E pee au ia Oe

E au mau taeae e tuahine here e, ma te haehaa mau e te mauuruuru rahi, te ti’a nei au i teie vahi mo’a. Ei tamaiti iti i paari i Raymond, Alberta, fenua Canada, ua au roa vau ia himene matou i te mau taime atoa: “E pee au ia Oe” (a hi’o Te mau Himene, no. 165). Taua mau ta’o râ o ta matou i himene i te mau taime atoa i roto i te pureraa oro’a e aore râ i te Haapiiraa Sabati, ua faa-ama ïa i te hiaai i roto i to’u aau e i to’u varua e, e haere noa vau i te vahi ta te Fatu e tono ia’u, e e parau hoi i Ta’na e hinaaro ia’u ia parau—“E pee au ia oe” e te Fatu e. E tano taua faaauraa râ ia faahiti faahouhia i teie mahana.

Te tupu nei to’u aau mehara no te patururaa i tupu inanahi nei, e ma te aau rotahi e o outou na, te paturu nei au ia Peresideni Gordon B. Hinckley, e ia Peresideni Monson raua Peresideni Faust, e tae noa’tu ia Peresideni Packer e na tino Hoê Ahuru Ma Piti ei mau peropheta, ei mau hi’o e ei mau heheu parau. Te faaite papu mau nei au e, e mau peropheta ratou, e mau hi’o e e mau heheu parau.

Ua here au i te Fatu. Ua here au i teie Ekalesia. Ua here au i te Feia Mo’a maitai e te haapao maitai na te ao nei o te faaitoito nei i te auraroraa i ta ratou mau fafauraa e i te oraraa i ta ratou haapaoraa-faaroo. Te faaite nei au i to’u iteraa papu e, te ora nei te Atua, e Ta’na Tamaiti o Iesu Mesia, o to tatou ïa Faaora e Taraehara. Ua here au Ia’na. Te hinaaro nei au ma to’u puai atoa e tavini mai Ia’na e hinaaro ia’u ia tavini, e te faaite nei au i teie mau parau e i to’u iteraa papu no te parau mau o teie mau mea i te i’oa o Iesu Mesia râ, amene.