යේසුස් ක්‍රිස්තුස්වහන්සේ යෞවනයේ ශක්තියයි

මගේ හිතවත් කුඩා මිත්‍රවරුනි, ගැලවුම්කරුවාණන් මේ මොහොතේ මෙහි සිටියා නම්, උන්වහන්සේ ඔබට කුමක් කියයිද?

ඔබ කෙරෙහි ඇති උන්වහන්සේගේ ගැඹුරු ආදරය ප්‍රකාශ කිරීමෙන් උන්වහන්සේ ආරම්භ කරනු ඇතැයි මම විශ්වාස කරනවා. උන්වහන්සේ එය වචන වලින් කියයි, නමුත් උන්වහන්සේගේ අභිමුඛයෙන්—එය නොවැරදීම, ඔබේ හදවතේ ගැඹුරට ළඟා වී, ඔබේ මුළු ආත්මයම පුරවමින්—එය ඉතා ශක්තිමත් ලෙස ගලා යයි!

ඒත් එහෙම වුණත්, අපි හැමෝම දුර්වල හා අසම්පූර්ණ නිසා, සමහර ගැටළු ඔබේ මනසට රිංගන්න පුළුවන්. ඔබ කළ වැරදි, ඔබ පරීක්ෂාවට ලක් වූ අවස්ථා, ඔබ නොකළා යැයි ඔබ සිතන දේවල්—හෝ ඔබ වඩා හොඳින් කළා නම් යැයි ඔබ ප්‍රාර්ථනා කරන දේවල් ඔබේ මතකයට එයි.

ගැලවුම්කරුවාණන්ට එය දැනෙයි, ඒවගේම “බිය නොවන්න” කියා උන්වහන්සේ ශුද්ධලියවිලිවල සඳහන් කර ඇති වචන වලින් උන්වහන්සේ ඔබට සහතික වෙයි කියලා මම විශ්වාස කරනවා.

“බිය නොවන්න.”¹

“සැක නොසිතන්න.”²

“ධෛර්යවන්තව සිටින්න.”³

“නුඹලාගේ සිත් කැලඹෙන්ට නොදෙන්න.”⁴

මම හිතන්නේ නැහැ උන්වහන්සේ ඔබේ වැරදි සඳහා කමක් නැහැ කියයි කියලා. උන්වහන්සේ ඒවා කුඩා කරන එකක් නැහැ. නෑ, උන්වහන්සේට ඔබට සමාව දිය හැකි වන ලෙස, ඔබේ පව් අත්හැර, වෙනස් වී—පසුතැවෙන ලෙස උන්වහන්සේ ඔබෙන් ඉල්ලා සිටියි. ඔබට පසුතැවිලි වීමට හැකි වන පරිදි, මීට වසර 2,000 කට පෙර උන්වහන්සේ එම පාපයන් තමා මතට ගත් බව උන්වහන්සේ ඔබට මතක් කරදෙයි. එය අපගේ ප්‍රේමණීය ස්වර්ගීය පියාණන්වහන්සේ අපට තෑගි කළ ප්‍රීතියේ සැලැස්මේ කොටසක්.

ඔබ බව්තීස්ම වූ විට සහ ඔබ සක්‍රමේන්තුවට සහභාගී වන සෑම අවස්ථාවකම අලුත් කරන—ඔබ උන්වහන්සේ සමඟ ඇති කරගත් ගිවිසුම්—උන්වහන්සේ සමඟ ඔබට විශේෂ සම්බන්ධයක් ලබා දෙන බව යේසුස්වහන්සේ පෙන්වා දෙයි. එය උන්වහන්සේගේ උපකාරයෙන් ඔබට ඕනෑම බරක් උසුලාගෙන යා හැකි වන පරිදි ශුද්ධලියවිලි විස්තර කරන ආකාරයට එකට බැඳී ඇති සම්බන්ධයක්.⁵

උන්වහන්සේ ඔබගේ ශක්තිය බව ඔබ දකිනවාට, ඔබට දැනෙනවාට, සහ ඔබ දැනගන්නවාට යේසුස් ක්‍රිස්තුස්වහන්සේ කැමති බව මම විශ්වාස කරනවා. උන්වහන්සේගේ උපකාරය ඇතුව, ඔබට කළ හැකි දේවල් වලට සීමාවක් නෑ. ඒ කියන්නේ ඔබේ හැකියාවන් අසීමිතයි. උන්වහන්සේ ඔබව දකින ආකාරයටම ඔබ ඔබව දැකීම උන්වහන්සේට අවශ්‍යයි. ඒවගේම ලෝකය ඔබව දකින ආකාරයට වඩා එය බෙහෙවින්ම වෙනස්.

ඔබ සර්වබලධාරී දෙවියන්වහන්සේගේ දියණියක් හෝ පුත්‍රයෙක් බව ගැලවුම්කරුවාණන් නිශ්චිත ලෙසම ප්‍රකාශ කරයි. ඔබගේ ස්වර්ගීය පියාණන්වහන්සේ මේ විශ්වයේ වඩාත්ම තේජාන්විත ජීවියා වන අතර, උන්වහන්සේ ආදරයෙන්, ප්‍රීතියෙන්, නිර්මලකමින්, ශුද්ධ බවින්, ආලෝකයෙන්, කරුණාවෙන් සහ සත්‍යයෙන් පූර්ණයි. ඒ වගේම යම් දවසක උන්වහන්සේ සතු සියල්ල ඔබ උරුම කරගන්නවාට උන්වහන්සේ කැමතියි.⁶

ඔබ මේ පොළොවේ සිටීමට හේතුව එයයි—ඒ තමයි ඉගෙනීමට, වර්ධනය වීමට සහ දියුණු වීමට සහ ස්වර්ගයේ සිටින ඔබේ පියාණන්වහන්සේ ඔබව නිර්මාණය කර ඇති සියල්ල බවට පත්වීමට.

මෙය යතාර්ථයක් කිරීම සඳහා, ඔබේ ගැලවුම්කරුවාණන් වීමට උන්වහන්සේ යේසුස් ක්‍රිස්තුස්වහන්සේව එව්වා. උන්වහන්සේගේ ප්‍රීතියේ මහා සැලැස්ම, උන්වහන්සේගේ සභාව, උන්වහන්සේගේ පූජකත්වය, ශුද්ධලියවිලි—මේ සියල්ල පිටුපස ඇති අරමුණ තමයි ඒ.

ඒ තමයි ඔබගේ ඉරණම. ඒ තමයි ඔබේ අනාගතය. ඒ තමයි ඔබේ තේරීම!

ඔබගේ සන්තෝෂය සඳහා දෙවියන්වහන්සේගේ සැලැස්මේ හදවත තමයි ඔබේ තෝරාගැනීමේ බලය.⁷ ඇත්ත වශයෙන්ම, ඔබගේ ස්වර්ගීය පියාණන්ට අවශ්‍ය වන්නේ ඔබ උන්වහන්සේ සමඟ සදාකාලික ප්‍රීතිය තෝරා ගැනීමයි, එය සාක්ෂාත් කර ගැනීමට උන්වහන්සේ ඔබට උපකාර කරයි, ඒත් උන්වහන්සේ කිසිවිටෙකත් ඒ සඳහා ඔබට බල කරන්නේ නෑ.

එමනිසා උන්වහන්සේ ඔබට තෝරාගැනීමට ඉඩ සලසනවා: ආලෝකය හෝ අන්ධකාරය? යහපත හෝ නපුර? ප්‍රීතිය හෝ දුක? සදාකාලික ජීවිතය හෝ ආත්මික මරණය?⁸

එය පහසු තේරීමක් ලෙස පේනවා, නේද? නමුත් කෙසේ හෝ, මේ පොළොව මත, එය පෙනෙන්න තිබෙනවාට වඩා සංකීර්ණයි.

ප්‍රශ්නය තමයි අපි කැමති තරම් පැහැදිලිව හැමවෙලේම අපිට දේවල් පෙනෙන්නට නෑ. ප්‍රේරිත පාවුල් එය සංසන්දනය කළේ “වීදුරුවකින් අඳුරු ලෙස” බැලීමකටයි.⁹ හරි දේ සහ වැරදි දේ ගැන ලෝකයේ බොහෝ ව්‍යාකූලත්වයන් තිබෙනවා. අයහපත හොඳ ලෙසත් යහපත අයහපත් ලෙසත් පෙනෙමින් සත්‍යය විකෘති වෙනවා.¹⁰

නමුත් ඔබ උනන්දුවෙන්—එම සදාකාලික, නොවෙනස්වන සත්‍යය සොයන විට—ඔබේ තේරීම් වඩාත් පැහැදිලි වෙනවා. ඔව්, ඔබට තවමත් පරීක්ෂාවන් සහ අභියෝග තියෙයි. නරක දේවල් තවමත් සිදුවෙයි. ප්‍රහේලිකා සහිත දේවල්, ඛේදජනක දේවල් සිදුවෙයි. නමුත් ඔබ කවුද, ඔබ මෙහි සිටින්නේ ඇයි සහ ඔබ දෙවියන්වහන්සේව විශ්වාස කළ යුත්තේ කෙලෙසද කියා ඔබ දැනගත් විට ඔබට ඒවා දරාගන්න පුළුවන්.

ඉතින් ඔබ සත්‍යය සොයා ගන්නේ කොහෙන්ද?

එය යේසුස් ක්‍රිස්තුස්වහන්සේගේ ශුභාරංචියේ ඇතුළත් වෙනවා. ශුභාරංචියේ ඒ පූර්ණත්වය යේසුස් ක්‍රිස්තුස්වහන්සේගේ පසුදවස් වල ශුද්ධවන්තයන්ගෙන් යුත් සභාවේ උගන්වනවා.

යේසුස් ක්‍රිස්තුස්වහන්සේ මෙහෙම කිව්වා: “මාර්ගයද සැබෑවද ජීවනයද මමය. මා කරුණුකොටගෙන මිස කිසිවෙක් පියාණන්වහන්සේ වෙතට පැමිණෙන්නේ නැත.”¹¹

ඔබට වැදගත් තේරීම් කිරීමට ඇති විට, යේසුස් ක්‍රිස්තුස්වහන්සේ සහ උන්වහන්සේගේ නැවත පිහිටුවන ලද ශුභාරංචිය තමයි හොඳම තේරීම. ඔබට ප්‍රශ්න ඇති විට, යේසුස් ක්‍රිස්තුස්වහන්සේගේ සහ උන්වහන්සේගේ නැවත පිහිටුවන ලද ශුභාරංචිය තමයි හොඳම පිළිතුර. ඔබට දුර්වල බවක් දැනෙන විට, යේසුස් ක්‍රිස්තුස්වහන්සේ තමයි ඔබේ ශක්තිය.

උන්වහන්සේ වෙහෙසට පත් වූවන්ට බලය ලබා දෙනවා; ඒවගේම බල රහිත යැයි හැඟෙන අයට, උන්වහන්සේ ශක්තිය වැඩි කර දෙනවා.

ස්වාමින්වහන්සේ කෙරෙහි බලා සිටින අය උන්වහන්සේගේ ශක්තියෙන් අලුත් වෙනවා.¹²

ඔබට මාර්ගය සොයා ගැනීමට උදව් වීමට සහ ක්‍රිස්තුස්වහන්සේගේ දහම ඔබේ ජීවිතයට මගපෙන්වන බලපෑම බවට පත්කිරීමට ඔබට උපකාර කිරීම සඳහා, යේසුස් ක්‍රිස්තුස්වහන්සේගේ පසුදවස් වල ශුද්ධවන්තයින්ගෙන් යුත් සභාව විසින් නව සම්පතක් සූදානම් කර තිබෙනවා, එය යෞවනයින්ගේ ශක්තිය සඳහා සංශෝධිත අනුවාදයක්.

රූපය

යෞවනයින්ගේ ශක්තිය සඳහා 2011 අනුවාදය

වසර 50 කට වැඩි කාලයක්, යෞවනයින්ගේ ශක්තිය සඳහා සම්පත පසුදවස් වල ශුද්ධවන්තයින්ගේ පරම්පරා ගණනාවකට මාර්ගෝපදේශයක් වී තිබෙනවා. මම සෑම විටම මගේ සාක්කුවේ පිටපතක් තබා ගන්නවා, ඒවගේම අපගේ ප්‍රමිතීන් ගැන කුතුහලයෙන් සිටින අය සමඟ මම එය බෙදාගන්නවා. අපේ අද දවසේ අභියෝග සහ පරීක්ෂාවන්ට, වඩා හොඳින් මුහුණ දීම සඳහා එය යාවත්කාලීන කර ප්‍රබෝධමත් කර තිබෙනවා. යෞවනයින්ගේ ශක්තිය සඳහා හි නව අනුවාදය විවිධ භාෂා 50 කින් අන්තර්ජාලයෙන් ලබා ගත හැකි අතර මුද්‍රණයෙන් ද ලබා ගන්න පුළුවන්. ඔබේ ජීවිතයේ තේරීම් කිරීමට එය සැලකිය යුතු උපකාරයක් වෙයි. කරුණාකර එය ඔබේම දෙයක් ලෙස වැළඳගෙන ඔබේ මිතුරන් සමඟ බෙදා ගන්න.

රූපය

යෞවනයින්ගේ ශක්තිය සඳහා 2022 අනුවාදය

යෞවනයින්ගේ ශක්තිය සඳහා සම්පතේ මෙම නව අනුවාදයේ තෝරාගැනීම් සඳහා මාර්ගෝපදේශයක් ඇතුළත් කර තිබෙනවා.

ඉතා පැහැදිලිව කිවහොත්, තේරීම් කිරීම සඳහා ඔබට තිබිය හැකි හොඳම මාර්ගෝපදේශකය තමයි යේසුස් ක්‍රිස්තුස්වහන්සේ. යේසුස් ක්‍රිස්තුස්වහන්සේ තමයි යෞවනයේ ශක්තිය.

එබැවින් යෞවනයින්ගේ ශක්තිය සඳහා සම්පතේ අරමුණ ඔබව උන්වහන්සේ වෙතට යොමු කිරීමයි. එය උන්වහන්සේගේ නැවත පිහිටුවන ලද ශුභාරංචියේ සදාකාලික සත්‍යයන් ඔබට උගන්වනවා—ඔබ කවුද, උන්වහන්සේ කවුද සහ උන්වහන්සේගේ ශක්තියෙන් ඔබට ඉටු කළ හැකි දේ පිළිබඳ සත්‍යයන් උගන්වනවා. එම සදාකාලික සත්‍යයන් මත පදනම්ව ධර්මිෂ්ඨ තේරීම් කරන්නේ කෙසේදැයි එය ඔබට උගන්වනවා.¹³

යෞවනයින්ගේ ශක්තිය සඳහා සම්පත විසින් නොකරන්නේ කුමක්දැයි දැන ගැනීමත් වැදගත්. එය ඔබ වෙනුවෙන් තීරණ ගන්නේ නෑ. ඔබ කවදා හෝ මුහුණ දිය හැකි සෑම තේරීමක් ගැනම එය ඔබට “ඔව්” හෝ “නැත” යන පිළිතුරු ලබාදෙන්නේ නෑ. යෞවනයින්ගේ ශක්තිය සඳහා සම්පත ඔබේ තේරීම් සඳහා පදනම කෙරෙහි අවධානය යොමු කරනවා. එය සෑම නිශ්චිත හැසිරීමක් වෙනුවට සාරධර්ම, මූලධර්ම සහ දහම කෙරෙහි අවධානය යොමු කරනවා.

ස්වාමින්වහන්සේ, උන්වහන්සේගේ අනාගතවක්තෘවරුන් හරහා, සෑම විටම අපව එම දිශාවට යොමුකර තිබෙනවා. “එළිදරව්ව ලබාගැනීමට [අපගේ] අධ්‍යාත්මික හැකියාව වැඩි කරගන්නා” ලෙස උන්වහන්සේ අපෙන් ආයාචනා කරනවා.¹⁴ “උන්වහන්සේට සවන් දෙන්න”¹⁵ කියා උන්වහන්සේ අපට ආරාධනා කරනවා. උසස් හා පරිශුද්ධ මාර්ග වලින් උන්වහන්සේව අනුගමනය කරන ලෙස උන්වහන්සේ අපව කැඳවනවා.¹⁶ එන්න, මා අනුගමනය කරන්න තුළින් අපි සෑම සතියකම ඒ හා සමාන ආකාරයකින් ඉගෙනගන්නවා.

ඔබ නොඇඳිය යුතු ඇඳුම්, ඔබ නොකිව යුතු වචන සහ ඔබ නැරඹිය යුතු නැති චිත්‍රපටවල දිගු ලැයිස්තු එම මාර්ගෝපදේශකයට ඔබට ලබා දිය හැකි බව මම හිතනවා. නමුත් එය ගෝලීය සභාවකට ඇත්තෙන්ම ප්‍රයෝජනවත් වේවිද? එවන් ප්‍රවේශයක් ක්‍රිස්තුස්වහන්සේ මෙන් ජීවත් වීමට ජීවිත කාලය පුරාවටම ඔබව සූදානම් කරයිද?

ජෝසෆ් ස්මිත් මෙසේ කිව්වා, “මම ඔවුන්ට නිවැරදි මූලධර්ම උගන්වනවා, ඒවගේම ඔවුන් තමන්වම පාලනය කරගන්නවා.”¹⁷

බෙන්යමින් රජු මොර්මොන්ගේ පොතේ තම සෙනඟට මෙසේ පැවසුවා, “නුඹලා විසින් පාපයන් සිදුකළ හැකි සියලු දේවල් කීමට මට නොහැකිය; මක්නිසාද එහි බොහෝ මාර්ග සහ ක්‍රම ඇත, ඒවා බොහෝය, මට ඒවා ගණන් කළ නොහැක.”¹⁸

බෙන්යමින් රජු තවදුරටත් මෙසේ පැවසුවා: “එහෙත් මෙපමණක් මට නුඹලාට කිව හැක, … නුඹලා ගැනත්, තවද නුඹලාගේ සිතුවිලි ගැනත්, තවද නුඹලාගේ වචන ගැනත්, තවද නුඹලාගේ ක්‍රියාවන් ගැනත් බලාගනින්න, තවද දෙවියන්වහන්සේගේ ආඥාවන් පවත්වන්න, තවද නුඹලාගේ ජීවිතයේ අවසානය දක්වා වුවද … අපගේ ස්වාමින්වහන්සේ කෙරෙහි, ඇදහිල්ලෙන් නොකඩවා පවතින්න.”¹⁹

රූපය

ගැලවුම්කරුවාණන් වන යේසුස් ක්‍රිස්තුස්වහන්සේ

නීති තිබීම වැරදිද? ඇත්තවශයෙන්ම නෑ. අපි හැමෝටම හැමදාම ඒවා අවශ්‍යයි. නමුත් ගැලවුම්කරුවාණන් කෙරෙහි අවධානය යොමු කිරීම වෙනුවට නීති ගැන පමණක් අවධානය යොමු කිරීම වැරදියි. ඇයි සහ කෙසේද යන්න ඔබ දැනගත යුතු අතර, ඔබේ තේරීම්වල ප්‍රතිවිපාක ඔබ සලකා බැලිය යුතුයි. ඔබ යේසුස් ක්‍රිස්තුස්වහන්සේ කෙරෙහි විශ්වාසය තැබිය යුතුයි. උන්වහන්සේ ඔබව නිවැරදි මාර්ගයට ගෙන යයි. උන්වහන්සේ ඔබේ ශක්තියයි.²⁰

යෞවනයින්ගේ ශක්තිය සඳහා සම්පත යේසුස් ක්‍රිස්තුස්වහන්සේගේ දහම ඉතා සෘජුව ප්‍රකාශ කරනවා. ක්‍රිස්තුස්වහන්සේගේ දහම මත පදනම්ව තේරීම් කිරීමට එය ඔබට සෘජුවම ආරාධනා කරනවා. ඒවගේම යේසුස් ක්‍රිස්තුස්වහන්සේගේ මාර්ගය අනුගමනය කරන අයට උන්වහන්සේ පොරොන්දු වන ආශිර්වාදද එය සෘජුව විස්තර කරනවා.²¹

සභාපති රසල් එම්. නෙල්සන් මෙසේ ඉගැන්වූවා: “ඔබේ ලොකුම ආශාව වන්නේ [ඔබේ ජීවිතය තුළ] දෙවියන්වහන්සේට ජය ගැනීමට ඉඩ දීම නම්, බොහෝ තීරණ පහසු වෙනවා. … බොහෝ ගැටළු ගැටළු නොවන ඒවා බවට පත්වෙනවා! ඔබම ලස්සනට සැරසෙන්නේ කෙසේදැයි ඔබ දැනගන්නවා. නැරඹිය යුතු හා කියවිය යුතු දේ, ඔබේ කාලය ගතකළ යුත්තේ කොතැනද, සහ ඇසුරු කළ යුත්තේ කා සමඟද යන්න ඔබ දැනගන්නවා. ඔබට ඉටුකරගැනීමට අවශ්‍ය දේ ඔබ දැනගන්නවා. ඔබ වීමට කැමති පුද්ගලයා … කවුරුද කියා ඔබ දැනගන්නවා.”²²

යේසුස් ක්‍රිස්තුස්වහන්සේට උන්වහන්සේගේ අනුගාමිකයන් සඳහා ඉතා උසස් ප්‍රමිතීන් තිබෙනවා. එමෙන්ම උන්වහන්සේගේ කැමැත්ත ඕනෑකමින් සොයා බලා උන්වහන්සේගේ සත්‍යයන් අනුව ජීවත් වීමට කරන ආරාධනය තමයි උසස්ම ප්‍රමිතිය!

වැදගත් ලෞකික සහ අධ්‍යාත්මික තේරීම් පුද්ගලික මනාපයන් හෝ පහසු හෝ ජනප්‍රිය දේ මත පමණක් පදනම් නොවිය යුතුයි.²³ “ඔබ කැමති ඕනෑම දෙයක් කරන්න” කියා ස්වාමින්වහන්සේ කියන්නේ නෑ.

උන්වහන්සේ කියන්නේ “දෙවියන්වහන්සේට ජයගන්න ඉඩදෙන්න” කියායි.

උන්වහන්සේ කියන්නේ, “එන්න, මා අනුගමනය කරන්න” කියායි.²⁴

උන්වහන්සේ කියන්නේ “පරිශුද්ධ, උසස්, පරිණත ආකාරයකින් ජීවත් වන්න” කියායි.

උන්වහන්සේ කියන්නේ “මාගේ ආඥා පවත්වන්න” කියායි.

යේසුස් ක්‍රිස්තුස්වහන්සේ අපගේ පරිපූර්ණ ආදර්ශය වන අතර, අපගේ ප්‍රාණයේ මුළු ශක්තියෙන්ම උන්වහන්සේව අනුගමනය කිරීමට අපි උත්සාහ කරමු.

මගේ ආදරණීය මිත්‍රවරුනි, මට නැවත කියන්නට ඉඩ දෙන්න, ගැලවුම්කරුවාණන් අද මෙහි සිටගෙන සිටියේ නම්, උන්වහන්සේ ඔබ කෙරෙහි උන්වහන්සේ තුළ ඇති අසීමිත ආදරය, ඔබ කෙරෙහි ඇති උන්වහන්සේගේ සම්පූර්ණ ආත්ම-විශ්වාසය ප්‍රකාශ කරයි. ඔබට මෙය කළ හැකි බව උන්වහන්සේ ඔබට කියයි. යේසුස් ක්‍රිස්තුස්වහන්සේ ඔබේ ශක්තිය නිසා ඔබට ප්‍රීතිමත්, සන්තෝෂවත් ජීවිතයක් ගොඩනගා ගන්න පුළුවන්. ඔබට ආත්ම-විශ්වාසය, සාමය, ආරක්ෂාව, සතුට, දැන් සහ සදාකාලයට අයිති බව සොයා ගන්න පුළුවන්, මොකද ඔබ ඒ සියල්ල යේසුස් ක්‍රිස්තුස්වහන්සේ තුළ, උන්වහන්සේගේ ශුභාරංචිය තුළ සහ උන්වහන්සේගේ සභාව තුළ සොයා ගනියි.

මේ පිළිබඳව මම ස්වාමින් වන යේසුස් ක්‍රිස්තුස්වහන්සේගේ ප්‍රේරිතවරයෙකු ලෙස මාගේ බැරෑරුම් සාක්ෂි දරන අතර ඔබ කෙරෙහි ගැඹුරු කෘතඥතාවයෙන් හා ආදරයෙන් යුතුව මාගේ හෘදයාංගම ආශිර්වාදය ඔබට තබන්නේ, යේසුස් ක්‍රිස්තුස්වහන්සේගේ නාමයෙන්, ආමෙන්.