Te mau mea hau no te basileia

Te mau taeae te mau tuahine, te hinaaro nei au, no tatou paatoa, e haamauruuru i te peresideniraa a Sotaiete Tauturu e te apooraa no teie pŭpŭ tauturu, o tei haamauruuruhia aʻe nei, no to ratou tavini-mate-raa ia tatou.

E teie â, te piri atu nei tatou i te hopea o te hoê amuiraa rahi tei faateitei mai e o tei faaurû mai. Ua farii tamau vau i te itoito e i te haamaramaramaraa i roto i teie nau mahana umere mau o te haapiiraa e o te iteraa papu. Ua ite au e, ua farii atoa outou i te reira. Penei aʻe, te mea o ta tatou i ite i roto i teie amuiraa hoê â ïa huru i tei fariihia e te mau pìpì atoa a te Faaora a pee ai ratou Iaʼna i tera vahi e tera vahi no te faaroo Iaʼna ia haapii i Te Parau Apî o Taʼna Evanelia.

E mau aau etaeta to te mau tamarii a Iseraela i te reira ra tau. Tei faatîtîhia i raro aʻe i te hau no te Ati Roma, ua imi ratou i to ratou tiʻamâraa e to ratou hau. Ua tiaʻi ratou i te Mesia; ua papu ia ratou e tae mai Oia no te faaora ia ratou i te faateimaharaa i te pae tino e i te pae politita. E ua farii vetahi i te evanelia o te oaoa e te hau a te Faaora, area vetahi aita ratou i farii papu i te taatoaraa o te mau titauraa pae varua o taua evanelia ra.

I te hoê mahana taa ê i te haamataraa o te misioni a te Fatu i roto i te tahuti nei, ua apee mai e rave rahi nahoʻa Iaʼna i te hiti o te Miti no Galilea, e ua taʻiruru maira i pihai iho Iaʼna i te hiti o te roto. “No reira … haere atura Oia i roto i te hoê boti e parahi i tai; e te tiʻa noa maira te nahoʻa rahi i te hiti o te miti. E haapii parabole maira ia ratou” (Mareko 4:1–2).

Ua haapiihia e rave rahi mau parau faahiahia i taua mahana ra, oia atoa te parabole o te taata ueue huero (a hiʻo Mareko 4:3–20). I te hopea o taua mahana haapiiraa ra, ua ani te Fatu i Taʼna mau pìpì ia fano i te tahi aʻe pae o te Miti o Galilea.

Ia fano râ ratou i taua ruʻi ra, “ua tupu maira te hoê maa mataʻi rahi, fati maira te are i nia i te pahi e î roa aʻera.

“Te taoto ra Oia i nia i te hoê tuaʻurua i te reimuri ra; ua faaaraʼtura ratou Iaʼna, na ô atura, e te Orometua, eita oe e haapaʻo mai i to matou nei pohe.

“Ua tiʻa aʻera Oia i nia, avau atura i te mataʻi, e ua na ô atura i te are, A faaea, a mania. Pohe ihora te mataʻi, mania roaʼtura” (Mareko 4:37–39).

Eaha to outou manaʻo i te feruriraa o te mau aposetolo a hiʻo ai ratou i te mau mea rii tumu— te mataʻi, te ua e te are—i te haapaʻoraa i te aʻo a te Fatu? Noaʼtu e no pii- noa-hia maira ratou i roto i te toroʻa aposetolo, ua matau maitai râ ratou Iaʼna e ua here Iaʼna e ua tiʻaturi Iaʼna. Ua vaiiho i ta ratou ohipa e to ratou mau utuafare no te pee Iaʼna. I rotoi te hoê tau poto noa, ua faaroo ratou Iaʼna i te haapiiraa i te mau mea maere, e ua ite Iaʼna i te faatupuraa i te mau semeio. Tera râ, ua maere mau ratou, e e mea papu e ua ite-atoa-hia te reira i nia i to ratou hohoʻa mata.

“Ua parau maira Oia ia ratou, Eaha outou i màtaʻu huaʼi? Eaha te mea i ore ai to outou faaroo?

“Rahi roaʼtura to ratou màtaʻu, e ua na ô aʻera ratou ratou iho, O vai hoi teie o tei faaroo te mataʻi e te moana atoa Iaʼna?” (Mareko 4:40–41).

I roto i te mau taime mataʻi e te riʻariʻa, ua fafau mai te Faaora i te horoʻa mai i te hau faito ore e te mure ore ma te titau ia faaineine tatou no te fariiraa i teie mana, mai Taʼna i haamania i te fatiraa o te are o tei haafifi i te feia i pihai iho Iaʼna i nia i te Miti o Galilea i taua aruʻi mataʻi ra a tau matahiti i mairi.

Mai te feia atoa i ora na i te anotau o Taʼna misioni, te vai nei i rotopu ia tatou vetahi o te imi nei i te hau e te faufaa i te pae tino ei tapaʻo no te mana rahi o te Faaora. E ore tatou i te tahi taime e maramarama i te hau faito ore o ta Iesu i fafau, oia ïa te hau i roto i te aau, fanauhia na roto i te faaroo, taaamuhia i nia i te iteraa papu, faaamuhia e te aroha, ma te ora i roto i te haapaʻo e te tatarahapa. Te hoê ïa hau o te varua o te pinaʻi i roto i te aau e i te varua. Ia roaa anaʻe i te hoê teie hau i roto i te aau, aita ïa e haapeʻapeʻaraa no te mau mea o te ao nei e haafifi mai. Ia ite papu anaʻe te hoê i roto roa i te aau, aita ïa e hepoheporaa aita atoa ihoa ïa e fifi.

Mai ta te Peresideni Hinckley i haapii atu i te mau taeae inapô nei, e ore te hau e itehia i roto i te ino. E roaa paha te oraraa ohie, te faahiahia, te tuiroo, e te ona; tera râ, e ore roa te hau e roaa. “E ere roa te parau-ino i te oaoa” (Alama 41:10). Eita roa te hoê e ora hau, mai te mea aita oia e ora râ i te parau mau i heheuhia mai. Aita roa e hau i roto i te varua iino e aore râ, i te màrôraa. Aita e hau i roto i te parau ino, i roto i te amuiraa o te mau taata faahuehue e aore râ, taa ore. Aita e roaa te hau i te raveraa i te mau raau taʻero, i te ava e aore râ, i te mataʻitaʻiraa i te mau hohoʻa faufau. Aita e roaa te hau ia rave ino ia vetahi ê, i te pae emotionare anei, i te pae tino anei e aore râ, i te hamani-ino-raa na roto i te taoto raa anei, no te mea, te feia tei farii i taua mau rave inoraa râ, e vai te reira i roto i to ratou feruriraa e i roto i te ahoahoraa o te pae varua e tae roaʼtu e, ua haere mai ratou i te Mesia na roto i te haehaa e i te imiraa i ta faaoreraa hara na roto i te tatarahapa mau.

I te hoê taime e aore râ, i te tahi atu taime, te tiʻaturi nei au e, e imi te taata tataʻitahi i te “hau a te Atua, o tei hau ê atu i te ite taata nei” (Philipi 4:7). E tae mai taua hau ra no to tatou aau peʻapeʻa, a pee ai tatou i te maramarama o te Mesia, o te “horoʻahia mai i te mau taata atoa ra ia ite ratou i te maitai e te ino” (Moroni 7:16), a arataʻi ai te reira ia tatou i te tatarahapa o te mau hapa e a imi ai i te faaoreraa. No tatou paatoa, te vai nei te hiaai i te ite “i te mau mea hau no te basileia” (PH&PF 36:2), e ia tamata i te “mau hotu o te parau-tiʻa,” oia tei “ueuehia ma te hau e te feia e faatupu i te parau hau ra” (Iakobo 3:18). I roto i te mau nohoraa atoa, ia faatupu tatou i te hau i to tatou mau taata tupu e i roto i te oraraa oire, eiaha roa râ e tomo i roto i te hoê pŭpŭ e imi i te mârô e aore râ, i te amahamaha.

I roto i te mau aamu o te papairaa moʻa, ua fafau mai te Fatu i te hau i Taʼna mau pîpî. Ua papai te Salamo e “e horoʻa mai Iehova i te puai no Toʼna ra mau taata; e e haamaitai mai Iehova i Toʼna mau taata i te tuuraa i te hau ra” (Salamo 29:11). Ua faaau Isaia i te Faaora i “Te Arii no te Hau” (Isaia 9:6). Ua ite atea o Nephi i te mau mahana o toʼna ra huaʻi te “fâraa mai te Tamaiti o te parau-tiʻa ia ratou ra; e faaora oia ia ratou, e hau to ratou i roto Iaʼna” (2 Nephi 26:9).

Tau-rii hora noa na muaʻe Oia a faaoti ai i te Taraʻehara hanahana e te riʻariʻa hoi, ua fafau te Fatu o Iesu Mesia i Taʼna mau aposetolo: “E Hau Taʻu e vaiiho ia outou nei, o Toʻu nei hau o Taʻu e ho-atu no outou” (Ioane 14:27).

Te fafau ra anei Oia i Taʼna mau pìpì te hau o ta te ao nei e titau oia—te parururaa, e ia ore roa te mârôraa e aore râ, te peʻapeʻa? E mea papu aita te papairaa aamu e manaʻo nei mai te reira te huru. Ua ite papu râ teie mau aposetolo i te tamataraa e te hamani-ino-raa e tae i nia ia ratou i te toeʻa o to ratou ra mau peu mahana, i opua ai te Fatu i te haapapu roaʼtu i Taʼna i fafau maira no te hau: “E ere mai ta to te ao nei horoʻa Taʻu horoʻa ia outou. Eiaha e taiâ to outou aau, eiaha hoi e mătaʻu” (Ioane 14:27).

“I parau atu Vau ia outou i teie nei mau parau, ia hauhia to outou Iaʻu nei,” teie faahou o Taʼna i parau. “E pohe to outou i teie nei ao: e faaitoito râ, ua riro te rê o teie nei ao Iaʻu” (Ioane 16:33, haapapu-roa-hiaʼtu).

E tae mai te hau—te hau mau, i roto roa ia outou iho—na roto râ i te faaroo i roto i te Fatu ia Iesu Mesia. Ia iteahia ia outou taua parau mau faufaa roa ra, e ua taa maitai i te mau parau tumu o te evanelia e ua faaohipahia, e tae mai taua hau rahi ra i roto i te aau e te varua o te mau tamarii a te Metua i te Ao ra. Ua parau te Faaora na roto mai ia Iosepha Semita, “A haapii mai râ e o oia o te rave i te mau ohipa parau-tiʻa ra e farii ïa oia i taʼna utuʻa, oia ïa te manaʻo hau i roto i teie nei ao, e te ora mure ore i roto i te ao a muri atu ra” (PH&PF 59:23).

E mea maere mau i te tahi taime ia hiʻo i te taa-ê-raa o ta teie hau e faatupu i roto i te oraraa o te feia o te farii i te reira. A peresideni ai au i te Misioni o Canada Toronto e rave rahi matahiti aʻe nei, ua haamata ta tatou mau misionare i te haapii i te hoê utuafare tei vai i roto i te poiri i te pae varua. E mea veve roa ratou e aita hoi i haere i te haapiiraa, e ia hiʻohiaʼtu to ratou hohoʻa, e faaite mai te reira e, aita ratou e atuatu nei ia ratou i te pae no te ea e te tamâraa i to ratou tino. Tera râ, e mau taata maitai, e mau taata faatura—i rotopu i te feia aau haavare ore o ta tatou e pure ia iteahia e ta tatou mau misionare––e ua pahono-varua mai a farii ai ratou no te taime matamua i roto i to ratou oraraa te hau o ta te evanelia e pûpû mai.

I to maua faarooraa e, e bapetizohia ratou, ua haere te Tuahine Ballard e vau nei i to ratou oroʻa bapetizoraa. Ua tiʻaʼtu vau i pihai iho i te episekopo o te paroita a tae mai ai taua utuafare ra. Aita vau e haavare atu ia outou, e mea tiʻa iaʻu ia faaite ia outou e, e ere roaʼtu to ratou huru i te mea anaanatae ia hiʻohiaʼtu. E mea reporepo mau â ratou. E no te mea ua taaê atu te episekopo no te hoê tau i taʼna paroita, aitaʼtura oia i tae no te farerei i teie mau melo apî o taʼna paroita; no reira, ua hitimaʻue oia i toʼna iteraaʼtu ia ratou e aita taʼna parau e roaa ia parau. Ua farii maitai atu râ oia ia ratou, tera râ, a haere ê atu ai ratou, ua ite au e, ua paruparu roa toʼna na turi avae.

Ua tuʻa vau i toʻu rima i niaa i teie nei episekopo no te faaite iaʼna e te paturu nei iaʼna—i te pae tino e i te pae varua. Ua faaurûhia ra vau i te parau iaʼna: “Episekopo, e mea maitai roa, ere anei? E faariro taua ia ratou ei mau Feia Moʻa numera hoê roa no te Mau Mahana Hopea Nei!”

Hiʻo maira oia iaʻu, e ataata maira. Aita i papu iaʻu e ua ata mai oia no te mea ua tiʻa mau iaʼna te mea o taʻu i parau, e aore râ, te manaʻo ra oia e, o te tahi o te mau misionare anaanatae paha vau nei.

Tupu mau atura te oroʻa bapetizoraa, e ua bapetizohia te utuafare taatoa. I te mahana i muri mai, ua opua matou i te haere i te pureraa i roto i taʼna paroita ia ite mata roaʼtu e, e farii- mau-hia teie utuafare ia haere mai ratou i te mau putuputuraa ei mau melo apî no te Ekalesia.

I to te utuafare tomoraa mai i roto i te fare pureraa no te pureraa oroʻa, te parahi râ vau i mua i te terono i pihai iho i te episekopo. E ahu mâ to te metua tane, e mea uouo hoi. E ere râ i te mea aano i ore ai oia i tapitopito i te arapoo o toʼna ahu oomo, e ua tamau atoa mai i toʼna taumu arapoʻa o taʻu i ite i nia i te hoê o taʻu mau misionare. Tera râ, ua anaana mau toʼna hohoʻa mata i te oaoa e te hau. E au ra e, e hohoʻa ê to te metua vahine e to taʼna mau tamahine i taʻu i ite nâ i nanahi ra. E ere to ratou mau ahu i te mea nehenehe roa, tera râ, e mea mâ maitai. Ua puta mai te anaana o te evanelia i nia i to ratou hohoʻa mata. Ua oomo atoa mai na tamaroa naʻinaʻi i te ahu uouo, ua rahi-roa-hia râ i nia ia ratou noaʼtu e, ua firihia te rima ahu i nia. E ua taʻumu atoa mai i te taʻumu arapoʻa tei tautau roa i raro atu i to ratou mau turi avae. E teie mau ahu oomo o te mau ahu ïa o ta te mau misionare i horoʻa no ratou ia nehenehe teie utuafare ia haere mai i te pureraa oroʻa.

Ua parahi ratou i pihai iho i ta ratou mau misionare, e ua anaana te maramarama o te evanelia i nia ia ratou. Teie ta Alama i parau “ua roaa anei ia outou te hohoʻa o te [Atua] i to outou mata” (Alama 5:14). Huri atura vau te parau atu i te episekopo e, “ua ite oe, Episekopo? E faariro taua ia ratou ei mau feia moʻa mau!”

Oia mau, te tauiraa i te pae tino no te hoê ruʻi noa ïa, tei niania-rii-noa ïa ia faaauhia i te tauiraa rahi i te pae varua o tei tupu i teie utuafare a tomo ai te evanelia i roto i to ratou mau aau e i roto i to ratou oraraa. Na roto i te mau haapiiraa a te mau misionare e te faahoaraa tamau a to ratou episekopo e a te mau melo o te paroita, ua punaha mai teie utuafare taatoa mai te poiri varua i roto i te maramarama o te evanelia e te parau mau. E na roto i taua maramarama ra, ua tamahanahanahia teie utuafare, ua faahaumaruhia e ua faaora-faahouhia mai e te hau na roto i te iteraa e, te ora nei te Fatu o Iesu Mesia. Ua faahoihia mai te maramarama o te parau mau o te evanelia i te fenua nei na roto i te Peropheta Iosepha Semita e te haamata nei te reira i te faaite i teie utuafare i te eʻa e arataʻi ia ratou i te hiero, i roto hoê matahiti toe, e farii ratou i to ratou mau haamaitairaa mure ore.

E faahiti faahou atu vau i te papai tohu a Isaia: “E te mau tamarii atoa na oe ra, e haapiihia ïa e Iehova, e e hau rahi to te mau tamarii na oe ra” (Isaia 54:13).

Ia tamata anaʻe tatou i te monamona o te hotu o te hau o te Atua, e titauhia ïa tatou i te faaite i te reira ia vetahi ê. Ua itehia o Francis no Assisi ei “taata here i te mau Poieteraaʼtoa” tei atuatu i roto i toʼna oraraa, te feia veve e te feia riirii—oiaʼtoa te mau animala. Na te hau i roaa iaʼna i roto i te taviniraa i faaitoito iaʼna, e i haapii iaʼna i te ume mai ia vetahi i roto i taua hau ra. Teie o taʼna i papai:

Hau atu i te hoê taime to te Fatu titau uʻanaraa i Taʼna mau pîpî ia riro ei mau “faatupu hau,” ma te fafau mai e e “parauhia ratou i te tamarii na te Atua” (Mataio 5:9). Ua itehia teie manaʻo i roto e rave rahi atu â mau irava o te mau papairaa moʻa, i te faatupuraa i te hoê hohoʻa no te hau mai roto mai i te parabole e i te parau poroʻi:

• “Ia peepee oe i te faaau i te parau i to taata tarahu” (Mataio 5:25).

• “E arohaʼtu i to outou mau enemi” (Mataio 5:44).

• “Eiaha e faaino” (Mataio 7:1).

• “E arohaʼtu oe i to taata-tupu, mai to aroha ia oe iho na” (Mataio 22:39).

• “Eiaha e faahapaʼtu” (Luka 6:37).

• “E faaore atu” (Luka 6:37).

• “E aroha outou ia outou iho” (Ioane 13:34).

Na teie mau haapiiraa o te papairaa moʻa, noaʼtu e te vaira atura e â, o teie noa râ tei iritihia mai no te haapapu e, eita te hau o te Atua e nehenehe ia tapea-noa-hia. Tera râ, ia opere maitehia i to tatou mau utuafare, i to tatou mau hoa, e i roto i to tatou mau oire. Ia operehia i roto i te Ekalesia oiaʼtoa i te feia e ere i te melo no ta tatou nei Ekalesia. Area vetahi e haaati nei ia tatou o tei maiti ia tamata noa i te momona e te hau o te îraa o te evanelia i faahoi-faahou-hia mai no ratou, e mea papu e, e haamaitaihia ratou na roto i te hiʻoraa i roto i to tatou oraraa e ia farii i te hau o te evanelia i pihai iho ia tatou. E tupu te poroʻi o te hau i te rahi, na roto i to tatou hiʻoraa.

“E parahi ma te hau,” o ta te aposetolo Paulo ïa i parau, “e tiʻa ïa te Atua Noʼna te aroha e te hau i rotopu ia outou” (2 Korinetia 13:11).

Te mauruuru nei au i te mea e, e nehenehe au ia faaite papu atu ia outou e o Iesu Mesia te Tamaiti a te Atua, e na roto Iaʼna, i roto i te faaroo e te tiʻaturi, e iteahiaʼi ia tatou paatoa te hau i roto i te aau o ta te evanelia e pûpû mai, mai te au i tei haapiihia mai ia tatou i roto i teie nei amuiraa. Te haapapu nei au i teie mau parau, na roto i te iʻoa o Iesu Mesia, amene.