Farii i te here o te Fatu

Te mau taeae e te mau tuahine, te naʻo râ te hoê parau e: “A maevaʼna i te fanaʻo e aratai nei ia outou i teraʼtu pae i to outou iho oraraa mai te mea e hinaaro outou ia tupu outou.” E ua ite au e haere au i te tupuraa. E tiʻa roa ia faaite au i toʻu mauruuru ia Tuahine Smoot, Tuahine Dew e ia Tuahine Jensen no te taviniraa rahi o ta ratou i ho mai no tatou paatoa ei mau mero no te Ekalesia. Te faaite nei au i toʻu aau mehara i toʻu na tauturu, o Kathy raua Anne, no to raua hiaai ia tavini. E na vahine raua no te faaroo.

Te tupu nei toʻu mauruuru rahi i teie mahana i toʻu metua vahine e i toʻu metua tane no ta raua mau haapiiraa, to raua here e to raua hoi haapiiraa iaʻu ia rave i te ohipa. Ua ite au i te rave i te ohipa. Te mauruuru nei au no toʻu hoa faaipoipo. E apiti faahiahia roa o Jim. Ua here au iaʼna e te mauruuru nei au no taʼna patururaa. E taata afaro oia. Te mauruuru nei au no taʻu mau tamaiti e ta ratou mau vahine o tei tauturu ia ratou ia riro mai ei mau taata maitai ae. Te mauruuru nei au no taʻu mau mootua. I te tahi atura pô, tere atura maua i te fare o te hoê o ta maua tamaiti no te faaite iaʼna te parau no teie piiraa. Ua taʻoto ta raua mau tamarii. Ua parau vau ia Brett raua Angie: “Ua piihia vau ei peresideni rahi no te Sotaiete Tauturu.” Parau maira Brett: “Oe? Te peresideni Sotaiete Tauturu no te Ekalesia taatoa?” Eere anei ta outou mau tamarii i te mea faahiahia? Ua parau oia i te mea i tupu i roto i toʻu aau i tau hepetoma i maʻiri ae nei.

Inanahi nei, i to maua hoʻiraa mai i te fare, ua farii au i te hoê rata-taniuniu i haponohia mai e ta maua tamaiti o David raua taʼna vahine. Te naʻo râ o David: “Mama, ua ite au e maraa te reira ia oe. Aita paha oe e haamanaʻo râ, tera râ e peu matarohia e oe ia pia i te hoê Papaʻiraa Moʻa i niʻa i ta tatou faatoetoeraa o te naʻo râ e: ‘Area vau e toʻu atoa ra utuafare, e haamori ïa matou ia Iehova” (Iosua 24:15).’ Ua parau oia: “Ua haere pinepine au i roto e i rapae i te faatoetoeraa, e ua ite au e, ua ite orua Papa i te auraa no te reira.” E mauruuru rahi toʻu no ta maua mau tamarii.

Ua î au i te mauruuru i te mau vahine o te Ekalesia o tei poihere iaʻu, o tei here iaʻu, o tei haapii iaʻu e o tei tuu i to ratou tiaturiraa i niʻa iaʻu. Ua î au i te mauruuru i te mau misionare no te Misioni Peretane no Roretona Apatoa, no to ratou maitai, no to ratou imiraa i te haapao i ta ratou mau fafauraa. Ua î au i te mauruuru i te Feia Moʻa no Peretane o tei here iaʻu e o tei tauturu iaʻu ia riro ei tuhaa no taua fenua faahiahia râ.

I teie nei e au mau taeae e tuahine e, aita vau i ite eaha vau i piihia ai, taʻu râ i ite, oia hoi, ua piihia vau. Te euhe nei au ia here ia outou, ia paturu ia outou e te ani nei au ia outou ia faaoromaʻi maori a haapii ai au.

Te poroi nei au i te feia api paari o te Ekalesia, i te vahi tei reira outou, ia hiʻo i te Sotaiete Tauturu e ia ite e, te hinaarohia nei outou i reira, ua here matou ia outou, ia amui anaʻe tatou, e taime oaoaraa ïa no tatou. Te taparu nei au ia outou: a haere mai e a amui mai.

Mai tei papaihia e Wallace Stegner no niʻa i te mau Momoni: “E mau vahine faahiahia to ratou.”¹ E o to ratou ïa huru i teie mahana! Ua ite au e, ua here te Fatu i te mau vahine o te Ekalesia. Ahiri e tupu te mea hoê roa o taʻu e hinaaro nei no te vahine tataʻitahi o te Ekalesia, o teie ïa: ia ite ratou i roto i to ratou aau te here o te Fatu i roto i to ratou oraraa o te mau mahana atoa. Ua ite au i roto i toʻu aau te here o te Fatu i roto i toʻu oraraa, e no reira toʻu aau i î ai i te mauruuru. Te tupu nei toʻu mauruuru rahi no te hau e vai nei i roto i toʻu aau.

Te faaite papu nei au no toʻu Faaora o Iesu Mesia. Ua ite au te ora nei Oia; Ua ite au i roto i toʻu aau Toʼu here. Ua ite au i roto i toʻu aau Toʼu faaoreraa-hara. Te haamanaʻo nei au i te hoê tuahine misionare i te faaotiraa taʼna misioni. I roto i toʼtu iteraa papu hopea, ua parau oia: “Ua haere mai au i roto i te misioni no te faaite i to tatou Metua i te Ao râ e, ua here au Iaʼna, no te faaite i toʻu aau mehara Iaʼna, e no te faahoʻi i Toʼtu mau maitai atoa.” e te naʻo faahou râ oia e: “I teie mahana tei mua roaʼtu taʻu aitarahuraa Iaʼna hou vau a haere mai ai.”

Te faaite nei au i toʻu iteraa papu no niʻa i te mana o te peropheta a te Atua, Peresideni Gordon B. Hinckley, e ua î au i te mauruuru noʼtu e no toʼtu here e tae noaʼtu no te mau peropheta o tei ho mai i to ratou tiaturiraa iaʻu. Te faaite papu nei au i teie mau mea i te iʻoa o Iesu Mesia, amene.