Ia riro ei taata tei roto iaʼna te varua o te atua ra

Te hinaaro nei au i teie pô e paraparau ia outou e te feia apî tamaroa maitai tei mau i te Autahuʻaraa Moʻa a Aarona. E haamaitairaa taaê mau ia mau i te Autahuʻaraa o te Atua tei riro ei faaaanoraa i to tatou mau mana, to tatou mau aravihi e to tatou ite varua. No te haapapuraa i te parau no te mau haamaitairaa i noaa ia tatou na roto mai i taua haamaitairaa ra, te hinaaro nei au e parau i te parau no na taata e piti a te Atua tei piihia toopiti atoa ra i te iʻoa ra Iosepha.

Ua tupu te hoê ohipa taaê roa i niʻa i toʻu papa i te tau e tahuʻa toʼna toroʻa. Aita e haapiiraa tuarua i te vahi taʼna e noho ra. Te titau ra oia i te ite e ua faatiʻa toʼna papa ia vaiiho oia i te ohipa faaapu e ia haere e imi i te ite noʼna i te tahi vahi, tera râ, naʼna iho e imi i te mau raveʻa e titauhia. I toʼna taeraa i Roto Miti, ua faaroo oia e, te vaira te hoê ohipa i te utuafare o te Peresideni Joseph F. Smith. Ua tihepuhia oia no te haapaʻo i na puaatoro ufa e piti a te Peropheta. I roto i ta matou mau pô utuafare, e ani matou i to matou papa ia faatiʻa mai i te tahi mau aamu no niʻa i toʼna oraraa a parahi ai oia i te fare o te Peropheta. Teie te tahi mau huru faatiʻaraa parau ta matou e faaroo:

Ua haapii te tuahine Smith i toʻu papa i taʼna ohipa ma te parau e, tera na puaatoro “e mea tura raua, e mea tiʻa ia oe ia rave maitai ia raua. Tamâ maitai ia raua, e a haapii maitai ia raua, i te mea e, ia hinaaro noaʼtu vau e arataʻi ia raua i roto i te fare, ua mâ noa ïa raua no te haere atu i reira.” Ua parau to matou papa e, ua taa maitai iaʼna e nahea ia faate i te û, aita râ oia i taa e nahea ia horohoroi i te puatoro.

I te mau pô e te mau poipoi atoa, hou a faatehia ai te û, e titauhia ia tamâ e ia tamarô maitai i na puaatoro i te pape veavea, e ua ineine te puʻa e te tauera. E faaamuhia raua i te maa maitai roa aʻe, e e faatehia to raua û i te hoê hora papu e piti taime i te mahana.

Taaê noaʼtu taʼna mau ohipa e rave i pihaiiho i na puaatoro “tura” a te utuafare Semita, ua anihia i toʻu papa ia rave atoa i te tahi mau ohipa atuaturaa i te fare. Ua parau oia ia matou e: “I te hoê poipoi toʻetoʻe roa te tamâ ra vau i te aroa hareraa e tae atu ai i te vahi faaearaa tumu o te Peresideni o te Ekalesia. Ua fatata roa te Peresideni i te topa i raro. No te mea, ua vaiiho vau ia paari te pape hou a tamaro ai i te reira. E ua rave au i te pape veavea no te faatahe i te pape paari e ua rave i te tauera no te tamaro i te mau ofaʻi haereraa. Ua fatata roa te mau taahiraa i te mâ, te haere atoa mai nei toʻu mau hoa no te fare haapiiraa no te haere i te haapiiraa hou a oti ai taʻu ohipa. Ua haamâhia vau.”

Ia faatiʻaʼtu vau i teie mau aamu, aita vau e hinaaro nei ia feruri outou e, e tamaroa maehaa ïa toʻu papa no “Cendrillon.” Ua farii te utuafare Semita i teie tamaiti faaapu e te veve no Idaho mai, i roto i to ratou utuafare, a faaoti ai oia i taʼna haapiiraa tuarua e a haere atu ai i te fare haapiiraa teitei no Utaha. Ua amui ratou iaʼna i roto i ta ratou mau ohipa, i roto i ta ratou mau tamaaraa, e i roto i te pureraa o te utuafare. Ua faaite toʻu papa i toʼna iho utuafare i toʼna iteraa papu e, te Peropheta Joseph F. Smith, e taata mau ïa no te Atua: “I toʻu tuturiraa i raro e te peropheta, i roto i te pure o te utuafare, e a faaroo ai au i taʼna taparuraa tuutuu ore i te mau haamaitairaa a te Fatu ia tae mai i niʻa i toʼna utuafare e ta ratou mau mamoe e te mau puaatoro e ia ite aʻera vau e, taua na puaatoro ra tei riro ei faahaamaraa iaʻu, tei roto atoa ïa raua i taʼna pure haamaitairaa, ua ite papu aʻera vau i te auraa mau o te mau mea e tupu ra… . Te rahiraa o te mau taata hiʻoraa maitai o taʻu i ite, aita ratou i faaite i te huru maitai mau i roto i te taatoaraa o te mau ohipa ta ratou i rave. E ere ïa te reira i te huru o te Peropheta Joseph F. Smith. Ua riro te hoê ohipa iti taʼna e rave i te mau mahana atoa ei faarahi faahouraaʼtu i toʼna huru teitei. Noʻu nei, e peropheta oia, tae roaʼtu i te taime e horoi ai oia i toʼna rima, e aore râ, e tatara ai oia i toʼna tuitui tiʻaa.”

Te haapiiraa e tapae mai, o te titauraa ïa ia noaa te hoê au rahi e te here i te hoê peropheta no te Atua.

Ua riro te faaiteraa a toʻu papa i te huru o te Peresideni Joseph F. Semita ei faahaamanaʻoraa iaʻu i te parau a Pharao no niʻa ia Iosepha i Aiphiti ra: “Eahaʼtu â ta tatou taata e noaa e au i teie nei taata, tei roto iaʼna te Varua o te Atua ra?” (Genese 41:38).

Te faaite mai nei te mau aamu a toʻu papa i te mau mea no niʻa i te Peresideni Smith, toʼna utuafare, e taʼna na puaatoro, te faaite atoa mai nei te reira i te tahi mea no niʻa i te huru te tauiraa te tau ia faaauhia i te omuaraa o te tenetere 20. Aita vau e manaʻo nei e, ua feruri na toʻu papa i te huru o to tatou nei anotau e te mau matini roro uira i niʻa i te hoê amuraamaa iti naʻinaʻi, e to ratou vitiviti e te rahi o te mau mea ta ratou e haaputu. Aita atoa vau e manaʻo nei e, ua ite mai oia i te ino ta Satane e nehenehe e rave na roto atoa i teie mau matini. Na roto i taʼna mau raveʻa piʻo, ua tiʻa ia Satane ia haaparare e rave rahi mau tirotiro apî e te taero hoi. E faatupu teie mau tirotiro i te ino rahi i roto i to tatou varua mai te mea e, aita tatou i mito i te mau raveʻa paari no te paruru ia tatou i te reira. No reira ua feruri au i te faanahoraa tei hau i te rahi i te mau faanahoraa atoa, no te aro i teie mau tirotiro—te horoʻa o te Varua Maitai ïa.

Teie te parau a te Peresideni Joseph F. Smith: “ ‘Te horoʻa o te Varua Maitai,’ o te hoê ïa haamaitairaa taaê tei taatihia i niʻa i te feia tatarahapa tei bapetizohia e tei tiʻaturi ia Iesu Mesia, e o ‘te hoê ïa ite hopea ore.” E nehenehe te taata e fanaʻo i te varua o te Atua no te hoê taime poto noa, e na roto hoi i te reira e noaa ai i te taata te maramarama e te mana no te hoê ohipa taaê e no te hoê taime taaê atoa. Area te horoʻa o te Varua Maitai, o tei fariihia e te mau aposetolo i te mahana Penetekote ra, e o te horoʻahia na roto i te haamauraa, o te hoê ïa ite tamau e te hoê hoi horoʻaraa teitei aʻe. (i roto James R. Clark, haaputuhia, Messages of the First Presidency of The Church of Jesus Christ of Latter-day Saints, 6 buka [1965–75], Buka 5:4).

E mea faufaa ia tauturu mai to outou utufare ia outou i roto i ta outou tuatapaparaa i te Evanelia a Iesu Mesia. E mea tiʻa ia tatou paatoa ia tiʻaturi i te horoʻa o te Varua Maitai no te arataʻi ia tatou ia ite i te maitai e te ino. Na te hohoʻa o Iosepha i Aiphiti e tauturu mai no te haapii ia tatou tataitahi. Oia te hoê taata tei tiʻaturi hope roa i te Varua o te Fatu, e noaʼtu te paari o te hoê taata i roto i te peu haamori idolo, tei parauhia o Pharao, ua ite roa o Pharao e, e mea taaê mau toʼna huru e toʼna puai.

E tamata tatou i teie pô ia hiʻo eaha te mau parau poroʻi faahiahia e noaa mai ia tatou na roto i te tuatapaparaa i te parau no te mau tiʻa faatere o te mau papaʻiraa moʻa. Te haapii mai nei Joseph Fielding Smith ia tatou i roto i taʼna buka ra Te mau Pahonoraa i te mau Uiraa no niʻa i te Evanelia:

“E mea papu maitai e, ua piihia na e ua faatoroʻahia na te mau tamaroa i te tau matamua ra. Na muaʼtu i te anotau no te diluvi, te tau a ora maoro ai te taata, ua piihia te tahi pae i te ohipa i to ratou apî-roa-raa ra, ia faaauhia i to ratou tau. E piti ahuru e ma pae matahiti to Enoha a faatoroʻahia ai oia e Adamu; … e hoê ahuru noa to Noa matahiti a farii ai oia i te autahuʻaraa [a hiʻo PH&PF 107:48, 52]. Aita i papaʻihia te matahiti o Iosepha, te tamaiti a Iseraela, a farii ai oia i te autahuʻaraa; ua tupu râ te reira i toʼna apî-roa-raa ra. Ahuru ma hitu anaʻe toʼna matahiti a hoohia ai oia e toʼna ra mau tuaana, e e mea papu e, e autahuʻaraa toʼna hou taua taime ra, i te mea e, ua faaohipa oia i te reira i te fenua Aiphiti. [a hiʻo Genese 37:2; 40:8–19; 41:14–36]” (haaputuhia Joseph Fielding Smith Jr., 5 buka [1957–66], buka 2:9).

Ia iriti tatou i te Buka Genese i roto i te Faufaa Tahito, e ite tatou i te aamu o Iosepha. No roto o Iosepha i te hoê utuafare 11 taeae—10 e mea paari aʻe iaʼna. Mai te mea ra e, e rahi aʻe te here o toʼna metua tane iaʼna i te tahi atu pueraa. Ua hamani oia i te tahi ahu maitai noʼna, ua tapea iaʼna i te fare, e ua faaue iaʼna i te tahi mau taime ia haere e hiʻo i toʼna mau tuaana tei hea ratou i te tiaʻiraa i te mau mamoe. Ua moemoea-atoa-hia o Iosepha, e mai te mea ra e, tei niʻa oia i te hoê tiʻaraa faatere i niʻa i toʼna mau tuaana.

I te hoê mahana, te haere ra Iosepha e hiʻo i toʼna mau tuaana e tiaʻi ra i te mau mamoe, ua feruri aʻera ratou e ua navai roa ratou ia Iosepha e ua hinaaro iho ra ratou e faaatea ê iaʼna. Ua tano maitai te taime no te hoo ia Iosepha ei tîtî i te ati Isemaela te haere anaʻe ra i to ratou tere i Aiphiti.

Aita i maoro, ite ihora Iosepha e, tei roto oia i te hoê fenua ê roa, e te peu taaê, te hoê haapaʻoraa faaroo huru ê roa, e te mea ino roaʼtu, ua hoohia oia ei tîtî. No te nehenehe o Iosepha e te aravihi atoa, ua hoohia maira oia e “Potiphara, e taata toroʻa i ô Pharao, e raatira no te faehau” (Genese 37:36).

“E tei ia Iosepha ra Iehova, [e na te varua i roto iaʼna i tauturu iaʼna] … i maitai ai hoi oia; e i roto oia i te fare o toʼna ra fatu o te taata Aiphiti ra.

“E te ite ra hoi toʼna fatu e tei iaʼna Iehova, e te mau mea atoa taʼna i rave ra, ua haamanuiahia mai [ïa] e Iehova.

“E i herehia mai Iosepha, e e tiʻa hoi oia i pihaiiho iaʼna… . e ua faariro [Potiphara] iaʼna ei tavana i toʼna ra utuafare, e te mau taoʻa atoa naʼna ra, ua tuuhiaʼtura i toʼna ra rima.

“E mai toʼna faariroraa mai â iaʼna ei tavana i toʼna ra utuafare, e te mau taoʻa atoa naʼna ra, ua haamaitaihia mai te utuafare o taua taata Aiphiti ra e Iehova ia Iosepha; e ua haamaitaihia e Iehova te mau taoʻa atoa naʼna, to roto i te fare, e to rapae au atoa.

“Faaruʻe noaʼtura oia i te mau taoʻa atoa naʼna ra ia Iosepha; aore noaʼtura oia i haapaʻo noaʼtu i te mau mea atoa naʼna ra maori râ i te maa taʼna iho i amu ra. E purotu hoi Iosepha i te tupu maitai, e te mata maitai” (Genese 39:2–6).

I te hoê mahana, te rave ra Iosepha i te ohipa i roto i te fare, tupu ihora te hoê ohipa fifi roa. Inaha, teie mai nei te vahine a Potiphara i te tamataraa mai iaʼna. Ua ite ihora o Iosepha e, e ere taua vahi ra noʼna. Te faaite ra te mau papaʻiraa e:

“Aita roa e taata i hau i teie nei utuafare iaʻu; e aita roa aʼna taoʻa i tapea iaʻu maori râ o oe, o te vahine naʼna ihora: eaha hoi au e tiʻaʻi ia rave i tena na ino rahi, a haraʻi i te Atua? …

“Ua haru maira taua vahine ra i taʼna pereue, na ô maira, e taoto na tâua: ua faaruʻe atura râ oia i te ahu i taʼna rima, horo maira, e tae maira i rapae au” (Cenese 39:9, 12).

E haapiiraa rahi roa ta tatou i apo mai no roto mai ia Iosepha. I toʼna tiʻaraa i mua i te hoê faahemaraa,, ua faaatea oioi oia iaʼna i taua taime ra ihoa, noaʼtu e, e hohoʻa noa te reira no te ino. Ua tupu aʻe nei i niʻa ia tatou paatoa te tahi mau ohipa i roto i to tatou oraraa tei riro ei tamataraa teimaha roa.

Ia tupu noaʼtu te hoê ohipa ino e te viivii hoi, i niʻa ia tatou, e pehe tano ore anei, e hohoʻa anei i roto i te afata teata, e aore râ, te tahua itereva, riro atu ai tatou i roto i te hoê tiʻaraa tano ore, aue ïa te puai e roaa ia tatou mai te mea e haamanaʻo tatou i te aamu o Iosepha: “Hro maira [oia] e tae maira i rapae au” (Genese 39:12).

Ua faaatea oia iaʼna i te faahemaraa.

Noaʼtu e, ua rave noa oia i te mau maitiraa tiʻa, aita te reira i faatiʻamâ iaʼna i te mau tamataraa tei farereihia e aʼna i roto i toʼna oraraa. E ia tae maira Potiphara i te utuafare ra, ua amuamu aʻera taʼna vahine i taʼna tane ma te parau e, ua faainaina Iosepha iaʼna. E riri rahi to Potiphara iaʼna no reira e “ua rave aʻera oia iaʼna, tuu atura i roto i te fare tapearaa, i te vahi e tapeahiaʻi te mau taata e tapeahia e te arii ra: i reira oia i roto i taua tapearaa ra.

“Tei pihaiiho [â] Iehova ia Iosepha, e ua hamani maitai maira iaʼna, e ua faatupu [Oia] i roto i te tiaʻi i taua tapearaa ra i te here iaʼna.

“[Aita i maoro] ua tuu maira taua tiaʻi o te fare tapearaa ra i te mau taata atoa i tapeahia i roto i taua tapearaa ra, ia Iosepha ei tiaʻi; e te mau mea atoa ta ratou i rave ra, na Iosepha ïa i parau i rave ai” (Genese 39:20–22).

Tei pihaiiho râ Iehova ia Iosepha, e ua tupu faahou maira te hoê ohipa i niʻa iaʼna a tavini ai oia i roto i te fare tapearaa ra. Tei roto atoa i te fare tapearaa te tapearaahia e piti na tavini no Pharao. Ua moemoea raua toopiti atoa ra i te hoê moemoea e na Iosepha i tatara i te auraa o te reira. Hoê o raua e pohe ïa i roto i te fare tapearaa; area te tahi ra, i roto i na mahana e toru ra, e hoʻi faahou oia i niʻa i toʼna toroʻa raatira o te rave vine no Pharao. Ua tupu mau atura mai ta raua i moemoea ra. Ua moʻehia râ i te rave vine, oia tei hoʻi faahou i niʻa i toʼna ra toroʻa teitei no Pharao, te mau mea atoa no niʻa ia Iosepha, e hope noaʼtu ra e piti matahiti.

E tae aʻera i te taime e taoto ta Pharao. Aita roa hoê taata e tiʻa ia tatara i te auraa o toʼna ra taoto. I te pae hopea, haamanaʻo aʻera te rave vine ia Iosepha. Faaite atura oia ia Pharao i te ite o Iosepha i te tatara i te mau taoto. “Ua tono atura Pharao i te veʻa i te tapapa ia Iosepha, ua arataʻi oioi maira ratou iaʼna mai roto mai i te tapearaa ra: e mâ aʻera toʼna taa i te hahu, e ahu aʻera i toʼna ahu, ua tomo maira oia i roto ia Pharao ra” (Genese 41:14).

Ua tiʻa mau ia Iosepha ia tatara i te auraa o te taoto a Pharao. No te maere rahi o Pharao, ua faariro ihora oia ia Iosepha ei tavini noʼna. Tei pihaiiho â Iehova ia Iosepha. Aita i maoro ua taʻuma Iosepha i niʻa i te toroʻa e tauturu no Pharao i roto i te fenua atoa i Aiphiti ra. E ohipa tei faataaê ia Iosepha e te tahi atu mau tavini. Ua faahiti Pharao i te mea tei faataaê ia Iosepha i te tahi atu mau tavini taatoa, a parau ai oia e, “Eahaʼtu â ta tatou taata e noaa e au i teie nei taata, tei roto iaʼna te Varua o te Atua ra?” (Genese 41:38).

I roto i te mau fifi atoa i farereihia e Iosepha, te ite ra outou e, tei pihaiiho noa Iehova iaʼna. E mea ohie ia ite i te varua taaê i roto iaʼna no te huru o toʼna oraraa, e no te huru o toʼna haapaʻoraa i te reo o Iehova i te arataʻiraa iaʼna.

E roaa atoa ia tatou tataitahi taua huru haamaitairaa ra mai te mea e, e arataʻihia tatou e Toʼna ra Varua Moʻa. A faaroo i te reo haʻihaʻi ia tiʻa outou i mua i te hoê faaotiraa. E mea papu roa e, e reo faaara puai te reira no te parau ia outou ia tupohe i te pehe tano ore, ia faaatea ê atu ia outou i te mau hohoʻa hairiiri o te afata teata, e aore râ, ia haere i rapae i te hoê tahua itereva o te faatupu mai i te mau feruriraa ino i roto i to outou upoo. E faaite te Varua Moʻa ia outou i te taime a tiʻa ai outou i te vahi opanihia.

Te fafau atu nei au ia outou e, mai te mea e, e haapaʻo outou i te reo faaara o te Varua Maitai, e ia pee i taʼna arataʻiraa, e farii outou i te haamaitairaa o te utuuturaa a te mau melahi, na te reira hoi e horoʻa mai ia outou i te paari, te ite, te mana, e te hanahana i to outou oraraa. Haamanaʻo outou e, ua ruuruuhia te Fatu na roto i te mau fafauraa hanahana ia haamaitai mai oia i to tatou nei oraraa ia au i to tatou haapaʻo. Oia anaʻe te nehenehe e faariro ia tatou ei taata tei roto iaʼna te Varua o te Atua, oia hoi, te Varua Maitai.

Aue te faahiahia te haamaitairaa ia mau i te Autahuʻaraa Moʻa o te Fatu, e ia noaa hoi taua mana ra e taua puai ra ia tatou. Ia faauru mai e ia arataʻi mai te Fatu ia tatou i roto i ta tatou tuatapaparaa i te mau aamu o te mau peropheta faahiahia tei taahi i niʻa i te tino o te fenua nei. E apo anaʻe tatou i roto i to ratou oraraa i te mau mea e haafatata ia tatou i tei Hamani ia tatou e e tauturu hoi ia tatou ia fanaʻo i te mau haamaitairaa e te mau hotu o te evanelia a to tatou Fatu e te Faaora. Ia faauru-papu-hia tatou ia pee i toʼna ra haerea, o taʻu ïa pure haehaa na roto i te iʻoa o Iesu Mesia ra, amene.