Te ora mure ore na roto ia Iesu Mesia

Fatata e piti tauatini matahiti i mairi aʻe nei, e taata apî, e taoʻa rahi hoi taʼna, tei ui atu i te hoê uiraa faufaa rahi roa i te Faaora: “E te Orometua maitai ra, eaha taʻu ohipa maitai e rave e noaaʼi te ora mure ore iaʻu?” (Mataio 19:16).

Ia “faaroo” mai râ oia i te mau haapiiraa a te Faaora, e i Taʼna titauraa marû ia “haere mai a pee mai iaʻu,” (Mataio 19:21) “haere ê atura ma te oto: e taoʻa rahi hoi taʼna” (Mataio 19:22).

Te vahi peʻapeʻa, oia hoi, e rave rahi milioni taata i te ao nei i teie mahana, te tamau nei â ratou i te haafaufaa e i te maiti “i te mau taoʻa o te fenua nei” hau atu i “te mau taoʻa no te tau mure ore” (PH&PF 38:39), ma te ite ore, e aore râ, ma te ore e maramarama maitai e, “O tei noaa i te ora mure ore ra, ua faufaahia ïa”(PH&PF 6:7; haapapuraa apitihiaʼtu), e te ora mure, o te horoʻa hau aʻe te reira i te mau horoʻa atoa a te Atua i te taata nei (a hi‘o PH&PF 14:7). E faaohie noa tatou i te parau e, te ora mure ore o te oraraa ïa e a muri noaʼtu ei utuafare i mua i te aro o te Atua (a hiʻo PH&PF 132:19–20, 24, 55).

I roto i Taʼna pure arai, ua horoʻa te Faaora i te mau taata atoa i te taviri e noaa ai ia ratou te ora mure ore, “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai” (Ioane 17:3).

Tera râ, nahea te taata e ite ai i te Atua mau?

Ua pahono te Faaora e: “O vau te eʻa, e te parau mau, e te ora: aore roa e taata e tae i te Metua ra, maori râ ei iaʻu” (Ioane 14:6).

Te faaite papu nei au e, te raveʻa hoê roa e tiʻa ai ia tatou e i te mau taata atoa, ia haere mai i to tatou Metua i te Ao ra, e ia ite Iaʼna, e ia noaa te ora mure ore, ia haere mai ïa ratou i te Fatu ra ia Iesu Mesia, e ia ite Iaʼna.

Tera râ, o vai o Iesu Mesia, e haere ai tatou Iaʼna ra e ia ite hoi Iaʼna? Aitaʼtu e faaiteraa poto e te puai e te nehenehe hoi taʻu i ite no niʻa i te huru e te ohipa a te Fatu Iesu Mesia maori râ, te faaiteraa a te Peresideniraa Matamua e a te Pŭpŭ no te Tino Ahuru Ma Piti, tei parauhia “Te Mesia Ora: Te iteraa papu o te mau Aposetolo,” o taʻu e faahiti atu:

“O [Iesu Mesia] taua Iehova Teitei roa o te Faufaa Tahito e te Mesia o te Faufaa Apî. I raro aʻe i te arataʻiraa a Toʼna Metua, Oia tei hamani i te fenua … .

“… Ua horoʻa Oia i Toʼna ora no te faaore i te mau hara a te taata nei … .

“… Oia te Fanau Tahi a te Metua i te ao ra, te Tamaiti Hoê roa i roto i te tino, te Faaora o to te ao nei.

“Ua tiʻa mai Oia mai roto mai i te menema ia ‘riro ei matamua no te feia i mairi i te taoto ra’ (1 Korinetia 15:20). Ei Fatu tei tiʻafaahou mai, … ua haere Oia i rotopu i Taʼna ‘mau mamoe ê atu’ (Ioane 10:16) i te Fenua America i tahito ra… . Ua fâ mai Oia e Toʼna Metua i te tamaiti ra ia Iosepha Semita, te haamataraa ïa o te tohu maoro e, ‘ia tae i te tuuraa parau i te hoperaa mau o te mau tau ra’ (Ephesia 1:10)… .

“… Ua faahoihia mai Toʼna autahuʻaraa e Taʼna Ekalesia i niʻa i te fenua nei—‘patuhia i niʻa iho i te niu o … te mau aposetolo e te mau peropheta, e o Iesu Mesia iho te tihi rahi’ (Ephesia 2:20).

“… E hoʻi mai Oia i te hoê mahana i niʻa i te fenua nei … e e faatere Oia ei Arii no te mau Arii e e parahi mai ei Fatu no te mau Fatu … E tiʻa tatou tataitahi ia haavahia e aʼna… .

“[Te faaite papu nei] Taʼna mau Aposetolo i faatoroʻa-mau-hia e, O Iesu te Mesia Ora, te Tamaiti tahuti ore a te Atua. Oia te Arii rahi Emanuela … o Oia te maramarama, te ora, e te tiʻaturiraa o to te ao nei” (Liahona, eperera 2000, 2–3).

E mea nehenehe roa e e mea faufaa rahi atoa ia ite e, o vai te Fatu Iesu Mesia.

Tera râ, te faaite papu faahou nei au e, te raveʻa hoê roa e tiʻa ai ia tatou e i te mau taata atoa, ia haere mai i to tatou Metua i te Ao ra, e ia ite Iaʼna, e ia noaa te ora mure ore, ia haere mai ïa ratou i te Fatu ra ia Iesu Mesia, e ia ite Iaʼna.

Eaha te auraa no te parau ra, ia ite i te Fatu ia Iesu Mesia, e nahea tatou e ite ai Iaʼna?

Ua pahono te Faaora e, “… ua afaro te uputa, e ua pirihao te eʻa o te arataʻi atu i te faateiteiraa e te haere-noa-raa o te mau ora, e aita rea o te ite mai i te reira, no te mea e ore outou e farii mai iaʻu i roto i te ao nei e aore hoi outou i ite mai iaʻu nei. Tera râ, mai te mea e farii mai outou iaʻu nei i roto i te ao nei, ei reira outou e ite mai ai iaʻu nei” (PH&PF 132:22–23).

E tiʻa anei ia tatou ia haroaroa hope maitai i Taʼna mau parau? “Mai te mea e farii mai outou iaʻu nei,”—te Iehova Teitei roa, te Mesia, tei hamani i te fenua nei, te Faaora e te taraehara o to te ao nei, te Tamaiti tahuti ore a te Atua—“Mai te mea e farii mai outou iaʻu nei … , ei reira outou e ite mai ai iaʻu nei” (PH&PF 132:23; haapapuraa apitihiaʼtu).

No te ite i te Fatu ia Iesu Mesia, e mea tiʻa ia tatou e i te mau taata atoa, ia farii Iaʼna. E no te farii Iaʼna, e mea tiʻa ia tatou ia farii i Taʼna mau tavini (a hiʻo Mataio 10:40; PH&PF 1:38; 68:8–9; 84:36; 112:20).

No te farii Iaʼna, e mea tiʻa ia tatou ia farii i te îraa o Taʼna evanelia, Taʼna fafauraa mure ore, oia te mau parau mau atoa, oia hoi, te mau ture, te mau fafauraa, e te mau oroʻa e titauhia no te taata nei no te hoʻi faahou i mua i te Atua (a hiʻo PH&PF 39:11; 45:9; 66:2; 76:40–43; 132:12; 133:57).

No te farii Iaʼna, e mea tiʻa i te mau tamaiti haapaʻo a te Atua ia farii i Toʼna autahuʻaraa, e ia faarahi i to ratou piiraa (PH&PF 84:33–35).

Tera râ, i te hopea roa, no te farii Iaʼna e ia Ite Iaʼna, e mea tiʻa ia tatou e i te mau taata atoa, mai ta Moroni i aʻo ra, “ia haere mai i te Mesia ia maitai roa outou Iaʼna” (Moroni 10:32; haapapuraa apitihiaʼtu). E tiʻa atoa ia parau e, e mea tiʻa ia tatou ia haere mai i te Mesia e ia tutava “ia riro” mai Iaʼna ra te huru (a hiʻo Dallin H. Oaks, “Te titauraa ia riro,” Liahona, tenuare 2001, 40–43).

Ua parau te Fatu tei Tiafaahou e: “Eaha to outou huru e au ai? Amene, e parau atu vau ia outou, Mai toʻu nei ïa” (3 Nephi 27:27). Te auraa no te parau ra e au ai, mai tei faaohipahia i roto i Taʼna uiraa ra, “Eaha to outou huru e au ai?” e mea faufaa rahi ïa no te haroaroa i Taʼna pahonoraa, “Mai toʻu nei ïa.” Te auraa no te parau ra, e au ai, maori râ, “e mea faufaa” e aore râ, “ia tapeahia e aore râ, ia ruuruuhia i roto i te ohipa, e aore râ, i te titauraa morare” (a hiʻo Luka 24:26), na teie e faaite e—te haapapu atoa ra te mau papaʻiraa moʻa no mutaa ra e no teie anotau e—“e mea faufaa,”e ua “ruuruuhia” hoi tatou, mai te au i te fafauraa, “ia riro” mai Taʼna i parau ra, “Mai toʻu nei ïa” (3 Nephi 27:27; a hiʻo atoa 3 Nephi 12:48; Mataio 5:48; 1 Ioane 3:2; Moroni 7:48).

O taʻu teie pure oia hoi, “… E tae vave mai te tau e parare ai te ite i te Faaora i roto i te mau nunaa atoa, e te mau opu atoa, e te mau reo atoa, e te mau fenua atoa” (Mosia 3:20; a hiʻo atoa Mose 7: 62; Isaia 11:9), e te feia atoa e hinaaro, a farii Iaʼna, oia te Fatu ia Iesu Mesia, e ia Ite Iaʼna, ia nehenehe ia ratou ia haere mai i to tatou Metua i te Ao ra, e ia Ite Iaʼna, e ia noaa te ora mure ore, i te iʻoa o Iesu Mesia ra, amene.