Ko ha Lēsoni mei ha Puha Ika Sioʻata

Naʻe ʻilo ʻe ha mēmipa ʻo ʻemau kau pīsopelikí ʻoku ʻi ai ha kiʻi puha sioʻata tauhiʻanga ika ʻeku kiʻi taʻahine taʻu hivá peá ne ʻeke mai ai ʻi ha ʻaho ʻe taha pe te ne fie maʻu ha toe fanga kiʻi ika. Naʻe ō hono fāmilí ʻo ʻeva mālōlō pea ne nau fie maʻu ke huaʻi ʻenau puha sioʻata tauhiʻanga iká. Naʻe tali vave ʻa e fokotuʻu ko ʻení, pea naʻe kau ʻi he fanga ika naʻe ʻomaí ha kiʻi ika naʻe feitama, ʻo fiefia ai ʻeku kiʻi taʻahiné.

ʻI heʻemau foki mai mei he lotú ʻi ha hoʻatā ʻe taha, ne fakahoko ʻe heʻeku kiʻi taʻahiné ʻene vakaiʻi angamaheni ʻo e puha ika sioʻatá ke fakapapauʻi ʻoku fiefia mo moʻui lelei ʻa e kiʻi ika kotoa pē. Naʻe ʻohovale ʻi haʻane fakatokangaʻi ha fanga kiʻi ika iiki foʻou ʻe fā naʻe toki fāʻeleʻi. Kuo kamata fāʻele ʻa e faʻē ʻa e iká. Naʻe ngāue fakavavevave leva ʻo ne toʻo ʻa e fanga kiʻi ika īkí ki ha puha malu ke ne maluʻi ai kinautolu mei he fanga ika lalahi mo houtamakí. Neongo ia, lolotonga ʻene fiefiá, ne mole ai ha kiʻi ika valevale ʻe taha. ʻI heʻene tangi mo loto mamahí, ne toki ʻilo ʻe heʻeku kiʻi taʻahiné ʻoku tokoto ʻi ha fanga kiʻi makamaka ʻi he takele ʻo e puha ika sioʻatá. Naʻe feinga ke ne ohuʻi hake ki heʻene kiʻi puha malú, ka naʻe ʻikai ke ne toe lava ʻo ueʻi ʻa e kiʻi ika valevalé taʻe-fakalaveaʻi ia.

Naʻe maʻu kotoa ʻa e fanga kiʻi ʻuhikiʻi ika ko ʻeé, pea neongo naʻe fonu ʻa e puha malú ʻi he fanga kiʻi ika foʻoú, ka naʻe kei nofo pē e tokanga ʻeku kiʻi taʻahiné ʻi he kiʻi ika naʻe ʻi he vahavahaʻa ʻo e fanga kiʻi makamaká. Naʻe tangutu ʻo teu pē ke tokoniʻi ia ki he puhá ʻi ha taimi pē ʻe ngaue ai. Naʻe aʻu ʻo ʻikai ke toe fie maʻu meʻatokoni efiafi ia ʻi heʻene tangutu tokanga ʻi heʻene veʻe puha ika sioʻatá ʻi ha meimei houa nai ʻe fā.

ʻI heʻeku vakai ki aí, ne ongo kiate au ha meʻa ou angamaheni ki ai. Naʻá ku fakakaukau ki he Tauhi Sipi Leleí, ʻa ia ʻokú Ne tuku ʻEne toko hivangofulu mā hivá kae kumi ʻa e taha naʻe molé (vakai, Luke 15:3–8; Sione 10:11–14). ʻOku tau ʻiloʻi kotoa ʻa e ongoʻi mole pe faingataʻaʻiá pe puke fakalaumālié. Ka ʻoku ʻikai teitei foʻi hotau Fakamoʻuí. ʻOkú Ne ʻi ai maʻu pē mo ha toʻukupu ʻoku mafao mai, ʻo mateuteu mo loto ke fakahaofi, fakamālohia, pea mo tāpuakiʻi kitautolu.

Neongo he ʻikai ke tau fakatokangaʻi maʻu pē, ka ʻoku ʻafioʻi moʻoni kitautolu ʻe heʻetau Tamai Hēvaní mo hotau Fakamoʻui ko Sīsū Kalaisí ʻi he pō mo e ʻaho kotoa, ʻo hohaʻa lahi ki hotau tuʻungá pea mo e ngaahi hala ʻoku tau fili ke fononga aí. ʻI he ʻofa taʻe-fakangatangatá, ʻokú Na fakatukupāʻi ʻEna kau ʻāngeló fekauʻaki mo kitautolu, ʻo tatali ke tau tātānaki ha ivi pea mo ha tui feʻunga ke maʻu ha malu pea mo ha nonga ʻi Hona toʻukupú.

ʻI he konga ki mui ʻo e ʻaho ko iá ne iku fiemālie ʻeku kiʻi taʻahiné. Hili e ngaahi houa lōloa ʻo ʻene tatali mo ʻamanakí, ne faifai pea ngaungaue hake ʻa e kiʻi iká pea lele mai ki tuʻa mei he fanga kiʻi maká. Naʻá ne ʻave fakalelei leva ia ki he nonga pea mo e malu ʻo e kiʻi puha malú. Ko ha fakamoʻoni feʻunga ia kiate au ki he mālohi tuʻuloa ʻo e ʻofá.