A haamoʻa i ta oe ohipa

Te aʻo atu nei au i teie mau parau no te feia maitai ore ïa o te faaitoito ra i roto i te utuafare o te feia faaroo. Noʼu atoa ihoa ïa taua mau parau ra.

Ia feruri tatou i te parau no te haamoʻaraa, te manaʻo ra ïa tatou no te horoaraa anaʻe i ta tatou mau taoʻa mai te au i te faaûrûraa no nia mai. Tera râ, te haamoʻaraa mau o te horoaraa ïa ia tatou iho i te Atua. Ua riro te aau, te varua, e te manaʻo ei tumu parau na te Mesia haamaramarama mai ai Oia i te ture matamua, oia hoi, ia haapao tamau noa i te reira (a hiʻo Mataio 22:37). Ia haapao tatou i te reira, e haamoʻahia ïa ta tatou mau ohipa no te maitai mure ore o to tatou mau varua (a hiʻo 2 Nephi 32:9).

Ia haapao tatou i teie faaueraa, eita ïa to tatou mau manaʻo, ta tatou mau parau, e ta tatou mau ohipa e haere atu i nia i te mau ohipa taa ê atu i te maitai. “Nahea [te hoê taata e ite ai] i te fatu aore â i tavinihia e ana ra, e tei vai taata ê ra iaʼna, e tei te atea ê te mau manaʻo e te mau opuaraa o toʼna ra aau?” (Mosia 5:13).

E rave rahi te haapao ore nei i te ture no te haamoʻaraa no te mea te manaʻo nei ratou e mea fifi ia feruri e ia rave. Te feia i hinaaro ia maitai, e tupu ïa te hinaaro i roto ia ratou ia maitai aʻe. E haere rii ratou i mua ma te haapae atoa i te mau mea e tano ia ratou ia rave. No reira e horoa atu vau i te tahi aʻoraa na roto i te here ei aratairaa e ei faaitoitoraa i roto i to utou tere, e no te tauturu ia outou i roto i te mau taime fifi.

Aita te faahaehaaraa pae varua e manuïa oioi noa, e tupu mărû noa râ te reira, mai te hoê ofaʻi taahiraa i nia i te tahi atu ofaʻi taahiraa, oa te tia ia taahihiaʼtu i te taime hoê. E tia hoi i to “tatou mau hinaaro ia fariihia i roto i te hinaaro o te Metua”, e ua hinaaro mau tatou “ia [faahaehaa ia tatou] … mai te tamarii e auraro … i toʼna ra metua” (a hiʻo Mosia 15:7; 3:19). Ia ore tatou e tamata ia haere tamau noa i mua, noaʼtu to tatou itoito ua faufaa ore ïa.

E hiʻo tatou i te tahi mau taata o tei haamoʻa i ta ratou taoʻa i te Fatu. I to Anania e taʼna vahine ra o Saphira hooraa i ta raua mau taoʻa, ua “tapea raua i te tahi pae” (a hiʻo Te mau Ohipa 5:1–11). E rave rahi to tatou e tapea maamaa nei i te “tahi pae” no to tatou mau taoʻa na roto i te nounou. No reira, i roto i te mau mea ta tatou e horoa nei, o te tufaa hopea roa te mea huru fifi ia horoa. Oia mau, ia horoa tatou i te tahi noa tufaa, e mea maitai â te reira, e ua au hoi te reira i te feia i “horoa ma te anaanatae ore” (a hiʻo Iakobo 1:7–8).

Te vai nei paha to tatou mau ite taa ê o ta tatou e manaʻo hape nei e o tatou iho te fatu no te reira. Mai te mea e tamau noa tatou i te nounou rahi atu i te reira i te Atua, te ofati ra ïa tatou i te tahi tufaa no te ture matamua. No te mea na te Atua i “horoa mai… . i to tatou aho i tera taime e i tera taime,” eiaha ïa tatou e nounou rahi e huti vitiviti noa i to tatou aho! (Mosia 2:21).

Te hape atoa nei tatou mai te mea e tavini tatou i te Atua ma te horoa i te taime e te moni, e ma te tapea i te tahi tufaa i roto mau ia tatou, e te faaite ra ïa te reira e ua riro te tahi noa tufaa o tatou Naʼna!

E mea fifi roa i te tahi pae o tatou ia horoa i te tahi mau mea auhia. Ua riro Ioane Bapetizo ei hiʻoraa, i te parauraa no nia i ta Iesu nănă, “e faarahi oia, e faaiti râ vau” (Ioane 3:30). Te manaʻo hape nei te tahi pae no nia i to ratou mau piiraa ei faaiteraa i to te Atua here rahi ia tatou e no reira aita tatou i hinaaro ia haamauruuruhia tatou. E te mau taeae e te mau tuahine, ua faataahia to tatou faufaa rahi e te Atua ei mea “rahi”; aita te reira e tauiui haere noa.

Te vai noa ra te tahi atu mau ofaʻi taahiraa o tei ore â i haerehia na nia iho, no te mea, mai te taata moni rahi, aita tatou i hinaaro ia faaite e te vai ra te tahi mau tufaa i roto i to tatou oraraa (a hiʻo Mareko 10:21). O te reira ïa, ia tano ia faahaerehia i mua.

E rave rahi huru no te tapearaa mai i ta tatou. Tei roto i te Basileia Teretetiera te mau “taata maitai,” o tei ore i itoito i te faaiteraa i te parau mau. Eiaha râ te feia “pari haavare” (PH&PF 76:75, 79). Te ravea maitai roa no te faaite i te iteraa papu no nia i te Mesia na roto ïa i te riroraa mai Iaʼna te huru, e te haamoʻaraa ia tatou no te tauturu ia faatitiaifaro i to tatou oraraa mai to te Mesia (a hiʻo 3 Nephi 27:27).

A tamata ai tatou ia faaoromaʻi i teie mau tamataraa o taʼu i parau iho nei, e mea tia roa ia vai te faahaehaa pae varua—e na te reira hoi e tauturu ia tatou ia “vaiiho atu” i te tahi mau mea, e tae noaʼtu i te oraraa tahuti nei, e i te tahi atu mau taime ia “faaohipa” i te mau ofaʻi taahiraa i mua (a hiʻo 1 Nephi 8:30).

Mai te mea e aita to tatou hiʻoraa e afaro ra, e riro paha ïa te mau taahiraa avae i mua nei i te fifi roa. Ua ite Lamana e Lemuela e mea nahea to te Atua haamaitairaa i to Iseraela ia matara mai i rapae i te mana o Pharao e toʼna mau nuu faehau, aita râ to raua e faaroo i te Atua no te tauturu ia raua i te rima o Labana.

E riro atoa paha tatou i te otohe rii no te mea ua hinaaro tatou ia au mai to tatou mau raatira ohipa e aore râ to tatou mau hoa ia tatou. E no reira te haapao ore ra ïa tatou i te ture matamua na roto i te faafauraa i te “tahi atu mau Atua” (Exodo 20:3).

I te tahi mau taime te paruru ra tatou i ta tatou mau peu tamarii rii ma te manaʻo e, e mea faufaa te reira no tatou. Area râ, no te riro ei pĭpĭ e mea titauhia te “faaoromaʻi” mai ta te Peropheta Iosepha Semita i faaite papu mai e:

“Ua riro vau mai te hoê ofaʻi taratara te huru … e ua faaanaanahia anaʻe vau na roto i te faauraaʼtu i nia i te tahi atu mau mea ma te puai e te vitiviti… . E no reira e riro vau ei mea moremore e te anaana i mua i te Atua Mana-Hope” (Teachings of the Prophet Joseph Smith, haaputuhia e Joseph Fielding Smith [1976], 304).

Te tuu pinepine ra tatou i te mau turi avae i raro no te faatupu i te mau tauiraa, na mua te manaʻo e hinaaro mau ai ia na reira, na roto i te tapearaa i te “hoê tufaa” o te feruriraa i ore ai e tia i te tahi mau taata maitai roa ia tauturu atu i te ohipa a te Atua. E mea maitai aʻe ia haehaa mai ia Mose, o tei ite i te mau mea “tei ore roa i manaʻohia e au ra” (Mose 1:10). Area râ, te mau taeae e te mau tuahine, no to tatou tiamâraa, ua fifi roa tatou ia haapae atu i te tahi mau mea tano ore. Na roto i te haapaeraa i te reira, ua tae mai te manuïa rahi, no te mea, e faatupu te reira i te mau ohipa “teitei” a te Atua! (A hiʻo Isaia 55:9).

Te fifi râ, ia hinaaro tatou ia rave i te tahi mau ohipa maitai, e riro te reira i te faaiti i to tatou hinaaro ia tavini i te Atua. E riro te hoê taata i te horoa i te pae rahi roa o toʼna taime no te rave i te ohipa taaro. E riro atoa te hoê taata i te haamori i te natura, eiaha râ i te Atua o tei hamani i te natura. I roto i taua mau mea ra, te haapaehia nei “te mau mea rarahi o te ture ra” (Mataio 23:23; a hiʻo atoa 1 Korinetia 2:16). O te Atua Teitei Roa anaʻe te tia ia aratai ia tatou ia rave i te ohipa maitai roa e te teitei roa.

I roto i na ture rahi e piti, te haapii ra Iesu, e aita atu e mea i hau atu i te maitai i teie na ture rahi e piti (a hiʻo Mataio 22:40). Aita te ture matamua i faanuhia i te hiti, no te mea e mea iti iho toʼna maitai, e aita hoi tatou e haamori nei i te hoê atua iti iho.

Na mua tatou e oaoa ai i te mau hotu no te mau ohipa parau-tia, e haamauruuru tatou na mua i te Atua. Eiaha hoi tatou e parau e, “No toʼu iho puai e toʼu iho itoito i noaaʼi taʼu nei taoʻa rahi” (Deuteronomi 8:17). E aore râ o te “faarahi” tatou ia tatou iho, mai ia Iseraela i te anotau tahito (eiaha râ te nuu faehau iti o Gideona), i te na ôraa i te faateʻoteʻoraa e, “I ora matou i to matou iho rima” (Te mau Tavana 7:2). Ia faateitei tatou i te mau ohipa ta tatou i rave i to tatou iho “rima” e fifi rahi roa ïa tatou ia parau e, na te Atua i tauturu ia tatou i roto i teie mau mea atoa (a hiʻo Alama 14:11; PH&PF 59:21).

I te vahi i parauhia o Meriba, te hoê taata faahiahia rahi, o Mose ïa, ua fiu roa oia i te amamuraa a te mau taata no te pape. I te hoê taime ua na ô atura oia, na roto i “toʼna iho manaʻo,” “E tia anei ia maua ia hopoi atu i te pape na outou?” (Salamo 106:33; Numera 20:10; a hiʻo atoa Deuteronomi 4:21). Ua arataʻi te Fatu ia Mose i roto i teie ohipa e ua faateitei atoa Oia iaʼna. E mea tia hoi ia tatou ia faahaehaa ia tatou mai ia Mose (a hi‘o Numera 12:3).

Ua ite maite Iesu i te ohipa Taʼna e rave ra! Noaʼtu â e ua rave Oia e rave rahi mau ohipa maitai, ua ite ihoa Oia i Taʼna ohipa no te Taraehara, e ua na ô hoi Oia e, “E Taʼu Metua, e faaora iaʼu i teie nei hora; i haere mai râ vau no teie nei hora” (Ioane 12:27; a hiʻo atoa 5:30; 6:38).

A faarahi atu ai tatou i to tatou here, te faaoromaʻi, e te haehaa, e mea tia ia tatou ia horoa rahi atu â i te reira i te Atua e i te taata nei. Oia atoa, ua tuuhia mai tatou i roto i te ao nei ia tia ia tatou ia rave i te mau ohipa rahi.

Na te mau ofaʻi taahiraa e afaʻi ia tatou i roto i te mau vahi apî o ta tatou e hepohepo ia haere atu. Ua riro te feia manuïa i haere na na nia i te mau ofaʻi taahiraa ei feia faaitoito rahi ia tatou. E haapao rahi atu tatou i te parau a te feia ta tatou i au. Ua haamanaʻo te tamaiti puhura taoʻa i te mau maa maitai taʼna i amu i roto i te utuafare o toʼna metua, area râ ua umehiʼtu oia te tahi atu mau mea, e te na ô ra hoi oia e, “E tia vau e haere i taʼu metua ra” (Luka 15:18).

No te faahaehaa roa ia tatou, e mea tia ia tatou ia horoa i to tatou hinaaro taatoa i te Atua ra. I roto i te mau horoaraa atoa o ta tatou e faatae atu Iaʼna, e riro atoa te reira i “te faahoʻihia mai ia tatou nei,” i te rahi hoi. Ia horoa tatou i to tatou hinaaro atoa i te Atua, e faahoʻi mai Oia i ta tatou, oia hoi, i te “taatoaraa no taʼna ra mau mea atoa” (PH&PF 84:38). Auê hoi te faahiahia no te reira.

Te vai noa ra i te tahi mau parau mau: Na te Atua hoi i horoa mai i ta tatou mau horoaara, mau taleni, e te faanahoraa; Ua horoʻa Oia i ta tatou mau taoʻa atoa; Naʼna i horoa maoro mai i te aho no to tatou ora (a hiʻo PH&PF 64:32). No reira, eiaha tatou e manaʻo hape no te faahoʻi iti atu i Taʼna, ma te manaʻo hape i te hoê pŭpŭ himene iti e Pŭpŭ Himene no te Fare Menemene!

No reira hoi te Peresideni Hinckley i parau noa ai e mea tia ia tatou ia riro ei feia fafauhia, no toʼna hinaaro ia tatou ia haapao i te mau fafauraa no te oroʻa a te Fatu, no te tufaa ahuru, e te hiero, e te faatusiaraa ei “niu no te Taraehara” (Teachings of Gordon B. Hinckley [1997], 147).

Ua manuïa te Faaora i te faahaehaaraa Iaʼna, a farii ai Oia i te mamae rahi e te oto no te Taraehara, e a parau ai Oia e, “ua hinaaro hoi ia ore au ia inu i te auaʻa maramara e orioiro atu” (PH&PF 19:18). I roto i te mau tamataraa iti tatou e farii nei, te hinaaro nei ïa tatou ia faaateahiaʼtu teie auʻa maramara.

Eaha mau te faufaa rahi no te ohipa a Iesu, ahiri Oia i rave hau atu â i te mau semeio, ma te rave ore i te semeio i ravehia i Getesemane e Kalavari? I roto i te tahi atu o Taʼna mau semeio rahi roa ua faaroahia te oraraa e ua faaitihia te mauiui—no vetahi ê. Nahea mau te reira ia faaauhia i te semeio no te tia-faahou-raa? (a hiʻo 1 Korinetia 15:22). Te faaamuraahia te mau taata i te faraoa e te iʻa, ua poʻia faahou ratou i muri iho, area râ te feia i amu i te Pane no te Ora aita ïa ratou i poʻia faahou (a hiʻo Ioane 6:51, 58).

I roto i te haamoʻaraa e te faahaehaaraa, e riro tatou i te tapitapi i te mau mea e titauhia mai ia tatou. Ua parau tamahanahana mai te Fatu i te na ôraa mai e, “ua navaʻi roa toʼu aroha no outou” (PH&PF 17:8). Te tiaturi mau ra anei tatou Iaʼna? Ua fafau mai Oia e faariro Oia i te mau mea paruparu ei mau mea paari (a hiʻo Etera 12:27). Ua hinaaro anei tatou ia auraro i te reira? Mai te mea e ua hinaaro tatou i te taatoaraa no te îraa, eita ïa i te mea tia ia tatou ia tapea mai te hoê tufaa i teie nei!

A vaiiho i to tatou mau hinaaro atoa ia fariihia i roto i te hinaaro o te Metua. Ia manuïa tatou i te na reiraraa, e farii ïa tatou i te “mau mea atoa a te Atua”(PH&PF 84:38). Nahea tatou e farii ai i Taʼna ra mau mea “atoa”, mai te mea e ua au to tatou mau hinaaro atoa i Toʼna? Aita hoi te “taatoaraa” e fariihia e te taata o te horoa noa i te hoê noa tufaa.

I roto i toʻu feruriraa, te haafifi ra tatou ia tatou iho na roto i te tapearaa mai i te “tahi tufaa” o tatou iho. E mea tia ia tatou ia ui, “E te Fatu, o vau anei?” (Mataio 26:22). Eiaha râ “E te Fatu, eaha te vahi taʼu e taui ia riro mai ia Oe na?” Ua ite aʻena paha tatou i te pahonoraa, e te hinaaro nei tatou i te haapapuraa.

Te mea oaoa roa i roto ite opuaraa a te Atua ua faataahia ïa na te feia i hinaaro ia haere atu i te maile hau i roto i to ratou tere e tae atu ai Iaʼna ra. E te mau taeae e te mau tuahine, “A haere mai a faaapî i to tatou haereraa.” (Come, Let Us Anew,”Hymns, no. 217).

Na roto i te iʻoa o te Fatu o te faatoro mai nei i Toʼna rima (a hiʻo PH&PF 103:17; 136:22), oia o Iesu Mesia, amene.