E hiʻo tatou i te Mesia

E aʻu mau taeae e aʻu mau tuahine here, te hinaaro atoa nei au e faaite i toʻu mauruuru rahi no te ohipa taviniraa faahiahia tei ravehia e te Tuahine Smoot, te Tuahine Jensen, te Tuahine Dew e to ratou apooraa faatere, tei tavini ma te itoito e te maitai i teie pŭpŭ faahiahia o te mau tuahine. E Sotaiete nehenehe teie, e 4.900.000 tuahine te puai. Te feruri nei au e, aita hoê pŭpŭ mai teie te huru e vai nei i roto i te ao nei, e te faatupu nei te reira pŭpŭ i te maitai rahi i niʻa i te oraraa o te mau vahine i te mau vahi atoa ati aʻe te fenua nei. Mauruuru ia outou e teie mau tuahine here, no te ohipa ta outou i rave. Manava ia oe e te Tuahine Parkin e tae noaʼtu i to oe na tauturu, e te apooraa faatere ta outou e maiti.

Te faaoti nei tatou i teie amuiraa rahi i teie taime. Ua oaoa tatou no te mau maa maitai ta tatou i amu i te iri amuraa maa a te Fatu. Ua haapiihia tatou i Toʼna mau haereaa mai te au i Taʼna faanahonahoraa.

E mea tia ia tatou tataitahi ia riro ei mea huru maitai aʻe. Mai te mea e aita, ua faufaa ore ïa to tatou haaputupupuraa mai.

Ia faaoti taʼu aʻoraa e himene mai te pŭpŭ himene:

Teie te huru tano ia vai i roto i to tatou aau a hoʻi atu ai tatou i to tatou mau fare.

Ia pee mai te Varua o te Fatu ia tatou e ia vai tamau noa i pihai iho ia tatou. Aita tatou i ite i te mau mea e tupu i mua ia tatou. Aita tatou i ite i te huru o te mau mahana i mua ia tatou. Te ora nei tatou i roto i te hoê ao papu ore. No te tahi pae e manuïa rahi ratou. No te tahi atu e mea huru fifi paha ïa. No te tahi pae e tupu paha ïa te oaoa, e farii i te tino maitai, e te hoê oraraa faahiahia. No te tahi pae, te tupu paha te maʻi e te oto. Aita tatou i ite. Hoê roa râ mea ta tatou i ite. Mai te fetia i roto i te mau raʻi, e vai noa atoa te Faaora o te ao nei, te Tamaiti a te Atua, ei tutau no to tatou nei oraraa tahuti ore. O oia te mato no to tatou faaoraraa, to tatou puai, to tatou taata tamahanahana, te niu no to tatou faaroo.

I roto i to tatou mau taime oaoa e te oto e hiʻo atu tatou Iaʼna, e tei reira ihoa Oia no te tauturu mai ia tatou.

O oia te tumu no ta tatou haamoriraa. O oia te Tamaiti a te Atua ora, te Matahiapo a te Metua, te Fanau Tahi i te tino nei, o tei vaiiho atu i Toʼna parahiraa teitei ia fanauhiamai i te tahuti nei i roto i te hoê oraraa haehaa roa. I te hoê taime moʻemoʻe rahi te na ô ra oia, “E ana to te alope, e tauraa to te manu i te reva, area te Tamaiti a te taata nei aita oʼna tuaroʻi” (Mataio 8:20). E ua “hamani maitai haere ra” (Te mau Ohipa 10:38).

E taata rave semeio Oia. Ua faatoro atu Oia i Toʼna rima i te feia ati. Ua faaora Oia i te feia maʻi e ua faatia i te feia pohe. E noaʼtu teie mau ohipa maitai Taʼna i afaʻi mai i roto i te ao nei, “ua inoinohia Oia; ua oto Oia, … e ua farii i te oto rahi,” e ua inoinohia Oia (Isaia 53:3).

E hiʻo tatou i Toʼna here rahi ma te parau mai ta Isaia i parau:

“Ua rave Oia i to tatou paaruparu, e ua hopoi ê i to tatou oto… .

“… Ua paruparu Oia no ta tatou nei hara, ua taʻirihia Oia no ta tatou nei ino, tei nia iaʼna te hau, e no Toʼna taʻiriraahia i ora ai tatou nei” (Isaia 53:4–5).

I te tupuraa te aroraa rahi i te ao varua, ua tia mai Lucifero, te Tamaiti no te Poipoi, e ua patoʻihia taʼna opuaraa. No te here o to tatou Metua i te Ao ra ia tatou, Taʼna mau tamarii, ua tuuhia maira te hoê opuaraa maitai atu ia vai to tatou tiamâraa no te maiti i to tatou eʻa. Ua faaite mai te Tamaiti Matahiapo, to tatou ïa tuana, i Taʼna opuaraa. E farii te taata i to ratou tiamâraa. E haere te taata i toʼna haerea, e hara oia, e topa oia. Area râ ua horoa mai te Tamaiti a te Atua Iaʼna iho ei tusia taraehara no ta tatou mau hara. E farii Oia i te mamae rahi, e e riro Oia ei Taraehara, ei Faaora no te ao nei.

Noaʼtu te itiraa o te iteraa no nia i teie ô faahiahia mau, ua farii tatou i taua horoarara no te faaoraraa ma te piʻo atu i mua Iaʼna.

Te vai nei e rave rahi mau faahaparaa i nia i te Ekalesia. Te parau nei te mau taata e aita tatou i tiaturi i te Mesia ‘mau’. Aita teie mau taata i ite i ta ratou e parau ra. Aita to tatou faaroo e to tatou ite i faatumuhia i nia i te mau peu tahito a to tatou mau tupuna, te mau tiaturiraa ïa no roto mai i te mau tatararaa e te mau aparauraa a te mau taata no nia i te Mesia o tei tia-faahou-hia. Ua farii tatou i to tatou faaroo e to tatou iteraa papu na roto i te iteraa papu o te hoê peropheta i teie anotau hopea nei o tei ite mata atu i te Atua e i Taʼna Tamaiti here, te Fatu o tei tia faahou mai. Ua paraparau mai Raua iaʼna. Ua paraparau atu oia ia Raua. Ua faaite papu oia i te orama o taʼna i ite. E orama teie no nia i te Mana Hope e te Taraehara o te ao nei. Na roto i taua ite ra, o tei faatumuhia i nia i te heheuraa, “no reira te haapii nei tatou no nia i te Mesia, te oaoa nei i roto i te Mesia, te aʻo nei no nia i te Mesia, e te tohu nei no nia i te Mesia, e te papai nei mai te au i te mau parau tohu no nia i te Mesia ia tia ia tatou e ta tatou mau tamarii ia ite i te tumu no te faaoreraa hara” (2 Nephi 25:26) mai ta Nephi i parau.

E no reira, e aʻu mau taeae e aʻu mau tuahine, hou a taaêe ai tatou no hoê tau, te faaite faahou atu nei matou i to matou iteraa papu aueue ore e te vai maite. Te faaite atu nei matou tataitahi i te reira na roto i te hoê ite papu e te tauiui ore. Mai taʻu i parau atu na e rave rahi taime, e o taʻu e parau faahou atu nei i teie nei, ua ite au e, te ora nei te Atua to tatou Metua Mure ore. Oia te Atua rahi no te ao atoa nei. Oia te Metua no to tatou mau varua, e e nehenehe ta tatou e paraparau iaʼna na roto i te pure.

Ua ite au e, o Iesu Mesia Taʻna Tamaiti Fanau Tahi, te Faaora o to te ao nei, oia tei horoʻa i Toʻna ora ia noaa ia tatou te ora mure ore, e oia hoi te aratai e te faatere i pihaiiho i Toʼna Metua. Ua ite au e, e na taata taaê Raua te tahi e te tahi, ua hoê râ Raua i roto i te hohoʻa e te ohipa e te opuaraa. Ua ite au e, te ohipa a te Manahope o “te faatupu ïa i te tahuti ore e te ora mure ore o te taata nei” (Mose 1:39). Ua ite au e, e peropheta o Iosepha Semita, te Peropheta rahi no teie tau tuuraa na roto hoi iaʻna i tae mai ai teie mau parau mau. Ua ite au e, teie Ekalesia, e ohipa ïa na te Atua, tei faaterehia e tei arataihia e Iesu Mesia, tei topahia hoi i toʻna ra iʻoa moʻa.

Te faaite papu nei au i teie mau mea ma te hanahana e te horoʻa atu nei au i toʻu here e taʻu haamaitairaa ia outou e toʻu mau hoa here, na roto i te iʻoa o Iesu Mesia ra, amene. Ei ia outou na te Atua e tae noaʼtu i te tau e farerei faahou ai tatou.