Ko ha Taʻahine Faitotonu Naʻe Ui ko ʻEma
Ko e hā hano lahi hoʻo ʻilo ki he kiʻi taʻahine faitotonu naʻe tupu hake ʻo hoko ko e uaifi ʻo e Palōfita ko Siosefa Sāmitá?
Naʻe fāʻeleʻi ʻa ʻEma Heili ʻi he ʻaho 10 ʻo Siulai 1804. Naʻe nofo mo ʻene tangataʻeikí mo ʻene fineʻeikí pea mo hono ngaahi tuongaʻané mo e ngaahi tokoua ʻe toko valú ʻi ha faama. Naʻe ʻi ai hono ngaahi mehikitanga, faʻē-tangata, pea mo ha niʻihi ʻo kinautolu naʻá ne tokoua mo tuongaʻane ʻakí naʻa nau nofo ofi mai pē.
Naʻe tuʻu ʻa e faama ʻa e fāmili Heilí ʻi Hāmoni ʻi Penisilivēnia, ʻi ha teleʻa fakaʻofoʻofa he veʻe kauvai ʻo e Vaitafe Sesikuehaná. Naʻe lava ʻa ʻEma ʻo toli ʻāpele ʻi he ngoue fuaʻi ʻakaú. Naʻá ne faʻa siofi e vaʻinga ʻa e fanga lamí, pea naʻe lava ʻo tokoni ʻi hono tānaki ʻa e vesitapoló mei he ngoue ʻanga lahí. Ko e taimi naʻe kamata ai ke vaia ʻa e sinoú, naʻá ne faʻa siofi hono tānaki heʻene tamaí ʻa e huhuaʻi māpelé ki he loto kané. Naʻe tokoni ki heʻene faʻeé ʻi hono haka ʻo e huhuaʻi māpelé kae ʻoua kuo hoko ko e suka.
Naʻe papitaiso ʻa ʻEma ʻi heʻene kei pēpeé, ki ha siasi faka-Kalisitiane, pea ʻalu ki he Lautohi Faka-Sāpaté ʻi heʻene lahi haké. Naʻe teʻeki ke fokotuʻu ʻa e Siasi ia ʻo Sīsū Kalaisí he taimi ko iá.
ʻI ha ʻaho ʻe taha ʻi he taʻu valu nai ʻo ʻEmá, naʻe ʻalu ai ke lotu ʻi he vao ʻakaú. Naʻe hohaʻa ki heʻene tamaí he naʻe ʻikai ke ne maʻu ha tui mālohi kia Sīsū Kalaisi. Lolotonga e lotu ʻa ʻEmá, ne haʻu ʻene tangataʻeikí ki he vao ʻakaú ke ʻalu ʻo tuli manu. ʻI he taimi naʻe fanongo ai ki hono lotua ia ʻe hono ʻofefine kei siʻí, naʻe ongo ʻaupito kiate ia. Naʻe fakamālohia ai ʻene tui ki he ʻEikí.
Naʻe tupu ʻa ʻEma ʻo hoko ko ha taʻahine palōloa pea mo poto. Naʻe hoko ko ha taha poto ʻaupito ʻi he laukongá pea mo e tohí. ʻI hono taʻu 21, naʻe haʻu ai ha talavou poto mo ngāue mālohi naʻe ui ko Siosefa Sāmita ke nofo ʻi he ʻapi ʻo e fāmili Heilí. Naʻe ʻulungāanga lelei ʻa ʻEma mo ʻatamai vave. Ko ha finemui anga-maʻa ia. Pea tā neʻineʻi ke ne fili mo Siosefa ke na hoko ko e husepāniti mo e uaifí!