Ko Hono Fakahaofi ʻe Sihova ʻa e Tokotaha Angatonu ko Tanielá

Naʻe mamata ʻa Taniela ki he peleti meʻakai ʻi muʻa ʻiate iá pea mo e uaine naʻe ʻi heʻene ipú. Naʻá ne ʻiloʻi ʻoku ʻikai ko e meʻakai fakatupu moʻui lelei ia naʻe finangalo ʻa Sihova ke ne kaí. Naʻe ʻikai ke ne kai ia.

Naʻe ʻikai foki ke kai ʻe he ngaahi kaungāmeʻa ʻo Tanielá—ʻe Setaleki, Mēsake, pea mo ʻApitenikō —ʻa e meʻakai ʻa e tuʻí. Naʻe puke pōpula ʻa e kau tangata Hepeluú ni ʻi Selusalema ʻo ʻave ki he kolo ko Pāpiloné. Kuo fie maʻu ʻeni ʻe he Tuʻi ko Nepukanesá ke nau kai ʻa e meʻakai ngakó pea mo e uainé. Naʻe fakakaukau ia te nau mālohi ai

Ka naʻe ʻilo ʻe Taniela mo hono ngaahi kaungāmeʻá he ʻikai ʻai ʻe he meʻakai ʻa e tuʻí ke nau moʻui lelei mo mālohi. Naʻe pehē ai ʻe Taniela ki he tamaioʻeiki ʻa e tuʻí, “Ke ke tuku kiate kimautolu ʻa e sepo ke mau kai, mo e vai ke mau inu. Pea tuku ke vakai ki homau matá ʻi he hili ʻa e ʻaho ʻe 10, pea mo e mata ʻo e fānau ʻoku nau kai ʻa e tufakanga ʻo e meʻakai ʻa e tuʻí.” Naʻe loto ki ai ʻa e tamaioʻeikí.

Ko e ʻaho kotoa pē, naʻe ʻomi ʻe he tamaioʻeikí ki he kau tangatá ni ʻe toko fā ha sepo, ko ha meʻakai naʻe ngaohi mei he tengaʻi ʻakaú pea mo e kēlení. Pea naʻá ne ʻomi ha vai ke nau inu, kae ʻikai ko ha uaine. Hili ha ʻaho ʻe 10, ne fotu moʻui lelei ange ʻa e kau talavoú ni ʻi ha toe taha nofo pōpula, pea ʻikai leva toe kole ʻe he tamaioʻeikí ke nau kai ʻa e meʻakai ʻa e tuʻí.

ʻI he tupu hake ʻa Tanielá, ne tāpuekina ia ʻe Sihova ʻaki ʻa e ʻiló pea mo e potó. Naʻe falala ʻa e Tuʻi ko Nepukanesá kia Taniela ʻo ne kole faleʻi meiate ia.

ʻI he taimi naʻe hoko ai ʻa e Tuʻi ko Talaiasí ko e tuʻi ʻo Pāpiloné, naʻá ne ʻai ʻa Taniela ke hoko ko ha palesiteni ʻi hono puleʻangá. Naʻe meheka ha kau tangata ʻe niʻihi ʻia Taniela. Naʻa nau ʻilo naʻe lotu tuʻo tolu ʻa Taniela ʻi he ʻaho ki he Tamai Hēvaní. Naʻe fakalotoʻi ʻe he kau tangata meheká ʻa e tuʻí ke ne fokotuʻu ha lao foʻou. Ka ʻi ai ha taha ʻe maʻu ʻoku lotu kuo pau ke tuku ia ki ha ʻana naʻe tauhi ai ha fanga laione fekai.

Naʻe ʻilo ʻe he tokotaha angatonu ko Tanielá ʻa e laó ni, ka naʻe kei lotu pē ia ʻi he ʻaho kotoa pē. Naʻe tatali ʻa e kau tangatá ʻi tuʻa ʻo fakaongoongo. ʻI he taimi naʻa nau fanongo ai ʻoku lotu ʻa Tanielá, ne nau fakatovave atu leva ki he tuʻí.

Naʻe faingataʻaʻia ʻa e Tuʻi ko Talaiasí ʻi he taimi naʻe fakamatala ange ai e kau tangatá ʻo fekauʻaki mo Tanielá. Naʻe fakaʻamu ia pehē ange mai naʻe ʻikai ke fakamoʻoni ʻi he laó, ka kuo pau ke talangofua ki he laó. Naʻe lī ai ʻa Taniela ki he ʻana ʻo e fanga laioné, pea tāpuni ʻaki e hūʻangá ha fuʻu maka lahi.

ʻI he pō ko iá, naʻe taʻe-manonga mo fifili pē ʻa e tuʻí. ʻI he hengihengi hono hokó, naʻe fakavavevave atu ki he ʻana ʻo e fanga laioné. Ne ui leʻo lahi atu leva ʻa e tuʻí, “ ʻE Taniela, [naʻe lava ho ʻOtuá ʻo] fakahaofi koe mei he fanga laioné?”

Naʻá ne fanongo fiefia atu ki he tali mai ʻa Taniela mei he loto ʻaná, “Kuo fekau ʻe hoku ʻOtuá ʻa ʻene ʻāngeló, pea kuo tāpuni ʻa e ngutu ʻo e fanga laioné, ke ʻoua naʻa nau fakamamahiʻi au.”

Ne ʻoatu fiefia ʻe he tuʻí ki he puleʻangá hono kotoa ha fanongonongo. Ko e ʻOtua ʻo Tanielá ʻa e ʻOtua moʻuí, pea kuó Ne fakahaofi ʻa Taniela mei he fanga laioné.