Ia vai mâ noa te taata no te faaohipa i te autahuʻaraa

E toʻu mau taeae here e, aue ia te mauruuru rahi e te manaʻonaʻo i te paraparau atu ia outou. Aue hoi te rahi no te autaeaeraa e vai nei i rotopu ia tatou e mau nei i te authauʻaraa nehenehe e te faufaa rahi. No o mai hoi te reira i te Atua to tatou Metua Here i te Ao ra o tei, i roto i teie tuuraa tau hanahana, e Taʼna Tamaiti Herehia i te paraparau faahouraa mai mai nia mai i te mau raʻi. Ua tono mai raua i to raua mau tavini no te tuu mai i teie mana hanahana i nia i te taata nei.

Ua riro te vai maraa o te taata ei titauraa no te farii e no te faaohipa i teie mana moʻa. O te reira taʻu e hinaaro nei e paraparau atu i teie pô.

E haamata vau na roto i te taiʻoraa mai roto mai i te buka no Te Mau Parau Haapiiraa e te Mau Parau Fafau tuhaa 121.

“I te mea e ua haamau-roa-hiaʼtu te mau tiʻaraa no te autahuʻaraa i te mau mana no te raʻi ra e …te mau mana no te raʻi ra e ore roa atoa hoi e faaohipahia maori rana roto i te parau tumu no te paarau-tiʻa ra.

“Parau mau ia, e tiʻa ia ia horoʻahia mai teie mau mea nei i nia ia tatou nei; tera ra ia tamata tatou i te tapoi mai i ta tatou mau hara, e aore ra ia haamauruuru i to tatou teoteo, to tatou opuaraa hahavai ra e aore ra ia faatere e aore ra ia hau e aore ra ia haavi atu i te mau varua o te tamarii a te taata nei, i roto i te hoê vahi iti aʻe o te parautiʻa ore ra, inaha, e faananaue atu te mau raʻi ia ratou iho; e oto te Varua o te Fatu; e ia iritiehiaʼtu te reira, ua Amene te autahuʻaraa, oia hoi te mana, no te reira taata” (PH&PF 121:36–37).

O tera te auraa no te parau a te Fatu no nia i Toʼna mana hanahana. Aue te faufaa rahi no te hopoia i tuuhia i nia ia tatou tataitahi. O tatou o te mau nei i te authuʻaraa o te Atua titauhia tatou ia tiʻa i nia aʻe i te mau eʻa o te ao nei. Ia haapaari tatou ia tatou iho. Eita tatou e riro mai ei mau taata parau-tiʻa roa, e nehenehe ra tatou ia riro mai ei mau taata tiʻaraa hanahana.

Ia riro to tatou mau huru i mua i te taata ei hiʻoraa hapa ore. E mea faufaa roa ia faaite i te huru hapa ore. Ia tuea i nia i te faanahoraa ta te Fatu i haamau. Eita e tano ia tatou ia farii i te hara, e ia tamata i te vaiiho noa e ia tamata i te tapoi i ta tatou mau hara. Eita tatou e nehenehe e haapopou i to tatou teoteo. Eita roa e nehenehe ia tatou ia rave i te mau mea parautiʻa ore. Eita roa ta tatou e nehenehe e faatere, e aore ra ia hau, e aore ra ia haavi atu i ta tatou mau vahine e aore ra i te mau tamarii, e aore ra i te tahi atu mau pueraa i roto i te hoê vahi iti aʻe o te parau-tiʻa ore ra.

Mai te mea e rave noaʼtu tatou i te hoê o teie mau mea nei e iritiehia te mau mana o te raʻi. E oto te Varua o te Fatu. E ore roa te viretu o to tatou autahuʻaraa. E ore te mana.

Te huru o to tatou oraraa, te mau parau o ta tatou e parau, to tatou huru i te mau mahana atoa e mau mea faufaa anae no tatou te mau taeae e te mau tamaroa e mau nei i te autahuʻaraa.

Te na o ra te Hiroa Faaro 5: “Te tiʻaturi nei matou e, hou te taata e aʻo ai i te Evanelia e hou oia e faatere ai i te mau oroʻa no te reira, e mea tiʻa iaʼna ia maitihia e te Atua na roto i te tohu e te tuuraa rima o te feia i haamanahia.”

Noaʼtu e ua tuu te feia i hamanahia i to ratou rima i nia i to tatou mau upoo e ua faatoroahia tatou, e nehenehe tatou e ere i te mana no te faaohipa i teie mana hanahana na roto i to tatou mau huru parautiʻa ore.

Te na o faahou ra te tuhaa 121: “E ore roa e nehenehe e e ore roa hoi e tiʻa ia haamauhia te hoê mana e aore ra te hoê vahi iti aʻe no te tura na roto i te authuʻaraa, maori ra na roto i te taparuraa, na roto i te faaoromai noaraa, na roto i te maru e te haehaa, e na roto hoi i te here mau ra;

“Na roto i te aroha, e te ite ateate ra, o te faarahi roa i te varua ma te faahua ore, e ma te haavare ore i roto i toʼna aau” (PH&PF 121:42).

I teie nei, e te mau taeae, o tera te mau mea e titauhia i teie autahuʻaraa ia imi i toʼna tanoraa. E ere te reira mai te hoê uati o ta tatou e amo e aore ra e tatara mai ta tatou e hinaaronoa. O te hoê ra, mai te mea e faaohipa parautiʻahia te reira, o te ahu mai ia o to tatou mau tino, ei tuhaa no tatou i te mau taime atoa e i roto i te mau faanahonahoraa atoa.

E no reira, o outou te feia apî tamaroa e mau nei i te Autahuʻaraa a Aarona, ua horoʻahia i nia ia outou tera mana o te mau ra i te mau taviri no te utuuturaa o te mau melahi. A rave na i te hoê taime no te feruri.

Eita outou e nehenehe e rave i te hoê mea o te tuu i te hoê paruru i rotopu ia outou e te utuuturaa o te mau melahi.

Eita outou e nehenehe ia riro ei feia viivii i te hoê noa aʻe faito. Eita outou e nehenehe ia riro ei feia haavare. Eita outou e nehenehe e eia, e aore ra e haavare, eita outou e nehenehe e parau faufaa ore noa i te iʻoa o te Atua e aore ra e faaohipa i te paarau ino e a mau noa ia i te tiʻaraa no te utuuturaa o te mau melahi.

Aita vau e hinaaro nei ia outou ia riro ei feia parautiʻa. Te hinaaro nei au ia outou ia riro ei taata, ia (î) i te oraraa, e ia puai, e ia oaoa. O outou i roto i te mau faaetaetaraa tino, te hinaaro nei au ia riro outou ei mau maona maitai e ia tutava ia riro ei mau aito. Teie ra ia rave outou i te reira, eiaha outou e faaino ia outou e aore ra te haaviiviiraa e aore ra te parauraa i te parau ino.

Ia outou e te feia apî tamaroa o te hiʻo ra no te haere i te misioni, eiaha roa e haarumaruma i to outou mau oraraa i te hoê noa aʻe mea o te faatupu i te fifi i nia i to outou tiʻamaraa no te haere i mua ei mau tavini no te Fatu.

Eiaha roa outou, eita roa outou e nehenehe ia haafifi i teie mana hanahana o ta outou e mau nei ei mau orometua no te evanelia.

Ei faaararaa, e ei faaara faahouraa ua haamau te Peresideniraa Matamua e te Pupu o te Tino Ahuru ma Piti Aposetolo i te faahitiraa parau i muri nei na outou:

“Ei mau misionare, te titauraa ia outou ia haapaʻo i te mau tiʻaraa maitai roa, tae noaʼtu i te haapaʻo maiteraa i te ture no te viivii ore, …

“Eiaha roa outou e faaea outou anae iho i te hoê vahi e te hoê atu, tane e aore ra vahine anei, taata paari e aore ra e tamarii [maoti ra i to outou ra mau hoa i faataahia].

“Tae noaʼtu i te mau pariraa haavare no te hoê misionare hapa ore titauhia e rave rahi mau avaʻe no te titorotoro e nehenehe hoi i te tapeʻahia e aore ra i te faaotihia te taviniraa a te misionare. Paruru ia outou mai roto mai i taua mau faahaparaa ma te oreraa outou e faaatea ia outou i to outou mau hoa raq, tae noaʼtu i roto i te mau utuafare o ta outou e haere atu e farerei” (First Presidency statement on missionary conduct, 22 Mar. 2002).

Eita outou e haapeapea no nia i teie mau mea mai te mea e haapaʻo outou i te mau taime atoa i te mau ture no te taviniraa misionare. Ia na reira outou, e roaa ia ia outou i te faahiahiaraa o ta outou ohipa e e hoi outou i to outou utuafare na roto i te hanahana ma te tafetafeta ore e aore ra faahapahia e aore ra ma te aau tatarahapa.

Ia hoʻi anae outou i to outou fare eiaha roa ia moʻehia ia outou e Elder outou no te Ekalesia a Iesu Mesia i te Feia Moʻa i te Mau Mahana Hopea Nei.

E riro outou i te imi i te hoê hoa faaipoipo no teie tau e amuri noaʼtu. E hinaaro e faaipoipo i roto i te fare o te Fatu. No outou, aita atu ia e titauraa hau atu. A haapaʻo maitai, eiaha outou e haafaufaa ore i to outou faaipoiporaa. Ia oaoa outou. A haapaʻo maitai i te faahoaraa ia vai ma noa te reira. Ua horoʻa te Fatu i te hoê parau e te hoê fafauraa. Ua parau oia e, “ia faaunauna noa te taiata ore i to outou mau feruriraa.” I muri mai i reira te fafauraa e “ei reira to outou tiʻaturiraa e puai roa ai i mua i te aro no te Atua; e … e riro te Varua Maiatai ei apiti no outou i te mau taime atoa” (PH&PF 121:45–46).

Te vahine faaipoipo o ta outou e maiti e aifaito noa e outou iho. Ua parau o Paulo, “Aita ra te tane i taa e i te vahine, aita atoa te vahine i taa ê i te tane i te Fatu nei” (1 Korinetia 11:11).

I roto i te oraraa faaipoipo aita e hiʻoraa nainai e aore ra e hiʻoraa teitei. Eita te vahine e haere na mua i te tane, aita atoa te tane e haere na mua i te vahine. E haere apipiti noa raua ei tamaroa e ei tamahine na te Atua i roto i te haereʻa mure ore.

E ere te vahine i te tavini, e ere atoa i te faaueueraa, e aore ra i te tahi atu faanahoraa mai te reira te huru.

Aue te peapea e te au ore i te hamani inoraa i te vahine. Te tane atoa i roto i teie Ekalesia o te hamani ino i taʼna vahine, o te haafaufaa ore iaʼna, o te parau ino iaʼna, o te faaohipa i te faatereraa faahepo i niaiho iaʼna aita ia oia e nehenehe ia mau i te autahuʻaraa. Noaʼtu e ua faatoroʻahia oia, e iritihia te mau raʻi mai iaʼna ra, e oto te Varua o te Fatu, e amene te mana o te autahuʻaraa o tere taata.

Te taata noaʼtu e rave i teie huru e ere ia oia i te mea tiʻama ia mau i te hoê parau faatiʻa no te hiero.

Te oto nei au i te parau atu e te ite nei au i te rahiraa o teie mau peu iino. Te vai nei te mau taata o te faaino nei i ta ratou mau vahine, na roto anei i te parau e aore ra na roto i te taparahiraa. Aue ia te peapea i te hoê taata ia haafaufaa ore i te metua vahine o taʼna mau tamarii.

E parau mau e te vai nei te tahi mau vahine o te hamani ino atoa nei i ta ratou tane. Aita ra vau e parau ra no ratou i teie nei pô. Te paraparau nei au i te mau tane no teie Ekalesia, te mau tane o te Mana Hope i tuu i Toʼna autahuʻaraa moʻa.

E toʻu mau taeae, mai te mea i roto i taʻu mau parau i parau atu e te ite ra outou i roto i reira te parau nei au ia outou ia tatarahapa. A tuturi i raro e ani i te Fatu ia faaore mai i ta outou hapa. A pure Iaʼna ia roaa ia outou i te puai no te faatere i to outou arero e to outou rima teimaha. A ani i te tatarahaparaa i ta outou mau vahine e i ta outou mau tamarii. Ua faauruhia te Peresideni McKay i te parau, “Aita e manuiaraa e nehenehe e faahoona i te manui oreraa i roto i te utuafare” (faahitiraa a J. E. McCulloch, Home: The Savior of Civilization [1924], 42; i roto Conference Report, eperera 1935, 116). E ua parau atoa te Peresideni Lee, “ Te vahi faufaa roa o te ohipa a te Fatu o ta outou e rave, o te ohipa ia, o ta outou e rave i roto i te mau papai o to outou utuafare” (Harold B. Lee, Doing the Right Things for the Right Reasons, Brigham Young University Speeches of the Year [19 Apr. 1961], 5).

Ua papu iaʻu e ia tiʻa anae tatou i mua i te aro o te Atua, e mea iti roa te parau no auhuneraa o to tatou oraraa, e aore ra te mau tiʻaraa hanahana o ta tatou paha i mau. Te vaira te mau uiraa no nia i to tatou mau huru i te utuafare. Ua papu iaʻu e o ratou o tei haere ma te here e te tura i roto i to ratou oraraa e te mauruuru no to ratou hoa faaipoipo e te mau tamarii e farii ia ratou i te mau parau mai to tatou mai haava i te mau parau, “Ua tiʻa roa, e teie nei tavini maitai … e haere oe i roto i te oroa oaoaraa a te Fatu” (Mataio 25:21).

E faahiti au i te tahi atu huru hamani inoraa. Oia hoi i te feia ruau. Te manaʻo nei au e aita te reira i matauhia i rotopu ia tatou. Te tiʻaturi nei au i te reira. Te pure nei au e aita ihoa te reira i rotopu ia tatou.

Te tiʻaturi nei i nia i to tatou mau taata, faatata i te taatoʻaraa, te haapaʻo nei i te faaueraa tahito ra: “E faaturaʼtu i to metua tane, e to metua vahine, ia haamaorohia to oe pue mahana i te fenua ta te Atua ia Iehova i horoʻa no oe” (Exodo 20:12).

Teie râ, aue ia i te peapea, e te au ore i te hamani-ino-raa i te feia ruau.

Te roa noa tura to tatou oraraa i teie nei, mauruuru i te mau semeio no te ihi iti apî e te rapaauraa maʻi i teie nei tau. Teie ra no te feia ruau te vai nei te fifi i te pae tino te paruparu o te tino, te pae no te feruriraa. Ua parau aena vau i te reira e ua ite au e mea rahi te ohipa o te titauhia ia rave no tera feia matahiti paari. Ua mauruuru roa ino vau no te here e te haapaʻo maitai a to tatou mau tamarii i to ratou metua vahine e to ratou metua tane. Aue te nehenehe no te hohoʻa o te hoê tamaiti e aore ra o te hoê tamahine o te haere nei e tauturu mai te taime ore e na roto i te here i te metua paari.

I teie nei te hinaaro nei au i te parau i te tahi atu hamani inoraa o tei faaitehia i roto i te mau veʻa. O te hamani inoraa a te diabolo o te mau tamarii na te feia paari, te mau tane ihoa ra. E ere tera mau hamani inoraa i te mea apî. Te vai nei te mau faaiteraa e mai tahito mau a te reira. E ohipa ino roa te reira. Te peapea nei au i te parau atu e te vai nei tera peu ino i rotopu ia tatou e ere ra i te mea rahi. O te hoê mea te reira o te ore e nehenehe ia fariihia. Ua parau te Fatu iho: “Area ra te faaturori i te hoê i teie nei mau taata rii i faaroo iaʻu nei e huru maitai aʻe oia ia taamuhia te hoê ofai mure i nia i taʼna aʻi e ia hurihia i raro i te moana” (Mataio 18:6).

Tera te reo puai roa no roto mai i te Arii no te Hau, te Tamaiti a te Atua.

E faahiti atu vau mai roto atu i te Buka Haamaraamaramaraa a te Ekalesia: “Te tiʻaraa o te Ekalesia no nia i te hamani-ino-raa eita roaʼtu te reira huru ohipa e fariihia. O ratou o te hamani ino nei…e tuuhia ratou i mua i te apooraa faatitiaifaroraa a te Ekalesia. Eiaha ratou ia mau i te mau piiraa eiaha atoa i te hoê parau faatiʻa no te hiero. Te hoê taata o tei hamani ino i te hoê tamarii na roto i te taotoraa e aore ra te hamani inoraa i te tino noaʼtu e ua tuuhia i mua i te aro o te apooraa faatitiʻaifaroraa a te Ekalesia e i muri mai ua faahoihia toʼna tiʻaraa melo na roto i te bapetizoraa, eiaha roa te feia faatere e pii i tera taata i te hoê noa aʻe tiʻaraa e ohipa e te mau tamarii e aore ra i te feia apî maoti ra na te Peresideniraa Matamua e faatiʻa na roto i te tatararaa i te papairaa i niaiho i toʼna parau meloraa.

“I roto i te hamani inoraa, te hopoia matamua a te Ekalesia o te tauturu ia i te feia o tei hamani inohia e ia paruru ia ratou eiaha hoi ratou ia topa i roto i te hamani inoraa faahou” (Buka 1: Te mau Peresideniraa Tĭtĭ e te mau Episekoporaa [1998], 157–58).

Ua ohipa maoro matou i nia i teie fifi. Ua faaue matou i te mau episekoporaa, i te mau peresideni tĭtĭ, e te tahi atu ia farerei i te feia i hamani inohia, no te tamahanahana ia ratou, no te haapuai ia aratou, no te faaite ia ratou e te mea i tupu e mea hape ia, e ere na ratou te hape, e eiaha hoi te reira ia tupu faahou.

Ua neneihia te mau parau, ua haamauhia te hoê reni niuniu i reira te feia faatere e nehenehe ai e farii i te tauturu no te hiʻoraa i teie mau fifi, e ia tauturu ia ratou na roto atu i te Pŭ Ohipa a te Ekalesia.

E mau hara taparahi taata teie mau peu. Mea faautuʻahia i ta te ture. Te vai nei te feia aravihi no te reira mai te mau paruru ture, te feia rave ohipa totiare no te tauturu i te mau episekopo e te mau peresideni tĭtĭ no nia i teie mau hopoia. O ratou i roto i te tahi atu mau hau e mea tiʻa ratou ia pii atu i to ratou mau peresideni area.

I teie nei te ohipa a te Ekalesia o te hoê ia ohipa no te faaoraraa. O te hoê ohipa no te faaoraraa i te mau varua. Te hinaaro nei tatou ia tauturu i te taata i hamani inohia e te taata i rave i te reira. To tatou aau tei te feia i hamani inohia, e mea titauhia tatou ia tauturu i te feia i hamani inohia. Oia ataoa i te feia o tei rave i te reira tera ra eita e nehenehe ia tatou ia farii i te hara o taʼna i rave. I te vahi o taʼna i ofati e faautuʻahia oia. E mea na reira atoa te ture tivira. E ohipa te faatereraa a te Ekalesia i taʼna faanahoraa, te rahiraa o te taime maoti ra te huriraa i rapae i te Ekalesia. E ohipa fifi roa e te peapea.

Noaʼtu ra, te ite nei tatou e ia ite ihoa tatou, e ia hope te faautuʻaraa e ua hope te faanahoraa a te ture, te vai nei ia te tahi rima no te tauturu e no te aroha atu. Eita e ore e vai a te mau taotiʻaraa, teie ra te vai atoa ara te aroha.

I teie nei e toʻu mau taeae, ia manaʻo vau e mea teimaha paha toʻu reo. Aita vau i hinaaro ia na reira. Teie ra te hinaaro nei au ia parau i te hoê reo faaara i te autahuʻaraa o teie nei Ekalesia i roto i te ao taatoa nei.

Ua tuu mai te Atua i nia iho ia tatou i te hoê horoʻa faufaa roa e te popou. Te amoraa i te mana no te faatere i te Ekalesia, e i roto i taʼna mau ohipa, ia parau na roto i te mana no te iʻoa o te Fatu o Iesu Mesia, ia rave mai te tavini mau Noʼna ra, no te haamaitai i te taata maʻi, no te haamaitai i to tatou mau utuafare e rave rahi atu mau taata. Ia riro ei arataʻi no te ora i to tatou mau oraraa. i roto i toʼna iraa, e te mana hau atu i muri mai i te paruru no te pohe e i roto i te mau tau e amuri noaʼtu o te vaira i mua.

Aita atu e mea e tiʻa i te reira taoʻa. A tapea matai i te reira, a poihere, a here e a ora i te hoê oraraa mâ no te faaohipa i te reira.

“Oia atoa to outou maramarama, ia anaana ia i mua i te taata nei, ia hiʻo ratou i ta outou parau maitai, e ia haamaitai i to outou Metua i te Ao ra” (Mataio 5:16), o taʻu ia pure haehaa a vaiiho atu ai au i taʻu haamaitairaa i nia ia outou e toʻu here, na roto i te iʻoa o Iesu Mesia ra, amene.