ʻE fakamafola ʻa e World Report, ko ha polokalama ongoongo ʻoku kau e Siasí hono faʻú ʻo fakamatalaʻi ai e ngaahi meʻa lalahi kuo hoko ʻi he Siasí ʻi he māhina ʻe ono kuohilí, ʻi ha lea fakafonua ʻe 19 ʻi he ʻaho Tokonaki ko hono 2 ʻo ʻOkatopá mo e Sāpate ko hono 3 ʻo ʻOkatopá, ʻi he taimi mālōlō ʻo e ngaahi fakatahaʻanga konifelenisi lahí ʻi he polokalama satelaite tatau pē. Ko e feituʻu ko ia ʻoku ʻikai maʻu ai ʻa e polokalamá ʻi he lea fakafonua ʻo e feituʻu ko iá, ʻe fakamafola atu ia ki ai ʻi he lea faka-Pilitāniá. ʻE lava foki ke maʻu atu ʻa e The World Report ʻi ha DVD mei he ngaahi senitā tufakiʻanga nāunaú pe maʻu fakahangatonu atu mei he ʻinitanetí ʻi he lds.org/videos mo e newsroom.lds.org.

ʻE lava ke mamataʻi ʻe he Kāingalotu ʻo e Siasí ʻi he funga ʻo e māmaní ʻoku nau lava ʻo fehokotaki ki he ʻInitanetí, ʻa e ngaahi fakamafola ʻa e Siasí mei he ngaahi taʻu ki muʻa angé. ʻE maʻu ʻe kinautolu ʻoku vakai ki he tuʻasila ʻInitaneti ʻa e Siasí ki he ngaahi fakamafolá, lds.org/broadcast, ha ngaahi polokalama kuo tauhi ai ʻo kau ai e ngaahi konifelenisi lahí, ngaahi fakataha lahi ʻa e Fineʻofá, ngaahi faeasaiti ʻa e Potungāue Ako ʻa e Siasí, ngaahi fakataha lotu faka-Kilisimasi ʻa e Kau Palesitenisī ʻUluakí pea mo ha ngaahi polokalama kehe pē. ʻI he taimi ní, kuo pau ke fakaʻaongaʻi pē ʻa e lea faka-Pilitāniá ke te hū holo ʻaki he uepi saiti ko ʻení, ka ko e konga lahi ʻo e ngaahi lea mo e vitiō ʻoku maʻu aí, ʻe lava ke maʻu ia ʻi ha ngaahi lea fakafonua kehekehe.

Kuo fakahoko ʻe he Laipeli Hisitōlia Fakafāmilí ha ngaahi kalasi fekumi fakafāmili ʻe valu ke fai fakahangatonu ʻi he ʻInitanetí ʻi he tuʻasila familysearch.org (lomiʻi ʻi he Free Online Classes). ʻOku ʻi ai ha ngaahi lēsoni kehekehe ʻe fai ʻi he ngaahi kalasi ko ʻení, ʻi he fōtunga ʻo e vitoó pe pdf, ʻa ia ʻoku akoʻi ai ha ngaahi meʻa tukupau fekauʻaki mo e fekumi ʻi he hisitōlia fakafāmilí ʻi ha ngaahi fonua hangē ko ʻIngilani, Siamane, ʻAilani, ʻĪtali, Mekisikou, Lūsia pea mo e ʻIunaiteti Siteití. ʻOku ʻi ai ha ngaahi kalasi ʻe fitu ʻe ala maʻu atu ia ʻi he lea faka-Pilitāniá pea taha ʻi he lea faka-Sipeiní. ʻE toki tānaki atu mo ha ngaahi lea fakafonua kehe ʻi he kahaʻú.

Ne kau atu e kau finemui ʻo e Kolo Katamanatú ʻi he Misiona Niu Teli ʻi ʻInitiá, ki heʻenau fuofua polokalama Kamataʻanga Foʻoú ʻi ʻEpeleli ʻo e 2010. Naʻe ʻi ai ha kau finemui ʻe toko nima mo ʻenau faʻeé pea pehē ki he kau palesitenisī fakakoló, pea naʻe fai ai ʻe he palesiteni ʻo e Kau Finemuí mo ha kau taki kehe ʻo e toʻu tupú ha ngaahi akonaki fakalaumālie. Naʻe akoʻi ki he kau finemuí ʻa e polokalama Fakalakalaka Fakatāutahá, lavaʻi ʻa ʻenau ngaahi taumuʻá ʻi he tokoni ʻa honau ngaahi fāmilí pea mo hono mahuʻinga ke langaki hake mo fakamālohia ʻenau ngaahi fakamoʻoni fakatāutahá.