Te riroraa ei haamaitairaa rahi no to tatou mau taata

I te 27raa o toʼna matahiti, ua faatoroʻahia o Wilford Woodruff ei tahuʻa i te 5 no Novema 1834. E vaʻu mahana i muri iho ua riro mai oia ei misionare no te piti matahiti te maoro i te mau pae apatoa hitia o te râ o te fenua Marite.¹ I te hoê pô ua taoto raua toʼna hoa i roto i te hoê utuafare i niʻa i te tahua, e te parau ra oia e, “e mea fifi mau, i te mea e, ua haere maua e 97 kirometera i te atea ma te tamaa ore.”²

Ia poʻipoʻi aʻe, ua haere raua i te atearaa 19 kirometera na roto i te ua e tae roaʼtu i te fare o te hoê taata tei riro na ei melo no te pŭpŭ taata iino i Missouri. Ua parau te taeae Woodruff e, “I to maua taeraaʼtu, te faaineine ra to te utuafare i te tamaa. I taua tau ra, e peu matarohia e te mau taata no Missouri ia titau ia oe ia haere mai e tamaa noaʼtu e, aita ratou e au ia oe; no reira, ua titau maira oia ia maua ia tamaa i taua poipoi ra, e ua oaoa roa maua i taua titauraa ra. Ua ite oia e, e Momoni maua; e i to maua hamataraa i te tamaa, ua haamata atoa oia i te faaino i te Momoni. Te vaira i niʻa i te amuraa maa hoê farii “bacon” rahi e te huero moa, e te faraoa e rave rahi, e aita taʼna faainoraa i tapu i ta maua tamaaraa, i te mea e, rahi noaʼtu taʼna faainoraa, rahi noatoaʼtu ta maua amuraa, e î noaʼtu to maua opu; i muri iho, tiʻa aʻe nei maua i niʻa, rave atura i to maua taupoo, e haamauruuru atura iaʼna no te maa. Te parau hopea ta maua i faaro iaʼna i te parauraa, taʼna ïa faainoraa. Te tiaturi nei au e, e haamaitai te Fatu iaʼna no te maa ta maua i amu.”³

I te hopea o te matahiti matamua o taʼna misioni, te faatiʻa ra oia e, “ua ratere oia i te atearaa e pae tauatini e piti hanere e piti ahuru ma vaʻu kirometera, e ua faatupu hoê hanere e hitu ahuru putuputuraa, [e] ua bapetizo e maha ahuru ma toru taata.”⁴

I muri aʻe i taʼna misioni matamua i te pae Apatoa o te fenua Marite, ua rave oia e piti misioni poto noa i te mau Motu no Fox i rapae i te hiti fenua no Maine,⁵ e e piti tau misioni i Peretane.⁶ I roto i taʼna misioni hopea i Peretane, i te matahiti 1840, ua faaite oia e, “na roto i te haamaitairaa a te Atua,” ua riro oia ei mauhaa no te faafariuraa mai hau atu i te 1800 varua i roto i te Ekalesia i roto noa i te hoê puʻe tau e vaʻu avaʻe te maoro.⁷

Ua faaite papu o Wilford Woodruff e ua fafau te Buka a Moromona e “Ua horoʻa mai te Atua i te raveʻa e tiʻa ai i te taata, na roto i te faaroo, ia faatupu i te mau temeio rarahi; e no reira, ua riro mai oia ei maitai rahi no toʼna mau taata tupu.”⁸ E taʻu mau taeae apî no te Autahuʻaraa a Aarona, te hinaaro nei au e faahaamanaʻo atu ia outou e, te hinaaro nei to tatou Metua i te Ao ra ia riro outou, eiaha ei mau taata maitai noa, ei mau taata maitai atoa râ na roto i te raveraa i te ohipa maitai no vetahi ê, te taviniraa e te haamaitairaa i te oraraa o vetahi ê, e te riroraa ei haamaitairaa no to outou mau taata tupu.

Te faaite ra te Evanelia a Luka e “Tupu atura Iesu i te rahi e te paari, e te herehia mai e te Atua e te taata atoa.”⁹ No te mea hoi e, ta tatou titauraa ia maitai roa, tei roto ïa i te reira te parau no te riroraa mai te Faaora te huru, no reira, tatou atoa, ia tupu atoa tatou i te rahi e te paari, e te herehia mai e te Atua e te taata atoa.

E riro te mau faaoaoaraa a te pŭpŭ Autahuʻaraa e te Feia Apî, mai te mea e, e faanahonaho-maitai-hia te reira na roto i te pure, e e tuatapapa-maitai-hia hoi i roto i te Tomite Episekoporaa a te Feia Apî,¹⁰ ei tauturu i te feia apî tamaroa e te feia apî tamahine tataitahi, e tae noaʼtu i tei paruparu rii, e o ratou e ere i te melo no te Ekalesia, ia tupu i rahi i roto i te paari na roto i to ratou ite-hau-raa i te mau papaʻiraa moʻa e te mau parau a te mau peropheta ora, e to ratou haereraa i roto i te mau faaoaoaraa a te feia apî, oia hoi, “te mau mea maitai, te mau mea faahiahia, te mau mea roo maitai e te mau mea poupouhia ra.”¹¹

E riro te mau apooraa a te Tomite Episekoporaa a te Feia Apî, ei haapiiraa i te hoê uʻi taatoa o te feia faatere no ananahi, i reira hoi ratou e haapii ai i te rave amui i te ohipa i roto i te mau apooraa.

Outou e te feia apî e, e tupu outou i te rahi e te puai i te tino mai te mea e, e faaô outou ia outou i roto i te ohipa ori, te ohipa tuaro, e i roto i te mau tataʻuraa tuaro maitai e te auhoa tei roto i reira te varua hauti maitai. E herehia outou e te Atua mai te mea e, e rave outou i te ohipa tuatapaparaa utuafare, te bapetizoraa i roto i te hiero no te mau tupuna tei pohe, te riroraa outou ei feia hahaere utuafare maitai, e tamâ pinepine outou i te fare pureraa, haere e farerei i te feia e utuutuhia i te utuafare, e e tauturu hoi i te faaʻunaʻunaraa i to outou oire. Ia na reira hoi outou, te faaohipa ra ïa outou i te aʻoraa a te arii Beniamina, tei na ô e, “a tavini ai outou i te taata nei, te tavini [ra] ïa outou i to outou Atua ra.”¹² Eita te hoê faatere feia apî maramarama e faananea roa i te ohipa imiraa faufaa, e faaitoito râ oia i te ohipa taviniraa ia vetahi ê.

Outou e te mau taeae apî e, e herehia outou e te taata e e ineine roaʼtu outou no te misioni, no te faaipoiporaa e no te hoê ohipa no ananahi, mai te mea e, e rahi atu te mau mea ta outou e haapii no niʻa i tera toroʻa e tera toroʻa, e ia faarahi outou i to outou tiaturi ia outou iho na roto i te horoʻaraa i te tahi mau aʻoraa, na roto i te faaôraa i roto i te tahi mau hautiraa teata taata ora, e te tahi mau hauti faaiteraa taleni.

E mea tiʻa i ta tatou mau faaoaoaraa na te feia apî ia riro ei faaiteraa i to tatou tiaturiraa e, “te vai nei te mau taata ia noaa to ratou oaoa,”¹³ e e mea tiʻa ia tatou ia horoʻa i taua oaoa ra ia vetahi ê. E ere i te mea maoro i teie nei, ua farerei au i te hoê vahine no te pae Hitia o te râ mai, e te ora nei oia i Roto Miti i teie nei. E melo haapao maitai oia no te tahi Ekalesia Keritetiano, e no reira, ua ani atura vau iaʼna e, eaha toʼna huru a ora ai oia i rotopu i te Feia Moʻa i te mau Mahana Hopea nei. Na ô maira oia e, “E mea maitai roa maua taʻu tane, te haapeapea nei râ vau no ta maua tamahine iti. Pauroa te ahiahi Mahana Toru, i te area no te hora hitu, e ite au i te tahi mau tamahine no to matou vahi ia haere amui i te hoê vahi, na mua noa i to matou fare, e aita roa ratou i tapea mai i te fare hoê noa aʻe taime no te ani mai i ta maua tamahine iti 14 matahiti ia haere atoa na muri iho ia ratou.”

Ua parau atura vau e, “Ua tanohia ïa oe i teie mahana; e nehenehe taʻu e faaafaro i taua fifi ra.” Ua horoʻa oioi maira oia i te iʻoa o taʼna tamahine e te vahi nohoraa, e ua farerei matou i te peresideni e te faatere no te haapiiraa evanelia.

To tatou mau hoa e tae noaʼtu hoi i to tatou mau veutupu, e mau tamarii anaʻe ratou na te hoê Metua here i te Ao ra tei hinaaro ia hoʻi paatoa ratou i pihaiiho Iaʼna. E oaoa anei tatou mai te mea e, aita te taatoaraa o te mau melo o ta tatou pùpù i tae mai i te poipoi Sabati? E mea papu e, e nehenehe ta tatou e haere atu i te feia huru paruparu ra, e i te feia no te tahi atu faaroo, e ia titau manihini ia ratou ma te au maitai, ia haere mai i roto i ta tatou mau faaoaoaraa na te Feia Apî Tamaroa e te Feia Apî Tamahine, i te Haapiiraa Evanelia, i te Haapiiraa Sabati, e i te mau pureraa oroʻa.

I te taime a farii ai Iosepha Semita e o Olive Tautere i te Autahuʻaraa a Aarona i raro aʻe i te rima o Ioane Bapetizo tei tiafaahou, ua farii ïa raua i “te mau taviri no te utuuturaa [a] te mau melahi,”¹⁴ e mai te reira atoa outou i te taime a faatoroʻahia ai outou. Te pure nei au no outou e te feia apî tamaroa nehenehe, eiaha i te tiamâ-noa-raa outou no te farii i te mau melahi utuutu, ia riro atoa râ outou, mai te tamaiti apî ra o Wilford Woodruff, ei melahi utuutu i roto i te oraraa o vetahi ê a faaohipa ai outou i to outou faaroo no te faatupu i “te mau temeio rarahi,” e na roto i te reira, riro atu ai outou ei “haamaitairaa rahi” no to outou mau taata.

E haamorohi Satane i to outou faaroo e e faatarapape i te mana o to outou autahuʻaraa no te faatupu i te mau temeio rarahi, tera râ, ua horoʻa mai te hoê Metua here i te Ao ra i te hoê paruru no te raʻi mai—te Horoʻa no te Varua Maitai. I roto i te pene matamua o te Buka a Moromona ua haapiihia tatou e, i to Lehi taiʻoraa i te mau papaʻiraa moʻa “î aʻera oia i te Varua o te Fatu.”¹⁵ I muri aʻera, ua fafau mai Nephi ia tatou e, “ia poupou [anaʻe tatou] i te parau a te Mesia … e faaite te parau a te Mesia ia [tatou] i te mau mea [atoa] ta [tatou] e haapao.”¹⁶

Te imi nei paha outou i te faaotiraa e au no te hoê misioni, no te hoê toroʻa ohipa no ananahi, e no te hoê paha faaipoiporaa. Ia taiʻo outou i te mau papaʻiraa moʻa e ia pure hoi no te ani i te aratairaa, eita paha te pahonoraa e papaʻihia mai i niʻa i te hoê api parau, tera râ, ia taiʻo anaʻe outou, e tupu mai i roto ia outou te tahi mau feruriraa maramarama, e te tahi mau faaururaa, e, mai tei fafauhia ra, na te Varua Maitai “e faaite ia outou i te mau mea atoa ta outou e rave.”¹⁷

E titau Satane ia faaruʻe outou i to outou tiamâraa i te pae morare no te rave i te mau peu haavîraa huru rau, auaʻe râ ua fafau mai te hoê Metua here i te Ao ra ia outou na roto i Taʼna peropheta o Isaia e, na roto i te hapaeraa maa ma te aau tae mau, e te haavîraa outou i to outou mau hiaai o te tino, e tauturu Oia ia outou “ia tatara i te ruru ra o te ino,” e “ia ofatihia te mau zugo atoa ra.”¹⁸ A titau i teie nei fafauraa na roto i te haapaeraa maa. E mâ to muri mai i te vero rahi. Ia ateatea maitai tatou, e rahi ïa te vairaa no te farii i te îraa o te evanelia.

Te taiʻoraa i te papaʻiraa moʻa e te haapaeraa i te maa, ma te haamata e ma te faahope i te reira na roto i te pure, e nehenehe mau ta te reira “e taui i te pô ei ao.”¹⁹ Ua riro te oraraa taatoa o te Peropheta Iosepha Semita ei faaiteraa i te mana o te pure e i te tupuraa o te fafauraa a te Fatu e “mai te mea e ani mai outou, e farii mai hoi outou i te heheuraa na niʻa i te heheuraa.”²⁰ Te hoê heheuraa faufaa roa ta outou e farii, maori râ, te iteraa e nahea e tiʻa ai ia outou ia faauru maitai roa i te oraraa o te feia tei hahi ê te haerea. Ia na reira outou, e mea tano ia haamanaʻo outou i te aʻoraa paari a te Peresideni Hinckley: “O te Varua Maitai te Faaite Papu i te parau mau, e te haapii hoi i te taata i te mau mea e ore e tiʻa ia ratou ia haapii atu i te tahi e te tahi.”²¹

Te feruri nei te Peresideni Gordon B. Hinckley e, e riro te mau hoa maitai ei hoê o te mau taviri no te tapearaa i te feia faafariu-apî-hia mai e no te faaitoito faahou i te feia tei paruparu, ia au i te faataaraa nehenehe a Robert Browning:

Ei Peresideni no te Ekalesia, i roto i toʼna paariraa, ua parau o Wilford Woodruff e, “E Tahua anei e aore ra, e Aposetolo anei te hoê taata, aita ïa e vahi huru ê i te reira, mai te mea e, e haapao maite oia i toʼna ra piiraa. Te mau ra te Tahua i te mau taviri no te utuuturaa [a] te mau melahi. Aita roaʼtu hoê aʻe taime i roto i toʻu oraraa ei Aposetolo, ei Hitu Ahuru, e aore râ, ei Peresibutero, a farii rahi ai au i te parururaa a te Fatu mai taʻu i farii a mau ai au i te toroʻa o te hoê Tahua. Ua heheu mai te Fatu iaʻu na roto i te orama, na roto i te heheuraa, e na roto i te Varua Moʻa, e rave rahi mau mea i mua iaʻu.”²³

E toʻu mau taeae here e, te pure nei au ia tiʻa ia tatou tataitahi, na roto i to tatou faaroo, ia faaohipa i to tatou mana autahuʻaraa no te faatupu i te mau temeio rarahi na roto i te faaiteraa i te evanelia e i te taviniraa ia vetahi ê, e na roto i te reira, e riro ïa tatou ei haamaitairaa no to tatou mau taata, na roto i te iʻoa o Iesu Mesia ra, amene.