Bonnie D. Parkin
Peresideni Rahi no te Sotaiete Tauturu
“E rave rahi mau mea maitataʻi i tupu i roto i toʻu oraraa e tumu ïa no te Sotaiete Tauturu,” o ta Bonnie D. Parkin ia i parau. “Te tiʻaturi nei au i te maitai rahi o te mau vahine o te imi te tahi i te tahi no te haapopou te tahi i te tahi.”
Fanauhia oia i te 4 no atete 1940 ia Jesse H. e Ruth Butikofer Dansie, o oia ïa te tamarii toru i roto i teie utuafare e pae tamarii. Ua paari mai oia i Herriman, i Utah, i te tufaa apatoa tooa o te râ o te afaa no Roto Miti, tei faaeahia i te reira ra tau e te tupuna tane o to’na metua tane i raro aʻe i te arataʻiraa a te peresideni Brigham Young. Area na metua o to’na mama, e feia faafariuhia mai ïa no te Fenua Tuite o tei faaea tapiri i Idaho Falls, Idaho.
I te matahiti 1962, ua faahanahanahia o te Tuahine Parkin i te Fare Haapiiraa Tuatoru no Utah State e ua farii i ta’na parau tuʻite tuatoru e ua haamata’tura i te haapii te fare haapiiraa no Bountiful, Utah. I te avaʻe fepuare 1963, ua matau mai oia ia James L. Parkin, e te haapii ra oia i te toroʻa taote i te fare haapiiraa tuatoru toroʻa taote no Utah. Ua faaipoipohia raua i te 1 no tiurai 1963 i te hiero no Roto Miti.
E metua raua no e 4 tamarii e 14 mootua, e e mea au na ratou ia amui i te Lake Powell e te utuafare taatoʻa no te mau tau faafaaearaa e aore râ, e haere e faahee i niʻa i te mau mouʻa hiona. E mea au na te Tuahine Parkin te ohipa faaapu, tairi popo, e ia hahaere i te poʻipoʻi roa.
“Ia hiʻo vau i roto i toʻu nei oraraa, ua haapuai te mau piiraa tataʻitahi iaʻu nei,” o ta’na ïa i parau. “I toʻu pii-raa-hia ei peresideni i roto i te Sotaiete Tauturu, ua riro te reira ei tamataraa iaʻu inaha o vau ïa te hoê metua vahine apî roaʻe i roto i taʻu paroita, tera râ, ua tae mai te hau i roto iaʻu i to te mau vahine fariiraa iaʻu nei. Ua haamaitai teie piiraa i toʻu oraraa e ua tauturu atoa iaʻu ia haere i mua.”
Ua tavini na te Tuahine Parkin i roto i te apooraa faatere rahi o te Sotaiete Tauturu mai te matahiti 1990 tae atu i te matahiti 1994, piihia’tu ai oia ei tauturu piti i roto i te peresideniraa rahi o te Feia Apî Tamahine. I te matahiti 1997, ua piihia to’na hoa faaipoipo ia tavini ei peresideni misioni no na matahiti e toru i roto i te Misioni no Peretane London South.
“Na te haamaitairaa o te taviniraa e toʻu hoa i roto i te hoê misioni i haapuai-mau- iaʻu nei,” o ta’na ia i parau. “Ua here maua i te feia moʻa no Peretane, e tae noa’tu i te mau elder e te mau tuahine misionare, e ia haapii-atoa-mai ratou iaʻu.”
Te hiaai uana nei au ia faaitoito i te feia apî paari ia ite i te mau oaoa o te Sotaiete Tauturu e ia haere te mau tuahine o te Sotaiete Tauturu e faahoa mai i te feia apî paari, o ta te Tauhine Parkin ia i parau, “No te tuahine atoa, e vahi au mau te Sotaiete Tauturu no te tautururaa ia tatou ia haere mai i te Mesia.”