Te mau hautiraa tuaro no te tau toʻetoʻe no te feia huma i roto miti

I te 7 no mati ra, ua tiʻa te Peresideniraa Matamua e te mau melo no te Pŭpŭ no te Tino Ahuru Ma Piti Aposetolo i mua i te fare piha toroʻa rahi a te ekalesia no te opere-atoa-raa i te ama auahi no te mau hautiraa tuaro no te feia huma. I niʻa i te mau eʻa, te Peresideniraa Matamua tei farii i te ama auahi i te rima o te vahine faahoro ra o Carrie Snoddy no Park City mai, i Utah. Ua horoʻa’tu oia i te reira i te Peresideni James E. Faust, tauturu piti i roto i te Peresideniraa Matamua, tei horoʻa’tu i te Peresideni Thomas S. Monson, tauturu matamua i roto i te peresideniraa Matamua, o tei horoʻa-roa’tu i te Peresideni Gordon B. Hinckley.

I reira, ua faateitei te Peresideni Hinckley i te ama auahi ia itehia mai e te feia mataʻitaʻi. “Maeva, maeva, i te mau hautiraa tuaro no te feia huma, i teie mau maʻona tei hau i te faahiahia!” o ta’na ïa i parau. “A haere i mua! Ia manuïa i te hororaa! A titau i te reva! A oaoa, a oaoa. Te paturu nei matou ia outou. Te faaitoito atu nei matou ia outou. Te hinaaro nei matou ia manuïa outou, e te tiʻaturi nei matou e, e taime maitai e te maere e te au hoʻi no outou atoa o te haa atu. Ia upootiʻa râ outou pauroa. Nana!”

Ua horoʻa’tu te peresideni Hinckley i te ama auahi ia Margaret Stocks no te paroita Piti o Brigham City, no te tĭtĭ o Box Elder no Brigham City Utah, e nana ïa i faahoro atu.

I rotopu i teie 1.000 maʻona no na fenua e 36 i amui mai no teie mau hautiraa tuaro no te tau toʻetoʻe 2002 no te feia huma i Roto Miti, e piti ïa na melo no te mau mahana hopea nei. O Lacey Heward, 22 matahiti no te paroita no Mount Mahogany, no te tĭtĭ Highland Utah East, ua aro mai oia i te 11 e te 14 no mati, e ua manuïa mai e piti fetiʻa veo i roto i te faaheeraa na te mau vahine.

18 anaʻe avaʻe to te tuahine o Heward i pepe ai oia i roto i te hoê ati pereoo i roohia ai oia i teie ati huma. area râ, aita te reira i faataupupu i ta’na opuaraa ia “riro vau ei mea maitai aʻe.”

“Ua haa puai noa vau ia tapae iho â i niʻa i teie reni,” o ta’na ïa i parau. “Ua oaoa vau i te tae raa mai i ô nei, e te itoito nei hoʻi i te aro i ô e ia manuïa hoʻi.”

Ua hauti atoa o Keith Barney, melo no te paroita 11 no Alpine, no te tĭtĭ Alpine no Utah, i roto i te hororaa 5 kilometera e no te faahee parahi. E taahi atoa oia i te pereoo taataahi i roto i te pŭpŭ a te Huma Melo no te Fenua Marite.

I te 14raa o te matahiti o te taeaʻe Barney, ua hapepa to’na na avae na roto i te hoê ati pereoo. I teie mahana te rave nei oia i te ohipa i roto i te pû no te faahauti-faahou-raa i te melo no te Pû Utuuturaa no te Fare Haapiiraa Tuatoru no Utah. E orometua haapii oia i te mau huma nahea ia ora maitai, e nahea ia faahotu i te oraraa.

Ei faahauraa no te mau maʻona Olympique tei neneʻihia’tu i roto i te Liahona o te avaʻe tiunu 2002, na Quinn Wheeler 28 matahiti, melo no te paroita Taylorsville 39, no te tĭtĭ Taylorsville Utah South e tataʻu no te mau motu no Vierges aihuaraau no te Fenua Marite ei melo i roto i ta ratou pŭpŭ Olympique Bobsleigh no te tau toʻetoʻe. Ua maiti o te taeaʻe i teie tuaro i te tau oia a haere ai i te Fare Haapiiraa Tuarua e mea na reira oia i te haamatauraa i te mau melo no teie pŭpŭ no te mau Motu Vierges mai a rave ai oia i te ohipa i St. Thomas i te afa o te matahiti 2000. Ua faaò atu oia i roto i teie pŭpŭ o tei manaʻohia e e haere teie pŭpŭ i mua.