Teie haerea ta tatou e parau nei o te oraraa

E te mau taeae, ua oaoa roa vau i te tia atu i mua ia outou i teie mahana. Te hinaaro nei au e paraparau atu i te feia apî tane no te Autahuʻaraa a Aarona. Ua here au ia outou e te hinaaro nei ia manuia outou paatoa.

I roto i te buka iti ra No te Puai o te Feia Apî tei faaapîhia, te parau ra te Peresideniraa Matamua ia outou: “E te mau feia apî tamaroa … te tiaturi rahi nei matou ia outou. E mau varua maʻiti-mau-hia outou tei fanauhia i teie nei anotau. Ua rau te mau haamaitairaa e vai ra no outou, tera râ ua rau atoa te mau faahemaraa e vai nei. Tei te omuaraa hoi outou no to outou haerea i teie oraraa tahuti nei. Na te mau faaotiraa ta outou e rave i teie nei e faataa mai eaha te tupu i muri mai i to outou oraraa e i te tau amuri atu” [buka iti, 2001].

E mea maitai, ahiri e i teie mahana, e tia ia outou ia farii mai i toʻu ite tei roaa iaʻu i roto fatata roa 70 matahiti i te maoro i te pee-noa-raa i te eʻa no te oraraa nei. Ua parau aʻena paha to outou mau metua e aore ra metua tupuna ia outou i te parau paari ra: “Ia ruau outou, te oioi atoa ia te taime i te mairi.” E au ra e, hoe taime e 12 matahiti paari to oe, e mea rahi roa te taime e vai ra i mua i to oe oraraa e i te taime i muri iho, ua fatata roa oe i te raeaʻehia e 70 matahiti i te paari, e ua rahi te opu!

E mea fifi roa noʻu i te tiaturi e ua mairi fatata 13 matahiti mai te taime hopea toʻu aʻoraaʼtu i roto i te Amuiraa Rahi no te Autahuʻaraa. I taua taime ra, ua faatiaʼtu vau i te mau taeae i te aamu no niʻa i te hoe taime toʻu faahororaa i te pereoo taataahi na muri i taʻu mau tamarii tamaroa, e toʻu raveraa mai i te parau tumu no te faufaa rahi no te faaineine-maitai-raa no te pee i te eʻa no te oraraa nei.

I teie mahana, te hinaaro nei au e aparau atu no niʻa i te tahi atu eʻa taʻu i rave, e e horoaʼtu vau i te mau ite i roaa mai iaʻu no roto mai i te reira.

Aita i maoro aʻenei, ua faaoti te tahi mau melo no toʻu utuafare e e mea arearea ahiri e e faahoro matou i te pereoo taataahi mai te oire ra no Bozeman, Montana e haere tia atu i te oire ra no Jackson Hole, Wyoming i te fenua Marite nei. No te ratere e 225 maile i te atea, e pau ia e toru mahana i te afa i te maoro, e e tere atu ia matou na niʻa i te mouʻa teitei ra no Wyoming o te faataa e ra i te taheraa pape i te Moana no Patitifa e i to te Atlantique. Ua faaoti aʻera matou e e mea maitai roa ia tere matou na niʻa i teie mau mouʻa i te mau mahana maitatai, i reira ia matou e au roa ai i te mataitai atu i te natura ta te Atua i hamani.

I muri mai i te faanahonaho-maitai-raa i teie tere pereoo taataahi, ua faahoro atura e piti o taʻu na tamarii tamaroa e ta maua hoe tamahine e o vau i to matou pereoo taataahi e tae atu i te vahi puhaparaa no te po matamua i Big sky, Montana. E mea maitai roa te mahana i taua poipoi ra. Area râ, a taahi noa ai matou, ua tae mai aʻera te mau ata poiri, ua topa te ‘ua, e te pape paari, e e mea heehee roa, e mea toʻetoʻe, e e mea ino roa te vero. A hope ai taua mahana matamua ra e a tae atu ai matou i te vahi puhaparaa matamua, ua haamanaʻo aʻera vau e tia atoa i te oraraa nei i te riro mai taua mahana ra te huru. Auaʻe ra ua faaineine maite matou no te mau huru mahana atoa. Ahiri e aita matou i faaineine, ua fifi ia matou i te faaoti i to matou tere faahoro pereoo taataahi i taua mahana matamua ra. I te mau otiʻa atoa no te eʻa no te oraraa nei, e mea tia roa ia ia tatou ia faaineine maitai no te tau maitai e no te tau hepohepo atoa hoi, te tau fifi rahi mau no te oraraa nei.

Te mau huru ta outou e rave faaoti i to outou vai-apî-raa, e nehenehe i te reira e apee ia outou i roto i te toea no to outou oraraa. Na roto i te raveraa i te mau faaotiraa tano i teie nei, e tia ia outou ia pee i te eʻa o te tauturu ia outou ia faaoromaʻi i te mau taime toʻetoʻe e te ino roa no te oraraa.

Mai teie te huru, mai te peu e ua matau outou i te faahiti i te parau ino, te rahi outou i te faahiti i te reira, te fifi atoa ia outou i te taui e i te faaea i te faaohipa i te reira. E mea maitai aʻe ia maiti outou i te tahi atu eʻa, oia hoi te hoe eʻa o te aratai i te manaʻo ma, te parau e te ohipa ma maitai, ia tia hoi ia outou ia farii i te auhoaraa a te Varua Maitai. A hiʻo na i te fifi rahi no te rave i te hoe tau misionare e ia o mai te parau ino i roto i to outou upoo i te taime e hinaaro ai outou i te Varua ei hoa tamau no outou. Ahiri e e peu matauhia e outou i te faahiti i te parau ino, o teie nei ia te taime no te taui.

I te piti o te mahana, ua faahoro atura matou i te pereoo taataahi i West Yellowstone. Ua tere maitai te mau mea atoa—te pereoo taataahi, ua maha maitai te rohirohi o to matou mau avae, e ua tere atura matou i te piti o te vahi puhaparaa. I reira toʻu feruriraa e ahiri e aita matou e haapao maitai, e nehenehe i te hoe faahemaraa e tupu mai a moʻe ai ia matou i te feruri e i te haamauruuru i te Metua i te Ao ra no to matou nei oaoa. Eiaha roa e na reira.

Ua na ô mai te Peropheta Iosepha Semita: “O te oaoa te opuaraa e te tumu no to tatou nei oraraa; e te reira atoa hoi te hopea, mai te mea e e pee tatou i te eʻa o te aratai atu i te reira; e teie nei eʻa, o te parau-tia ia, te faaroo, te moʻaraa, e te haapaoraa i te mau faaueraa atoa a te Atua” (Teachings of the Prophet Joseph Smith, haaputuhia Joseph Fielding Smith [1976], 255–56).

Ua î roa i roto i te Buka a Moromona te aamu o te mau feia tei haamaitihia e te Fatu e i muri iho mai ua faaahaha ratou ia ratou iho no te mau mea tei ravehia e ratou. E i te pae hopea i roto i to ratou teʻoteʻo, ua faarue atu ratou i te eʻa, ua pau ia ratou a faarue ai ratou i te parau mau. A haapapu ia ore outou e riro mai te ati Nephi ra te huru; a haamanaʻo tamau noa no hea mai to outou mau haamaitairaa.

I te mahana toru no to matou faahororaa i te pereoo taataahi, ua ite aʻera vau e noaʼtu e taʻuma tatou i niʻa i te tahi mau aivi i roto i to tatou mau oraraa, na ta tatou mau peu matauhia ra e faataa mai nahea tatou i te pahono atu i mua i taua mau fifi ra. I taua mahana ra, ua tere atu matou na niʻa i te mouʻa teitei ra no Wyoming o te faataa e ra i te taheraa pape i te Moana no Patitifa e i to te Atlantique e toru taime i taua mahana ra, e 4800 e tae atu e 8300 avae i te teitei. No te faataʻumaraa i teie mau mouʻa teitei, e mea titauhia ia afaro maitai to oe huru. Hoe a atoa i te oraraa nei. Na roto i te faaotiraa i te mau opuaraa tano no te oraraa nei e te pee-maitai-raa i te reira e roaa mai ai te haaviraa ia tatou iho. Oia mau, noaʼtu e e mea fifi roa teie tere na niʻa i te mouʻa, aita ra vau i faaea no te mea ua faaea noa vau i niʻa i taʻu opuaraa.

E te mau feia apî tane no te Autahuʻaraa a Aarona, te poroʻi atu nei au ia outou ia rave faaoti i te tahi mau opuaraa no outou iho, oia hoi mai te faaoti-roa-raa i ta outou haapiiraa seminare, te rave-faaoti-raa i ta outou tau misionare, te rave-faaoti-raa i ta outou mau tau haapiiraa, e te vai-tiama-raa no te faaipoiporaa hiero. I to outou nei matahiti paari, e au ra e e mau opuaraa rahi roa teie no te rave, tera râ mai te mea e haamata outou i te taʻuma i teie nei, e ineine roa ia outou i te rave manuia i te reira.

E piti na matahiti i mairi aʻenei, ua haere maua te Taeae Richard G. Scott, e melo no te Pŭpŭ Tino Ahuru e Ma Piti Apoetolo, i te medebara no Quetico i Ontario, Canada. Ua taʻitaʻi maua i te vaa e taua mau maa no te haereraa e hoe i te vaa i tera Roto Pape e tera Roto Pape. A tapae atu ai maua i te afaraa no te hoe tere, ua tupu mai te hoe vero rahi roa, e ua taui te huru no te pape, ua opaopa noa to maua nei vaa.

Ua titauhia aʻera maua ia rave i te hoe faaotiraa. E tamata anei maua i te hoe noa i te vaa e tae roaʼtu i te vahi ta maua e opua ra i te tapae atu e aore ra e hoe atu nei ra maua i ta maua vaa i te motu piri roa mai ia maua, e i reira hoi e tiai ai e tae roa ua maru te vero. E mea ohie i teie nei no te ite eaha te faaotiraa tano no te rave, area râ i taua taime ra e ere ia i te mea ohie. Ahiri e e hoe noaʼtu maua i te vaa, peneiaʻe paha e tapae atu maua i te vahi i opuahia maua i te haere atu. Ahiri e e faataere maua i to maua tere, e taere roa ia maua, e e roohia maua i te poiri o te po. A feruri ai maua nahea ra maua, ua o mai te manaʻo ia haere oioi atu maua i te motu ra. A na reira ai maua, ua tupu faahou mai te hoe vero apî. Ahiri maua i hoe noa i te vaa, e mea papu ua ati roa maua i te pohe.

I roto i te tahuti nei, te titauhia nei tatou ia rave i te tahi mau faaotiraa rahi roa, e na te reira e faaoti mai i to tatou huru no te pae varua no te tau i muri mai iho. Te faaitoito atu nei au ia outou ia vai tiama no te titau i te Varua ia tauturu mai ia outou ia rave i te faaotiraa tano.

I roto i te Buka a Moromona, te parau mau nei o Nephi ia tatou: “Ia na reira outou, tei niʻa ia outou i teie nei eʻa titiaifaro e te pirihao e tae roa atu ai i te ora mure ore ra; oia ia, ua na te uputa outou i te o mai; ua rave maite outou mai tei au i te mau faaue a te Metua e te Tamaiti atoa; ua noaa mai hoi ia outou te Varua Maitai” (2 Nephi 31:18).

A faahope ai toʻu utuafare i teie tere e 225 maile i te atea na niʻa i te pereoo taataahi, ua itehia mai ia matou e noaʼtu i te fifi rahi o teie nei eʻa no te oraraa nei, te vai ra te oaoa rahi mau i te pae hopea no te feia o te haapao i te mau faaueraa e o te faaoromaʻi e tae roaʼtu i te hopea.

Outou te feia apî tane no te Autahuʻaraa a Aarona, te mau nei outou i te hopoia no te tamau noa i niʻa i te eʻa haere tia atu i te ora mure ore. Oia mau, e taʻuma outou i niʻa e e topa mai i raro. Te vai ra te mau mahana e mea huru fifi roa te oraraa. Tera râ ia faaea outou i niʻa i te eʻa titiaifaro, e haamaitairaa rahi ia to te pae hopea no te oraraa o te tiai mai ra ia outou.

Te na ô faahou ra te parau papai a te Peresideniraa Matamua i roto i te buka ra, No te Puai o te Feia Apî: “Ia vai mâ noa to outou mau feruriraa e te tino i te mau ino no te ao nei, ia tia hoi ia outou ia rave i te ohipa e vai nei i mua ia outou. Te pure nei matou ia vai tiama outou no te haapao i te mau hopoia no te paturaa i te basileia o te Atua e no te faaineineraa i te ao nei no te Tae-Piti-Raa mai o te Faaora” (api, 3).

E toʻu mau hoa apî nei, a ite na outou i te faufaa no te haapaoraa i te parau faaue a to tatou mau Peropheta, i reira hoi e roaa ai te oaoa ia outou i roto i te eʻa no te oraraa nei.

Teie ia toʻu iteraa papu na roto i te iʻoa o Iesu Mesia, amene.