို မြို့ထဲသို့ချီတက်၍၊ သိမ်းယူရန် အမိန့်ပေး၏။

၂၅ ထိုကဲ့သို့အားဖြင့်၊ သူတို့သည် မြို့ကို ကာကွယ်ရန် ကျန်ရစ်ခဲ့လေသူခပ်သိမ်း၊ အထူးသဖြင့်၊ စစ်တိုက်ရာလက်နက်များကို မပေးအပ်လိုသူခပ်သိမ်းတို့ကို ကွပ်မျက်ကြ၏။

၂၆ ထိုကဲ့သို့အားဖြင့်၊ မော်ရော်နိုင်းသည် လာမန်အမျိုးသားများ တေအန်ကမ်ကို လိုက်ရာမှ ပြန်လာသောအခါ သူတို့ကို ရင်ဆိုင်ရန် ကျန်ကြွင်းသောသူတို့ဖြင့် ချီတက်စဉ်တွင်၊ သူ့တပ်၏တစ်စိတ်တစ်ပိုင်းဖြင့် မြူးလက်မြို့ကို ရရှိလေ၏။

၂၇ ဤသို့အားဖြင့်အချိန်တန်လာသောအခါ၊ လာမန်အမျိုးသားတို့သည် တေအန်ကမ်ကို အလျှံပယ်မြို့အနီးသို့ရောက်သည်အထိ လိုက်၍၊ ထို့နောက်တွင်၊ လေဟိနှင့်အတူ၊ အလျှံပယ်မြို့ကို ကာကွယ်ရန် ချန်ထားလေသည့် တပ်ငယ်ကို ရင်ဆိုင်ရလေ၏။

၂၈ ယခုမူကား၊ ရှုလော့၊ လာမန်အမျိုးသားတို့၏ဗိုလ်ချုပ်မင်းတို့သည် လေဟိကို သူ၏တပ်နှင့်အတူ သူတို့ထံလာနေသည်ကို မြင်လေလျှင်၊ သူတို့ကို လေဟိမမီခင် မြူးလက်မြို့ကို မရရှိမည်ကို စိုးရိမ်၍၊ လွန်စွာဖရိုဖရဲဖြစ်ပြီး ထွက်ပြေးကြ၏။ အကြောင်းမူကား၊ သူတို့သည် ချီတက်လာရခြင်းကြောင့်၊ မောပန်းလေ၏၊ လေဟိ၏လူတို့မှာ လန်းဆန်းစွာရှိလေ၏။

၂၉ ယခုတွင်၊ လာမန်အမျိုးသားတို့သည် မော်ရော်နိုင်းမှာ သူ့တပ်နှင့်အတူ၊ သူတို့နောက်၌ ရှိနေသည်ကို မသိကြ။ သူတို့ကြောက်ရွံ့သည်မှာလည်း လေဟိနှင့် သူ၏လူများကိုသာဖြစ်၏။

၃၀ ယခုတွင်၊ လေဟိသည် မော်ရော်နိုင်းနှင့် တပ်ကို သူတို့မတွေ့မီအထိ လာမန်အမျိုးသားတို့ကို မီရန်အလိုမရှိ။

၃၁ ဤသို့အားဖြင့်အချိန်တန်လာသောအခါ၊ လာမန်အမျိုးသားတို့သည် ဝေးစွာမဆုတ်ခွာမီတွင်၊ နီဖိုင်းအမျိုးသားတို့အားဖြင့်၊ တစ်ဖက်တွင် မော်ရော်နိုင်း၏ လူတို့အားဖြင့်လည်းကောင်း၊ အခြားတစ်ဖက်တွင် လေဟိ၏ လူတို့အားဖြင့်လည်းကောင်း၊ ဝိုင်းထား ခံရလေ၏။ ထိုသူခပ်သိမ်းတို့မှာ လန်းဆန်း၍ ခွန်အားပြည့်လေ၏။ သို့ရာတွင်၊ လာမန်အမျိုးသားတို့မှာ သူတို့၏ ဝေးစွာသောချီတက်ခြင်းကြောင့် မောပန်းလေ၏။

၃၂ မော်ရော်နိုင်းကလည်း၊ မိမိလူတို့သည် ထိုသူတို့စစ်တိုက်ရာလက်နက်များကို ပေးအပ်လေသည့်အချိန်ထိ တိုက်ခိုက်ရမည့်အကြောင်း အမိန့်ပေး၏။

၃၃ ဤသို့အားဖြင့်အချိန်တန်လာသောအခါ၊ ယာကုပ်သည်၊ သူတို့၏အကြီးအကဲဖြစ်၍၊ ဇော်ရမ်အမျိုးသားတစ်ဦးလည်းဖြစ်၍၊ အနိုင်မခံသောစိတ်လည်းရှိ၍၊ မော်ရော်နိုင်းကို ဆန့်ကျင်၍၊ အလွန်ပြင်းစွာသော အမျက်ဖြင့် စစ်တိုက်ခြင်းငှာ လာမန်အမျိုးသားတို့ကို ဦးဆောင်၍ ထွက်၏။

၃၄ မော်ရော်နိုင်းသည် ချီတက်ရာလမ်းကြောင်း၌ ရှိလေ၍၊ ထို့ကြောင့်၊ ယာကုပ်သည် သူတို့ကို ကွပ်မျက်၍၊ မြူးလက်မြို့သို့ ထိုးဖောက်ကျော်ဖြတ်သွားမည်ဟု သန္နိဌာန်ချ၏။ သို့ရာတွင်၊ ရှုလော့၊ မော်ရော်နိုင်းနှင့် သူ၏လူတို့သည် ပို၍အားကြီးလေ၏။ ထို့ကြောင့်၊ လာမန်အမျိုးသားတို့ရှေ့မှ မဆုတ်ခွာကြ။

၃၅ ဤသို့အားဖြင့်အချိန်တန်လာသောအခါ၊ သူတို့နှစ်ဖက်စလုံး၌ အလွန်ပြင်းစွာသောအမျက်ဖြင့် တိုက်ခိုက်ကြ၏။ နှစ်ဖက်စလုံး၌ များစွာသောသူတို့ ကွပ်မျက်ခံရလေ၏။ ထိုမှတစ်ပါး၊ မော်ရော်နိုင်းဒဏ်ရာရ၍၊ ယာကုပ်လည်းအသတ်ခံရလေ၏။

၃၆ လေဟိသည်လည်း သူတို့၏နောက်ပိုင်း၌ သူ၏အားကြီးသောလူတို့ဖြင့် ထိုကဲ့သို့သောအမျက်နှင့် ပြင်းပြင်းထန်ထန်တိုက်ခိုက်သဖြင့်၊ နောက်ပိုင်းမှ လာမန်အမျိုးသားတို့သည် သူတို့စစ်တိုက်ရာလက်နက်များကို ပေးအပ်ကြ၏။ သူတို့အထဲမှ ကျန်ကြွင်းသောသူတို့သည်လည်း အလွန်စိတ်ရှုပ်ထွေး၍ အဘယ်အရပ်သို့ ထွက်ပြေးရမှန်း၊ သို့မဟုတ် တိုက်ခိုက်ရမှန်း သိခြင်းမရှိကြ။

၃၇ ယခုတွင်၊ မော်ရော်နိုင်းသည် သူတို့၏စိတ်ရှုပ်ထွေးခြင်းကို မြင်ရသောအခါ၊ သင်တို့၏စစ်တိုက်ရာလက်နက်များကို ယူလာပြီး၊ ပေးအပ်ကြလျှင်၊ ရှုလော့၊ သင်တို့၏အသွေးသွန်းလောင်းခြင်းကို ငါတို့ရပ်တန့်မည်ဟု ဆို၏။

၃၈ ဤသို့အားဖြင့်အချိန်တန်လာသောအခါ၊ လာမန်အမျိုးသားတို့သည် ဤစကားများကို ကြားလေလျှင်၊ သူတို့၏ဗိုလ်ချုပ်မင်းများ၊ ကွပ်မျက်မခံရလေသောသူခပ်သိမ်းတို့သည် ထွက်လာကြ၏၊ သူတို့၏စစ်တိုက်ရာလက်နက်များကို မော်ရော်နိုင်း၏ခြေရင်းသို့ ပစ်ချ၍၊ သူတို့၏လူတို့ကိုလည်း ထိုနည်းတူပြုရန် အမိန့်ပေးကြ၏။

၃၉ သို့ရာတွင်၊ ရှုလော့၊ မပေးအပ်လိုသောသူ များစွာရှိလေ၏။ သူတို့၏စစ်တိုက်ရာလက်နက်များကို မပေးအပ်လိုသောသူတို့သည် ဖမ်းဆီး၍ ချည်နှောင် ခံရ၏၊ သူတို့၏စစ်တိုက်ရာလက်နက်များကိုလည်း သူတို့ထံမှ သိမ်းယူ၍၊ သူတို့ညီအစ်ကိုများနှင့်အတူ အလျှံပယ်ပြည်ထဲသို့ ချီတက်စေရန် အနိုင်အထက်စီရင်ခံရလေ၏။

၄၀ ယခုမူကား၊ ဖမ်းဆီးခေါ်ဆောင်ခံရလေသည့် စစ်အကျဉ်းသားတို့၏ အရေအတွက်မှာ၊ ကွပ်မျက်ခံရလေသောသူတို့၏အရေအတွက်ထက် ပို၍သာလွန်၏၊ အမှန်စင်စစ်၊ နှစ်ဖက်စလုံး၌ ကွပ်မျက်ခံရလေသောသူတို့ထက် ပို၍များ၏။